متابعات الوضع السياسي الراهن اليوم الخميس 25 نوفمبر 2021

Quote: مهادن الزعيم٣٥ د ✵ ضربة البداية جات من الدمازين (ذي م حصل في ثورة ديسمبر) طلع الثوار الى الشارع قبل الساعة واحدة وهتفوا للشهداء ورفضوا الاتفاق بين حمدوك والعسكر ...✵ من عطبرة الثورة بدت المواكب قبل الزمن المحدد بكتير وكانت ضربة البداية من حي المطار و الصناعات وبعدها اصبح موكب هادر وبرضو كان في موكب هادر في دامر المجزوب ...✵ من دارفور خرجت ثلاثة مواكب كببرة في كل من الفاشر ونيالا والجنينة رفضوا فيها الانقلاب وطالبوا بالقصاص للشهداء ...✵ من ولاية الجزيرة خرجت مواكب ضخمة قبل الزمن المحدد في مدينة مدني وبعدها طلعوا ثوار رفاعة في موكب مهيب والتحموا مع موكب طلاب المجمع الطبي بجامعة البطانة دا غير مواكب المناقل والحصاحيصا وابوعشر وابوطلحة ...✵ من النيل الابيض خرجت مواكب ضخمة جدا في كل من كوستي وربك واتعرض موكب ربك للقمع المفرط من قبل الشرطة ...✵ موكب الابيض كان ضخم جدا واتعرض لقمع كبير بالبمبان وبعدها دورت اعتقلات وضرب للثوار في الشوارع وبرضو كان في مومب قوي شديد في بارا ... ✵ مواكب سنار وبورتسودان شهدت حشود خرافية مطالبة بمحاسبة قتلة الثوار ورفضوا فيه الانقلااب جملة وتفصيلا ...✵ من الولاية الشمالية خرج موكب كبير من مدينة عبري وفي ذات الوقت طلاب جامعة مروي عملوا وقفة إحتجاجية رفضا للانقلاب وبرضو كان في موكب سمح شديد في مدينة حلفا بذات الشعارات والهتافات ...✵ في العاصمة المثلثة بدت مواكب الاحياء في التجمع في الوقت المحددة (الواحدة بتوقيت الثورة) ولحدي الساعة 1:30 حتى بدت في الانطلاق نحو الاماكن المحددة للتجمع ...✵ القمع بدأ بدري (كالعادة) انضرب ثوار الفتيحاب مربع 9 وموكب ثوار الثورة في مهداوي والبمبان غطى المكان قبل زمن تحرك المواكب ...✵ رغم القمع واصلت المواكب مسيرها نحو نقاط التجمع وفعلا اتجمع جزء كبير من ثوار الخرطوم في محطة سبعة وشكلوا موكب مهيب بعد التحام مواكب الديم والصحافات والشجرة والخرطوم 2 و 3 وجبرة وباقي الاحياء المجاورة. دا غير الحشود الضخمة الكانت في شارع عبيد ختم بذات الشعارات والهتافات الرافضة للانقلاب ...✵ ناس الخرطوم عملوا منصة وساوند وناس بحري عملو نفس الحكاية وناس الديم موكبهم دلوكتو مدورة من ظهرا بدري (طبعا ناس امدر رصاص وبمبان) واجمل حركة قام بها ثوار بحري انهم كرموا الكادر الطبي في المستشفى الدولي علي وقفتهم مع الثوار في علاج المصابين والجرحى ...✵ مواكب بحري كانت بهية عادتها ووتجمع الثوار في حشود كبيرة في تقاطع المؤسسة بهتافات قوية رافضة للانقلاب وممجدة للشهداء وطبعا جزء من ناس امدر عكسوا عقارب الساعة وسيرو موكب لحدي بحري تضامنا مع ثوار بحري ....✵ في امدرمان بدأ الثوار في التجمع في عدة نقاط في كرري وامبدة الفتيحاب واستوب بانت وعابدين وودنوباوي وبدت المواكب تتشكل وشارع الشهيد عبدالعظيم (الاربعين سابقا) يزداد حشده رويدا رويدا حتى بلغ اشده عند الساعة الثالثة ظهرا ...✵ شارع العرضة امتلأ عن اخره بالمواكب القادمة من امبدة وباقي الاحياء المجاورة وطبعا الحشود بتخيف العسكر عشان كدا بدا القمع مباشرة الساعة 3 ببمبان كثيف في صينية التجاني الماحي ...✵ بعدها حاولو اقتحام شارعي الاربعين والعرضة وبدأ الثوار في المقاومة وبناء المتاريس التي شكلت عقبة امام تقدم القوات الامنية لضرب الثوار ...✵ امتدت مقاومة الثوار للقوات الامنية لحدي لحظة كتابة هذا التقرير في السادسة من مساء الخميس 25 نوفمبر ....✵ القوات الامنية استعانت بمدرعات البمبان لقمع الثوار وكان التصويب علي اجساد الثوار مباشرة في كثير من الاحيان مما نتج عنه عدد من الاصابات الخطيرة وحالات الاغماء (في انتظار تقرير لجنة الاطباء لمعرفة عدد المصابين وحالاتهم) وهناك انباء غير مؤكدة عن اصابتين بالرصاص في بحري وامدرمان ....✵ قامت الشرطة بإعتقال عدد من الثوار (قريب المغرب) من محيط حوش الخليفة وسوق امدرمان واتعرض المعتقلين لضرب مبرح قبل نقلهم الى جهات غير معلومة ...✵ الليلة الحشود الطلعت في اكتر من 20 مدينة حول السودان قالت كلمتها واضحة جلية فيما يخص إنقلاب البرهان (الرحمة للشهداء وعاجل الشفاء للجرحى) الشعب اقوى والردة مستحيلة ... سلام ومحبة

(عدل بواسطة علاء سيداحمد on 11-25-2021, 06:30 PM)