|
|
|
 Re: السمري well done ! (Re: walid taha)
|
ينصر دينك يا ود طه.
السمري مستقبل رهيب . لمان يغني بيغني كلو.
دا نوع جديد من دفق الأحاسيس .
ياخ ربنا يديك العافية وكان عندك حاوية ممسوكة في الميناء
ربنا يمرقها ليك .
دي دعوات الناس اليومين دي . ههههههه
والله السمري فنان جد .
الف شكر
| |
  
|
|
|
|
|
|
|
|
Re: السمري well done ! (Re: walid taha)
|
تحياتي يا وليد
ليك وحشة والله وانت طولت الغياب
سمعت عاهدتني من السمري
وعندي ملاحظات
الاولى هي شجاعة المغني، ودا مؤكد شي يحمد ليه ويشكر عليه
لانه أداء الحان عثمان حسين عمل شاق لأقصى مدي
ليه شاق ؟
لانه الحان عثمان حسين هو الصاغها وعملها بنفسه وفصلها تفصيل دقيق علي صوته وأسلوب وطريقة الأداء عنده
عشان كدا كان التميز والابداع العبقري
ومغنيين كتار جدا قبل السمري فشلو في إخراج اعمال ابو عفان ولو بقليل من تجلي عثمان حسين
عندك جلال الصحافة وفيصل الصحافة وحتى عباس تلودي بالرغم من مقدرته التطريبية العالية
الملاحظة التانية
ودي الأهم
الإيقاع المستخدم ما هو نفس إيقاع عاهدتني الأصلي
في زيادة في الميزان يمكن بمقدار درجتين
واخونا الموسيقار احمد ياسين لو مر علينا هنا يمكن يؤكد علي كلامي دا
الإيقاع هو ال structure الرئيسي لأي عمل موسيقي او غنائي
واي خلل فيه معناه الانهيار التام
ما عارف ليه المغني هنا اختار تسريع الإيقاع
وما كان بكلفه شي لو اعتمد نفس الميزان
بالعكس كان كمان حيساعده في أداء الكلام بطريقة مريحة جدا جدا
ويمكن تلاحظو معاي ومن بداية الاغنية، انه المغني لقى نفسه زي المجبر يطارد الايقاع
تحديدا في "لو كان صحابك"
بالله لاحظو كويس للحتة دي
ودا اخل كتير جدا بأداء السمري علي الرغم من صوته الجميل
وبرضو ما عارف الحتة دي فاتت كيف علي سعد الدين الطيب تحديدا
وعلي باقي الفرقة الموسيقية
الملاحظة التالتة
السمري صوته جميل وجروب
بس لازم يلتزم بالاصول وما ينحرف عن أسس البناء اللحني لما يغني اعمال مطربين تانين
وما يفوت عليه انه اي عمل غنائي بالضرورة تم تفصيله علي مقاسات وابعاد صوت وأداء صاحبه الاصلي
| |
|
|
|
|
|
|
|
|
|
Re: السمري well done ! (Re: walid taha)
|
ازيك يا وليد
تعرف عشان ما نظلم الزول الغناي دا ساي
يا ريت لو تنزلو الأغنية بصوت عثمان حسين
بس عشان نلاحظ للفرق في سرعة الايقاع بين الأغنيتين
صدقني السمري بصوته الجميل دا وطريقة الأداء عنده
كان حيبدع لو غنى الأغنية علي نفس ايقاعها الأصلي
كان حيرتاح جدا في المد والوقف والدخول من مقطع أو جملة للبعدها
| |
|
|
|
|
|
|
|
|
|
Re: السمري well done ! (Re: walid taha)
|
التحية يا شباب
(عاهدتني) بسموها ناس الرومانتيك( انت لي)
دي الأغنية الظهر فيها الخماسي السوداني بعد تقطيع السباعي
وسمكرته في ورشة السجانة وقصوا منه درجتين الرابعة والسابعة
وتخيلوا بعد دا الخماسي بقى يستوعب اكتر من السباعي الغربي المصري
دي السودنة.. و(عاهدتني) أظهرت مقدرات عثمان حسين زي ما (الفراش الحائر)
اظهرت قالب عثمان حسين.
نجي للفيديو .... اولا مشكور يا وليد عليهو
الفنان مع إمكانياته الا انه فات عليه أن عثمان حسين أدى الأغنية في طبقة (وسيطة)دافئة
وبميزان لحني بالمليمتر ..نسبيا هادىء ...
صراحة أنا تفاجأت من ملاحظة ابوذر عن تسريع الايقاع في الأغنية
ودا عمل اختلال في هيكل الأغنية اذا ركزتوا في:
أو غرتك كلمة حنان ....
وفي:
ما أظني يوم أتعب وراك أو أسألك
وفي:
وأسهر ليالي ضنى
بنلقى بعض الهنات البسيطة
طبعا دا شىء طبيعي في أداء اغنيات عثمان حسين والجابري
وخليل اسماعيل ومحمد الأمين وابوعركي والخالدي
| |
|
|
|
|
|
|
|
|
|
Re: السمري well done ! (Re: Ahmed Yassin)
|
يعني ملاحظتي في محلها مش كدا ؟
يا زول انا بعد ارجع السودان ان شاء الله بمش اعمل انتساب طوالي
في كلية الموسيقى
هههههه
والله يا احمد ما اظن تقدر عثمان حسين دا بالنسبة بيعني شنو
انا بالجد مفكر اعمل بحث متكامل عنه وفيه
| |
|
|
|
|
|
|
|
|
|
Re: السمري well done ! (Re: walid taha)
|
موسيقارنا الحبيب
عثمان حسين عبقرية مطلقة
في كل الفعل الإبداعي الغنائي
وزي ما قلت ليك لو ربنا مد في الاجال
لازم اكتب عنه كتاب عديييييل
عشان الناس تعرف شنو ومنو يعني عثمان حسين
الناس كلهم ممكن يسمعو ابو عفان ويطربو وينتشو
بس ما بكونو عارفين شنو الحاصل وكيف هذا الإنسان الجميل قدر يخلق كل الكم الهائل دا من الجمال والتجلي
اسرار بابكر؟
يا لهول الفقد يا احمد
ربنا زي ما تقول
"حندكنا" بيها وشالها مننا قبل ما نصل ثمالة الاستمتاع بيها
اسرار فلتة من فلتات الإبداع الغنائي
ما اظن تتكرر قريب
| |
|
|
|
|
|
|
|
|
|
Re: السمري well done ! (Re: أبوذر بابكر)
|
الواحد يقول ليك شنو بس بعد كلامك دا
وكتابك دا ... اذا احتجت اي معلومة ..موسيقية او تحليل موسيقى لجميع أعماله
بتلقانا رهن الاشارة أو معلومة تاريخية فنية.
| |
|
|
|
|
|
|
|
|
|
Re: السمري well done ! (Re: walid taha)
|
المايسترو أحمد ياسين
صباح الخير
ماذا عن الإيقاع الأصل ؟ أعتقد - إن جاز التعبير- هو قديم جدا ! كما أنه شائع جدا فى التسجيلات القديمة !
please advise
تحياتي ،،
| |
|
|
|
|
|
|
|
|
|
Re: السمري well done ! (Re: walid taha)
|
صباحك خير يا وليد
معليش قبل ما موسيقارنا يوافيك بالاجابة
واكيد حيفيدنا اكتر طبعا
بالنسبة لايقاع عاهدتني
هو مش ايقاع قديم بقدر ما انه قليل او شبه نادر
سبحان الله اكتر مطرب استخدمه هو عثمان حسين نفسه
ربما مع اختلاف طفيف بين كل اغنية والتانية في تنويع الايقاع، مش في ميزان الايقاع
عندك مثلا اغنياته زي
- المصير، او كل لحظة بتمر علي
- ما بصدقكم
- داوم علي حبي
وبرضو عند
ابراهيم عوض - عزيز دنياي
الكاشف - فتنت بيه
الكاشف - جزاك يا عيوني
احمد المصطفى - يا ناسينا
وردي - نور العين، باللحن القديم الأصلي
التنويع البسيط الأنا بقصده، بمعنى انه كل الأغنيات دي، ممكن تغنيها بنفس لحنها الميلودي، مع ايقاع "عاهدتني"
يعني "عضم" الايقاع ما بختلف كتير
لكن عموما هو ايقاع ما شائع كتير
دي اجتهادات ساي مني طبعا
لغاية ما يجينا احمد ياسين بالخبر اليقين
| |
|
|
|
|
|
|
|
|
|
Re: السمري well done ! (Re: أبوذر بابكر)
|
غايتو يا شباب
انا زول ترابل و عنقالي ساكت في جخانين الموسيقي.
وخاصة لمان تكون في تفانين مدرسة ابوعفان.
لكن يعلم الله زولكم السمري دا لما يصل الحتة
البتقول ( كانت كنوز الدنيا لك)
داممممم.
انا اقرب الفح نعلاتي وامشي مقابر فاروق اتنخج على
ضريح ابوعفان لامن أقول بس .
ابوعفان دا مقام شاهق و واضح انو السمري من حيرانو
و واضح انو بحبو شديد .
عليكم الله شوفوا كمية الخجل وكمية الاحترام الفي
عيون السمري وهو بيغني في اغنية ابوعفان .
غايتو يا وليد و يا ابوذر ويا احمد والمتداخلين
انا طالب دعوتكم في اقرب فرصة لو جيتو السودان
نقعد نعمل لينا بليلة و نبكي على ضريح شيخنا ابوعفان
والله جادي.
| |
|
|
|
|
|
|
|
|
|
Re: السمري well done ! (Re: Osman Musa)
|
الله....الله. ..بطريقة كرومة يا عثمان يا ود موسى
عاهدتني ..خماسية بحتة ..الايقاع زي ما في "قصتنا" بطىء ولكنه متنوع وفيه جمل متنوعة تفاديا للرتابة
في "قصتنا" اللحن الأساسي اتبنى على مفتاح "صول الصغير" ماينر وتفرعاته : "سي بيمول" "دو" "ري" "فا"
ودا بورينا كيف عثمان حسين بتنقل بين المقامات بسلاسة عجيبة وفي التنويعات وحواراته مع الأوركسترا
ويظهر تعلقه بى مقام"دو" الصغير ...و "سي بيمول"مايجر. ... الكبير
| |
|
|
|
|
|
|
|
|
|
Re: السمري well done ! (Re: Ahmed Yassin)
|
Quote: انا طالب دعوتكم في اقرب فرصة لو جيتو السودان
نقعد نعمل لينا بليلة و نبكي على ضريح شيخنا ابوعفان
والله جادي |
وعشان نحرر البكا ليك علي يا عثمان موسى بى كمنجتين و٢عود .. وباص جيتار وفلوت وإيقاع
ومع فنان أو فنانة...حنختار (١٢) اغنية من اغاني عثمان حسين (٩) غناء و(٣) موسيقى بس
| |
|
|
|
|
|
|
|
|
|
Re: السمري well done ! (Re: Ahmed Yassin)
|
| Quote: ومع فنان أو فنانة...حنختار (١٢) اغنية من اغاني عثمان حسين (٩) غناء و(٣) موسيقى بس |
طيب دى فرصة نشوف السمري بذات نفسو :)
أعتقد السمري بأدائه لـ "عاهدتني" قد خاض تحدي كبير جدا لصعوبة الأغنية ولحنها بدليل - ومن واقع بحثي فى اليوتيوب - مافى أى فنان جربها ما عدا واحد فقط و بالعود .
الغريبة حتى الكونتيسة سميرة دنيا لم تطرق باب هذه الأغنية !!!
تحياتي أحمد ياسين و عثمان
| |
|
|
|
|
|
|
|
|
|
Re: السمري well done ! (Re: walid taha)
|
الإخوان كلكم
وعليكم على اعمل ليكم دعوة كاربة لشعراء اوفيا وفنانين وفنانات عشقوا ابوعفان
حد الهيام.
لو الله يمد في الأيام حيكون أجمل ابداع على ضريح صاحب الكنوز.
بالمناسبة يا جماعة واحتمال للظروف . نحنا مقصرين كتير في حق اهلنا المبدعين.
| |
|
|
|
|
|
|
| |
walid taha
Osman Musa
أبوذر بابكر
Ahmed Yassin
فيس بوك
تويتر
انستقرام
يوتيوب
بنتيريست