هل هذه حقيقةً آراء أهل السودان في أمدرمان؟؟؟؟
أحبتي السلام عليكم،، ما جعلني أشرككم معي في قراءة الاستطلاع أدناه ليس هو حب أمدرمان المتأصل فيا ولا هي عنصريتي الأمدرمانيه التي أحاربها حتى لا أوصف بالعنصرية التي أعتبرها من الصفات البغيضة، وأُشهدكم اليوم علي براءتي من هذه المدعوة العنصرية في جميع أشكالها. ولكن هو عجبي من هذا الاستطلاع والآراء التي احتواها، ثم رغبتي في الإطلاع علي آراء أُخري بها منطق أحترمه. فهل هذه حقيقةً آراء أهل السودان في أمدرمان؟؟؟؟ وهل لي أن أقرأ آراء أخري صادقة؟؟؟؟؟؟؟؟؟؟؟؟؟ لكم الود والمحبة وإن اختلفنا حول أمدرمان أو غيرها. ملحوظة: الاستطلاع منقول كما هو وبلغته. تقدمة الاستطلاع رضينا أم أبينا فأمدرمان مدينة مؤثرة في حياة السودان إن كان هذا التأثير إيجابياً – كما يزعم أهلها – أو سلباً – كما يقول أهل المدن الأخرى، الذين يرون في أدرمان أنها سلبتهم حقاً بتمديدها الإعلامي عبر الإذاعة التي كان من المفترض أن تمثلهم كلهم، أبناء احتكروها، وحتي أغاني الحقيبة والتمتم انتزعوها منهم.... فإلي اللقاء. آراء من مختلف مدن السودان -كماقال الاستطلاع- قالت: عبدا لحليم محمد إسماعيل – الأبيض كنت متشوقاً لرؤية أمدرمان وهذا حسب ما تبثه الإذاعة عنها وكنت أتخيلها مدينة مخضرة ومبانيها كلها عمارات وشوارعها تغسل بالماء المعطر، ولكن عند حضوري لها كدت اصدم فقابلني قبح مبانيها وتراب شوارعها حتي ناسها لما خالطهم وجدتهم عاديين تماماً بل نحن في الأبيض نبذهم علماً وفناً ومدينتنا اعرق من مدينتهم وأتحداهم أن ينقلوا الإذاعة لمدة يوم واحد لمدينة الأبيض. نادية عبد الله – عطبرة والله أنا مشيت ليها مرة واحدة وما كنت متخيلاها بالصورة دي كلها طين وتراب، ما عارفه الناس عايشين فيها كيف غايتو أنا ما حا أمشي ليها تاني. بشري فتح الرحمن – شندي والله أمدرمان دي لو ما ناس الأقاليم ألجوها وسكنو فيها وبنوا عمارات جميلة ما بتقابل كل البيوت السمحة ألفيها من ناس الأقاليم الذين جابو الحقيبة والتمتم ومن قبلهم كان الناس أمدرمان بطنبرو بحلوقهم وما بعرفوا الغني ويمكن أعد ليك الفنانين ديل. الحقيبة جابها مزارع من كبوشية أسمو ود الماحي بالإضافة لأحمد المصطفي وسيد خليفة من الدبيبة ووردي من صواردة وإسماعيل حسن من الشمالية شايقي عديل كدي والكاشف من مدني وكذالك ود الأمين وأبوعركي ومصطفي سيد أحمد من الحصاحيصا وكذلك عائشة الفلاتية وأم بلينة السنوسي وأبو داؤود وحسن خليفة العطبراوي وغيرهم عيك لو ما الاستعمار عمل الإذاعة في أمدرمان كانوا ما سمعوا بيهم وكل لاعبي الكورة من الأقاليم ولا واحد من أمدرمان. عبير صديق – سنار والله أمدرمان دي ما قاعدة تعجبني أولا شوارعها ضيقة ومليانه تراب، ومواصلاتها صعبة ولكن ناسها راقيين وطيبين. أحمد الجالي أحمد – الخرطوم أمدرمان وهم كبير، عرش في عقول الكثيرين فصاروا لا يرون العالم إلا بعيونهم فأين هي من مدن حقيقية سطع نجمها فتحولت إلي قبلة تزار وعلامات تضئ وفنارات يهتدي بها الضائعون، أين هي من أصيلة وقرطاج الخ، مدن صغيرة ولكنها حفرت نفسها في الذاكرة وتموقعت فيها. النقطة الوحيدة المضيئة هي أنها مدينة الثورة المهدية وذاك زمان وهذا زمان آخر. فقط ما أرجوه من أهلها ألا يكابروا ولا يغالوا في زهوهم وتعاليمهم. عامر محمد أحمد – شندي أمدرمان مدينة ليست مصنوعة كما قال د. عبد الله حمدنا الله بل قرية وجدت صدفة ليس لان الإمام أختارها عاصمة لدولته، بل مدينة أشتات هناك ذات تاريخ وحضارة لا يحلف أحد بها، القاهرة ودمشق مثلاً، شندي لها تاريخ منذ آلاف السنين ولعب أبناؤها دوراً لا ينكره أحد، ولكنهم تمترسوا خلف السودان. الهادي هارون – كادقلي والله أمدرمان ناسها مثلنا فيهم العالم والجاهل وكل الأصناف موجودة في المدن الاخري وظرفاء أمدرمان ناس عاديين تماماً مقارنة بظرفاء المدن الاخري، ولكن الذي عمل هذه الضجة المسماة أمدرمان هي الإذاعة، التي أتي بها المستعمر لامدرمان ولا أدري لماذا أختارها وهذا سؤال موجه لناس أمدرمان لان الإجابة عنه تفسر أشياء كثيرة بالنسبة لنا، هل أمدرمان مدينة كولنيالية كما يزعم البعض وهناك قول يقول أن أهل الخرطوم أخذوا المادية والعلم من الخرطوم وأهل أمدرمان أخذوا الروحانيات. علي عبد الله – الفاشر اسمح لي أن أقارن أمدرمان بمدينتي الفاشر السلطان علي دينار وكل سلاطين الفور الذي أقاموا دولة إسلامية في الفاشر وعم خبرهم مكة المكرمة والمدينة والأزهر الشريف ولو في منطق حقوا الإذاعة يودوها الفاشر أو سنار أو الأبيض أو كوستي وبهذه المناسبة أقترح أن تبث الإذاعة إرسالها كل شهر من مدينة، دي إذاعة أولاد أمدرمان بس، وحتي الذين عملوا بها من الأقاليم يقدمون برامج تمجد أمدرمان ودا المجنني وخلاني اغني. عباس عبد الله كوستي يا زول أنا أمدرمان مشيت ليها مرة واحدة وحالف طلاق ما أمشي ليها تاني وخليهم ناس أمدرمان اجو يشوفوا كوستي والله واحد فيهم افتح خشمو واقول ان في أمدرمان.... لا كوستي تختلف عن أمدرمان لأنها مدينة جد جد ما فيها حي باسم قبيلة ولا شارع لكن أمدرمان فيها أحياء وشوارع بأسماء قبائل، وطبعاً المدينة ما كدا. عزمي إبراهيم – أم روابة أمدرمان دي كذبة كبيرة كنت قايلها مدينة لكن لما شفتها قلبي دق وزعلت من ان الإذاعة قاعدة تغش فينا نحن ناس الأقاليم ذي ما نحن نسمع هنا لندن وتمشي لندن يا سلام يا لندن مدينة تستحق انو الإنجليز اقولو هنا لندن وعشان كدا بقترح نعمل لينا مدينة جديدة وننقل الإذاعة ليها وحتي ذلك الوقت نحول الإذاعة للخرطوم لأنها شوية كدا أجمل بالذات في زمن المتعافي الذي حاول ان يصنع من الفسيخ شربات وبطريقتو دي لو خلوه حيعمل الشربات وبالمناسبة هو ما من هنا من الدويم يعني إقليمي زيي كده. استطلاع: محمد خير عبد الله المصدر: جريدة ونسه – الصحافة العدد رقم (4161) الجمعة الموافق 31/12/2004

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]