Quote: اول صباح بعد شتات المؤسس الشمس طلعت من الشرق كالمعتاد..مشيت الدكان لقيت سيد الدكان بتسوك(كالمعتاد برضوا ) قلت ليهوا صباح الخير رد علي ب(تلويحة معتادة كذلك )ختيت ليهوا القروش وشلت البسكويت حقي(كالمعتاد تماما )رجعت البيت لقيت ناس البيت ولعوا البخور ولمعوا العدة ونضفوا البيت وبقى يرقش يسوي كدي..مسكت كباية الشاي بيدي اليمين ودخلت الفيس بتلفوني باليد الشمال وجغمت جغمة كبييييرة من الشاي واستمتعت تماما بالاتنين الشوق والريد اقصد الشاي والفيس لقيت الحياة عادية في الفيس لجان المقاومة تعلن عن مليونية بكرة نحو قصر الرمم في(شجاعة معتادة )رغم الألم والجراح واستشهاد الصحاب والرفاق وكل بياناتهم تقول ما معناه(مؤسس بتاع فنيلتك ) ..طبعا هنالك جماعات من المواهيم المولولين ضاربين الثكلي والحي ووب في أرجاء الفيس واي يا حمدوك احي يا حمدوك معليش استحملوهم يومين تلاتة كدة البنج بفك وحيكتشفوا إنهم كانوا مبارين(صنم عجوة ) صنعوهوا بأيديهم وكان رجلا لا بجدع لا بجيب الحجار وحيغنوا براهم(بركة الطار بركة الطار )..والحمدلله الذي كشف الغمة وازاح الرمة عشان الناس كلها تفضى لاولأد الهرمة وحتما حننتصر عليهم...صباحكم نور وسرور..#مليونية_4يناير
الكاتب الفنان عبدالوهاب وردي ... بالمناسبة من لم يتابع صفحة الاستاذ عبدالوهاب في الفيس فقد فاتته كتابة مدهشة، وساخرة، ومحفزة...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة