Quote: ديل الدرنية يا دفع الله الفي حي المدنيين
|
+ إتْ عارف الخيت دا ما داير أقولليك فك دربو
لا ، بالعكس يا دوبك انعدل و بقى راس بي راس،
يلا نتونس برانا كدي نغرف فيه برفقٍ لامن تلقاني واقف
في قفاك و أقوليك ابتسم.. إتا داخل على قبة جدك ود شطوط.
+ الدرنية ديل معرس منهم عمي شيخ ككر جدودك الأعراك
و الوريث الحالي للسجادة القادرية الجيلانية ابنه / العارف بالله/
عبد الرحمن بن دفع الله بن الشيخ حمد الناجي، أمو عمتي ستنا بت الحاج
ود أب عاقلة ود الناجي و د عبد الله و د حمد النيل ود اللمين ود حمد العمسيب.
+ تحين سمعت فيحاء محمد علي في مدحة: محمِّر بحرو ديمة ملان.. حمد
الناجي يا عطشان دي متل شغل يا عطشان و البحر جنبك (لإسحق الحلنقي).
+بي موناصبة المدنيين ، مرة في منتديات و د مدني ، قام واحد ظنيتو من الدشيناب
ديل ، الله يرحمه الفاتح أبو طلبية ومعاه كم واحد كدا يمارسو نوع من العنصرية كتبو
بوست بعنوان ود مدني مدينة مزيفة والفكرة أنها تعاني من غزو العرب الروس
من شرق الكبريوغرب الكنار. يقولليك:( بقى الواحد يحصى من نومو يلقى
جارو زول من الفعج و لا أم طرطارة و لا كمل نومك و حشرو عباس).
+ الشاهد أخوك العبد الفقير إلى الله دخلت عليهم وريتم المشكن برا بصل
, و إنو مؤسس مدين اللي هو محمد السُّني لمَّا جاءنا وافداً إلى أبي حراز،
جدودك ناس أب شراء كان دمهم حامي بلحيل نصحوه يمرق من منطقة
عملياتهم وقاللولو : شيل بقجتك دي و أمش أكطع البحر بهناك
أكجرلي ضُل تحت شدرة تتتعبد تحتا لامن ربنا يفتح عليك بمن
يآنس عزلتك المجيدة. فكانت تلك الخميرة التي خُبزت
منها ما تسى الآن عدن النيل الأزرق مدني.