*جوز يخسر،،،،* لعب البلى ده فيهو قوانين،،، و لوائح ،،، و بنود،،،، و تحدي،،، أهم حاجه،،، *الجله ،،،،، و الضراب ،،،،* ديل زي ،،،، الثوار و الكنداكات ،،،،، لعب البلى ده،،، نوعين،،،، حسب الجيب،،، لو مقرش،،، بتلعب البلى،،،، و جلتك قويه و نياشه،،، لو مفلس،،، بتبقى زول حصاص سااااااي،،،، ناس ضرابي،،، وضرابك،،، الخرخره ،،،، دي لو مابتعرف ليها،،، حقك بروح ساي،،، في ناس متخصصين في الخرخره دي،،،، طالعين جديد في الكفر ⚽،،، ممكن تكون كيشه،،، تجلى وانت قريب،،، لكن لو خرخار،،، بتسرق حق غيرك،،، الله يبعد مننا الخرخارين،،، الحراميه،،،، ناس القلع و حمرة 👁،،،، قوانين لعب البلى،،، صارمه و صعبه،،،، تقول لي الوثيقه الدستوريه،،،، *الترس،،،،،* نقطه ،،، درس جديد،،،، في جملة متفق عليها،،،، *تكس لين ترس،،،،* جملة اشبه بتلك الاهازيج التي اقتلعت الظلم،،، و أتت بالعداله،،، جملة أقوى من البنادق،،، أنعمت علينا بالحريه،،، انك تتكلم و ماتخاف،، ،، ترسل وبي ♥ قوي 💪🏻،،، تحديد *اللين،،،* مهم جدا،،، أحرف واحد هو البرسمو،،، و ياريت لو رسم لينا كيف نعمل و ننجز ما بعد الثوره،،، و *الجكو،،،،* كمان،،،، منه بدور التنشين،،، زي فض الاعتصام ،،،،، وبعده،،،، *الطقش،،،* ده ما زاتو الحصل،،، بين المدنيه و العسكريه،، ،، ولي هسه مدور،،،، طقش زي الطقش،،، مرات الطقش بكون بي دردقه كده ،،، تطقش و تلز لي قدام ،،،، وتعلم رايح،،، لكن وين ياااااااا،،،، شوف القانون ده،،، *حكمك شاقي اللين حياطي،،،* ده ما المادة *١٣١* زاتها،،، أدى القانون ده فهم من عندك،،، ده المفروض كان يتطبق بعد الثوره طوالي،،، *حكمك نظر،،،* دي سرقها واحد،،، عاها ،،،، في الزمن الاغبر،،، قال الدفاع بالنظر،،،، هو فهمها غلط،،، *حكمك نظر* دي مستمده من أغاني سيد عبدالعزيز،،، و ابو صلاح،،، و مكمدات عبدالرحمن الريح،،، نظره يا السمحه ام عجن،،، تقول لي معادله كيميائية،،، من اول نظره،،،، و يجلي النظر يا صاحي،،،، في قانون،،،، *اديهو حريته،،،،* دي قاصدين بيها،،، حريه،،، سلام،،، و عداله ،،،،، *الخرت،،،* خرتونا جنس خرت،،،، ولسه،،،، خرتونا و كتلونا ،،،، فهمنا واحد،،،، *تكس يرجع،،،،* دي زي حساب التفاضل و التكامل،،،، كلمتين زي الجزر التربيعي،،، اي لولوه،،، طوالي تكس يرجع،،،، يرجع لي الفهم القامت عشانوا الثوره و ضحوا عشانه الشهداء،،، و زي ما بدينا،،،، *جوز يخسر،،،* قصه شراكه زي دي مابتودي لي قدام ،،،، بس،،،، ديمقراطيه ،،،،، *مدنياااااااااااااو*
بكره اقعدوا في بيوتكم،،، خليكم جاهزين يوم ٢١ اكتوبر،،،، تاني نقول ،،،،، *جوز يخسر،،، ،،،*
*د. علي الشيخ* *الحنين* *امدرمان* *١٥ اكتوبر ٢٠٢١*
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
علوبه
فيس بوك
تويتر
انستقرام
يوتيوب
بنتيريست