في كم كذا منشور او تعليــق صادفني في الفيس او عبر الواتساب بلقى كلمة زواطة او اغاني زوط.. الحقيقة ما ركزت مع الكلمة شديد بدءاً افتكرتها زي زووط الكورة بتاعت المكاواة او كلمة تحمل معني رتابة اللحن الدائري والنقزيبة البتتميز بيها اغاني الربابة او الطنبور سواء في شمالية الشايقية او شرق الهدندوة والا كردفان.. ولأني عموماً ما بحب اغاني الربابة وبتضرس لي اغاني الطمبور وتررن تن ترررن تن كجك كجك كجك وعباطة الصفقة والشنبات الماعندها وجيع فما اشتغلت بمعني الكلمة.. من الصباح صادفني منشور بيتكلم عن تمدد اغاني الزواطة وناس زوط.. ونسبة للفضاوة والفراغ وقلة الشغلة هسه قلت اعرف قصة زواطة دي شنو وهل بتحمل معنى سالب او موجب ام زيها وزي قونة وغنَاي وطمباري..
فلقيت في الأساس انه معني زواط في اللغة العربية بتعني الزول الأكال اب لقمة غليدة البيدبلها ويبلعها سريع سريع فقلت احتمال آآآي نعم عشان ناس الربابة والطمبور بتاعين تدبيل لحن وبيجازوفوا الاغنية سريع..
فيديو للشرح :
لكن بعدها لقيت انه المعنى حقيقة سالب جداً وهو واحد من حركات ولاد قلبها ناس جلابية بيضاء مكوية اطلقوها لمحاربة سيد الفنيلة البيضاء الكاتب عليها الريدة مستحيلة،
02-01-2023, 01:07 PM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
ـــــــــــــــــ في الحقيقة بنزل الفيديوهات دي وما بسمع منها اكتر من حتة اني اتاكد من انه الفيديو شغال لانه دا ما جو وفضاوة الزول يخرب بيها اضانه بنقزيبة لحن طنبور.. لكن للضرورة احكام حتى يستبين المراد قبل ما الواحد يتكلم عن الدلالة السلبية لكلمة زواطة
02-01-2023, 01:20 PM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
ودا قال ليك بمثابة الأب الروحي للفنانيين ديل اسمو عبدالله ود دار الزين :
طبعاً الفنانين ديل عندهم جمهور ضخم ومعجبين تفوقوا على جماهير الدولية والجبلية ونانسي ارسالية وحتى ود المزاد.. الاسبوع الفات جاء واحد منهم في حلتنا بقرية كنور لاحياء مناسبة عرس .. قولوا بس ماشاء الله آلاف مؤلفة وحكي لي من حضر الواقعة انه اهل المناسبة استعانوا بالشرطة والاحتياطي والشرطة العسكرية لضبط الحشود التي توافدت من العصر لحضور النقزيبة في دلالة على القبول والحضور والرغبة من جماهير وعشاق هذا النوع من الاغاني.. زي ما انه هسه متأكد في كذا واحد بيصرررج في سنونه ومتضايق انه كيف اتكلم عن اغاني الطنبور وحنين الشايقية بعدم رغبة وكجنة في اني استمع ليها.. لكنها الاذن وما تعشق :)
02-01-2023, 01:35 PM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
وهي في الاساس جاية من مصطلح عرب زوط.. وللحقيقة للمرة التانية أول مرة اسمع بانه في ناس بتطلق علينا كلمة عرب زوط اليوم .. كنت مفتكر الحكاية مرتبطة بالاغاني وأداتها اللي هي الطمنبور كما اسلفت فقط ولم اعرف بانه في زول بيقول ليك عرب زوط الا الليلة والبيقول ليك زوط دا في البدء تفهم انه هو زول شايف نفسه حضري من مدينة وفجة متطورة فيها شارع زلط وكهرباء واسانسير وواي فاي وداندرمة في علبة بمعلقتها ما في كيس.. بالاضافة أنه بيكون مثقف وفاهم وبيعرف يكتب انجليزي وقد يستخدم الفنرسية وسمع اقلاها بمظفر النواب وواسيني الاعرج وبيعرف ايش يعني فكـ العرش.. دا بيقولها في مواجهتك انت كزول اقليمي قروي من البادية ساي جاهل اخر ما وصلك من ثقافة مسلسل ليالي الحلمية واقصي طموحك في العولمة تركب عجلة حسن تسريحة او تضوق عدس الوابل.
02-01-2023, 01:40 PM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
زي ما اسلفت سابقاً مصطلح عرب زوط واغاني الزواطة بدلالته السلبية هو نتاج إهتزاز عرش الاغنية الامدرمانية اللي عممتها النخبة المركزية في اذاعتها واعلامها الحكومي على مدي عقود باعتبارها هي الموسيقى الرسمية للدولة السودانية زيها وزي الجلابية والعمة كزي قومي متجاهلة كل الألوان الموسيقية الاخرى للشعب السوداني قبل كدة تكلمت عن انه اكتر إبداع وصلنا بعد قلع نظام الانقاذ وعوار الطيب مصطفى من الاعلام هو علو كعب اغاني القونات وموسيقى الزنق وانتشارها في مختلف وسائل الاعلام لدرجة انه الفنان المبدع نيجيري اصبح من وجوه الاعلام الرسمي والجبلية بتقعد جنب عصام محمد نور المتأفف .. ودا كله بالتاكيد تهديد لناس حقيبة الفن وأصول الغناء العربي :)
02-01-2023, 01:58 PM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
ول أبا حيدر ما قصرت .. ناس المركز ينكربوا .. جمهورنا في الشمال والشرق والغرب .. بدأ يستمع للأغانى التى تمثله وتمثل تراثه وهويته .. ما أجمل هذه الزوطات .. أو أي كان إسمها ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
HAIDER ALZAIN
Biraima M Adam
فيس بوك
تويتر
انستقرام
يوتيوب
بنتيريست