ما هو رأي حبايبنا الجمهوريين في تطبيق الحدود الإسلامية؟!

Quote: سلام للجميع هنا * يا أبوبكر عباس ، انت قلت لعادل : (لكن في حاجة ناقصة لفهمك للفكرة ، ما عارف أوصلها ليك كيف ؟!) . * لا ـ عادل عبد العاطي ـ مافي حاجة ناقصة في فهمو للفكرة ، هو فاهم الفكرة كويس وعارف تماماً مرمَى كل كلمة قالها أو كتبها الأستاذ محمود محمد طه في الفكرة الجمهورية . * لكن مشكلتو عندو حاجة في نفسه ـ تجاه الأستاذ وتجاه الفكرة ، الأستاذ محمود وفكرته قاعدين لنوع عادل دا ـ فوق قلبهم ـ إن جازت العِبارة ـ عشان كدا أكان لاحظتَ في كتابته بيلوي عُنق كتير من النصوص في الفكرة ويخرجها من مضمونها ومن سياقها ـ عشان يصل للغاية ال في نفسه . * هو بفلسفته وتخريجاته ال بيضلل بيها نفسه ويضلل بيها القاريء البسيط ـ داير يقول للناس " أنا " ، داير يثبت نفسه للناس كمفكر أو كمُصلِح إجتماعي عندو حلول جذرية لمشاكل حياة الناس في المُجتمع ـ لكن حاسي أو شايف انو الأستاذ محمود وفكرته مزاحمنو ، قاعدين ليهو في الطريق ـ قافلين عليهو الشارع . * وطبعاً ـ أي زول من حقه يثبت نفسه بالصورة ال بيرتضيها ، لكن ما على حساب الآخرين ، وما بإلصاق التُهَم والإسقاطات الشخصية على الآخرين ـ إذا عندو ضابط أخلاقي . * هو بدل ما يعتمد على النقد الهدَّام وإلصاق التُهَم والأوهام بالآخرين ـ أحسن يقدِم طرحه وإنتاجه الخاص بيهو ـ أكان عندو إنتاج أو عندو حل لمشاكل حياة الناس في المجتمع . * هو إنسان مطلِع ومُثقف ، وعندو مقدرة على الكتابة والإقناع ، وعندو مقدرة على التضليل ، والأستاذ محمود محمد طه ما ماسكو من رقبتو ، ولا كاتم نفسه ـ ما قافل عليهو الشارع ـ زي ما بيعتقِد أو يتوهَّم . * أكان عندو فهم أو عندو شيء داير يقولو للناس ـ الباب مفتوح ليهو ولغيرو . * و شعار الأستاذ محمود ، الخالد : " الحُــرية لنا ولسـوانا " .