بهدوء.....الوضع الراهن

Quote: التفاف الناس حول قحت في وقت من اوقات الثورة لم يكن حباً فيها ولا إنتماء لها. ولكن لأن إلتفافهم حولها يمثل الطريق الآمن نحو المدنية والديمقراطية في مجابهة خطر العساكر إجهاض الثورة. وأقول الطريق لأن حكومة قحت ليست الغاية ولا المبتغى من الثورة ولكنها فقط عتبة في الطريق.

Quote: والقارئ الجيد لن يمسه الإحباط لأن كل إخفاقات قحت متوقعة ومبررة بحكم الواقع السياسي وبحكم طبيعة قحت نفسها.

متفقة معاك و كما ذكرت لأحد الإخوة فوق ... حكم الإنقاذ ما أدى الناس فرصة في ممارسة الديموقراطية و وعي دروبها و المشي فيها...

ثم لا أدعي تجويد القراءة و لكن ده إحساسي البحسو و من زول ما بدسو (كما شدت مطربتنا الخطيرة ما متذكرة إسمها)

عارف زي تشجيع ناس المساطب... مرات تلقى زول وقف من مسطبتة دي و عاوز يهدف... و لا بيكورك و يأشر بيده
أها أنا محبطة بقدر حماس المساطب دي.. لكن دي ما كورة للأسف ... هنا في أرواح جميلة و بريئة و صادقة فقدناها و بنفقد فيها...
ف خليني أُحبط و خليني أحزن ... ما عندي حاجة غير أحاسيسي الإنسانية دي!

في سيرة المساطب و الإحباط...
لما الناس كانت في القيادة و عملوا المنصة و قاموا هبطوا فيها ناس ما كانوا dedicated لتحريض الناس للخروج و فاعلين
في الأرض أو السوشيال ميديا في الوقت داك (ما بتكلم عن تاريخهم )..
ماكانوا من الشباب التابعنا معاهم دخول القيادة و الرصاص مصوب في روؤسهم و صدورهم العارية!
الشباب الكانوا فاعلين ( و هم كُثر كما تابعنا) عملوا رايحين لكن ذو النون اتجرس و عمل ليه منصة بعد رجع
و حصلت جوطة لو متذكر... ده مع إختلافي مع ذو النون و إحترامي ليه...
أها من المساطب كنت متمنية أشوف المنصة مفتوحة و مافيها إصطفاء!
على الأقل مفتوحة للناس الجعلوها ممكنة !
و منذ ذلك الحين من مسطبتي دي بقوم براي و أكورك و أُحبط و هكذا دواليك...

آي نعم ال في البر عوام لكن مرات بتشوفها جلوها تاااخ ...

فعليك الله ما عندي شي غير إحباطي ده... مشيهُ , مشيهُ!

و الجاتني في إحباطي ما سامحتني كلو كلو :)

لك التحية !