الحقيقه حول نهب و سرقات المنازل .. *هل يمكنك العودة إلى الخرطوم الآن؟*

Quote: مالك يا قباني بقيت زي دكتور المشرّف بتمسك المثال من ضنبه. مثالي واضح وهو عن التقبُّل عمومًا، وليس تطابق الحال بين السودان وكندا، وكذلك مثالي عن أوباما وسوناك اللي مقصود منه أنه السودانيين الجلابة الآن "أكثر انفتاحًا" فيما يتعلق بتقبُّل أن يحكمهم واحد ما جلابي. إنت بعضمة لسانك قلت الجلابة ما بشوفوا غيرهم سودانيين، وأنا ما غالطتك في الكلام ده، بل استوقفتني كلمة "تام" دي اللي أطلقتها بدون أي قياس. ملاحظتي على كلامك أنه الحال ما ياهو نفس الحال زمان، بل في تطور وإن كان بطيئًا في المجتمع بشأن تقبُّل فئات المجتمع لبعضها. ولما أقول في تطور وأنه الحل تدريجي معناها أنا أقرّ بكلامك ولكن أختلف معاك في حكااية أنه تقبُّل السودانيين لبعضهم في الخمسينيات والستينيات ما زي تقبُّلهم لبعض الآن. إنت شكلك عايز الكلام يجي منك ولو زول غيرك وخصوصًا جلابي قال نفس كلامك بطريقة تانية بتعتبره عدم تقبُّل للآخرين. ده مثال تاني لفكرة التقبُّل وارجو إنك ما تقول ما عنده علاقة. زمان لو اتقدم واحد لواحدة من نفس الحلّة خليك من قبيلة تانية كانوا بستشيروا أولاد الأعمام والعمات والخيلان والخالات وإذا ما في واحد منهم دقّ سدره وقال بيغطي قدحه بعد داك ممكن يوافقوا على الغريب من نفس الحلّة. الآن الكلام ده ما حاصل زي زمان والناس بدأت في التداخل والتصاهر. الأجيال الجديدة قطعًا أفضل مننا في هذا الجانب. أنا لاحظت يا قباني أنه عندك آراء متشددة وفي كلامك عن حلها بتكون ما واقعي. والملاحظة التانية أنك بتتعامل مع المشاكل المجتمعية "المزمنة" تعامل المشاكل بين الأفراد. المشاكل المجتمعية المزمنة عايزة زمن طويل للحدّ منها وليس معالجتها تمامًا، وجزء من العلاج بيكون من حراك المجتمع نفسه بالإضافة لعوامل أخرى، وفي هذه الحالة الهجرات الداخلية والخارجية والتعليم ووسائل التواصل الحديثة.