|
رسالة اخيرة للمحبوب
|
تسيبيني وترضى عيونك الحلوات تخليني بعد ما الحب كبر جواي بعد ما الشوق سكن فينى وكيف اقدر على وداعك وكيف اصبر على حنيني وانت العشتي فى قلبي وشفت معاك صفا سنيني وانت الكنت بحلم بيك تكملي لى نص ديني **** كت بتمنى يا طاهرة تكوني معاي مدى الايام وكت بتمني من الله انه يحقق الاحلام اشيلك فوق سواد عيني واغطيك وادفيك واختك بلسما شافي يداوي جروحي والالام *** سنين مرت وانتي معاي معاي ساعة اصحي من النوم معاي فى السكة طول اليوم ولما نهاري يتباقص وتبقى سماية خالية نجوم يجيني خيالك الغالي يعشعش فوق مسام روحي اشوف فى الدنيا ما فى هموم ويشتل فى جواي الريد ويطيب خاطري المكلوم ونستمتع انا وطيفك بطعم الريد اريت ريدك معاي يدوم. **** اعاين ليك افكر فيك واتبسم اشوف الكحل فى عيونك سواد قدري وما بندم عيونك فيها شيئ غامض افكر فيه شان افهم وما بفهم ما اصله الفهم قسمة وانا المكتوب لى ما افهم ولو بفهم كنت فهمت من بدري انه مصيرنا نتفرق وما نتلم حواجبك ديمة مرفوعة ما معروفة من الدهشة ولا الخوف وربك وحده هو البعلم خلى حواجبك المرفوعة تستعدل وقلبك ما يشيل الهم وكان فرقتنا بتهنيك نفارق دربك المخضر ونتحمل جراح والم ونفرح لى فرح روحك نتكل الدمعة فوق العين ونزرف فى قلوبنا الدم ***** امانة عليك يا العصفورة سلمى لى على المحبوب قولي ليه مما الدنيا خلوقها وكتابا فى الازل مكتوب انه فى يوم تطل فى الدنيا روح انسان رهيف وشفيف ومن النسمة روحه تذوب ومكتوب لى انا المسكين اغرق فى بحار حبه واقيف قدامه متكتف تقول مصلوب وانسي هناك بنات اهلى انسي الحلة والجالوص بيوت الطوب وانسي معاه تاريخي من اول حلاوي وصل بلاد النيل ويمم بي مراكبه جنوب وكل الكانوا من بعده لغاية جدى ود حبوب ***** امانة عليك يا عصفورة زوريه وقولي ليه ما يزعل اصله فراقنا كان مكتوب وانه سعادة المحبوب مع غيري وسعادتي انا لمن يسعد المحبوب وما بندم على ايامي فى حبه وما اظن من حبه تانى اتوب وامانة عليك توصيه لو فى يوم غلطتنا معاك اغفر لينا يا المحبوب اغفر لينا كل زلة واغفر لينا كل ذنوب
|
|
|
|
|
|
|
العنوان |
الكاتب |
Date |
رسالة اخيرة للمحبوب | المعتمد | 01-09-05, 01:18 AM |
Re: رسالة اخيرة للمحبوب | ود الشيخ | 01-09-05, 01:41 AM |
Re: رسالة اخيرة للمحبوب | المعتمد | 01-09-05, 09:49 PM |
Re: رسالة اخيرة للمحبوب | المعتمد | 01-10-05, 01:59 AM |
Re: رسالة اخيرة للمحبوب | المعتمد | 01-10-05, 11:19 PM |
Re: رسالة اخيرة للمحبوب | aboalkonfod | 01-11-05, 02:20 AM |
Re: رسالة اخيرة للمحبوب | المعتمد | 01-12-05, 01:02 AM |
Re: رسالة اخيرة للمحبوب | عمر الفاروق شيخ الدين | 01-12-05, 01:31 AM |
Re: رسالة اخيرة للمحبوب | المعتمد | 01-12-05, 02:42 AM |
Re: رسالة اخيرة للمحبوب | omer alrubatabi | 01-12-05, 07:14 AM |
Re: رسالة اخيرة للمحبوب | المعتمد | 01-12-05, 10:16 PM |
|
|
|