بس أول مرة أعرف إنو سيدي الحسن الحلَّم من و بي خشمو ما تكلم - ما من سُلالة المراغنة، و إنو جاينا من بلادي فاس الما وراها ناس . دي معلومة جديرة بالتبوثيق . -------------------------------------------------------------------
نستأذن اخونا حيدر الزين
اخي ود الأصيل
سيدي الحسن حلم بي خشمه ما تكلم المقصود هو السيد الحسن اب جلابية ود الامام الختم شيخ الطريقة الختمية . السيد الحسن اب جلابية مولود في مدينة بارا ( ما شفت مويتها حلوه كيف ) والدته من مدينة بارا وهي السيده الفضلي رقية بت جلاب تزوجها السيد الختم و هو جا من مكه بي العقبة بي فوق مصر و شق السودان عن طريق الاربعين لي حدي ما وصل بارا سال من منزل ناس ود جلاب و لما وصلهم سال من بنتهم رقية قالوا ليه مشت الفزع . لما جات و كانت في مقتبل العمر طلب الزواج منها و تزوجها و مكث معهم قرابة ال 6 شهور و رجع الحجاز عن طريق مصوع و قال ليهم اكان جا ولد سموه محمد الحسن و رزقت بولد و سموه محمد الحسن . رجع الختم بعد 8 سنوات عن طريق سواكن و نزل في التاكا و الشريفة رقية بت جلاب جابت ولدها و جوه في كسلا .
طيب شريف من مكه ليه جا تزوج في بارا سنة 1775 ميلادية في زمن صعب و منطقة ريفية لا يعرف عنها شئ . هنا الكلام يطول و اذا اتكلمنا اجوك ناس محمد الزبير اطلعونا كفار و ناس قبه اطلعونا ناس كروش سكات ساكين الفته . .
ده قصة السيد الحسن الحلم بي خشمه ما اتكلم . السيد الحسن اب جلابية ولد الامام الختم . السيد الحسن مدفون في كسلا جبل التاكا حي السواقي.
اما شيخنا حسن ود حسونه ده قصته براها جاء والده من المغرب و تزوج من بنات الشيخ حمد اب دنانه ( سبعه بنات ولد اولياء السودان الكمل و ما همل ) في منطقه الدبه و انجب الشيخ حسن يعني امه سودانية و ابوه مغربي . تبحر في علوم الشريعه و فتح الله عليه بعلم الحقيقة و كان الشيخ حسن ود حسنوه الاحيا بغاره . له غار طويل كان يتعبد فيه و حد الغار وين ما بنقدر نتكلم عشان ما نط لينا محمد الزبير و الحمد لله بالنسبه لاخونا قبه ما في ملئ كروش و لا حاجه هنا في غار الشيخ حسن . الشيخ حسن ود حسونه انجب بنات و له ذرراي في منطقة شرق النيل و وسط الجزيره . . يا ود حسونه من المدفونه يا ود بدر من الفقر يا ود كنان من محن الزمان ود كمان قصة الشيخ حسن ود حسونه الحقنا و افزعنا .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة