|
|
 التمباك واثره الصحي والاجتماعي ****و راي البنت شنو في الولد البسف تمباك !!!
|
اولا عشان ناس الهند ما يقولوا مهاجر شمتان فينا وهو متين خلي التمباك
حقيقة تجربة عشتها وما لاقيته منها
اولا واحدة زميلتي بعد فترة كدا قالت لي( والله كنت معجبة بيك اعجاب ما عادي لكن من ما عرفتك بتسف نسيت كل حاجة وحمد الله ما صارحتك؟؟ واكلتها في حناني .. ما طلعتها الا اليوم
سبب تركي التمباك
كنت ذاهب الي المنزل من محطة القطار وهي قريبة جدا من منزلي لكن يوجد كبري عالي شوية لازم اعدي من عندوا
عندها شميت لي شوية دعاش وقلت اديها سفة مظبوتة..ودنكلتها وبعدها اصبت بالم في صدري بصورة غريبة..لكن الحمد لله خفت شوية وطلعت السفة وحلفت ما اسف تاني والحمد لله.
يوجد اشخاص لا يضعون اعتبار للنساء عموما .. الواحد يسف ويتف في ان واحد امامهم ولا يهموا
رايكم شنو في الشخص البسف تمباك
ايضا السادة الاطباء نرجو مدنا بالمعلومات والامراض المترتبة من تعاطي التمباك
عندنا الحريم الكبار لما يجيها وجع ضرس تخت ليها سفة ومن ديك وعييك .. وتبقي عادة عندهن
تحت تحت عرفت انوا عندنا بنات شباب بسفوا وفي جامعة مرموقة تخيلوا
هيا لنري ارائكم
|
|
 
|
|
|
|
|
|
|
 Re: التمباك واثره الصحي والاجتماعي ****و راي البنت شنو في الولد البسف تمباك !!! (Re: مهاجر)
|
الأورام الحميدة والخبيثة تحت سقف الحلق
نسبة الاورام الحميدة والخبيثة تحت سقف الحلق والحنجرة نسبتها اصبحت عالية في السودان ولكن مقارنة بالدول العربية والاوروبية تعتبر نسبة قليلة جدا.
ü الاسباب التى تؤدي الي هذه الاورام؟
ـ غير معروفة ولكن هنالك اسباب تساعد علي حدوثها فمعظم الحالات اصبحت كثيرة في الاقليم الغربي نسبة لعدم وجود الرعاية الصحية المتكاملة وكذلك اخذت تتكاثر في الاقليم الشمالي وفي الاقليم الاوسط.
ü المسببات المساعدة؟
ـ طريقة التغذية المثالية، التدخين، التمباك وهنالك عوامل وراثية وجينية تساعد علي حدوث تلك الاورام تحت سقف الحلق والحنجرة.
ü الاعراض اولا: حدوث ورم بجنبة العنق ـ نزيف من الانف ـ بحة في الصوت لمدة شهر ـ شهرين باستمرار احتقان او انسداد في الانف ـ ضعف في السمع ـ فقدان الشهية (الاكل) مما يؤدي الي نحافة الجسم.. هذه الاعراض هي مبكرة قبل استفحال الاعراض الاخري ويمكن علاجها بسرعة بالاشعاع الذري او بالعلاج الكيماوي وتكون النتيجة مبشرة اما اذا اظهرت اعراض متأخرة نسبة لانتشار الاورام في مناطق الجسم الاخري وبالذات في المخ فيبقي العلاج مستعصيا.
التدخين والتمباك هما آفتان كبيرتان ويؤدي التدخين الي حدوث أورام في الحنجرة وفي الرئة الأورام الخبيثة في الحنجرة والرئة اصبحت في تزايد بالسودان واصبح مستشفي الذرة لايسع لمرضي أورام الحنجرة والرئة اما التمباك او الصعوط هي افة اخري تتسبب في سرطان اللثة والشفاه.
ü الوقاية من تلك الأورام؟
ـ يمكن تشخيصها بشدة وعلاجها اذا حضر المريض مبكرا لطبيب الاذن والانف والحنجرة اذا شعر بالأعراض التي ذكرت سابقا.
كذلك نحذر بشدة بعدم التدخين واستعمال التمباك لانهما توجد فيهما مواد تساعد علي حدوث الأورام في الحنجرة ونسأل الله السلامة والوقاية.
| |
|
|
|
|
|
|
|
|
|
Re: التمباك واثره الصحي والاجتماعي ****و راي البنت شنو في الولد البسف تمباك !!! (Re: مهاجر)
|
واقع مأساة التمباك في السودان مؤلم ، والأكثر إيلاماً أن الأمر في تفاقم رغم أن بعض الصور هنا تقشعر منها الأبدان ، أولاً أحب أن أعلنها بينة : كل شخص حر حرية مطلقة في إختياراته ما دام هو وحده المسؤل عن النتائج ، لكن ليس من باب المصادفة أنه كلما كان الإختيار مبني على علم و اطلاع كان إختياراً صائباً ، و هذا هو الهدف من هذه الصفحة إطلاعك على نتائج أبحاث علمية، و قد قال الشاعر:
لقـــد لامـــني فـيـها أخٌ ذو قــرابـــة حــبـيب إليه فــي ملامته رشدي
فقلت له: فيها قضى الله ما ترى علىّ وهــل فــيـمـا قــضى الله من رد
فإن كان رشــداً حــبها أو غـوايـة فـقـد جـئـتـه ، مــا كان مـني عـلـى عـمـد
. 25% من المراهقين في السودان يستخدمون التمباك.
2. 32% من البالغين فوق 18 سنة يستخدمون التمباك.
. نسبة مستخدمي التمباك في المدن 24% و في القري و المناطق الريفية 35% .
4. أعـلى فئة تستخدم التمباك هي بين الراشدين فوق الثلاثين و القاطنين في القرى و المنا طق الريفية وهي 57%.
5. 12% من السودانين يدخنون.
6. نسبة المدخنين في المدن 18% و في القرى و المناطق الريفية 12% .
7. إستخدام التمباك يضاعف من مخاطر الأصابة بسرطان الفم.
8. إرتفاع نسبة الإصابة بسرطان الفم في السودان هو راجع إلى إستخدام التمباك.
(دراسة لكلية طب الأسنان بالخرطوم ، نشرت في سنة 1995 في المطبوعة
( العلمية الدولية للسرطان
. التمباك السوداني يحتوي على نسب عالية و غير طبيعية من المواد المسرطنة.
(دراسة لكلية الخرطوم نشرت سنة 1991 في المجلة العلمية "السرطنة").
10. يحتوي التمباك على 28 مادة مسرطنة ، أكثرها ضراراً هي نيترسامينات التبغ ، التي تشكل أثناء تحضير و تخمير التمباك (إذا ما أحتوت أي من اللحوم أو المأكولات جزء مما يحتويه التمباك من النيتروسامينات فهي تمنع فوراً و بإعتبارها مسرطنة).
من المواد المسرطنة الأخرى في التمباك:
البينزوبيرين ، الكورتونلديهيد ، الفورمالديهيد (عنصر مستخدم في تحنيط الموتى) ، الأسيتلديهيد (مادة مهيجة) ، هيدرازين (مادة كيميائية سامة) ، الزرنيخ (مادة سامة) ، النيكل ، الكادميوم (عنصر يدخل في صناعة بطاريات السيارات) ، البولونيوم (عنصر مشع ذرياً) .
11. يحتوي التمباك على النيكوتين و هو مادة تؤدي إلى الإدمان و إضطرابات في القلب و ضغط الدم و الأوعية الدموية ، النيكوتين الذي يمتصه الجسم من التمباك هو أكثر بمرتين إلى ثلاثة من الممتص عند تدخين سيجارة ، كما يبقى النيكوتين في الدم لفترات أطول.
12. يسبب التمباك العديد من أنواع السرطانات و منها سرطان الفم و الحلق و البلعوم ، وتنتشر هذه السرطانات بإستمرار إلى الأعضاء المجاورة ما لم تتم معالجتها سواء كيميائياً أو بالإشعاع أو جراحياً (إزالة الأورام و الأنسجة المحيطة ،ويؤدي ذلك في أغلب الأحيان إلى تشوهات).
| |
|
|
|
|
|
|
|
|
|
Re: التمباك واثره الصحي والاجتماعي ****و راي البنت شنو في الولد البسف تمباك !!! (Re: مهاجر)
|
أدعوك الآن لتتأمل نفسك أمام المرآة ، و تدقق في فمك هذا التدقيق قد ينقذ حياتك وبشكل خاص إن كنت مدخناً أو مستخدماً للتمباك.
مع بعض التدقيق من وقت للآخر بإمكانك التعرف على التغيرات في فمك التي يحتمل التحول (أعاذك الله) إلى سرطان الفم ، اكتشاف هذه التغيرات في وقت مبك بالفعل قد ينقذ حياتك.
جراحيّ الفم و الفك و الأسنان يوصون بإجراء فحص ذاتي منزلي كل شهر ، أما اٍذا ما كنت من مَن يرجح إصابتهم بسرطان الفم (المدخنون ، متعاطي الكحوليات ، مستخدمي التمباك) فمن الأفضل أن تزور الجراح أو طبيب الأسنان كل ثلاث ألى ستة أشهر ليتفحص فمك .
حينما تبدأ الفحص الذاتي المنزلي هذا ما يجب أن تبحث عنه:
• • رقع حمراء أو بيضاء
• • تقرحات لا تندمل و تدمي بسهولة
• • تورم أو ازدياد سماكة الأنسجة
• ألم مزمن في الحلق أو تغير في الصوت.
و هذه هي طريقة الفحص :
• • أخرج من فمك أي تركيبة متحركة (طقم أسنان).
• . إنزوي بنفسك بعيداً حتى لا يظن الناظر وأنت تحملق داخل فمك بأن التمباك أو السجائر قد أفقداك عقلك!
• • دقق و تحسس الشفتين (العليا و السفلى) من الداخل و كذلك سطح اللثة.
• • أرجع رأسك للخلف لتدقق في سقف فمك و حلقك.
• • أسحب كل خد لتتفحصه الداخل و اللثة المقابلة له.
• • أخرج لسانك و تفحصه ولا تخجل! حركه إلى اليمين ثم اليسار لتتفحص جانبيه ، ارفعه إلى أعلى لتتفحص سطحه السفلي و الأرضية أسفله.
• • تفحص بيدك جانبي رقبتك و جانبي ما تحت الفك السفلي للتأكد من عدم وجود أورام أو تمدد في الغدد اللمفاوية.
| |
|
|
|
|
|
|
|
|
|
Re: التمباك واثره الصحي والاجتماعي ****و راي البنت شنو في الولد البسف تمباك !!! (Re: مهاجر)
|
منقول من منتديات عشاق السودان
الساعة اتناشر باليل
و الناس نيام
و الشخير عاكل في السماء
ما في صوت إلا هوهيو الكلاب
جارتنا كلتوم شالت توبها المشجر
و كربت بيهو نصها
لمن الكرشة بتاعتها اتكومت قدامها ذي الدلوكة
و قالت كدا اتشعبطت ليك في الحيطة الحدودية
البتفصل بين بيتها الحدادي و المدادي
و بيتنا العامل ذي بيت الكبريت
الله يجازي محنك يا كلتوم
الحيطة دي طولها تلاتة أمتار
لكن راس كلتوم دا انا شفتو بي فوق الحيطة كيف انا ما عارف
الله بسعلني انا قلتا يمكن يكون شالها حمار النوم
و هي ما جايبة خبر
المهم مدت لينا رقبتها مترين بي فوق الحيطة
و فتحت ليك خشمها العريض داك
و قعدت تجعر ذي المخنوقة : يا فيفيد
فيفيد
فيفييييييييييييييد
انا قمتا من النوم مخلوع ذي الطقتني عقرب
و قعدت اتلفت ذات اليمين و ذات الشمال
عشان اشوف البنادي في فيفيد دا منو
لكن ما لقيت أي زول
بس الساعة الرفعت ليك فيها راسي فرق
كان أشوف ليك شبح كلتوم متكوم في راس الحيطة
انا : كلتوم!!!!! بسم الله الرحمن الرحيم !!!!!
مالك قاعدة في راس الحيطة
كلتوم : ود يا فيفيد
خالك بلة نايم و الا صاحي
انا : يا كلتوم الساعة اتناشر الناس كلهم غرقانين في النوم
كلتوم : جميل جداً
انا : هو شنو الجميل جداً
كلتوم : قوم أمشي بشويش كدا
و أفتح حُقة التمباك بتاعت خالك
بلة و جيب لي منها سفة
و الله يا ولدي التمباك راميني
انا : التمباك راميك كيف يا كلتوم
هسي انتي طالعة في الحيطة ذي متسلقين الجبال
كلتوم : ستين مرة يا فيفيد قلتا ليك انا عندي الضرس
انعل أبو دي خرمة
الخرمة بتاعت الساعة اتناشر باليل دي
ما شفتها إلا عند كلتوم جارتنا
و الله النساوين ديل قصتهن قصة
الواحدة تلقى سفتها ذي دقار اللوري
لمن تجي تسألها العلمك سف التمباك شنو
تقول ليك علمني ليهو الضرس
طيب كان كدا خلوني أسألكم
لو الضرس علمكم سف التمباك
العلمكم شرب السجار شنو
يكون وجع الحلق؟
الغريب في الأمر انو في عيد الضحية
كانت كلتوم دي بتقرمش ليها في عضم بتاع مقرشة قدر الليلة و باكر
قام انحشر ليها حتة عضم في فرقات سنونها
جاتني كارا توبا و تتوحوح
و فاتحا خشمها ذي كبوت النيسان
و قالت لي : يا فيفيد
تعال أمرق لي العظم دا من سنوني
و الله انا لمن قعدت أفحص في سنونها
يا سبحان الله
ذي رصت السبحة
سنونها كاملة و سليمة من أي سوسة أو شرمة
قمتا قلت ليها بعد ما مرقتا ليها العضم : يا كلتوم
ضرسك العلمك التمباك في الصف الفوق و الا التحت
كلتوم : الضرس الفي طرف لساني
كدي سيبونا من كلتوم
و خلونا مع مناهل
بت ذي الليل
تكوي في الفكك
كشافة عدييييييل كدا الواحد ما بقدر يعاين ليها مرتين
دمار
إرهاب
صاحبة صوت ملائكي
رهييييييييييييييييييييييييب
كانت هي البلبل و الفنان بتاع الدفعة بتاعتنا في الجامعة
لكن يا عيني
مدمنة تمباك بي شراهة
كنت اليوم داك بشرح ليها عشان الامتحانات قربت
قامت البنت دي و بدون ما تخجل مني طلعت ليها
علبة بتاعت نيفيا
و الله انا افتكرت انو البنت دي تكون عايزة تمسح شلاليفا
من السقط و البرد بتاع أمدرمان
بس اكتشفت انو مكشوفة الحال مناهل
عاملة علبة النيفيا حُقة بتاعت تمباك
و الله البنت المسلطة دي كرضمت ليها سفة
قدر حبة الطعمية
و ختتها في نص لسانها
و بي طرف اللسان
و بحركة قردية كدا
تنم عن المهارة و الخبرة الطويلة في هذا المجال
قسمت السفة دي علي قسمين
ختت القسم الأول
تحت الشلوفا العليا عند بداية الضرس الأول ناحية اليمين
و ختت القسم الثاني
تحت الشلوفا العليا عند بداية الضرس الأول ناحية الشمال
مدهش جداً يا مناهل و منكم نستفيد
انا : عندك ضرس يا مناهل؟
مناهل : لا لا لا يا فيفيد
بس ذي ما انت عارف اني بعد الامتحانات
عندي حفلة في الريفييرا
و لازم أظبط صوتي كويس
يا نسوان دي دعوه من مناهل بتقول ليكم
أنو التمباك بيظبط الصوت
فماذا انتم فاعلون
لكن
في ناس بيرميهم التمباك
و في ناس بترميهم المخدرات
و في ناس بيرميهم الشاي
و في ناس بترميهم المريسة
و في ناس بترميهم الجبنة
و بمناسبة الجبنة و المريسة دي
نحنا مربين لينا غنمايتين
واحدة اسمها الزريقة
و التانية اسمها شواطين
الغنمايتين حقننا ديل كمان قصتهم قصة
أولاً : غنمايتنا الزريقة
مزاجها راااااااااااااااااااااايق
مزاج معلمين كبار
كل الجلاكين بتاعين حلتنا بيحترموها
و بيقدروها
و بيكنوا ليها كل الود و الاحترم
عرفين ليه؟
كدي خلونا نعرف
خالتي نادية
متعودة تقلي البن تحت ظل الشجرة بتاعت النيم بتاعتنا
عشان تظبط بيهو الجبنة بتاعت المغربية
غنمياتنا كل يوم تجي من السرحة
تقوم تصنقر جنب خالتي نادية
و هي تقلي في البن بتاعها
و تقعد تشمشم في ريحة البن
اها اليوم داك خالتي نادية جاتا ملاريا
و الله لمن غطيناها بالبطانية
قامت الغنامية جات من السرحة
و رامياها ريحة البن
و قومي يا الغنماية و اتكومي جنب نادية
نادية رامياها الملاريا
و غنمايتنا الزريقة راميها ريحة البن
تلاتة يوم الغنماية دي ما بتتفاهم معانا
لا بتجر كراع
لا بتحرك ضنب
لا بتهز راس
راقدة سلطة
اها لمن نادية خالتي طابت من الملاريا
قالت لي : يا فيفيد
كدي جيب لي الكانون
و جيب ليا شوية بن خليني أقوم بيهو الغنماية دي
و الله الساعة الدخان بتاع البن دا عكل في السماء
انتي يا الغنماية قومي من رقدتك ديك
و قومي اتعركي في توب نادية خالتي
يعني ذي البتقول لي خالتي : جزاك الله خير
ثانياً : غنمايتنا شواطين
مرتع صباها كان في الصعيد
و بالتحديد في منطقة أبو حجار
حاج سعيد بعد ما قبض حق الغنماية من اخوي الكبير
قال ليهو بالإنجليزي : BE CARE
اخوي المسكين ما عرف الكلام دي بيعني شنو
إلا بعد أن شرف الغنماية المصون بيتنا
ناس الحلة سموها شواطين
نسبة لي شيطنتها المبالغ فيها
مرة تاكل زراعة حاج متولي
مرة تاكل عيش حاجة علوية
مرة تشرط هدوم حاجة الشول
مرة تلقاها طالعة في ريسين البيوت
مرة تلقاها نايمة في سرير حاج التجاني
الغنماية دي قصتها مع الخرمة و القرفة حاجة غريبة جداً
يوم كدا عمتي فاطنة قاعدة تغسل في هدومها
انتي يا شواطين تعالي و اقعي ليها في طش الغسيل بتاعها
و جدعت ليك
كراع شرق
و كراع غرب
و كراع جنوب
و كراع شمال
و الضنب وقفتو ليك اريل تلفزيون
عمتي قالت و شالت توبا في كتفها
و جرت لي محمد احمد البطري
الراجل كتر خيرو جاء و كشف علي شواطين
و قال ليها : يا حاجة فاطنة غنمايتك سكران
بعد يومين اكتشفنا انو شواطين
قاعدة بتمشي لي بيت مشبوه جنبنا
و بتاكل عندهم التمر بتاع المريس
لكن الظاهر انها تقلت فيهو
بس يا جماعة كعبة رمية مرض حامد
| |
|
|
|
|
|
|
|
|
|
Re: التمباك واثره الصحي والاجتماعي ****و راي البنت شنو في الولد البسف تمباك !!! (Re: مهاجر)
|
البوست قديم حبتين لكن هذا لا يعني أن أهدافه قد إستنفذت بالتقادم ، فالطرح في مجمله جيد ويناقش ظاهرة إجتماعية نعيشها في مجتمعاتنا داخل وخارج حدود الوطن ومع ذلك فإن الردود على المقال معدودة. قلت في نفسي أن الإحجام أو السكوت عن الظاهرة مردها إما أن معظم سكان المنتدى بيسفوا التمباك سفاً ودون تميز أو أنهم يتفقون مع كاتب المقال على ان الظاهرة يجب أن يتم القضاء عليها وهؤلاء يترددون لأنهم غير قادرين على أن يبطلوا التمباك يعني بالعربي كده لن يتمثلوا بأن يأمروا الناس بالمعروف وينسون أنفسهم.
بعيداً عن الآثار الصحية للتمباك هناك الكثير من الآثار التي لابد أن نتناولها بشئ من التفصيل ، أول تلك الآثار هي أن الكثيرين من الذين يسفون التمباك في حاجة إلى البصق بين وقت وآخر – هناك فئة حريفة في شأن التمباك لا تبصق أبداً بل زعم البعض أنهم قادرين على الأكل والشراب من خلال السفه وهي العملية التي تعرف بالكوبري علوياً كان أم سفلي – لكن يظل البصاق في كل الأحوال أمر غير محمود خاصة إذا كان التمباك كثير العطرون الأمر الذي يسيل معه لعاب السافي وفي حالة تواجده في أى وسيلة من وسائل المواصلات يكون كل الذين على خط النار – خلف السافي – عرضة لرزاز البصقة السفية المدمرة. من طرائف التمباك أن سائق ركشه سافي مال يمينا ليبصق السفة فأنقلبت الركشة وسجلت سلطات الحركة الحادث ضد مجهول.
ولي عودة إن عاد في الحقة تمباك
| |
|
|
|
|
|
|
|
|
|
Re: التمباك واثره الصحي والاجتماعي ****و راي البنت شنو في الولد البسف تمباك !!! (Re: almulaomar)
|
تحيه اخ مهاجر والي كل المشاركين....
تجربتي مع التمباك بداءت من الثانوي العام ؟!
سفيت بشراهه غير عاديه، أيام الجامعه كانت اهم مايميزني عن الاخرين ختي المتمبكين التمباك!! كنت لا اكترث لشكلي (السياحي) كثيرا، وكانوا يقولون انني ياسافي، يا تافي، يابعمل في سفه...
ايضا كنت لا اكترث بوجود (الجكس) او عدم وجوده فهن بالنسبة لي والي الان والفضل يمكن يرجع الي التمباك غير مميزات عن الرجاله اصحابي فاني اتعامل معهن بعفويه كامله وكل صديقاتي الذين عاشرتهن في الجامعه او خارجها يرحبن بهذا، المهم عام 1999 وفي الولايات المتحده الامريكيه، وامام مراية الحمام فتحت خشمي وتهياء لي انني اري الوانا مختلفه صفراء وحمراء ولبنيه وبنيه ودخلتني ليك خوفه كبيره جدا.. كان احد ابناء حلتنا في امدرمان (بودارو) قد اكتشف ان لديه خلايا سرطانيه وقاموا باستئصال اجزاء من شفايفه (شلوفته) وظنت بي الظنون وتخيلت نفسي بدون شفايف شكلي حيكون كيف؟؟ حااتزوج كيف؟؟ حا اكون (حايم) مع (الجكسويات) صحباتي ديلاك لمن ارجع السودان كيف ؟؟ حااتكلم مع ناس الحله وناس البيت والشباب كيف؟؟ كلهم حيكون مبحلقين في خشمي ابو شلاليف مافي!
المهم اول حاجه عملتها جدعت الحقه ومريت باسابيع لا يعلم بعزابها الا الله، لكنني نجحت في ان اتخلص منه الي غير رجعه الي يومنا هذا والحمد لله علي ذلك؟
رجعت السودان واندهشت الي التغيير الذي انتابني وانتاب الذين صادقتهم كل عمري، فقد كانوا اكثر التصاقا بي شكلي بقي حضاري زي ماقالوا، رغم انهم في السابق كانوا يخرجون معي الي الشارع لكني لاحظت ان النظره التي يوليها الشارع لنا قد تغيرت كثيرا فالجميع سيلاحظ ان الشارع يولي للبنات الذين يمشين مع مدخن او سافي نظره مختلفه عن اللائي مع اشخاص لا يدخنون او يسفون!!
شعرت بعلاقتي مع المتمبكين والمسجرين من اصحابي قد بدات تنحسر لاسباب قد ترجع الي الشعور بعدم احترامهم لي عندما يبداءون في التسجير او التتمبك امامي! ام يرجع ذلك الي طول غيابي من السودان وتاقلمي علي ثقافة الوعي الزائد هنا لا اعلم؟!!
ادهشني ايضا سلوك المدخنيين والمتمبكين في السودان! انهم يدخنون في اي مكان ويتمبكون في اي مكان؟!! لا توجد اي لافتات تمنع التدخين او التتمبك ولوا في صالة المول او المطار او اي صاله مقفوله ولا توجد مناطق خاصه بالمدخنين او المتمبكين في الكافترات او المكاتب صاحبة فتراة انتظار طويله؟؟!!
علي العموم قد ارتحت كثيرا من عمليات البصق ودنكله السفه والريحه الكريهه التي تصاحبهما والتي ايضا تلتصق باصابعي وتجعلها مصفره ومتلوثه. واسناني اليوم اكثر بياضا واناقه من زي قبل. اتمني من كل المتمبكين الاقلاع الفوري من التمباك وسيشعرون بالراحه والمتعه اكثر، وسيحبهم الجكس ايضا اكثر من زي قبل واسالوا مجرب ولا تسالوا طبيب؟؟!!!
| |
|
|
|
|
|
|
|
|
|
Re: التمباك واثره الصحي والاجتماعي ****و راي البنت شنو في الولد البسف تمباك !!! (Re: مهاجر)
|
مهاجر العزيز..
ســـلامات وتحيات كتيرااات..
أولا الحمد لله خليت سف التمباك.. والله انا ما قايلاك بتسف.. (ما تسألني هسع لييه)..
بالاضافة للمصايب القاعد يجيبها التمباك زي ما وضحت الدراسات.. فهو مقرف بجد..
بيني وبينك انا عندي الزول ان شا الله يشرب ماريجوانا ما يسف تمباك  .. والود ودي يصدرو فرمان (قراقوشي) في بلدنا عشان يحرموهو..
لما زرت السودان قبل 3 سنين صدمت للغاية لإنتشاره (المرعب).. والعجب في البلد عندنا.. غايتو انا أصدرت فرماني برااي لأولاد أهلي قلت ليهم على الأقل وهم قاعدين معاي ما يسفوا. ومشكورين لبًوا (الأمر)..
اها ده كلو كوم والناس القاعدة تسف برة السودان كوم تاني.. ولا كمان بيطلبوهو مخصوص  .. والواحد فيهم يقول ليك ماشي وين عشان يستلم ليهو (تمباك) جاييهو من البلد..
..
والله ما ترفًع.. لكن من أقرف الأشياء في الدنيا بالنسبة لي هي التمباك.. وكل امنيتي ان يتركه من يسف.. ويشوف ليهو شئ تاني اقل قرف..
وعشان تكتمل الصورة: التدخين ايضا شئ سيئ..
وشكرا ليك للموضوع..
تحياتي..
تخريمة واجبة: ايضا افتقد معك أهل العوض وبت قضيم وناس الزمن الحلو..
| |
|
|
|
|
|
|
|
|
|
Re: التمباك واثره الصحي والاجتماعي ****و راي البنت شنو في الولد البسف تمباك !!! (Re: Raja)
|
الاستاذة رجاء في رحاب حوشنا المغبر ومليان ريحة تمباك
حقيقة اثبتي لي اشياء كثيرة توضح درجة الوعي الانساني لديك
وبرضو تقولي عايزة تسيبي المنبر.
شكرا لكي وللاستاذة عالية ايضا للمساهمة في هذا البوست
نبدأ
أولا الحمد لله خليت سف التمباك.. والله انا ما قايلاك بتسف.. (ما تسألني هسع لييه)..
انتي طبعا عارفة كل حاجة عن حنتوب والغربة فيها.حتي ثالثة ثانوي لا اهتم بالتمباك
لكن في ثالثة كان في مشاكل كثيرة والواحد كره المدرسة والسبب كان مدير جابوه من مدني الثانوية بنات.كرهنا المدرسة.يا حليل عباس الطيب يرفدك الصباح ونفس اليوم ترجع تاني.
اها ده كلو كوم والناس القاعدة تسف برة السودان كوم تاني.. ولا كمان بيطلبوهو مخصوص .. والواحد فيهم يقول ليك ماشي وين عشان يستلم ليهو (تمباك) جاييهو من البلد..
تخيلي الواحد هنا في جدة بيصرف 5 ريال كل يومين ومرات 6 ريال او اكثر.
يوجد بقالة سعودية في حارتنا .صاحبها امتلك بلاوي من التمباك.الان قام ببناء عمارة من 6 طوابق ودا من عادتنا العجيبة دي.
تخريمة واجبة: ايضا افتقد معك أهل العوض وبت قضيم وناس الزمن الحلو..
الناس دي.انتي عارفة زي الناس البتمشي تزرع في القضارف زراعة موسمية وترجع بعد نهاية الموسم يفكوها فيكي.
شكرا لكي لهذه المداخلة
| |
|
|
|
|
|
|
|
|
|
Re: التمباك واثره الصحي والاجتماعي ****و راي البنت شنو في الولد البسف تمباك !!! (Re: بشري الطيب)
|
أخي بشري الطيب
الحمد لله الذي جعلك تبطل التمباك وسف التمباك وأكيد التجربة ثرية جدا خاصة مع واحد كان بسف لمدة ثلاثة عشر عاماً يعني خبرة كبيرة في عالم الصعوت أو الصعوط ونحن في إنتظار قصتك خلال الثلاثة عشر سنة.
طبعاً بعضامن الذين أعرفهم وبيسفو التبماك قالوا أنا موضوع المرسال هو السبب في أن يتعلموا السفه ، الواحد يرسلوه عشان يشتري تمباك يقوم بحب إستطلاع يدنكل ليهو سفه ويختها وبعدها يا إستفرغ يا وقع الواطه وبعد ده ينادوه للغدا يقول ليهم ما داير. وواحدين بنصائح حبوباتيه لا أساس لها من الصحة يكون الواحد عندو وجع ضرس وحاميهو النوم يقولو ليهو خت ليك سفه في قطنه وختها في الضرس ووجع الضرس ينتهي ويمكن الضرس زاتو يقلعوهو وتبقي السفه وكل سفه بي تفه
| |
|
|
|
|
|
|
| |
مهاجر
Mohamed Adam
almulaomar
Raja
بشري الطيب
فيس بوك
تويتر
انستقرام
يوتيوب
بنتيريست