الليلة يا حليلك يا أم شارلس يا أم وشاً ما عابس!! و يا حليلك أم يا اندرو أم جمالاً ما بيقدرو، يا حليلك يا أم ادورد ست الصرح الممرد، ويا حليلك يا أم آن يا الحكمتي لحدي السودان، انشاءالله البركة في الجنيات.
سمعنا تِحِت تحت قالوا دخلت في غيبوبة بسبب الخوف والخُلعة من يوم كلام البرهان ومطالبته بالتعويض والاعتذار عن معركة كرري، غايتو الله يكضب الشينه و يستر علينا، منتظرين شهادة الوفاة عشان نعرف الأسباب.
لكن المستشار الثقافي للرئيس دقس، ممكن بريطانيا ترفض تدينا تعويض لسبب بسيط (لأن الأسود الضارية خاضوا اللهيب وشتتوا كتل الغزاة الباغية وما هان فرسان لنا بل فرّ جمع الطاغية) دا ما كلامنا !؟ الناس دي شردت عديل، المهم بعض الناس بعد كلامهم دا ما بيقدروا يمشوا يرفعوا ﺍﻟﻔﺎﺗﺤﺔ، اها دي بدل نثريات و سفريات الله ريحنا منها.
الجماعة فات عليهم فراش رهيب، قال ليك مُلاح التقلية دا يلاقيو فيهو بالصهاريج، وينقلوا فيهو بالبراميل بكارو الحمير، والعصيدة دي ها زول ها اسكت ساكت يقطعوا فيها بالدلو حق الكراكة تقول لي مهيوبة! طبعًا التيران والخرفان ديل كلامهن براهو.
لكن بصراحة رئيسة الوزراء البريطانية الجديدة دي "ليز بنت تراس" البالغة من العمر ٤٧ عاما وهي اصغر من نصف عمر الملكة، كراعها حارة شديد ياريت يسلفونا ليها اسبوع واحد، و النصيحة حاجة اليزابيث ما صغيرة عاشت ٩٦ عاماً ميلادياً اي ما يعادل قرن هجري كامل حضرت من زمن الجدري والطاعون لحدي الكورونا، قال ليك ليها اكتر من ٢٠ سنة بتصلي جالسة، ومازلنا منتظرين اراء الفقهاء هل يجوز ان نترحم عليها ام لا!؟
بعدين ما تنسوا انها كانت قد ذكرت ان نسبها ينتهي الى الاشراف اي والله صحي عند الجد رقم ٤٣ تلتقي بالنسب الشريف، يعني السادة الأشراف يمكن يفرشوا قبلهم زي ناس الدنيقيلة الشرفة والشريف مختار والشريف بركات والشرفه و الشريف الدسيس والشربف يعقوب وغيرهم!!
الملك لله وحده، الزولة دي حكمت ٧٣ عاما فقط لاغير وحكمت مشارق الأرض ومغاربها، وزارت السودان عام ١٩٦٥م ردا لزيارة جماعتنا الزعماء المشو باركوا ليها الانتصار بعد الحرب العالمية التانية، وتنعموا بالديباج والحلي والحلل، وخلعت عليهم الألقاب و الاوسمة والأنواط والهدايا و كمان رجعت ليهم سيفهم.
طبعاً نحن اصلنا شعب ما محظوظين لكن تقول شنو القسمة والنصيب هسع كان يومها داك امها قبلت كلام الخليفة و عرست يونس ود الدكيم كان بقت بتنا عديل وتكون غرتنا لي صُرتنا لكن قسمة الوليدات ديل.
اها الحاجة قبل الأخيرة راجعوا الكشف الانقليز ديل هسع في غرق المناقل دي ختوا لينا كم !؟ عشان ما يمسكونا بي مشروع الجزيرة، دا انتهى ما فضل فيهو ولا سرايا ولا مكتب زراعي ولا قنطرة ري واحدة، اها والسكة حديد دي كلها اتدمرت واتكسرت وبعناها خرد.
تنبيه للإخوة الرياضيين عامة وعشاق البريميرليغ خاصة بان بريطانيا قد اعلنت الحداد لمدة 12 يوم على وفاة الملكة اليزابيث مما يعني توقف جميع الانشطة الرياضية لجولتين يعني بعد التفريقة والسبب ناس الفراش الكتيرين ديل يدقوا ليهم صيوانات وين غير ملعب ويمبلي!؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة