***** إن شاء الله يجيبو ليكم التوم هجو رئيس وزراء *****

Quote: التحايا والسلام~ بما إنى أخ أبو حسين (الإسم بالعربى ساهل 😀شكرا ليك) ساكنة هنا -حمدوك زول مسكين ساكت لبسوه جزمة كبييييرة وعملوه رئيس وزراء ، واصلا الكيزان عارفنه (صورته مع غندور مثال) ، وأها الرباطى القاتل والباقين لقوا المسألة ساهلة - الشفيع خضر يختار ليه الوزراء، ولجنة أديب - يوافق؛ - الكباشى وآخرين يقيلوا دكتور أكرم - تمام معاه لأنه دكتور أكرم حسب إعجاب الدكاترة الصغار بيه أطلقوا عليه "نار الضلع" يوم شفت حمدوك فى لقاء جوار دكتور أكرم ، حمدوك باهت - عرفت إنه شدة وقوة دكتور أكرم حتجيب خبره؛ - إتخلص من البروفسور العالم محمد أمين التوم - يوافق ولا يكلف نفسه حتى بإحترام البروفسور ومخاطبته؛ - أدينا ملف مفاوضات السلام العبثية - يوافق وياهو حدس ما حدس (الحقوق محفوظة لكباشى ) من إتفاقات تحت التربيزة (حسب كلام ميناوى) مع ناس الحركات (كلمة حركات تنطبق على أفعالهم تماما)؛ - كل يوم لجنة ،لجنة وكمان واحدة منهم أظنها إقتصادية رئيسها حميدتى ! - العلاقات الدولية وشنو وشنو - قبل ما حمدوك يلبسوا الجزمة الكبيرة العالم عرف السودان ال CNN وضعت أجمل صورة فى صفحتها (أفتشها أجيبها، أصلى جايطة ليك خيطك دا) ؛ - الشخصية القوية ، القاطعة مهمة لأى رئيس خلى رئيس وزراء ثورة حااارة. المهم حمدوك جاء وفهمه إنه ياهو موظف المنظمات - شايل برنامج إقتصادى واصلوا تدمير إقتصاد البلد بيه- داك البيرسلوه للدول الأفريقية ويشتغل مع حكامها الفاسدين ، الديكتاتورين وعليه ما قدر يبقى رئيس وزراء لحكومة ثورة. ولما الإنقلابين وشركائهم من دول خارجية (هم يجهلوا الشعب السودانى) ، عينوه رئيس ليهم ، فاكر الشعب حيهتف ليه زى زمان وياهو يقعد تانى ساكت ، لقى الشعب إتجاوزه وبقى ما شغال بيه، دا بكون كلموا بيها المقربين ، لأنه ما أظن بيكلف نفسه يشوف الحاصل. * أيام وجوده قبل الإنقلاب - قتل الثوار كان شغال وهو لجنة ،لجنة ،لجنة! ** أها خلاص نقوم على ثورتنا حتى إزالتهم جميعا.