|
Re: شوفو العب اللقاها (Re: يازولyazoalيازول)
|
سلام يا هشام
سلام يا تولوس
وسلام يا سودان
كدى النواصل ليك شويه فى حكاية الناس السمحين
عبد الحميد خير السيد كان زول طويل القامة وطويل البال زول وسيم وسمح ورزين وصارم ومهذب وحنين
طبعا جدنا خير السيد والده أنا ما شفتو لأنو توفى بدرى قبل جدى، لكين بحكو عنو إنه كان واحد من الناس البقعد معاهم السكرتير الإدارى الإنجليزى بتاع الخرطوم كلها ويسمع منهم، يعنى لاحظ راجل "عربجى" يقعد مع أتخن انجليزى فى البلد
عبد الحميد تزوج سيدة مصرية فاضلة ما لاقيت أطيب وأحن منها والله يا هشام لحدى اليوم، وعندو ولده الوحيد، لدكتور محمد عبد الحليم خير السيد، وهو طبيب، وتلاتة بنات، من أجمل ما خلق الله من بشر، جمال فى الخلقه والأخلاق
شوف الناس ديل فى الوقت داك كانوا فى مرتبة ابناء الوزراء والقيادات العليا زى ما بقولو هسه، ولو وصفت ليك كيف كان التعامل بيناتنا ومعاهم نحن أولاد الناس المساكين العامة، والله يا هشام ما حتصدق
أطرف حاجة فى الموضوع ده تعرف شنو يا هشام
الأستاذة الجليلة تعيمة خير السيد، طيبة برضو ورزينة وفاهمة زى أخوها، والدنيا دى كلها بتريدا إلا زول واحد بس
تعرف منو؟
الوالدة، الله يديها الصحة والعافية ويطراها بالخير
كانت اصلو ما بتطيقها لأنها كانت بتفتكر إنو أبوى عايز يعرسها ابوى كان بقول ليها
إنتى ما بتفهمى، نعيمة دى أختى، ونحن رضعنا سوا واتربينا سوا
شفت سماحة الناس كيف يا هشام لما الفهم يكون كامل والعرفة تامة
اتذكر فى واحدة من زياراتى لبيت عمنا عبد الحميد وفى واحدة من غرف الإستقبال كان فى طربوش عسكرى معلق فى الجدار بطريقة جميلة وتحت منو طوالى كان فى صورة لعمنا عبد الحميد أيام كان طالب فى الكلية الحربية
انا قمت اتشالق وكان عندى حب استطلاع شديد عشان اهبش الطربوش ده واشوفو من قريب قمت طلعت فى تربيزة وقعدت اتناطا عشان انزل الطربوش، الطربوش والصورة وانا كلنا وقعنا والبرواز اتكسر وعمل صوت مزعج جدا
الدنيا كان يوم جمعة وابوى برضو كان موجود عشان يسوقنى ونرجع سوا، واتذكر والله يا هشام زى كأنه الحدث ده قبل ساعات، العمة نعيمة وزوجة عبد الحميد وواحدة تانية ما تذكرها كويس، كانو قاعدين فى الضل فى الحديقة بعملو فى "كعك" اها الناس كلهم جو جارين عشان يشوفو الحصل شنو، لقونى أنا مظلوط فى يدى والبرواز مكسر والطربوش مجدوع فى الواطا
طوالى ابوى وقع ليم فينى جلد، ودى أول مرة وآخرة مرة الوالد يدقنى فيها، تصدق
عمنا عبد الحميد حمر ليك فيهو وجاط جوطة شديدة وقال لى أبوى
ده شنو يا بابكر
الأولاد ما بعلموهم بالضرب والجلد، لأنو الحاجات دى بتخلى جواهم آثار مش كويسه لازم يتعلمو ويفهمو عشان تانى يتذكرو كيف يتصرفو، كده ما ينفعش
نفس الكلمات والله يا هشام لحدى اللحظة ترن فى اضانى زى كأنها قبل ثوانى
شفت العرفة والفهم والذوق كيف
وزولنا قال لى
بالله شوف اللقاها العب ده
الله يرحمك فى أعاليك السامقة يا عبد الحميد خير السيد
كنت نموذج متفرد للإنسان ومعنى الإنسان
وكيف يكون الإنسان
|
|
|
|
|
|
|
العنوان |
الكاتب |
Date |
شوفو العب اللقاها | يازولyazoalيازول | 08-01-06, 02:43 AM |
Re: شوفو العب اللقاها | أبوذر بابكر | 08-01-06, 03:51 AM |
Re: شوفو العب اللقاها | تولوس | 08-01-06, 04:11 AM |
Re: شوفو العب اللقاها | يازولyazoalيازول | 08-01-06, 04:13 AM |
Re: شوفو العب اللقاها | أبوذر بابكر | 08-01-06, 04:43 AM |
Re: شوفو العب اللقاها | حيدر حسن ميرغني | 08-01-06, 04:54 AM |
Re: شوفو العب اللقاها | يازولyazoalيازول | 08-01-06, 06:26 AM |
Re: شوفو العب اللقاها | يازولyazoalيازول | 08-01-06, 05:29 AM |
Re: شوفو العب اللقاها | بكري الصايغ | 08-01-06, 06:07 AM |
Re: شوفو العب اللقاها | يازولyazoalيازول | 08-01-06, 06:31 AM |
Re: شوفو العب اللقاها | رأفت ميلاد | 08-01-06, 09:16 AM |
Re: شوفو العب اللقاها | عبد الله عقيد | 08-01-06, 10:50 AM |
Re: شوفو العب اللقاها | أحمد أمين | 08-01-06, 11:55 AM |
Re: شوفو العب اللقاها | يازولyazoalيازول | 08-02-06, 03:06 AM |
Re: شوفو العب اللقاها | bob | 08-02-06, 03:08 AM |
Re: شوفو العب اللقاها | يازولyazoalيازول | 08-02-06, 03:14 AM |
Re: شوفو العب اللقاها | الصادق صديق سلمان | 08-02-06, 03:27 AM |
Re: شوفو العب اللقاها | يازولyazoalيازول | 08-02-06, 03:32 AM |
Re: شوفو العب اللقاها | Haytham Abdulaziz | 08-02-06, 03:58 AM |
Re: شوفو العب اللقاها | امير عوض الجمري | 08-02-06, 04:29 AM |
Re: شوفو العب اللقاها | بكري الصايغ | 08-03-06, 11:19 AM |
|
|
|