أسئلة للإخوة الجمهوريين ، دالي

Quote: يا أخ علاء * في حاجة عايز أوضحها ليك ولغيرك ـ هي أنو أنا ـ الصديق الزبير ـ عضو المنبر دا هنا ، ما جمهوري ـ (بمعنى اني منظم) ، ما منظم ـ سياسياً ـ ولا عندي أي إنتماء ـ والكلام دا قبل كدا ، قلتو هنا في منبر سودانيزاونلاين . * ما عندي أي إنتماء ـ مواطن سوداني بسيط وعادي ـ زي كل الناس . * أما بخصوص الفكرة الجمهورية ـ عندي قناعة تامة بإنها هي الحق و هي الحل والمخرَج للمسلمين في كل العالم ـ دي قناعة . * وحقيقة ـ أنا ما محصور في فكر الأستاذ محمود محمد طه ، فقط ـ في مفكرين وكتَّاب آخرين ـ غير محمود محمد طه ـ قريت ليهم واتأثّرتَ بيهم ـ لكن الأستاذ محمود عندو الأثر الأكبر في تكويني ـ بحُكم الموطن واللُغة واللهجة . * البوست دا هنا ـ الأسئلة ال فيهو أساساً هي مطروحة وموجَّهة للإخوان الجمهوريين ـ لكن أنا اتداخلتَ ـ بناءاً على قناعتي بالفكرة ، وبحسب فهمي فيها ـ عشان كدا شاركتَ في الإجابة على بعض استفهامات صاحب البوست . * دا للتذكير والتوضيح . ** * طيب أرجع لكلامك انت عن آية الشورى . * عايز اقول ليك باختصار : آية الشورى ـ في فكر الأستاذ محمود ـ ما آية ديمقراطية ، هي آية وِصاية ـ وِصاية الرشيد على القُصَّر ـ (قُصَّر في فهمهم لمعنى الحُرية الفردية ، وفي تحمُّلهم للمسئولية أمام الله) ـ عشان كدا المُستشار فيها ـ (في آية الشورى) ـ رايو ما مُلزِم ـ الأغلبية المُستشارين القاصرين ، رأيهم ما مُلزِم للرشيد ـ لأنهم قاصرين ، وعند الأستاذ محمود ـ الديمقراطية ما موجودة في آية الشورى ، موجودة في (فذكّـِر إنما أنت مُذكّـِر * لستَ عليهم بمُسيطر) ـ دي آيات الديمقراطية ـ حسب الأستاذ . * في المستوى دا ـ الأغلبية المُستشارة ، رأيهم مُلزِم وواجب التطبيق ـ ما مُجرد إستشارة فقط ، الأغلبية في المستوى دا ـ رأيهم مُلزِم ـ لأنهم فاهمين معنى الحُرية الفردية ، وقادرين على تحمُّل المسئولية ـ أمام الله . * دا المقصود ـ حسب فهمي ـ في فكر الأستاذ محمود ـ من آية الشورى ، والمقصود من آيات الديمقراطية . * وشرح الكلام دا مُتاح بإستفاضة ـ لو في حاجة ما واضحة ليك ممكن ترجع ليها ـ تقراها أو تسمعها من الأستاذ محمود ـ مباشرة ـ في موقع الفكرة ـ في المحاضرات والكُتب ـ إذا اقتنعتَ بكلام الأستاذ ـ أهلاً وسهلاً ، وإذا ما اقتنعتَ ، أنا ما افتكر اني ح أقدر أشرح ليك الفكرة ـ بصورة أوضح من شرح صاحب الفكرة نفسه . * في كلامك انت الفوق دا ـ شايفك جايب ليك نَص منقول عن الغزالي ـ من كتاب إحياء علوم الدين ـ في فلسفة الأفعال . * النَص ال انت نقلتو ـ عن مبدأ الأفعال عند الغزالي ـ النَص دا علاقتو شنو ؟ بالشورى ال بنتكلم عنها دي ؟! * عايز تقول شنو انت ؟ أو عايز تصل لشنو بالضبط ؟!