|
|
 فى حلتنا حرامى .... !
|
سلاااااااااااامات .... صباحات الله بيض وصباحات شوقنا بريدهن وكيفكم (عافية درت ) اها انشاء الله الامور استقرت والحمى نزلت منكم وختيتو الرحمن فى قلبكم عشان عندنا مزاج رايق نقدم مشاركات كدا كميه بس عاوزين اجواء مهياءة ووفاقية وفيها وقف عدائيات ، اها طبعها الدنيا (شتاء ) والجو مرات بيكون باااااااااااارد خاصة فى انصاص الليل ومع الصباح يعنى لو ما فاطر ما شنو ما تخاطر اها عليكم امان الله اليومين دى كمان رجعت فى بعض احياء الخرطوم وام درمان ظاهرة (الحرامية ) ... اى الحرامية ... ناس تلب ... لانو الناس كلها بتنقشط جوه الغرف وكدا يقوم يجى زول زائر ليل يعمل مسح للحوش والحاجات البتكون فى ملف السواقط ... فرده شراب ... عجلة شافع ... قميص مشرور فى حبل .. جردل مويه مطرف او ملاية طاشه اهملت فى ركن ولا زاوية منزلية ، طبعا فى حراميه كدا عينهم قوية الواحد ممكن يكون (مبسوط ) شوية يقوم يدق باب الاوضه يصحيك يقول ليك مشينا يا كابتن ، جيب الفيها النصيب وحصلت لزول بعرفو ساكن فى الحتانة جوه الجماعة حامو ليهو فى الحوش لقيهو ليك زى زلط شندى ... نظييييييييف اغتاظو مشو صحهوه وكان ساكن عزابى لان اولادو مشو البلد لبكا عليك امان الله الزول كسروه ليك كسره نضيفة اكلها صاحبنا غماتى وابى يكورك ولا يقول غوغ ... قال شنو عيب والمهم بعد ما ربطوه ما لقو عندو التكتح الا تلفزيون ابيض واسود بيشتغل ببطارية عربية لانو الكهربا عندو جمره خبيثة وحالتو المادية (شلش ) فخلى البيت بتاعو مضاء بالشمع زى معابد البوذيين وجاب البطارية عشان يحضر بيها المسلسل وشوية من الاخبار لو الدنيا فيها مصائب و(كبع ) ولو ما فى حاجة بينوم اها قال ليك كبير الحرامية شاف حال صاحبنا والتلفزيون ابيض واسود سكت مسافة وقال ليهو والله انت زول مسكين جدا ومعليش على (الهوكات ) الاخدتها مننا ومرقو خلوهو ليك يلقط فى سنونو الحتوها ليهو قبال ما يربطوه ويدقوه لمن افتكرو انو القبة تحتها فكى !
الايام زى ما قلنا الناس قبال ما تخش غرفها بقت تمسح الحيشان ما تخلى فيها الحبه ولو عندك سرير ولا حاجة كبيرة مكومة فى حوشك بس تتصرف وتشوف ليك طريقة والا فانك ستصحو الصبح ولا السرير ولا السخان باق ، اها المسالة لمن بقت ظاهرة وحديث المجالس فى حلتنا بقى فى حالة نفسية بتاعة توجس يعنى الزول بقى ينوم وعينو مفتحه واضانو مرميه بره الحوش لو كديسه دخلت فى معركة مع اختها واشتبكو فى معركة و(لللللللللللللب ) وقعو من راس الراكوبة ولا راس البيت (توووووووووج ) تلقى الزول قام طوالى كارى معاه عكاظ ولا مرق عنقريب وجاى طاير عاوز يكاتل يلقى ليك (بره المكسينة ) فاكه البريق ، ودا كوم والنساوين والعوين كوم ، النهار كلو ناس فلانة سرقوهم وناس علانة قال ليك الحرامى ما باقى الا يلحق ليهم صلعات بعد ما شال هدومهم (شت ) وتلقاهن بينتجن قصص وروايات بس رافت الهجان وطبعا فيها مبالغات يعنى يقولو ليك ناس حاجة مياسه بنتهم الجاتهم ضيفة من عسلاية لى هسه ماسكاها حمى والدكاترة غلبو فى معالجتها وهسه جابو ليهم حافلة فقرا عشان يشوفو البيها شنو ، اها يا جماعة مالها سلامتها ... قالو شافت الحرامى بيحوم فى الحوش قام قلبها وقف واتخلعت وفى ناس قالو جا عليها وقال ليها ...اخ ! .. وشيل خت القصص كترت لغاية ما امبارح فجاة كدا شق ليك سكون الليل صرااااااااااااااخ حاااااااااااد .... حراااااااااااااااااااااااااااااااااااااامى ....ودب دب الناس بقت مارقه وطبعا الحرامى التعيس زاتو شكلو داخل جديد فى الشغلانيه لانو جا فى زمن غريب يمكن قبال حداشر مسا ودا وقت ...الشفع بتكون فيهو صاحيه فى الزمن دا ... اها بقينا كلنا مارقين ... ناس صديق ابو عوف طرشقو (قيم الكوتشنية ) فى بيت العزابة ومرقو مسلحين بكتل من العكاكيز المضببة الجابوها من بعض مدن السودان البعيده وناس ابو الزيك ودى شلة متخصصه فى (الاستيم ) طلعو مخلوعين من جرى الناس والجوطة اتخيلوها (كشه ) وطاره - دا لقب عربة الشرطة - كبست عليهم رغم انهم كانوا مطمئنين من انهم ممكن (يطشمو ) بعد دا بارتياح بدون قول ( كه ) لانو الدنيا سلام والبوليس زاتو بقى فى تولا ... وعوض (هوندا ) جانا مارق شايل ليهو سوط عنج وطبعا لازم يكون (قاشر ) العمه والملفح والمركوب وعشان كدا جا متاخر ويمكن اخر زول بعد ما الناس التلمت جنب بيت ناس (خالد تلة ) محل صوت الاستغاثة وشبك ليك الناس ... يا جماعة براااااااااااااحه ... زحوا الشباب الصغار ديل بعيد ..خلونى للحرامى دا انا بعرف انجمو ليكم .. والمسالة جاطت والغريب انو لغاية الوكت داك لا شفنا حرامى وناس تله زاتهم لقيتهم مخلوعين ودا قصتو تناقض التانى .......
خلوكم معانا .... فاصل ونعود ..
|
|
 
|
|
|
|
|
|
|
 Re: فى حلتنا حرامى .... ! (Re: محمد حامد جمعه)
|
في عيد الله المبارك ده...
أنتو الحرامية ديل ما بيعيدوا ولا شنو...
| Quote: فى حلتنا حرامى .... ! |
الجاكم يختاكم....
سلامات كميات... وتمنيات مباركات...
وكل الأعوام وأنت والجميع بألف خير وعافية....
| Quote: خلوكم معانا .... فاصل ونعود .. |
معاك لآخر السكة...
والعود أحمد....
| |
|
|
|
|
|
|
|
|
|
Re: فى حلتنا حرامى .... ! (Re: محمد حامد جمعه)
|
الحبيب الجبهجي محمد حامد جمعة: احييك: شايفك بتتكلم عن الحرامية وكترتم، وشايفك شغال معانا باسمك الحقيقي كما نحن كذلك،انت ما بتخاف من السيد الوزير ولا الحقيبة قربت تطير!مع بشريات السودان الجديدالذي ظللنا لفترة طويلة نعمل من اجل ان يكون وان يسود
| |
|
|
|
|
|
|
|
|
|
Re: فى حلتنا حرامى .... ! (Re: علي محمد علي)
|
ابو علوه .... قلت لى جبهجى وبكتب باسمى الحقيقى ( شفتا الشفافية الجاذبة دى )
حبابك الف وشكرا على المرور
بالمناسبة وعلى ذكر السودان الجديد الذى طالما ناديتم به كما تقول ... اها رايك شنو فى الشراكة معانا .... مش ناس ارقيين لقيتنا اهو حنخمس ليكم ونديكم كرام مقاعدنا ... واهو وزير الخارجية الدكتور مصطفى عثمان على سن ورمح حيديكم مقعدو ... وعموما نامل ان يكون مشروعكم حلو واخضر ويقود البلد لقدام والنشوف اخرتا ...عساها تكون خير .. للبلد والوطن والجميع الرضيان والزعلان والحيران ... والماسك العصاية من النص
| |
|
|
|
|
|
|
|
|
|
Re: فى حلتنا حرامى .... ! (Re: علي محمد علي)
|
الاولانى (فلان الفلانى ) ........... دا حمدو فى بطنو لكن (التانى ) دا صدقنى حيكون مفاجاة المرحلة ....... زول مفتح ... ما شفتا عمل شنو فى الجزيرة ابا ...... خلع باقى الاحزاب ... عرفتو مش كدا
| |
|
|
|
|
|
|
|
|
|
Re: فى حلتنا حرامى .... ! (Re: محمد حامد جمعه)
|
ابو حميدة
كيف الحال وصباحك لبن وجبنة وزبادي المعدوم اليومين ديل
امس مشيت دكان ناس احمد عشان اجي بزبادي كابو سيد الدكان قال لي الزبادي ليهو كم يوم كمافى قلت ليهو ليش الحكاية شنو ؟ قال ما عارف
انت مصنع كابو سرقوهو ولا شنو ؟
تحايا
| |
|
|
|
|
|
|
|
|
|
Re: فى حلتنا حرامى .... ! (Re: محمد حامد جمعه)
|
محمد حامد جمعة تحياتي وسلامي يا لذيذ يا رايق على راي علاء الدين ..
صراحة كنت مدبرس ..بس ضحكت الان حد القهقه بحكاياتك عن الحرامي
انت بالمناسبة الحتانه دي فيها شنو ؟
في اجازتي الاخيرة في السودان قبل اشهر سمعت لي بسرقتين ..
وفي احد صباحات الله طالع من الحتانه لقيته ليك محاصرة بالقوات الخاصة من الجهات الاربعة يا ناس الحاصل شنو انتو الضفه الغربية وغزه جات بجاي ولا شنو؟
قالو جاري البحث من بيت لبيت ...(دا ايام المحاولة الانقلابية والاسلحه بتاعه الخليله)
العسكري قال لي موظف هات بطاقتك
طالب هات بطاقتك غير كده مافي طلوع ابدا ..يازول انا مغترب ياخ ومسافر !! حلف يمين كان يخليني اطلع !1
الغريبة طلعت !!! بس ما بقول ليك كيف !!
| |
|
|
|
|
|
|
| |
محمد حامد جمعه
A.Razek Althalib
علاء الدين يوسف علي محمد
المكاشفي الخضر الطاهر
luai
فيس بوك
تويتر
انستقرام
يوتيوب
بنتيريست