يحدث في السودان: فصل تلميذ عمره 6 سنوات من المدرسة حماية للعقيدة و الدين!!!!!!

Quote: توضيح من والدة التلميذ المفصول في مدني توضيح من Meso Musaad كامل التضامن منقول من صفحة الاستاذ بركة ساكن ______________________ توضيح فيما يخص ابني معتصم قبل يوم من الحادثة جاني ولدي معتصم (عصومي) قال لي يا مامي ليه الشيطان بياكل معاي في يدي الشمال لو اكلت بيها قلت لا يا عصومي ما بياكل معاك تاني قالب طيب يا مامي الله قاعد في ياتو كوكب قلت فيه ماقاعد في اي كوكب قال لا الميس قالت قاعد في السماء قلت ليه انت شايف شنو ، المهم اتونسنا في الموضوع بطريقة بسيطة وهادئة زي اي ونسة واسئلة يسألني ليها عصومي اصلا يطلعو بحب النقاش والاسئلة . بعد دا انا ما ختيت بعد الموضوع في نفس اليوم استاذة عصومي رسلت لي مسج بخصوص نوم عصومي واتفاهمت معاها ما جابت لي سيرة حاجة تانية خالص (ممكن ارفق اسكرين شوت )، تاني يوم الترحيل ما جا لي عصومي المدرسة اتصلت على المشرفة قالت لي الادارة اخطرتهم ما يجو لي عصومي سقت ولدي ومشيت المدرسة دخلت لادارة المدرسة وسألتهم ليه ابني عصومي ماجاهو الترحيل قالو لي ما بنقدر نرد ليك الا المدير اجي وفتحو لي موضوع منتصر (مونتي) ولدي الصغير بشكل استفذاذي نظام ولدك عمل ولدك هاج ولدك ونحنا في حين انو موضوع منتصر العمرو اربعة سنة دا براهو وانا سحبته من المدرسة بعدم رغبته والمشرف الاجتماعية اخطرتني اني لازم اوديه لي مركز علاجي عشان هو عندو فرط حركة وانا وافقتهم طبعا في البداية وبحسن نية اتعاملت مع الموضوع قلت الاستاذ الاتكلم معاي حاليا يا استاذ انا ما بتكلم عن منتصر انا عايزة اعرف الترحيل ما جا لي ولدي معتصم ليه قال نحنا أولادك ديل قبلناهم بي واسطة من استاذ ابراهيم ولي امرهم استاذ ابراهيم قلت ليهم انا ولية امر الطالب معتصم وامو ودا مسجل في اوراق التسجيل عندكم قال انت ذاتك كنت ما موجودة في البلد بطريقة برضو استفذاذية جدا وانا قلت ليهم انا في البلد ودا ما شئ بخصكم والموضوع حاليا ترحيل عصومي ممكن رد بسيط ليه عصومي ما جاهو الترحيل ؟ طلع الاستاذ وحت قال اصلا نحنا كنا عايزين نستدعيك بخصوص عصومي لانو حصل منو سلوك امس حتى لما قعدناهو مع المشرفة الاجتماعية طوالي سألت السؤال يعني الترحيل ما جا بسبب سلوك عملو عصومي ؟ طيب انا لحدي المسا كنت بتكلم مع المس لديه ما اخطرتني بحضوري المدرسة ولا انو الترحيل ما جا رد ولدك بقول حاجات غريبة جدا انو الشيطان مافي وكذا .. قلت ليه ايوا سألني وقلت ليه مافي شيطان بياكل معاك قال دا حديث شريف بعلمو ليهم وبيحفظو شرحت ليه منطق ولدي ومنطقي في الموضوع قال لي نحنا ماعندنا كلام زي دا قلت ليه خلاص انا ما بقدر امنع ولدي يسأل في الحصة هاجت فيني المرشدة الاجتماعية والمدرس ودخلت موضوع مونتي تاني وقالو لي ما بنتكلم معاك الا يجي المدير بعد شوية جا زوج عمتي مدير مدرسة تانية مجاورة بطلب من الاستاذ جا داخل طوالي قالو ليه موضوع الدين وكدا وهو وهو طلب مني اسكت وسمع كلامهم عن الدين وطوالي قال ليهم انا لو مكانكم برفدهم وما تجاملوني ارفدوهم بعد مشادة بيني وبين المرشدة قررت اسحب ولدي من المدرسة جاني قرار مكتوب من ابراهيم خليفة في نهاية اليوم بفصل معتصم وخطاب انو انا سحبت منتصر مع انو قبل كدا ما رسلو لي اي خطاب في نفس اليوم مع انو اتفاقي مونتي ارجعو بعد اعرضو لي مختص نفسي لاني ما بثق في تشخيصهم لمونتي لانهم كا مدرسة ممكن يكونو جزء سلوكه دا و حصل موقف قبل كدا قالتو لي الأستاذة انو منتصر رفض يقعد في الفصل تم استدعاء ابراهيم خليفة فقام ضربه و تاديبه علي حد قولهم و قطع سوط من الشجرة و قفلو في فصل براهو و ضربه تخيلو طفل عمره أربعة سنه يتعاملو ماهو كدة عملو ليهو خوف من المدرسة و الفصل و تاني يوم رفض يدخل الفصل و ضرب الباب لمن القذاذ اتكسر و الأستاذ خنقو من قميصه قدام معتصم اخهو و الموجودين دي المدرسة الانا طلعت منها اولادي وفعلا قلت ليهم مدرستكم غير مؤهلة للتعامل مع الاطفال عموما مش أطفالي بس