|
|
 Re: البرينسه (Re: الشيخ سيد أحمد)
|
Quote: كان راكب قدام مع السواق طوالي
لما وصل قصاد بيتهم وعايز ينزل
نزل قزاز الباب وطلع راسو بره
وقعد يكورك للكمساري
يا ولد عليك الله دق ليهو هنا دق ليهو هنا
الكمساري طبعا بكون شايل ليهو حجر صغير عشان يدق بيهو للسواق
وحمودي راكب جنب السواق |
ههههههههههه
قصص كتيرة عن (حموري) - يقال انه زول ظريف جدآ وزول نكتة وضحك.
لكن يا ابوذر موضوع انك إشتغلت كمساري دي حاجة عايزين نعمل ليها
فلفلة وكده:) عشان نشوف ذكرياتك مع الركاب والقصص العجيبة.
تعرف ايام الدراسة لازم يكون الواحد عندو علاقات إجتماعية مع (الكماسرة) لأنو
ممكن تكون (مسخن) سخانة (الأربعاء وعقاب الشهر) ههههههه - لازم تكون عندك
إستراتيجية تتناسب مع وضع الفلس العجيب داك:)
غايتو الوضع ده كان في الحافلات والبصات- لكن ما أظن في (البرينسه) يكون في ناس
بتاعين (ملح) لأنو العدد محدود خالص.
بمناسبة المواصلات دي يا ابوذر - زمان اول ايام الإنقاذ- كانت في أزمة مواصلات كبيرة
جدآ- الحكومة جابت (بطاحات) (شاحنات تنقل بها المواشي) - حاجة كدة ضخمة جدآ
عملوا ليها (سقف) من الشمس - وبدأت تنقل في الناس.
اها الكمساري شغال للركاب يا جماعه ادخلوا لي جوه - يا جماعه ادخلو لي جوه.
من ضمن الركاب في واحد اظنو (مسطول) من الصباح- الزول ده بيسمع في كلام الكمساري وما
اتحرك ولا شبر واحد.
الكمساري قالو ليهو - ممكن تدخل لي جوه يا فرده.
قال ليهو اذا بدخل لي جوه ما امشي بي كرعيني :)
ده طبعآ غير لغة الكماسرة العجيبة...لمن الواحد بيكون بيحصل في القروش - ويكون في واحد من الركاب
عامل رايح- الكمساري يشبكو ليك (ارح ارقعنا يا عمك).
دي لغة هذا الزمن - بالله ادينا لمحة من لغة البرينسات في السبعينات يا ابوذر.
|
|
 
|
|
|
|
|
| |
الشيخ سيد أحمد
فيس بوك
تويتر
انستقرام
يوتيوب
بنتيريست