|
|
|
 Re: محكمة بكراوي: ما بترضى زول شايل رتب في شنط� (Re: عبدالله عثمان)
|
*محكمة انقلاب بكراوي تعاود انعقادها وافادات مثيرة لضباط الصف*
المساعد محمد حامد اسماعيل عبد الله: الاساءة للجيش باتت في كل مكان وكمان جاتنا مليشيات تلبس كاكي وعلامات ضباط لا تاهيل ولا دورات..
تحركنا عشان كرامتنا وكرامة الجيش ما تكون واطة وما ندمانين.. ابدا ابدا
المساعد مقدم بكر مقدم: انا واسرتي وقبيلتي كلها لو عبد الباقي خاض نار بنخوض وراءه
لمن عرفت بكراوي قائد التحرك طوالي عبيت عساكري وشونت ذخايري وبقيت جاهز وللاسف هو قال نوقف
نحن ناس اتربينا في الميري.. ما بنرضى واحد يجي شايل رتب في شنطة يوزعها زي البسكويت علي اولاد عمو؟
الخرطوم - مونتي كاروو ٢٤-٨-٢٠٢٢
بدات الاسبوع الماضي محكمة انقلاب اللواء عبد الباقي بكراوي عقدت جلساتها بمباني اكاديمية كرري للتقانة العسكرية في منطقة وادي سيدنا شمال امدرمان برئاسة اللواء الركن عباس محمد عثمان، بعد توقف لقرابة الشهر بسبب عطلة الاعياد، واستمعت المحكمة التي انعقدت بكامل عضويتها في هيئتي الاتهام والدفاع الي اقوال المتهمين من ضباط الصف المشاركين في المحاولة الانقلابية والذين جرى استجوابهم بواسطة اللواء ابراهيم جالي، وبدات الجلسة بتلاوة اقوال المساعد حاتم عبد الرحيم مختار بشير من سلاح المدرعات والذي افاد بحسب ملخص الاقوال الذي تحصلت عليه مونتي كاروو بالاتي:
تكتفي لجنة التحقيق بتوضيح لحظة تعارف المتهمين مع قائد الانقلاب كما جاءت في افادتهم حرفيا ثم الدور المناط لكل منهم في تنفيذ العملية الانقلابية وبعدها سالت اللجنة عن الدوافع للمشاركة في هذه العملية وختاما سالت اللجنة كل منهم هل هو مذنب او نادم علي مشاركته ام لا.. وفي ختام ملخص الاقول التي تم رفعها للواء معتصم عباس رئيس اللجنة العليا..
*المساعد حاتم عبد الرحيم ما ندمان علي المشاركة في التحرك.. قال: وقفو حقنا للدماء*
انا المساعد حاتم عبد الرحيم الموطن الاصلي من شندي. اخدم بسلاح المدرعات الشجرة. جأني اتصال من زميل لي وقال لي ان اللواء عبد الباقي وصل من مصر ويريدني في امر هام وانا بعرف سيادتو عبد الباقي من، تقريبا، ثماني وعشرين عام اشتغلنا في عدة قطاعات في حوش المدرعات وهو رجل ثقة وقائد بمعني الكلمة ما عاوز امدحه هو زول معروف اساسا بمواقفه القوية وانحيازه لعساكره وزول حقاني، المهم مشينا زرناها وكفرنا ليه وحمدنا لله السلامة ولاحظت انه في عيونه كلام كتير انتظرت حتي طلع الناس لانه بيته كان ملان خلق علي ضيق مساحة الشقة في الاشلاق لكن المهم لقيت لي خمسة دقائق جلست جنبه والطرف الصناعي في رجله قلت له سعادتك طمنا عليك قال لي انا بخير لكن انتوو طمنونا علي المعاكم قلت له الحال ما بيسر قال لي الكلام دا ما وقته لكن لو في طريقة لاصلاح الحال انت جاهز ما قدرت اتمالك نفسي واهتزيت. وقفت وقلت له انت عارف جوابي المهم رجعت منه افكر طول الليل وما تكلمت مع زول حتي اتصل بي هو فجر اليوم - يوم الانقلاب وقال لي تعال عاوزك مشيت لقيته في بوابة السلاح لابس ميري واول مرة اشوفه علي كتفه رتبة لواء ومعاه ضباط وعساكر اديته التحية كانت الساعة حوالي ٢:٣٠ فجرا وكبرت شكرا لله.. الدافع للتحرك كان اولا حالة البلد عامة لكن الجيش يا سيادتك حالته ما بتسر وانا فهمت انه الموضوع الغرض منه اعادة الهيبة للمؤسسة العسكرية وتصحيح الاخطاء الحصلت في الخمسة وثلاثين سنة الاخيرة انا دخلت الجيش دا عمري ٢٠ سنة والان خدمتي توصل اربعين سنة خدمة عسكرية انا بربي العسكري النفر والمستجد من مركز التجنيد الي ان يصير صول مراحل ومراحل اجي القي ولد عمره ١٦ سنة لابس رتبة نقيب وواحد يصرف رتب لابناء عمه وابناء خالته من المخلاية دي اسمها فوضي انا عشت في الجيش وفي العسكرية اكثر مما عشت مع اهلي واولادي ما اقبل الفوضي دي السياسة لها ناسها ولها فهمها لكن العسكرية دي زي الطب والجراحة عندها نظام ما تقدر تجيب نجاز يعمل غسيل كلي ولا طالب طب يعمل جراحة قلب الرتب لها وقارها…
ما ندمان علي المشاركة في التحرك دا لكن بعد ما جاءنا السيد القائد العام في الشجرة وقال وقفو حقنا للدماء وفهمنا انه الرسالة وصلت، لووو سيادتو عبد الباقي ادانا التعليمات وقال لنا ”Go“ والله لو اركب في الدبابات دي بنفسي والله ما اوقف الا احقق شعار والمدرعات الحقيقي النصر او الشهادة..
الصول محمد ابراهيم: اشرفت على قطاع مهم.
ثم تلت اللجنة ملخص اقول الصول محمد ابراهيم حسن الملك التي ادلي بها في لجنة التحقيق ظهيرة اعتقاله والتي قال انه كان موجود في السلاح وقت عرف ان هناك تحرك فانتظم في كامل زيه العسكري وعرف من زميل له ان التحرك بقيادة اللواء بكراوي وانه يعرفه شخصيا ويثق تماما في دوافعه الوطنية واستبشر بهذا وعلي الفور ذهب وحضر نفسه وتم تكليفه بالاشراف علي قطاع مهم (…لم يتم ذكره في محضر الاقوال…) ثم بدات اتابع عملي بصورة روتينة وبصراحة يا جنابو كنت متحمس جدا نعم الزول اللي قال لك المساعد ابراهيم كان متحمس كلامه صاح، بالله يا سعادتك انت لواء ومعاك حضرات ضباط جنبك الان كلكم درستوا كلية حربية ومشيتو معاهد تدريب وكورسات خارجية وداخلية وامتحانات ترقية واركان حرب وما عارف شنوو تقبلوو كيف ناس جايين من الخلاء يوزعووو رتب زيكم واعلى منكم علي اهلهم واولاد عمهم وتديهم التحية كمان.. السكوت علي مثل هذا والله عيب وبكراوي انحن بنعرفه راجل عشان كدا مما سمعنا اسمه ركبنا في الشغل معاه لكن فرمل بعد ما تدخل الفريق اول برهان وقال المشاكل بنحلها والناس تصبر، نحن عملنا ارضا سلاح وخلاص..
في ختام اقوله افاد المساعد انه غير نادم ابدا علي المشاركة في المحاولة الانقلابية.
*المساعد محمد حامد اسماعيل عبد الله: الدوافع عندي قديمة.. نحن ناس عساكر شرفنا في الجندية واحترام الناس ليها *
اخذت الجلسة استراحة (عشرة دقيقة صفا) ثم عاودت الانعقاد مرة باخري بتلاوة اقول المساعد محمد حامد إسماعيل عبد الله الذي افاد بانه كان في الاستعداد في تلك الليلة وسمع بحركة في رئاسة السلاح وذهب واستفسر ولم تصدق عيناه عندما راي اللواء عبد الباقي يدخل وهو في كامل زيه العسكري برتبه لواء ويمشي علي عصايات قال جريت واديته سيادته التحية الساعة كانت ثلاثة الا شوية فجرا ففهمت علي طول انه في شئ حاصل وقلت له سعادتك والله الناس كلها جاااهزة قال لي جاهزة لشنو يا حضرة الصول قلت له سعادتك انت اول مرة اشوفك لابس لواء والمكتب دا من ثلاث سنوات انت ما جيت والان الساعة ٣ فجرا يعني جاهزين نعمل حولية ؟؟ ما انقلاب انقلاب خلينا نسمع اخبار سعيدة. سعادتو بكراوي نظر لي وقال لي يا زول تعال نورني في دقيقتين جاهزيتك.. دخلت مكتب قائد سلاح المدرعات الي بعرفه من انا جندي نفر ونورت سعادتو. واداني واجبات محددة والحمدلله منطقتي ما جاء منها اي خرم تنفيس نفذت بكامل جاهزيتي ولما قال لي كما كنت والناس رسالتها وصلت ومافي داعي يكون دشمان بين رفقاء السلاح المشاكل في طرق ثانية للحل انحنا انصعنا للتعليمات وما شايل هم شئ وراءنا ولا بنخالف قائدنا هو وقف الشغلانة بعد ما نجحنا واستلمنا.
انا الدوافع عندي قديمة نحن ناس عساكر شرفنا في الجندية واحترام الناس ليها زمان نمشي اي محل الناس ترفع راسنا تحيينا. الان اساءة للجيش في كل مكان والناس تفتخر بانها تكره الجيش وتسيء لنا في كل مكان وكما جاءتنا مليشيات تلبس كاكي وعلامات ضباط لا تاهيل ولا دورات ولا شئ بس كدا ويقولوو لنا دا سلام وسياسة انا ما بعرف سياسة بعرف جيشي دا ما بعرف غيروو فهل الدنيا تاني ما فيها رجال فانحنا تحركنا عشان كرامتنا وكرامة الجيش ما تكون واطة وما ندمانين ابدا ابدا..
*المساعد احمد حسان: كنت بفتش للشغل دا من زمان لانه كل يوم البس ميري بشوف نفسي خائن*
المساعد احمد حسان احمد محمد قال انه عرف من زميل له في اتصال ان هناك تحرك فقال لبست الميري وجريت لقيادة السلاح وفهمت من الزملاء انه في تحرك ودخلت قابلت السيد العميد فشرح لي الحاصل واداني واجبي وبصراحة انا كنت بفتش للشغل دا من زمان لانه كل يوم البس ميري اشوف نفسي صغير خائن للامانة كونوو الجيش دا ضحوو رجال وقادة دفناهم بايادينا في الاستوائية وفي النيل الازرق والشرق وكل مكان حاربنا فيه عشان جيشنا يرفع راسوو انحن نكون احياء والشماشة يعملونا مسخرة وفي كل مكان شتيمة وفي كل يوم يقولوا بنغتصب البنات انا ابوو بنات كيف يقولو الجيش مغتصب النساء الاولاد الصعاليك بتاعين اليشيش والمخدرات المحرشين يقولوا انحن العساكر بناكل مال البلد دا ما عيب وقيادتنا قاعدة تعاين ليهم وتضحك معاهم.. انا والله سيادتو بكراوي احترم تقديره لكن كونوو يوقف الشغل ويسلمكم لها لانه القادة الكبار عملوا وساطة المهم هو مسئول امام الله انحن اديناه ارواحنا امانة وهو بيتصرف، انا عن نفسي لو الان قال تعالووو من المعتقل دا نفذو والله لو انط السور امشي ليه ما بندم علي موقف اخذته برجولة ابدا ابدا..
*المساعد مقدم بكر شايب البلد دي عاوزة حكومة رجال مش يدو رتب لمليشيات ويطلعو ليها قانون.. دي فوضي*
استمعت كذلك هيئة المحكمة الي اقول المساعد مقدم بكر مقدم شايب. - ابنه لاعب فريق الهلال عيد مقدم - وقد. قال انه يعرف اللواء بكراوي منذ عام ١٩٩٣ خدموا في عدة الوية مدرعة واشتغل معاه عمليات. اخر شئ اشتغل معانا كان في ابكرشولا ودي بلدي انا من جبال النوبة والعقيد عبد الباقي بكرواي وقتها كان قائد متحرك التحرير ليها في صيف ٢٠١٣ عشان كدا انا واسرتي وقبيلتي كلها لو عبد الباقي خاض نار بنخوووض وراءه التحرك عرفت بيه في يوم الشغل ذاتووو بالليل وبعد مشيت السلاح وعرفت ان بكراوي طووووالي ما رجعت البيت بالعكس عبيت عساكري وشووونت ذخايري وبقيت جاهز والاسف انه هو قال نوقف لكن كان ما قال نوقف يا كان هو في القصر يا نحن في القبر البلد دي سعادتك عاوزة حكومة رجال رجال ما في نص نص حكاية اولاد عيال يهزرووو ويمسخروا الميري ويدو رتب لمليشيات ويطلعوا لها قانون دي فوضي فوضي نحن ناس تربينا في الميري ومقتنعين الليلة سلاح المدرعات دا فيها احسب لك اكثر من عشرين ضابط اولادنا ضباط اتولدوا في الاشلاق وتربوا فيه ودخلوا كلية حربية بقوو ضباط واباءهم عساكر نفر يدوهم تحية وتعظيم سلام.
واحد يجي شايل رتب في شنطة يوزعها زي ميداليات الكورة والبسكويت علي اولاد عمو؟ دا جيش وين ونظام وين!!
السياسة لها مكانها وكلامها لكن الجيش جييش جيش لا لعب زبط وربط ولا البلد تولع وتتخرب..
رفعت الجلسة
#مونتي_كاروو
| |
  
|
|
|
|
|
| |
عبدالله عثمان
فيس بوك
تويتر
انستقرام
يوتيوب
بنتيريست