Quote: الزول البنطلونو مرفوع فى نص بطنو ومتريح وطالع العصر داك؟؟ بس يتخيل لى ده نوع الراجل الحيقع لى
ولا فى شخصية كده لاقيتا قريب ده: زول طوالى يندمك على الحاجة الاشتريتا..يقول ليك بى كم؟ تقوليه بعشرين دولار مثلا يقول ليك دى فى "وول مارت" بى تسعة ونص..تعرف النوع ده؟؟ يخليك خجلان من نفسك وشاعر بالغباوة من اى قرار مالى اتخذتو فى حياتك؟؟ يتخيل لى ياهو ده الحيقع لى..ووب على كان وقع لى..
نزار ياخ تعال نعمل بوست برانا عن "الشخصيات" ..فى ناس ما بيخلوك تتفرج فى التلفزيون: اول من الزول الفى التلفزيون يفتح خشمو هم ببدوا موضوع..بى برة..لا تقدر تتابعهم لا تقدر تتابع التلفزيون..بس اوع يقع لى ده..وفى نوع بيحب نفسو شدييييييد ..ما تنفتح سيرة الا ويوريك ان كان مهم قدر شنو فى وجود الفكرة "على الارض" يعنى لو تتكلم عن صيد الاسماك فى يوغسلافيا ولا تأثير التدخين على الرئة ولا العنف المنزلى..ولا الهندسة الوراثية برضو يلف الموضوع وهو يبقى البطل بتاعو "ده الله لا جابو لى عريس.."
اها فى النوع البتكلم ببطء وأهمية زايده فى موضوع "هباب" ساى..بعدين يركز عيونو فى عيونك..وما يديك فرصة "تزوغ" بنظرتك..ولا تهرب بجلدك..من قصصو.لاحظ الحكى بطىء وفيه سكتات فى النص..وايماءات..يعنى ..يأشر باصبعه على حاجة..تانى ما ينزل اصبعه..ده بيدخل المستمع ليه فى ورطة "اخراجية" معروفة.."ابرا منه واستبرا" تانى فى النوع القباض بالحاجات..كدى نواصل لو شفتك جيت راجع وادليت بدلوك "الكبير ده"
بعدين - فجأة - فكرت فى كلامها ده ، لقيت ليك روحى من نفس نمط الشخصيات (السغيلة) دى
أنا زول لايوق وعبيط واهبل ، والزول البيكون قاعد جمبى يتونس ، كان فى عرس كان فى عزاء كان فى صالون ساى ، ولاّ حتى كان فى السينما
يا ويلو
اول حاجة لمن أتكلم مع الجمبى تلقانى أرفس وأنضم بى إيدى وبى كرعى ، وحات الله كان البشير زاتو ولاّ بوش ، لازم أقابضو ليك ، شى لكزة فى كتفو ولاّ رصعة فى الكراع ولاّ دفره من نصو ، بعدين الهبيش ده كلو بدون ما صاحبك يحس ، يعنى بجى موزون مع النضمى وزولك زاتو ما بشعر بيهو ، بس بينجض نجاض
غايتو مرتى متحملانى كيف ما عارف ، تكون ولّفت ساى ، مجبورة خادم الفكى على الصلاة ، وماعرفت الحكاية دى فينى إلا بعد تماضر كتبت كلامها ده
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة