لاقيتو في ممر في المستشفي وكعادة السودانيين دخلنا مباشرة في موضوع الحرب والجيش/ الفلول vs الجنجويد وشرعت مباشرة في الكلام عن الموقف المتأزم للجيش ومحاصرتو داخل معسكراتو و قيادتو العامه ومهندسينو وكرريهو ووادي سيدهم وشجرتو وفشلو التام في تحقيق اهدافو المتمثلة في دحر التمرد وانهاء الاحتلال الجنجويدي للخرطوم و استعادة هيمنتو على عدد من الولايات الغربية والانزعاج الكبير داخل اروقة قناة طيبة واقزامها طرحه وآخرون و الخ الخ الخ ..
الموضوع ده بجي طقم واحد زي ما عارفين
اها الزول ده اتخلع خلعة ما طبيعية كلو كلو .. وبدهشه حقيقية قال كلامي ده غلط و ساعة الحسم قرببة جدا وما النصر الا ساعة و تكتيك الجيش وايقاع انتصارو المؤكد ماشي زي الساعة السويسرية
ما خلى ليهو (ساعة) حايمه الا وقالها .. التقول سيدنا روليكس 😊
سكت مساااافة كده .. واخدت دهشتي تمام التمام ثم ايقنت بالحكمة القائلة بأن القحاته من المريخ والبلابسه من زحل ..
المهم عزمني شاي كرك و ايق اند تشيز تشاباتي شلتهم تيك اوي واكلت في مكتبي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة