|
|
 أبيات (مزبوتة) فى حب حنكوشة سغمبوتة
|
الغداها إندومى
والمجهجهه نومى
المس كولا خرطومى
دى الأدتنى قدومى
حلات (الدمعة) فى إيدا
يازول تشبه الصيدا
ضفائر شعرها وجيدا
توقد نارنا وتزيدا
شوفو سنونا وبروقا
ما جلست فى تبروقة
وما بتعرف أباريقا
داير بس أضوق ريقا
حلاتك وإنتى حنكوشة
دايره زفاف مع الكوشة
شوفتك بس تسو دوشة
ويارب جلسه فى حوشا
جاتنى رسالة بالبلتوث
قالت دايره بس دبوس
من دهب أصلى فيه تكوس
وبعدو ان شاء الله تانى تبوس
وتانى رسالة بالإس إم
قالت إنت عندك كم؟
ماشة السوق تجيب ثرى إم
وأبوها حلف وقال حرم
شايله اليورو والدولار
وجنها تبدا بالبوبار
وأكلها مافى طعم زفار
بتحرق زى لهيب النار
مرة جلسنا فى ماكدون
لمست الإيد تقول معجون
حلات الشافعة فيها عيون
بقيت ولهان بقيت مجنون
صوتها نغم بيقول عمو
مشيها دلع خفيف دمو
نومها ملائكه وإتلموا
تخلى الزول يفور سمو
|
|
 
|
|
|
|
|
|
|
 Re: أبيات (مزبوتة) فى حب حنكوشة سغمبوتة (Re: يازولyazoalيازول)
|
يعني نحن أهل عوض لكن ممكن كدا تقول علينا درجة أولى
جاتنا حنكوشة مرة من الخرطوم من أهلنا
طبعاً الحلة مافيها كهرباء
والموية من الماسورة للزير
والزير نفسه مشترك للكل
الناس والحمير والبقر والخيل المسومة
المهم الشافعة تلاتة يوم ماشربت ليها موية باردة
وطبعاً لو كلمتك بي ملاح البامبي والقرع حاتفطس
ماعاوز اتكلم فيها
قال أندومي قال !!!
المهم الشافعة دي قالت زهجت لأننا ماعندنا موية باردة
قامت قالت عاوزة تمشي أهلنا
وديل غرب المناقل
تركب لواري وكارو ومشي بالكرعين عشان تصلهم
ومن يزورونا بنتفسح فيهم وبنقول ليهم أهل العوض
المهم قلنا للجماعة خلوها تمشي
عشان تجي مقتنعة
تصدق أول ما وصلت لقت يادوب الموية جايبنها بالصفيحة
وعلي بالطلاق أزيار ما عندهم
بشربوا الموية في بث مباشر
يعني من الصفيحة للخشم
زولتنا بكرة جات راجعة
قلنا ليها 00 اها لقيتي الجماعة كيف
قالت والله انتوا بالنسبة ليهم زي ناس المنشية !!!
قال سغمبوته قال !!!
حكمة اليوم
أسوأ أنواع المراهقة هي التي تأتي بعد الأربعين
| |
|
|
|
|
|
|
|
|
 Re: أبيات (مزبوتة) فى حب حنكوشة سغمبوتة (Re: Mustafa Mahmoud)
|
وليم أندرية
شايف الحكم عجبك 
قد تأتى مراهقة بعد الأربعين ، ولكن لا أعرف إن كانت اسوأ أو أفضل ، إنما عموماً (تصابى) الشيوخ ، شىء غير جميل ، ولكنى أؤكد لسعادتك إننى أكتب ما أكتب بغرض إسعاد (نفسى) أولا ثم الآخرين ،
تحياتى
دكتور مصطفى : هى قد تكون 21 ولكن بالتأكيد ، بعد خروجى من المراهقة الأولى ب 21 سنة
| |
|
|
|
|
|
|
| |
يازولyazoalيازول
حيدر حسن ميرغني
saif massad ali
ibrahim barssi
خضر الطيب
ابوحراز
عمر عبد الخالق سعيد
abas
Mustafa Mahmoud
willeim andrea
خدر
فيس بوك
تويتر
انستقرام
يوتيوب
بنتيريست