|
|
|
 Re: ***** يوميات علوب ***** (Re: ABUHUSSEIN)
|
أبو حسين يا صاحب..
أنت نارك المولعة دي متين تطفيها؟!..
في أغنية كردفانية بتأديها الفنانة الراقية أنصاف فتحي؟!..
في إحدى كلمات الأغنية سمعتها بتقول:
الجمرة بتحرق الواطيها.
| |
  
|
|
|
|
|
|
|
|
Re: ***** يوميات علوب ***** (Re: Haytham Ghaly)
|
Quote: أبو حسين يا صاحب..
أنت نارك المولعة دي متين تطفيها؟!..
في أغنية كردفانية بتأديها الفنانة الراقية أنصاف فتحي؟!..
في إحدى كلمات الأغنية سمعتها بتقول:
الجمرة بتحرق الواطيها. |
عزيز العزيز حبيبنا
الكيزان قالو ليك بي كفي بطفيها 🎵🎶🎼
إنصاف فتحي فعلا فنانة راقية
بركة الشفناك طيب ياخ ...
| |
|
|
|
|
|
|
|
|
|
Re: ***** يوميات علوب ***** (Re: ABUHUSSEIN)
|
Quote: دقيقة دقيقة عشان بس نفهم
يعنى انت عاوز تقول الطيب عبد الماجد و احمد ياسين شخصيتين مختلفتين |
انت ما حا تفهم اي حاجة
حا تضيع زمني ساكت
و انت زمني ثمين كالسيف ان لم تقطعه طلع ميتينك
قوم لف ياخ
| |
|
|
|
|
|
|
|
|
 Re: ***** يوميات علوب ***** (Re: Haytham Ghaly)
|
الطيب عبد الماجد :
يوميات علوب
في إحدى الصباحات الندية في ذلك الزمان وتلك الأيام ونحن علي مقاعد الدراسة كان عندنا أستاذ بدرسنا الإنجليزي إسمو ( السماني ) زول مرتب كدا ودقيق حال الإنجليز أنفسهم ….
والحصة كانت ( دبل ) إنجليزي
دي بالنسبه لينا قنبلة ( نووية ) ملخبته مع ( هيدروجينية )
وترانا راكزين …!!
المهم جا خاشي كدا ( قود مورننغ ) ….( قود مورنننغ ) تبادلنا التحايا …..!!
تحلف تقول طلبه في ( ساندهيرست )
( هو إنتا خليت فيها مورننغ )
أستاذ ( السماني ( دا بتكلم زي الخواجات نفس ( الآكسنت ) ….!!
ما تسمعو ( الآكسنت ) دي تقولو خلاص كنا ( منقطنها ) عرفناها بعد زمن
هو نحن فاضين من ( بريزنت بيرفكت تنس )
الله حلانا من ( كونتينيوس ) المسك بينا زمن
….
المهم زي ماقلت ليكم هو زول منظم كدا وصعب
بنلاوذ منو لكن ًبنحبو برضو …
ماعارف اشرحا ليكم كيف ….!!!
أحاسيس متضاربة لكن في النهاية كويسة …
المهم بعد التحيه دي كتب كلام كدا بالإنجليزي في السبورة ونحن كالعاده ماعارفنو كتب شنو..
( فكي بس ) ….
وعندو حركة غريبة كدا بعملا قبل ما يكتب …..
بكسر جزء من ( الطبشيرة ) وبجدعو بالشباك …..ماعرفناها دي شنو …!!
يكًون بجدع الفاضي ..!!؟؟؟
المهم قام طوالي قال ( بي اتنشن )
وسادت حالة من الصمت الرهيب ….!!
وخاطبنا متسائلا بصوته الجهور
Fire ….!!
what does it mean؟
مش كلام واضح والإجابة أوضح من ( النار ) دي ذاتا
برضو اتجهجهنا ….!!
وصبت فينا المطره ….نتلفت زي الطير …..!!
قلنا إمكن كمين …!!
المهم إترددنا كدا وسادت حالة من الصمت لم يتركها ( السماني ) تطول …!!
طوالي حسم الموقف وحدد الهدف …..!!
قال
قوم جاوب يا ( عامر ) ….!!
الله …. !!!
ليه كدا ياخ .……!!!
ما لقيت إلا ( عامر ) …
( عامر ) دا ود لطيف كدا معانا في الفصل مسكييين ومسالم خلاص
وغير متفرع للاكاديميات دي شديد ….ضارب ليك ( الكورنة ) دي وقاعد كافي شرو غيرو ….!
المهم ( عامر ) عشان بس يقوم داير لي ( دفرة )
أول حاجه القعده دي بتكون من الصباح رجلينو خدرن
وهو ذاتو ما بحب الإزعاج … تحس بيهو ( وحلان ) كدا حاضن الركن دا والجيوب مليانه ( كرور )
بالمناسبة ( عامر ) دا ببيع لينا ( اللالوب ) في الفصل وبصدر لي فصول تانيه ….والله زي ما بقول ليكم ..
وأشهد أنه صاحب أجمل ( لالوب ) في المدينه ..!!
ماهي ( اللالوبة ) دي ياطازجه يا ( حزينة ) …..!!!
وفي واحدات ( مزعمطات ) كدا زي الأكلم زول قبل كدا
ياخ الزول دا شدة ما مبدع في ( قد ) كدا في ( اللالوبة ) دي لي هسا أنا ما عارفتو دا شنو …!!!
( تصريف وتهوية ) ولا ( فتحة درب ) ولا الحاصل شنو …!!؟ ….
ما عرفتو والله
المهم ( عامر ) دا كان بركب فيهو عود كدا بتبقى ( اللالوبة ) زي ( حلاوه حربه ) لمن لا يستطع للأصل سبيلا …
الأصلية دي كان بشتروها ناس ( وليد إمام )
( شوف الإسم ….) وليد دا مره جاب معاهو ( حصالة ) كدا أول يوم نشوفها
في شكل ( فيل ) مليانه قروش ( تطقطق ) قال بوفر فيها من مصروفو اليومي …!!
وكانت صدمتنا كبيرة وبالغة يومها لأنو أول مره نكتشف إنو ذاتو في *مصروف* ….!! خلي يومي …
أتاري أهلنا سايقننا بالغابة الزمن دا كلو
حدنا حق الفطور ….. جابت ليها حصاله كمان ….!!
( ليكم يوم لكن ) ..!!
تسقطو كلكم …
الغريبة ( وليد ) دا بجي بي فطوروا من البيت
( فطور العريس )
نحن سلطة الروب بتاعة حاجة ( نفلو ) عملت لينا ( إستسقا )
( لكن طاعمة طعومية )
أها ( عامر ) أخيراً قام ….!!
( ألف حمدلله على السلامة )
ونحن الضحك كاتلنا منتظرين الإجابة مع ترقب وتضامن نفسي كبير معاهو
هو طوااالي سرحان كدا
( يكون بحسب في عائدات الصادر والمنتجات الزراعيه دي )
لو قال لي أستاذ ( السماني ) ….السؤال كان شنو …!؟؟
حتكون مصيبة …ولو جاوب غلط فهي الكارثه
( وهي الأقرب للوقوع )
علاقة ( عامر ) بالإنجليزي متوترة شديد حال بعض المواد الأخرى عدا الدين والتاريخ …!!
ونفسنا كلنا نساعدو والله وكلنا متعاطفين معاهو …
( غير اللالوب ) عامر لطيف ياخ وطيبان كدا وبرضو مرات ببيع لينا ( الحبر )
وفي تقديري هو أحد رواد ( قدر ظروفك )
( والمشاريع متناهية الصغر ) لأنو عندو ( محبرة ) كدا تجي ( تشفط ) بي قلمك وتديهو الفيها النصيب
غايتو كان بمرقنا من أزمات قاتلة ….!!
يمين ( عامر ) أحسن من الحكومة وأفضل من يدير الازمات
يعني مره معانا واحد ( زرايرو ) كلها اتقطعت في إحدي معارك ( فسحة الفطور )
وكانت ( الإبره والخيت ) الوحيدات عند ( عامر )
ولولا ( عامر ) الزول دا كان قطعوا هو ذاتو …
لأنو أستاذ ( الريح ) أبو فصلنا دا
( الاضافرين ) الطوال بقشطك بي المسطرة ….
( الزراير ) دي معناها المقصلة …!!
المهم يازول الفصل دا صننننن صنا وأستاذ ( السماني )
بقى يمشي ويجي زي بندول الساعة …
ردد السؤال مره تانية ….!!
المرة دي كلمة …كلمه
تسمع صوت ( بلعة الريق ) …بين كل كلمة والتانية
Fire
موسيقي من سيربح المليون)
🥁( دا دا دنق)
what ….
does….
it ….
meen
بس أفلام الرعب ديك ….
( عامر ) بدا يفقد سوايل ) ….!!
قال ليهو يا ( عامر ) يعني شنو fire
قالا بالعربي كدا …!!
( سرك باتع يا معلم )
( أستاذ ( السماني) أسلم )
بس مافي فايدة ال ( fire ) لسا مولعة ..
الليله يحلك الله يا ( عامر )
( زنقة السواد ) ….!!
زولك بقى يهبش في جيوبو ….!!
( ياربي داير يرشي الأستاذ ) ….
وأطول دقايق تمر علينا منذ فترة طويلة …
و( عامر ) عامل فيها بفكر ……
ونحن ندعو في دواخلنا أن يلهمه الله الصواب ….!!
ويثبته عند السؤال
وصبر ( السماني ) بدا في النفاذ ….!!
واخير نطق ( عامر ) …..!!!
وبكل ثقة قال للأستاذ
( السوق )
يا الرسول ….!!!!!
والله كأنو دفقو فينا موية باردة …..!!!
الله لا كسبك يا ( عامر ) ياخ …..!!
دا شنو دا هسا ….!!؟؟؟؟؟؟
غايتو كمية الإحباط الدخلتنا ما حصلت
وكان حزننا كبير لأننا سنشهد ( مجلدة ) يندى لها جبين الإنسانية على هذا الإجابة النموذجيه …..!!
يعني الزول دا لو قال ( الرماد) كنا قلنا احتمال …
( غايتو الرماد فينا وفيك )
السوق ياعامر …!!؟؟ ………..ما بالغتا …..!!
وتهيئنا للمجزرة ا ….!!
لكن حدث مالم يكن في الحسبان
أستاذ ( السماني ) قال صفقو لي عامر ….
نحن طوالي صفقنا ..!!
وضحك ( عامر ) ضحكة بريئة ( ممزوجة بخجل ) يشوبها الحذر والتوجس كحال طبعة الودود ….!!
( هو ذاتو مابكون عارف قال شنو ) …!!
أستاذ ( السماني) قال ليهو ( fire ) معناها النار يا ( عامر ) والسوق القلتو إنتا دا لأنو قاعد في عقلك الباطن …!!
( وكانت أول مرة في حياتنا نسمع بقصة الباطن دي )
أستاذ ( السماني ) قال لينا يا أبنائي أنا الليلة
I am sooo impressed
( طبعا نحن الجمل الاعتراضية دي ولا كأنو سمعناها
راجين باقي الحكاية بالعربي …. ..!! )
قال الحقيقة أنا لقيت ( عامر ) دا قبل يومين وتحديداً يوم الجمعة الفاتت بعد الصلاة …!! كنا بنصلي في جامع السوق
قال لقيتو تحت شجرة كدا لما شافني جا جاري علي
وقال لي عليك الله يا أستاذ ممكن تجي تسلم على الوالدة….!!!
وقد كان ….قال فعلاً جيت سلمت عليها ووجدتها امرأة عظيمة
إسمها الحجه ( نعيمة ) ….وصفها بالفارسة
وقال
She is a great and distinguished woman
( دي كباها لينا بدون ترجمة …..!! بس حسينا بيها )
قال فارشة بتبيع حاجات في السوق بكل عزة
و( عامر ) جنبها يساعد فيها …..!!
وقال لينا ما تتخيلو سعادتي بيهم كانت قدر شنو ….
واحترامي ليهم قدر شنو …!!
أخوكم ( عامر ) يا أبنائي رجل محترم وعصامي …
( وكانت برضو أول مرة نسمع بكلمه ( عصامي )
ولا نعلم معناها لكن اتوقعنا ا إنها حاجة كويسه ؛ ….!!
أستاذ ( السماني ) شكرو على الهدية قال هو وأمو
اهدوهو كيس من ( النبق ) و ( القنقليز ) و ( الدوم )
وبجانب هذه الطيبات قال ( أم عامر )
عندها ( المقاشيش ) و( الهبابات )
وحاجات جميلة كدا معمولة بالسعف ….!!
( زمن البلد فيها ( مقاشيش )
( نقش الواطا والقلوب نضيفة )
( قبل ما يقشونا نحن ذاتنا ) …….!!
قال دي أعظم هديه يتلقاها …..
أكرمني ( عامر ) وأنا ( أكرمه ) اليوم …..!!
وأنا قصدت أقول ليهو ( fire ) لأنو الظروف القاسية زي ( النار ….بتختبر الرجال ….!! و إنتا والوالدة نموذح يحتذي للنضال … ربنا يوفقك يا ابني….!!
قال أكتر حاجه هزتو لما حاجه ( نعيمة ) قالت ليهو
ما بوصيك على ( عامر ) ياولدي …ينتبه لي دروسو
دقو ما تفضل فيه الحبة ….!! ياهو دا يسمع في كلامي
قلمو قليم …..
وهو يضحك سااااي وهي تضحك وأستاذ ( السماني) يضحك
….
( في دق يا اخوانا أجمل من كدا )
قال حاجه ( نعيمة ) قالت ليهو
( عايزاهو يتعلم عشان ما يتألم)
قال لينا العباره القالتا ( أم عامر ) دي مش أنا
أستاذ ومعلم وانجليزي وكدا …..
قال هو يقف ( تلميذ ) أمام هذه العبارة ……!!
يازوووول نحن من غير ما نشعر صفقنا وجنس صفقة هي
و( عامر ) دا بس يتبسم ويعاين …
أستاذ( السماني ) قال تاني صفقو ليهو …!
ودورنا ليك تاتي صفقة نار ووقفنا على حيلنا نصفق
و دقينا الادراج .. رط رط رط المدرسة كلها تسمع
( بنحب عامر ياخ )
انه طيب وجميل وحبيب الشعب
وهو أول إحتفال أشهده في حياتي لجواب غلط
لكن الطريق إليه صحيح ….!!
( مامهم نغط المهم نتعلم من الغلط)
ومن غير عمل مافي أمل …. ومن غير تعليم الواقع أليم
كما قالتها المحترمة ( نعيمة ) ….
ومين علمك يا فراش…..!!
الحصة انتهت وكان بطلها ( عامر ) وانتقلت الحكايه لبقية الفصول وكان ( عامر ) في ذلك اليوم
أشهر من ( المدير ) يوزع في الإبتسامات والضحكات ( واللالوب ) برضو
مستغلا ( الماركتنغ) الرهيب دا الليله
ولأول مرة ( اللالوب ) قطع …..واحتاج ( عامر) للإمداد
( الله يفتحا عليك من كل باب )
وكان ( عامر ) نجم ذلك اليوم وكل الفصول ……..
سلام عليك أينما كنت …فقد منحتنا كل شيئ في ذلك
الصباح الباهي والذي لازال في ذاكرتنا …!!
تذكرت كل ذلك وأنا أشاهد علي صفحات ( الفيس )
( عامر ) ذااااتو المابغباني بكل صفائه والجمال والضربة الفي الجبهة ….والطيبة …بس ضعف شوية
في صورة له أمام ( الحرم ) مع والدته ….!
وقد كتب عليها ….
( أنا وأمي ( نعيمة ) العظيمة )
أشهد أنها عظيمة …..!!
وأشهد أنك ( عامر )
( وان شاءلله دايماً عامر ) …!!
أتاري ( اللالوبة ) كانت ( سبحة ) ونحن ماعارفين …!!
اللهم رزقاً طيباً مباركاً ..
وبلغ نعيمة الحب
سلام عليكما في العالمين
وصباح الخير يا الأمير …!!
كانت أيام ايام
| |
|
|
|
|
|
|
|
|
|
Re: ***** يوميات علوب ***** (Re: ABUHUSSEIN)
|
يا أبا حسين
اب اضنين
دحين دا ما ياهو نفس الموضوع الكتبو احمد ياسين ؟
الطيب عبد الماجد المذيع مش كدا ؟
الكان بجي مع اسمها منو ديك في مشوار المساء
كدي ذكرني الاسم
ههههههه
| |
|
|
|
|
|
|
|
|
|
Re: ***** يوميات علوب ***** (Re: ABUHUSSEIN)
|
Quote: دقيقة دقيقة عشان بس نفهم
يعنى انت عاوز تقول الطيب عبد الماجد و احمد ياسين شخصيتين مختلفتين
_____
اووو عزيزنا عزيز عيسي
سلام و شوق شديد ياخ |
جلالدونا يا جميل كيفك ياخ..
بقيت ما بتظهر إلا في المولد.
غايتو أخونا الطيب عبدالماجد دا زولنا من ودمدني حلة حسن..
وياهو من زمان بنعرفو بإسم الطيب عبدالماجد ما عندو إسم تاني..
شفت كيف؟!
كدي النمشي نسألو
| |
|
|
|
|
|
|
|
|
|
Re: ***** يوميات علوب ***** (Re: عزيز عيسى)
|
Quote: عزيز العزيز حبيبنا
الكيزان قالو ليك بي كفي بطفيها 🎵🎶🎼
إنصاف فتحي فعلا فنانة راقية
بركة الشفناك طيب ياخ ... |
حبيبنا أبو حسين.. كيفك ياخ..
أتاري الكيزان ديل ناس صالحين وأنحنا ما عارفين ساي..
شاعرنا أبوذر
كيفك يا ود أم المدائن..
Quote: الطيب عبد الماجد المذيع مش كدا ؟
الكان بجي مع اسمها منو ديك في مشوار المساء
كدي ذكرني الاسم |
بس ياهو ذاتو الطيب عبدالماحد الليلنا.. هههههه
| |
|
|
|
|
|
|
|
|
|
Re: ***** يوميات علوب ***** (Re: ABUHUSSEIN)
|
الطيب عبد الماجد في يوميات علوب الحلقة 146
السنبلة
عندنا صاحبنا في الحلة أسمو ( طيب الأسماء )…!! طبعا اي زول اسمو ( طيب الأسماء ) …بكون زول لطيف …عديييل كدا وان مسؤول من الكلام دا …
كدي راجعو في خيالكم كل البتعرفوهم بالاسم دا واستدعو الذاكرة ….!! بقع ليكم كلامي دا …..!!
بعدين هم ذاتم ما كتار جماعة الأسماء المركبة وقاطرا قندرانو ديل ….تاج الأصفياء …وسر الختم …وجبر الدار….!!! وطيب الأسماء. ….وعز العرب
ياربي( قسيم الريد) ( وسلاح الأسلحة ) ديل برضو تابعين ليهم …!! خلينا في ( طيب الاسما ) حقنا دا ….!!! يازووول اصلو ما مرق من الرصة…!! الاتنين والخميس ثابتات صيام ….وكان فاتو المغرب في الجامع فاعلم أن الأمر جلل …والدقن دي طالقنها ،،،وهو ذاتو وجيييه كدا علي الصلاح العلي دا …. ناس ( امنيات) قالو ( طيب الأسماء) شهاهم الصلاة …!!
( شوف ليك بنات ) …!!
وهو يعجبك ( غضغيض ) شديد للبصر ….بطبقو ذي ما قال الكتاب ….!! مرات لو النسوان كتار في الشارع عااادي بفكا ليهن الدرب ….
بس الحاجة الكويسة إنو أصلو مابدخل في الناس …عملو شنو ولا لابسين كيف …!! مركز مع نفسو …وماعندو شغلا بي زول ….مش ذي المركزين معانا ونسو روحن ديل ….
أها ( طيب الاسما ) دا عندو معاي مزاج خاااص وصحبة شديدة ومحبة في الله ….الوحيد البتونس معاي ونسة كدا دقاقا ….( البسمع دقاقا دي يقول الله يوريني …!!
؛ انتو قايلين الدقاقا حقتو دي يعني كيف ،.!!؟؟ …
يعني مثلا يقول لي …..غايتو ناس الاتصالات ديل ياعلوب بصراحة مرات بستهبلو ….!!! اها ( بستهبلو ) دي مش عادي وأقلا من عادي …بعد مايقولا وراها مية استغفار….!! وياربي تعفي لي ولقد ( اغتبتهم ) …!!
هيااااا ( الاغتبتهم ) ….هم ببيعو الكلام ..!! فضل شنو ….!!! قال اغتبتهم …!!! 😳
يلا أنا بحكم الصحبة دي مع ( أبو الطب) دا ….فعااادي بشاغلو …!! وبشغلا ليهو …..
وأحيانا بردمو بي أسئلة لايجرؤ أحد ان يسأله إياها الإ ( علوب ) ..!!
يعني مرات بقول ليهو إنتا اصلو ماف ( جكساية ) كدا ثبتتك …!!!؟؟؟
والله يا اخوانا الزول دا من الخجل بقرررب يقوم جاري ….!! ويشبكني ليك دا كلام شنو ياعلوب ياخ استغفر …!!
استغفر ياخ …!! ( مع ابتسامة كدا ….!!! )
قلتا ليهو عليك الله وحلفتك …..كلامي دا هسا فيهو شنو …!!؟
اها سحبنا كلمة ( جكساية ) …..!!! ( دي البتكون جهجهتك ) أعيد ليك السؤال مره تانية …..!!!
( أيا طيب الأسماء ….!!! أو لم تولد بعد من تحرك قلبك الساكن الصدوق …الولة العشوق …!! …!!؟؟؟ )
اها كدا كيف ..!!؟
وركز لي علي العشوق دي ….!!
زولك يضحك سااااي ويستغفر ….
( ولادة الرضا ( استغفار) ضحك وبكا )
ويشبكني ليك ….!!! الله يجازي محنك ياعلوب ……!!
وهو لما يضحك بخت طرف ( الشال) كدا في خشمو ….!!
( غايتو جنس أدب …)
ما شاف ناس ودا الحاجه …الضحكة زي زئير الأسد ….الخشم دا يفتحو طابقين …!! ( سمكة قرش ولاذا الكرش …) يقرب ياكلنا …والصفيق مع الضحكة …!! 👏👏
انتو الصفقة دي شنو كمان المعا الضحيكة دي ….!؟؟؟؟
والله فعلا العطالة دي مدرسة ….
وبتعلمك الكتير….!! يوم تصفق ويوم تزغرد
( ومره تغلبني القراية) …..!! ومرات تمسك ليك ( نملة ) تحميها المهم الموضوع….!!!
اللهم لاتعطلنا ولا تبطلنا ……!!!!!
( أها دا الفرق بين طيب الأسماء ….!! والرجرجة والدهماء ……
إتخيلو أصلو ما كنت منتظر إجابة حاسمة من الزول دا
لكن ( مولانا ) فاجئني ..!! قال لي ماف زول ما عندو إحساس
ياعلوب …..!!! قالا بشكل يوحي بان هناك شي ما …..
قلتا ليهو عارفييييين نومتك ياشيخنا ….!!! لما نطط عيونو …!!
وانا ما عارف التكتح …!! ( لعاب ياعلوب )
المهم يازول عيونو برقن …!! وريقو نشف ….وحالتو بقت صعبة …
هسا اكثر المتفائلين ما ممكن يتخيلوا إنو ( مولانا ) دا ممكن يحب ويتكسر زيو ذي باقي الناس …!!!
غايتو بكون الفرق الوحيد إنو بتحصن قبل الدخول في الصحن ….!!! ( صحن حبنا )
وبدخل باليمين وبدون ( نعال ) ….!!! رغم الحنين والقلب الشمال ..بس دا بكون الفرق ….
قال لي اها منوووو …!!؟؟؟ ( مولانا انكشح )
دا هسا اقول ليهو شنووووو …!!؟ ( علوب اتلفح )
قلتا ليهو انتا عااااارف ….وانا عارف …والله عارف …ما تحنكني ساكت ( كبييير ياعلوب )
قال لي أوعي يكون في زول تاني عارف ..!!!؟ ) ( زولك وقع )
ا قلتا ليهو لحدي هسا لا ….لكن ما بضمن ليك …
( معللللللم ….)
( بصراحة بقيت عايز اعرف دي منو المجهجة مولانا دي ……!!! سامحني يارب ) …!!
قال لي بالجد ياعلوب دي ( البت ) الوحيدة البتلفت إنتباهي ….
بقيت استعرض في ( محجبات ) الحلة ديل بالصف للوصول الي الهدف …!! غلبني..!!؟
قلتا أستمر في الدرديق …قلتا ليهو علي كل هي زوله لطيفة وملتزمة …!! مافيها كلام …!! …
قلتا السنارة دي اكيد حتقبض ليها ( سمكة ) ….أصلو ما اتخيلتها حتجيب ( تمساح ) ….!!!
عندما فاجئني ( طيب الأسماء ) بالتعقيب
قال لي هي من ناحية لطيفة مافي شك …..!! لكن ملتزمة دي أنا بختلف معاك …ياعلوب ….!!! ياخ البت دي طرحة ساكت ما بتختها في راسا …!! وبعدين يعني صراحة أنا المشي الموضة دا بشوفو عدم التزام …!!! لكن رغم دا كلو …عاجباني ياعلوب بتصدق….!! وشديد كمان ……!!! 💔
غايتو نحنا بنعرف الحب العذري ….لكن ( الحب الشرعي) دا ..الليلة بس …
!!!!هسا لكن الزول دا شايت وين ….!!! ودي منو الراستا الشالت قلبو دي ….!! وحياني بي ( شالو ) ….!! صحي الحب لادين له ولا وطن …)
أنا هنا بقيت في أمرا ضيق ….
( ماف اي طريقة أعمل فيها ماعارف دي منو …!!
( عيب يعني قدام مولانا ) …
ومافي طريقة اقول ليهو هي دي منو دي ….!!!
تبقي فضيحة شرعية ……
( علوب اصطكا) 😬
دي فايدة صيام الاتنين والخميس ….ومن يتق الله يجعل له مخرجا …
بقيت انا في الطريقة البتخارجني ….!!
( مولانا ) لاعب معاي ضاغط يا مؤمن يامصدق إنو انا بعرف البت ….!!!! وانا بقيت يادوب داير أعرِّفا ….!! في جهجهة اكتر من دي
…قلتا أغير الخطة …!! قلتا ليهو يامولانا دا كلو ممكن يتغير
المهم الإحساس ….بكرة تتحجب وتكون ذي ما إنتا عايز
لكن سؤال يا ( مولانا ) لو سمحتا لي …!! هو الموضوع دا عرس ولا إعجاب ساكت من بعيد لي بعيد …
( وأريتني كان ماقلتا )
قال لي استغفر ياعلوب …( جاده شوية المره دي )
أتفتري علي البنت عن ظهر غيب ….!!! 😳
اها الجماعة ديل أول مايقلبو لغة عربية …ويجيبو ليك ظهر غيب ….وحين غرة ….والفسوق بعد الإيمان ….طوالي بشوفوك قدامم واحد من كفار قريش …..!!! ينزلو فيك ( محط ) في ( ضهرك ) دا ….( ظهر ) غيب …وفضل ( ظهر ) وبين ( ظهرانينا) لما تفهم حاجة ……وماتعرف راسك من ضهرك …!!!
قلتا ليهو هسا الافترا وين يا مولانا بنسأل عن مستقبل العلاقة فيها شنو …!! ؟؟؟
قال لي سويتا علاقة …!!! وأردف قائلا ….
أنا طبعا كان نفسي تكون بالمواصفات الانا عايزا …لكن …..!!فجاتن كدا قطع ….وما كمل كلامو …..!! وحسّيت بيهو ماياهو ….!!! وبدا يتلعثم ويتكبكب ….!! بس إتلفتا وراي
ألقي ليك ( حسنة مبارك ) جاية من هناااك …!! تقدل …وما ادراك ما ( حسنة مبارك ) …!! تجلي الرحمن تبارك
مَش مرات بغنو …والجيش سلاح وانا مالي الخدار مرق لي وداري ….اها ( حسنة ) دي ياها ( الجيش ) …..!!
انا طوااالي عرفتا ليك ( الشيخ ) مكتول وين ……!!
لكن بي أمانة ( حسنة ) بتكتل ……!!
عزاااال يامولانا …( هنا تبكو وفي الجامع تبكو ) …..!!!
علي القسم البت دي تبكي حلة كاملة خلي ( شيخنا ) دا …. سماحةً الدنيا …!! ما ناقصة ولا سطر …..
جاية ملفلفة ليها بي توب قديم كدا….!! خيوتو طالعة ….!!! وزيتو طالع ….
ماتعرف تعاين التوب ….ولا تشوف ( الزيت )
( السماسرة بقولو ليك ( البودي ) لو نضيف ( البوهية ) ما مشكلة …!! )
( وحسنة ) دي علي الحلا دي …!! هي برضو من الناشطات في (حقوق المرأة ) والجندر والقصص دي ….!! عندها صفحتين في الفيس …( حقوق نسوان بس ) ….!!!
وجريئة جنس جراءة…… قريت ليها( بوست ) قبل يومين
إذا لم تكن قدر المسؤولية…!! فترجل يا ادم ….!!
عديييل ولا بتدسها ……!!
بس جات ليك مارا بي جنبنا …كتحت ليك مولانا دا كتيح …..وطوااالي خشت ليك فيني يمين …
ويييين يا قلب …!! مشتاقين ياخ ..كيف ياعلوب …!! و سلام في الكتف واليد …..مولانا داير يطير …!!
وهي بتسلم علي ادتو لفتا كدا ….خلتو يتهوزز …قالت لي طبعا ناس مولانا ديل مابسلمو…!! المرأة ما عورة كمان …!!
وتوجهت اليه بالحديث .. …..ولا شنو يامولانا ..!!؟؟؟
والله يا اخوانا ….أنا بس كنتا دايركم تشوفو منظر ( شيخنا ) دا وهو محشور بين الدنيا والدين ….!!
( ياها دي الإختبارات الجد جد …..!!! تقول لي فيزيا …)
زنقة الزنقة ….بقي يرترت ….!!
قال ليها عورة اذا سوت الغلط …!! والراجل ذاتو كان سوي الغلط عورة …..!!
اوووووووووووو ….. والله اصفق واعلق …لا لا لا دا الهام دا
يامولانا …..!!
الليلة كان سمعو في الجامع كان رفدو…
قالت ليهو إنتا لكن ما مولانا ( كلاس ) …وراجل فاهم …!!
( قرب يتفرتق ) ….!!!
غايتو النسوان ديل كان قصدوك بجهجهوك …!!
شوف ( حسنة ) دي هسا ( نهزت ) مولانا دا كيفن …!!
وتاتي رجعت لي بالكلام …..!! قالت لي أها وشوشو عاملة شنو بالله ياعلوب ….!! وانا مركز مع ( ابوالطب )اكتر منها …..
أجمل ما خرجت به من إنطباع إنو الدنيا لسا فيها حب ….شفتو في عيونو ديل …!! ( ونادو لي الشيخ يقرا لي ( يس )
ياربي هسا ( طيب الأسماء) دا بكل هذا التدين والمحافظة هل ممكن يتزوج ( حسنة) دي وهي بكل هذا الانفتاح والجرأة
سألت نفسي هذا السؤال في ذلك الْيَوْمَ وذلك اللقاء الذي جمعنا وكأنه البارحة وقد مر عليه أكثر من عام ونيف ….
بس ليه أنا حكيت ليكم القصة دي بعد الزمن دا كلو…!!؟؟
لانو ببساطة انا بتأمل في هذه اللحظات ( طيب الأسماء ) و ( حسنة ) ياهم ديل قدامي ….!!
( طيب الأسماء اللمين ) وزوجته الفضلي (حسنة المبارك) بشحمهم ولحمهم هنا في عرس ( أخت أكرم صاحبنا) في صالة اسمها ( السنبلة ) في بحري جنب ( المظلات ) ..!!
انا هسا مافي ( السنبلة ) الصالة …!! انا في السنبلة ( الهالة ) وقد أثمرت قمحا ( ووعدا ) وتمني ….!!
( طيب الأسماء) شايل بتو ( وعد ) في كتفو …!! ويتحاوم في نص الحفلة …( وحسنة )مرتو حجاااب تقيل …!! لكنها بكل ذلك اللطف والأريحية والثقة في التعامل مع الجميع …
يبدو أن ( طيب الأسماء) أعطاها ماعنده ….!!! وهي بدورها منحته مافي معيتها …. لأنو كان من الصعب اصلا يدخل حفلة ذي دي ويصول ويجول فيها ….!!
الحياة جوهر …وسنام جوهرها الدين والمودّة والاحترام
لم يتخل طيب الأسماء عن قناعاته ..!! لكنه تنازل ….!! ولم تترك حسنة توجهاتها ….!! لكنها اعتدلت ….
طبت مطيبا ياطيب ….
( وحسنك ) أمر …..!!!
| |
|
|
|
|
|
|
|
|
|
Re: ***** يوميات علوب ***** (Re: ABUHUSSEIN)
|
Quote: يا أبا حسين
اب اضنين
الطيب عبد الماجد المذيع مش كدا ؟
الكان بجي مع اسمها منو ديك في مشوار المساء
كدي ذكرني الاسم
ههههههه |
الإضنين الدخلن في الموضوع دا شنو ...؟؟ خليهن في حالن ياخ ... 🤣
ياهو زاتو الطيب عبد الماجد البجي مع هبة المهندس.... 🤣🤣🤣🤣
| |
|
|
|
|
|
|
|
|
|
Re: ***** يوميات علوب ***** (Re: أبوذر بابكر)
|
Quote: اها ما علوب
جيب مصدرك
بقيت تخم ساى
تورت نفسنا وهيجت لينا الاستيليفزيا زاتو وجبت بوست مكرر ودون مصدر كمان |
البتاعة الهيجتها ليك دي دا اسمها و ل لتخت الاسم من راسك المدوقس دا ... ؟؟؟ 🤣🤣
| |
|
|
|
|
|
|
|
|
|
Re: ***** يوميات علوب ***** (Re: أبوذر بابكر)
|
يوميات علوب 160 مع الطيب عبدالماجد
حلتنا وناس فجتنا
بروفايل 1
( اشراقية ) بت الشيريا
البت ( الحريقة )
الليلك قلتا أسوقكم معاي شوية في جولة سياحية علي حلتنا دي من جوه لبعض الوجوه والشخصيات البارزة ....!! ( والمحشورة ) ...!!
وكلهم خير وبركة ....
و خلونا نبدا بالبت دي ...!!
البت ( الحريقة )
إسمها إشراقة ......!!!
إشراقة الشليقة ...!! بت جيرانا ....!! أول بت ساقت عجلة في الحلة ....!! والوحيدة العندها ضربة في نص جبهتا .... !!
بقولو ليها ( شيريا ) تيمنا ببت (الشيريا ) في الكتشينة
... ساكنين قدام مننا كدا جنب محطة ستة ...!!
غايتو بأمانة كدا ( إشراقة ) فاضحانا فضيحة...!! وشتارة كدا مبالغ فيها ....!!
( مشاعر ) قالت لي ( سنية ) عندها ( أخت راجلا ) ماتت مشينا نعزيها....! والنسوان ديل ملمومات واقفات بالصف ...! كمان ( سنية ) دي وزير الدفاع الما بجيها ويعزيها عليه أن يتحمل تبعات ذلك .....!! مش مرات كدا لو وقعت مصيبة وأمريكا مزاجا عكران بطلع زولم داك يقول ليك البيت الابيض يتابع عن ( كثب )
.....!! بس ياها ( سنية ) دي الله لا ( كسبا ) ....!!
عشان كدا الما بجي يعزي طوالي بتصنف متمرد ...!! وتعلن عليه الحرب .....!! ( تحسبو لعب ) ....!!
الحلة كلها مكبوبة هناك ....!! لاحظ إنو العزاء من الدرجة التانيه.... ( أخت راجلا ) ...رغم دا حضور جماهيري كثيف ....
بس الساعة ( الإشراقة ) جات ليك من هناااك تتهوزز يازووول الطرحة المشرشرة ...!! وحاجه كدا زي فنلة البرد في الحر دا ...!! ودارعين ليك الشنطة أم ريش ...!!
( بس رواد الفضاء) ...!!
( مشاعر ) قالت لي كان نفسي أعرف شنطة ( إشراقية ) الزِّي ( الجدادة ) دي فيها شنو ....!!!؟ لحدي ما ربنا أكرمني وأتيحت لي الفرصة وشفتها عن قرب ...!! بتصدق ياعلوب فيها فرشة.. ومشط ...ومراية مكسورة .....!! دا كووولو عرفنا.... وقلنا خير ......
( الدوم ) شنو ...!! ؟؟؟ 😳
اي والله ياعلوب ما بهتها ...!!( الدوم ) الواااحد دا ...
لا دومة لا دومتين ....!! كمية ...!! هسا دي بت ولا حصان .....
المهم ( أبو الشا ) جات ليك مقشطة ...المكياج دا بالنهار ...!! وشاختين ليك البنبي دا كيف ....!! والإسكيرت أبو لمعة والأمة مجتمعة ....والنفشه ....!!! ولاااا هاميها.....!! واللبانة في الخشم ...بدوها كجمة كل خمسة دقايق وترجعا تاني تحت الضرس ..!! الظاهر مخزناها هناك ...!! بتطلعا تمدغا وترجعا محلها حسب الحالة ....!! ماعندها شي لأي زول ....!!
مشاعر ( قالت لي أنا خلاااص قلتا أكيد في كارثة حتحصل ....!!
قالت لي بعد ما عزت وقَعَدت والناس دي كلها أخدت ليها صنة كدا .....!!! وشكلها بتدعي بي جوه إنو ربنا دا من فوق يهدي سرك يا إشراقة .....!! ويعدي الْيَوْمَ دا علي خير .....!! وقد خاب ظن الجميع ...!! ويبدو إنو الدعوة طشت شبكة ولم تجد طريقها للإرسال وإشراقة قعدت تتململ ....!! وخشما أكلا ....!!
وطقت ليك اللبانة دي في نص بيت البكا ....( طقق ) ( كويس ما نفختا ) .....!! و النسوان حسن بيها قعدن يضايرن ( وحانت ساعة الصفر ) وقالت كدا وقبلت ليك علي ( سنية ) ...!! وبكل برود قالت ليها ......
إنتي ياسنية أوعي بس تقولي لي الماتت دي أختو ديك القلتي بتآكل قروش الصندوق ....😳💰😳😳
يوززززززززززززززع
والله يااخوانا أي ( مرا ) في الأوضة اللحظة دي إتمنت تتحول لي ( ساروخ ) يقد ( الزقف ) دا ويطير ...!!!
وفي النسوان الخايفات من ( سنية ) ديل عملن رايحات كأنهن ماسمعن حاجه ....!!
ودي واحده من أرفع درجات ( كسيرالتلج ) إنك تسمع شي محرج في زول وتعمل ( حميل) ...وما تدوس لايك ....
( سنية ) بقت تتضاير قدام النسوان وتبلع في ريقا ...
وإشراقة كأنها ما قالت حاجه ...ولا هاميها
طبعا الميزة الوحيدة العند ( إشراقية ) دي إنو ماعندها كبير ...!! لا بتعرف ( سنية ) ..!! ولا قيامة
وكت لقت النسوان بعاينن ليها ...بدل تستدرك الموقف
وتحاول ترقعو ....اتلفتت جاي جاي ..ولوت ليك خشما دا ...وصدحت بالقول ....
النصييييحه ....
هكذا عقبت عاصفة الصحراء......!!
لتقطع أي أمل في الإصلاح ...!!
حالة ميئوس منها .....!!! صاح ....
فوزية حلفت قالت ( إشراقة ) دي ( بتسف ) ...😳😳
( كان صحي كان كضب ) ....!! قالت مره راكبه الحافلة جنب سعد قشرة عينا لي ( إشراقة ) بي شنطتا الدايرا تلد دي ......!! واقفة قدام ( الجمري ) للعماري الجيد واشترت كيسين ...!! والكلام علي ذمة ( فوزية ) ...!! لكن فيما يبدو وأغلب الظن إنو ( إشراقة ) بتكون رصعت ليك ( فوزية ) دي بي كم حاجه كدا ...( وفوزية ) دايرا تنتقم منها ...
والظاهر إنو ( فوزية ) هي البتسف ...لأنو قالت حتي مكتوب في المحل ( لو ما فاطر ما تخاطر ...) ...!!
معقولة دا كلو قرتو من الحافلة ....!!
بصراحة أنا عجبتني ( لو مافاطر ماتخاطر ) دي هسا لو كنا في ( أمريكا ) كان بعناها لي ناس ( البيبسي ) ...( قوية شديد )
.!!
ياخ دي معلقا في بروفايلا في الفيس ( جون سينا ) المصارع ....!!
قالت لي ناس مشاعر إنها ( مشتركة ) في الفيس بوك
( مشتركة) ..!!؟؟؟؟؟؟؟؟؟ 😳😳😳😳😳
( إشراقة ) دي بتكون قايلا الفيس دا ( جمعية )
ياربي ( مارك ) عندو علم بالمهزلة دي ....
أها دي ( إشراقة ) والنارا حراقا ....رايكم شنو ....
لاقيتا ليك أول أمبارح في المستشفي أبو أميرة فلقصة عمك ( مصطفي ) دا راقد هناك ....وهو زول فاضل خلاص ....ما عارف (فلقصة )دي طلعت لي منو ....!! عاملين ليهو عمليه رباط صليبي في الركبة
قلتا ليها خير يا ( شيريا ) مالك الليلة بي جاي ...!!!؟ قالت لي جيت أشوف ( نيمار ) دا .....😳
( أريتك بدون جيه ) ...... براااحة كدا قلتا ليها إنتي يا (إشراقة ) ما بتخافي هسا لو زول من أهلو ديل سمعك .....!!؟ قالت لي ما يسمعو ....هو لاقي يكون ( نيمار ) ......!!!!!!! المهم إنتا كيف يا ( علوب ) بقيت ما بتتشاف ... (قشطوك ) بي وزارة ولا شنو ....!!
قلتا أهظر معاها شوية ....قلتا ليها هسا بالله الوزارة الخايلة فيني شنو ...!!؟؟
قالت لي وزارة الكهربا ....الوحيدا النقاطة....!! الباقيات ديل خلاص عبرن .....!! هوا شديد ....
( شوف ( إشراقة ) وشدتا .....عااارفا الرصة )
قلتا ليها هسا إنتي يا ( اشراقة ) شايفك مازي البنات شغالة بي موضوع العرس والإستقرار والحاجات دي
...!! مالك .....!!؟
قالت لي أول حاجه الرجال ديل مرض .....( كععععع )
وكضابين ( اووولا لا ) ...!! حركتم تقييييلة ....يجي العرس بزوغو ...خلي بنات كاس العالم ديل ينفعنهم ...وهو ماعارفين نحنا أحلي منهن ...قلتا ليها أبشري بناتنا وكاساتنا ...!!
قلتا ليها بس ما تعممي في كدا وفِي كدا ....قالت لي غايتو دي البضاعة اللاقتني ...!! ( عملتنا بضاعة ...) ....!!
ثم أردفت ( المشوطنة ) ...قالت لي كدي تعال هنا النحدثك ....أنا ترا لسه ما فات فيني الفوت ...!!
إنتا سؤالك دا ما كان تسألو لي ( أمونة ) عشان تسويك ( كفته ) 😳😳😳
( هسا دا زول يهظرو معاهو ).....
طوالي قلتا ليها عن إذنك يا ( إشراقة ) أنا مستعجل قالت لي هيااااا المستعجل ....!!!
إنتا قايل نفسك ( الكريج ) .....!!
( إستوقفني التوصيف ....!! )
( الكريج ) دا منو كمان الأنا قايل نفسي هو دا ...!!؟؟ ) قلتا ليها و ( الكريج ) دا يطلع شنو كمان ...!!
قالت لي معقولة يا علوب ما بتعرف ( الكريج ) ...
الكريج دا ببدل الهدوم بالعده ...يعني ( البشكير) بي طوه...!!التوب بي تلاته حلل 🍵🍵🍵....!! البلوزه بي جك ....حاجات زي دي .....!! وطواااالي هو مستعجل ....واستدركت الكتاحة....
قالت لي ماعندك بنطلون نجيب ليك بيهو ( سيرميس ) 🍶وفقعتا ليك ضحكة في نص المستشفي ....!! 😂😂😂😂😂
عليك الله شوف البت دي ....!! صدقو انا ذاتي قعدتا أضحك 😂😂😂.......المابضحكني شنو
(إشراقة ) دي مانصيحةً والله ...! انا غايتو مرات بتكيفني صراحتا دي .....!! بس لو ظبطت الإيقاع دا شوية ....
قلتا ليها طيب ما تعرسيهو ( الكريج ) دا ...!!!؟
قالت لي أنا دي ..!!؟ .....ماااالي .....يقوم يبدلني بي ( بوتجاز )
( والبابورجاز خلي اليشتغل والشغل بالجاز خلي اليشتغل ) 🎵
أها دي ياها ( إشراقة ) شغالة بنزين وجاز ...إسم الشهرة ..( شيريا ) والإسم الحركي ( إشراقية ) ....!!! والإسم في الشهادة ( إشراقة العشراقة )
إحدي وجوه حلتنا البارزة .......( برواز ) شديد
أخطر مافيها إنو مافي ( مرا ) بتتجرأ وترد عليها
لأنو عارفنها تمتلك ( النووي ) ....!! مرات بفرضو عليها بعض العقوبات ...! يعني ممكن ( يرخوها ) من عزومة مثلا وما يكلموها ...
وفِي الحالة دي لو ومزاجا ( جايط ) بترسل ليهم طياره من دون طيار.... تنسفن نسف ...
مره جلوها من سماية بت ناس (الخزين )جابو ليها بت بعد خمسة سنين زواج ...طايرين بيها السما ...!! سموها ( هبة ) ..!!الغدا والقيامة والحفلة بي ميادة
نص الحلة دي هناك وهي ماعزموها .....😓😓
طوااالي الطيارة قصفت .....!!
طلعت إشاعة إنو أبو المولودة ( هبة ) دي معرس بالدس وعندو ولد ......خلت ليك خشمن دا ملح ملح ...كرهتم ليك السماية ذاتا ...!!!
التحقيق بس ...مع المتهم الأول أبو ( هبة ) استمرا تلاته أسابيع لحدي ماطلع براءة ......
هسا دا زول بفطو ....!!!
زي ( إشراقة ) دي تعزما وأكلها يكون خاص ...
.....
اها دي ياها ( إشراقة ) العشراقة ....
( بصلة ) بتعشرق في الحلق ...
نعود ونلتقيكم مع وجه جديد من
#وجوه حلتنا _وناس _فجتنا ....
ملحوظة ....
بالله لوووو سمحتو مافي زول يقول ليها علوب جابك في اليوميات..... طبعا ( F16 ) دي عااادي ممكن تقفل الفيس دا .....
ولو حظك حلو تلاقي ( إشراقة ) في الرملة الدقاقا عشان تفهم حاجه ومع ( الشتات ) تتلاقي
😜😜😜 صحي يا شيريا .....♣️
| |
|
|
|
|
|
|
|
|
 Re: ***** يوميات علوب ***** (Re: ABUHUSSEIN)
|
Quote: عشان القافية برضو
ههههههه
خليهم يقولو
زي ما الناس يقولو
حلاة الجمعة يومو
وحلو المنبر مفيلو |
يا زول هوي و الله احرش ليك صاحبي الشاعر الانيق صديق مهدي يبرك بي خمسة ستة ابيات مقفيات يحيرك زاتو ....
🤣🤣🤣🤣
| |
|
|
|
|
|
|
|
|
|
Re: ***** يوميات علوب ***** (Re: Haytham Ghaly)
|
العزيزة …..!!!!
( عزيزة ) دي ساكنة جنبنا في الحلة مما قمنا لقيناها
شغاله في الضرايب …..
بس تسأل يقول ليك عزيزة في الضرايب …. بتضرب في شنو ما عارفنها …..!!
وأصلو مافي زول داير منها بلحة …لأنو علاقتنا بالضرايب في هذا المكان علاقة سطحية خالية من أي عمق …..!!
يعني ناس حلتنا ديل ( السجل الضريبي ) الوحيد العندهم ياهو دفتر الديون العند دكان ( يس ) دا ….
وكويس إنو محافظ على سريتو …!!
بس كمان في الغلاف وبالخط العريض كاتب ( حصيلة المديونيات ) …!!
تسمع ( المديونيات ) تقول البنك الفرنسي ….!!
( هسا في داعي يا ( يس ) للعناوين الجارحة دي )
عايتو أجمل حاجه إنو جوه كاتب إسمي ( فريد ) …..!!
مره قال دايرين نعمل ( قروب واتس ) بدل الكراس دا نواكب الحضارة
خوفتو ليك قطعتا قلبو ……
قلت ليهو القروبات دي مرصوده ممكن يتهموك بي تنظيم إرهابي خاصة لو الناس ما عندها علاقة بي بعض
خليت عيونو ينططن الحنين …
معقوله يا ( يس ) ياخ …..
بي علبة صلصة وبسكويت رويال داير داير تبيعنا online
أها ( عزيزة ) مرتااااحة زول بكلفا بي حاجه في الحلة دي مافي ….وزووول داير منها حاجه مافي .. ..
عشان كدا ضلها ميت ….!!
عدا ( منصور ) جارنا دا …….عندو ( بنشر )
الظاهر ناس المحلية ( نافخنو ) بالضرايب والجبايات
قال ( عزيزة ) مندسة …!!
لكن في المقابل مثلاً ( جعفر ) دا عندو أخوهو ( ملازم ) في ( الجوازات ) إسمو ( أسامة ) ….!!
قال لي ( صبري ) كرهو اليوم الدخل فيهو الكلية
كل يوم خامي ليهو تلاته أربعة موديهم ليهو دايرين جواز
لما زهج قال لي ( جعفر ) إتكلم مع ( صبري ) دا قول ليهو
مشيناها ليك مره مرتين أنا مافاضي ليك …!!
جعفر قال لي كلمت ( صبري )
قال لي خلاص معليش تاني ( تجضيض ) بس !!!
ابو الجعافر قال لي لو كلمتا ( أسامة ) بدي طلقة …!!
المهم في الفترة الأخيرة دي ( عزيزة ) زي استشرست حبة كدا ….!!
( والله ما حبة كتير )
وبقت عصبية شوية قالو ليها عشرين سنة في الضرايب جابو ليها شافعة صغيرة كدا مسكوها المكتب المغسة كتلتا وبقت بتفرغ شحناتا في أي زول ….!!
هي لكن يا ( عزيزة ) إنتي كمان ما لازم تطوري قدراتك
البنات الصغار ديل ( بطقطقن ) الكمبيوتر دا ( طقطيق) الجن …..إنتي ياهو طواااالي لافحين الشنطة السودا دي والنضارة وماشين
بعدين ياعزيزة الشنطة دي ذاتا كبيره شديد …!!
( ياربي يكون دا الوعاء الضريبي ) …
وشنو الشمسيات دي …
( إنتي اليزابيث )
والصرصير … …
فكيها شويه يا عزيزة …( الإبتسامة خالي ضريبة )
بس كمان شهادة حق
( عزيزة ) تاريخ والله …!!
ريحتا ذاتا ضرايب
يديها العافية …!! ………….لكنها الحياة
أها قبل يومين كدا جات شاقا ميدان الحلة دا والشفع بلعبو ………الكوره طقشتا …. !!
التقول طقشتا الركشة
لمت ليك في الشفع ديل مسحت بيهم الأرض..
يا عديمين التربية والأخلاق….. يا شذاذ الآفاق…يا متنطعة
قالت ليهم إنتو فاقد تربوي …..!!
طبعا ناس ( الكجم ) الكلام دا بالنسبة ليهم ( صيني ) بس …ما فاهمين ولا حاجه …!!
( شذاذ افاق ) ياعزيزة ما شذيتي )
بس بقو راجنها تنتهي تديهم كورتم دي وتمشي
لأنها ماسكه ( الكفر ) رهينة …
المهم فضت فيهم زهجتا كلها ….وماسكا الكورة بالجنبه كدا في نص الملعب …..!
( عكرمة ) صاحبهم دا على التعترو قال ليها خلاص أحكميها لينا
وليته لم يقل …..!!
كتمت فوق وتحت
و عزيزة بقت لابتسمع ولا بتشوف شالت الكورة ومشت
خلت الأولاد ديل خشمن ملح ملح …..!!
( عزتم العزيزة لكن ) …..!!
أها بقت المشكلة في الكورة الشالتا دي يرجعوها كيييف
….!؟؟؟
وقرروا عمل أي حاجة لإسترجاع
( الكفر ) وكأنه قد كفر ……!!
جوني جارين قالو لي ( عزيزة ) شالت مننا الكورة ياعلوب ودايرين نرحعا …
أنا طبعاً لاقيتا قبل كم يوم في المواصلات ….
قلتا ليها إزيك يا عزيزة إن شاءالله كويسين ….
كدا بكل لطافة ….. !!
مش كلام حلو ….!!!
قالت لي الأسئلة النمطيه اللا بتودي لا بتجيب دي الناس تبطلا ….
( عرفتا وضعها حرج …!! )
أها هسا نجيب منها الكوره دي كيف …..!!؟
انا كان مشيت بتطردني ..
استشرتا ( مشاعر ) وحكيت ليها الموضوع …
( مشاعر ) قالت لي ( عزيزة ) دي مفتاحا وااااحد بس مافي غيرو …تدوها إحساس بي أهميتا
سواء في الدولة أو الحلة ….!!
دي الشي الوحيد البفتح نفسا …….!!!
طوالي مشيت قلتا لي ناس ( الكجم ) أسمعوني كويس
إنتو تشكلو ليكم ( تيم ) منكم وتمشو تدقو لي ناس عزيزة ديل الباب وتقولو ليها نحن جايين نعتذر …
وأهلنا قالو لينا إنتو ما عارفين إنو ( عزيزة ) دي شخصية قومية ومهمة في الدولة ….وديل الناس البعتمد عليهم الإقتصاد …ونحن آسفين….!!
كلامي دا واضح
وعملت ليهم بروفة خمسة مرات للمرافعة دي وكل زول فيهم فهمتو بالظبط يقول شنو ودورو شنو ….!!!
فعلا الوفد إتكون من ( الكجم ) و ( عكرمة ) وواحد تاني إسمو ( المغيرة ) و ( إسماعيل) واتين تاني صغار كدا
واحد إسمو( أسعد) والتاني ( معز ) ….!!
أها الصغار الاتنين ديل ماليهم أي لازمة
( تمومة جرتق ) بس …مهمتم الاساسية يكبرو العدد ويقوو الموقف التفاوضي …
المهم أخيراً الوفد إتكركر مشو على بيت ناس ( عزيزة )
الرجلين مغبشات ….والفنايل متربة …واتنين في الوفد حفيانين ….!!
دقو الباب فتح ليهم أخوها شرحو ليه الموقف وأسباب القدوم …..!!
دخلوهم مطاطئي الرؤوس التقول أسرى بني النضير
و( الكجم ) رئيس الوفد يقشقش في نخرينو ….!
وقف قداما ( متني ) كدا
واليدين الإتنين في الراس ….
وما مركز معاها نهائي بتكلم ويعاين في البيت
( الكجم ) دا أصلاً عندو الحركة دي …..
زي ( الجرادة ) عيونو مركبه
بعاين أي حاجه في وقت واحد …….
( الود دا احتمال كبير يطلع حرامي لو ما حصلنا )
المهم إتمطى كدا وقال ليها …
( قالو لينا ) نقول ليك معليش….
الله يفضحك يا كجم ياخ …..
( قالو لينا ) دي شنو ..؟؟؟
دا كلام دا …..
و ( المغيرة ) أخير (الكجم )
دا كمان قال ليها ( قالو لينا )
شكروها بتديكم الكوره …..!!
( ليدق آخر مسمار في نعش المفاوضات )
( عزيزة ) دايره تجن ….!!
المهم غايتو ( إسماعيل ) دا نبيه كدا في وفد التفاوض
رغم إنو الأصغر …..
قال ليها شفناك يوم داك في التلفزيون ….
لمن ضحكت ….!!
وهو مشبها بس ….تلفزيون واحد مافي …
المهم المفاوضات إنهارت …..!!
قالت ليهم رسلو لي الرسلكم دا ….بلا يخمكم ….
يلا من هنا …….
خلعتم ( الميراج ) ……!!
إتشتتو زي السكسك … قربو ينطو الحيطة ….!!
( حتى الطفولة لم تسلم منك ياعزيزة )
( عدا الكجم وعكرمة الطفولة بريئة منهم الى يوم يبعثون ) ….!!
( إسماعيل ) دا في عز المفاوضات دي استوقفته( كديسة ) متكلا تحت الطربيزة في صالة ناس عزيزة ديل ….قعد ليها في الواطا ….
بقو يعاينو لي بعض هو والكديسة قربو يتحاضنو
وكان على ( أسعد) و ( معز ) ديل اصلاً ما جايبين خبر الدنيا وهم ذاتم هنا لي شنو ….!!
أخو عزيزة دا أداهم حلاوة عايزين يغمرو
بس بقو مركزين معاهو باعو الدنيا كلها …..!!!
والضحكة حدها الأضان ….!!
( قدو أم الوفد المفاوض ….)
المهم بعد فشل المفاوضات
حكيت لي ود الحاجه الحكايه قال لي ( عزيزة ) دي لازم نشد معاها شوية ياعلوب التحانيس والتفويت الكتير خلاها سايقة في الخلا
قال لي رايك شنو نكلم ( أمونة ) ترسل ليها رسالة …
قلتا ليهو خايف القصة ( تتطمبج ) ….
قال لي أحسن نعرف البينا والعلينا ….!!
( عزيزة ) دي الليله شالت الكفر بكره بتشيل عداد الكهربا …حنقعد ننتظرا يعني
إستشرتا ( أمونة ) قالت أحسن حاجه عملتها ( عزيزة )
دي إنها شالت الكورة من الشفع ديل
لأنهم بقو شفع مزعجين وقليلين أدب خليهم يرتاحو في الحر دا …..!!
لتنهار المفاوضات بشكل نهائي …!!
باين إنو أمونة ) ذاتا لاحقة ( عزيزة ) ……
إنتو الحاصل شنو في الحلة دي الناس دي مالا ……!!؟
واضح إنو قطوعات الكهربا الكتيره دي ….قطعت
سلوك البعض
والبعض أنوارو ضاوية بدون سلوك زي ناس ( رحاب ) القيامة لاقيتا في عرس ناس فرحات داير لي موضوع قلتا ليها الله يستر غايتو الكهربا ما تقطع
قالت لي النور نورك يا علوب …
قطعت أنا ساعتها موية وكهربا وبنزين …..
ياربي عزيزة
(( حتملا )) الكفر ولا حتخلي منفس ….!!
وياعزيز دنياي …!!
| |
|
|
|
|
|
|
|
|
|
Re: ***** يوميات علوب ***** (Re: ABUHUSSEIN)
|
يوميات علوب. 91 ...
تجي ولا نجي
في تلاته اخوات في الحلة الجنبنا دي سمحات سماحة مامعقوله ...!!! فدوي وسماح ومعزة ....!! (مثلث برمودا) ...اها الفي النص البقولو ليها سماح دي ...نجاضه ..نجاضه ..!! والله انا مرات بستغرب كيف الزول يختارو ليهو اسم بشبهو ...!!اها بس ياها (سماح ) دي ....!!!
البت دي قااااطعه ..!! قاطعه ...لهبه بس ...!! بعدين هي خدورية كده تشهيك الخدره ...!! النوع داك الدقاقا ...
والعيون متل الفناجيل ..والسنون براقن يشيل ...رصه ذي الرصه ...!! ياخ خليك من سماح ...فدوي ومعزة ...!! هينات...!!! يمين كلو واحده تقول للتانيه انتي منو ..!! غايتو أمهن دي اتوحمت علي غزاله ولا زرافه ماعارف ...!! المهم معقداتن ليك البنات ديل تلقاهن تعبانات في روحن مسيح وكريمات ...يجن (المارينز ) ديل ملفحات بي توب الجيران ده يوقفن الحركة ...
اولاد الحلة سامنهم هيئة الأركان ..!! غايتو (سماح ) دي فريق أول ...!! ....!! (النصيحة كلهن لواءات.. وفرقا) ....!!
المهم جا خبر طاشي كده قالو سماح دي خطبوها...!!!
غايتو اليوم داك جنس احباط .. ..!!! الناس دي كلها تبكي ...!!! انا نفسي اعرف هو المبكيهم شنو ...!!؟ ماسمعتا فيهم واحد يوم قال النمشي نخطبا ولا اي حاجه ...!! بس اصلو كده في السودان ده ..!! البت تتخطب ولا تعرس ...!! المغسة تشق الشباب ..!! خاصة لو سمحة ...خليك من (سماح )الطياره دي ...انا ذاتي اتغزتا ...!! بس بقينا منتظرين لينا وكالة تكذب خبر السواد ده ....تنقرو ما أتأكد ...!!
جانا (صبري ) واحد صاحبنا (معولق ) كدا ....!!! اها ده كمان أسرع من (سونا ) ...!!واخبارو نجيضه من المصدر ...جانا يتلولح ذي المروحة ...وهو بجرجر الكلام كدا ...!! قال لينا الترااابه دي في خشوومكم ..!! حمامه وطارت ....سماح اتلحست ...!! (يلحسك الدبيب انتا ...!! يادبيب...!!! الله لاغزا فيك بركه ...)
اها بعد ما وقع القدر...واستغفرنا ...!!! بقينا دايرين
نعرف العريس منو ..!! لانو لو طلعنا مابنعرفو ..!! بخفف علينا الضيق شوية ...!! بس (صبري ) رجمنا ليك بالتانيه ...قال العريس متزوج واولادو كبار ....!! خدددد ..!!
اهاااا لحدي هنا نحنا كويسين...!! لكن حكاية الرجال الكبار
البجو يلقطوا ( البلي ) ده ...!! ده موضوع مابنسكت عليهو ...ينعل ....!! ابو اي حاجه ...!! ماتخلونا نجوط ساكت
يعني نحن لا نلقي شغل ولا ذي ناس (سماح) ديل.. مع الهجمات المرتده دي ...مش كدا ...!!! هي سماح دي ذاتا جنت ولا شنو ...ياخ البت دي تأشر بس ....يجو ميه ...!! مالا ومالا رجال النسوان وأولاد وقيامة ...!!
اها صبري اب راسا مبري قال كده واستعدلنا ليك بالفنية القاضية ....!!!قال جابو ليها توسان ٢٠١٧ بمناسبة الخطوبة
ايواااا يعني الحكاية كدا ...!!! معناها اكيد العقد بي ( برادو )....!!!
مبروك ياسماح ...!! والوسيم القلبي رادو ......!!! تجي ولا نجي
| |
|
|
|
|
|
|
|
|
|
Re: ***** يوميات علوب ***** (Re: ABUHUSSEIN)
|
إستراحة مع
الأعلامي المخضرم والكاتب الرائع
الطيب عبدالماجد
مهما تكالبت المصاعب وتأزمت الأمور يجب أن لا نفقد ثقتنا في أنفسنا
ونتذكر على الدوام أننا أكبر من كل الظروف والمحن ..!
🎈🎈🎈🎈
( وياهو دا السودان ) ......!!
ليتهم يفهموا أننا شعب لطيف وعفيف ...!! هذا هو الأصل وما طرأ عليه فهو قشور ..! وزيف ...!!
قنوعين بالفطرة ...!! ومسالمين بالطبيعة ....!! وكبار بمعزتنا وعزتنا
ومتسامين بأخلاقنا وعزة نفسنا ....!!
بسيطين بعمق ...!! وعزيزين بي فهم ...!!
ممهولين بس أسياد واجب ...!! كرماء دون أذى...!!
عارفين أي حاجه بس مرات بنعمل ( رايحين ) عشان الأمور تمشي ...!!
طيبين شديد ...!! بس ما تستفزنا ....
بي كلمة طيبة نختك في راسنا ....!! وبي نية صادقة نديك روحنا وإحساسنا ...!!
تحترمنا...!! نحترمك ..!! ونختك في السما ....!!
تمتهنا ...!!!! ( إتعديت الأحمر ) ...⛔️🚷
وجبهتك بنوسما ...!!
تسعدنا جداً زيارة حبيب ...!! وتفرحنا من جوه مكالمة محبة وسؤال ....!!
حياتنا نصها ( رابحة ) بين صالة عرس ..!!وبيت بكا وزيارة مستشفى ...!!
نواصل ونجامل ...!! نخاوي ونزامل ....!!
البيت كلو ( بتخمخم ) يمشي المطار نستقبل أخونا الجاي من ( الرياض ) ....
وأختنا بي اولادها جايين من ( مانشستر ) يعيدو معانا ...!!
( لقاء الأشواق ) 💞
والحرائر يزرفن الدموع قبالة صالة المغادرة لعروس تتهيأ للسفر وشهر العسل ...!!
في توصيف يتفوق على المسلسل الأصل
( الشهد والدموع ) ...!!
رجال بهزو ..ويرزو ..!! يتقالدو باكين رحيل رفيق عزيز ...!!!
فيا لرقة الشعور ...!! ويا لصلابة الظهور ....!!!
والسوداني حر ...!!
فأي جمال هذا وبهاء وحضور ....
نساؤنا كما الأقمار يسطعن عفافاً ومسؤوليةً ومواقف ...!!
بنات قبايل ..!! وستات فهم ...!! وسليلات عازة
الراكزات أخوات الرجال ...!!
يرتبن البيوت والمكاتب بذات المقدرة والتفرد ..!!
نضرب صحن الفول المصلح مع الأخوان بالشطة والونسة والشمار ...!! فنحلق ...!!
ونحضر مباراة في ( دار الرياضة أم درمان ) بذات
إحساس ومتعة لقاء في ( الكامب نو ) ....!!
لانو الإحساس هو الحاجه الوحيدة الما بتعرف المكان لكنه يعي اللحظة ويتفاعل معها أينما كانت ...!!
وكلاهما ( كلاسيكو ) الأرض ....!! 🌍 وهذه الأرض لنا ✌️
نعشق النكات العميقة والمواقف البتضحك جد جد
لذلك تداولنا فيديو ( عثمان الفلاتي ) عندما قلع ( الكسكته ) 😂 بذاكرته الحية ولطفة الطبيعي ...!!
وتفاعلنا مع ذلك ( الظريف ) الذي كان يروي من اسرار الحقيبة سحرها وبيانها
( صورة وصوت ) بسلاسة يحسده عليها مقدمو البرامج في
أحد الصوالين العامرة والتي تحس تجاهها بالألفة وكأنو ديوانكم ....!! 🥰
وعندنا غنت تلكم الصبية البهية على ضفاف سيل خريفي جارف .. ...
( أعطف على ياريم ...أنا والنجم زملان ....!!😍 ...!!)
كلنا انعطفنا ( جمال ) ..!!! وكان ( جنوبيا ) صداها....
فوصلتنا رقيقة على ظهر ( الواتس ) وقد عبرت الطوفان ...
فتداعى الخلان وسكروا طرباً في كل الأرجاء في تناغم فريد
وتوحد نادر للشعور والوجدان وجوازات المرور للمبدعين يختم عليها السودانيون
في وقت واحد ومن كل الأصقاع ختم الدخول
فمن أي كوكب جئتم أيها الناس ...!!
يا أيها الحبان ...!!
وياهو دا السودان ...!!
مريض واحد بالداخل ...! وجيش يفترش الأرض بالخارج
( بصلو المغرب على عتبات المشفى ) ..!!
يعقبه دعاء أكثر نجاعة من دواء الطبيب ( الجوه ) ...!!
وأكثر حميمية ودون تاريخ إنتهاء ....!! ( الله حي ) ...!!
ونحن ناس بنعيش حياتنا الغالية بالنية السليمة ..!!
بنحب ( الطيب صالح ) ...!! ونعتز بي ( عبد الله الطيب ) يشجينا ( على المك ) ....!! وتهزنا الحقيبة ...!!
يطربنا الكبار ....!! ونعشق ( الحوت ) ....!!😍
نقرا ( الجنقو مسامير الأرض ) ...!! ونحترم ( فرانسيس دينق ) .....!!
بنحضر ( المهرج ) في المسرح ....!!
وفي حكاياتنا ( وردي ووداللمين ) و ( علي شمو ) ...!!!
بنصفق لي ( باص ) من ( هيثم مصطفي ) ...!!
وحزنا كلنا لما مات ( كمال عبد الوهاب ) دكتور الكورة السودانية ...!!
رغم إختفاءه من المشهد لسنوات طوال لكنها العشرة والموهبة...!! وأشياء أخر ...!!😌
مسالمين شديد وبالنا طويل ...!! لكن أول ما تقول لينا كان رجال تعالو ..!! ولا الراجل يجي مارق ...!!
ساعتها لا بنشوف لا بنسمع ....!! ونأتيك من كل فج عميق ...!!
تهتز الجزيرة ووتدق نحاسا ...!! وتخرج سيوف الشرق من جفيرها ...!!
تكشر فاشر السلطان عن أنيابها ....!! وكردفان تستعيد ذكري شيكان ...!!
يعود المك ..!! وتكاد نخلات الشمال ان تنضم الي جموع الرجال .. !!
تنزل الكنانية من الجبل ...!! وتمطر بت عبود ...!!
..وقتها فقط ترى السودانيين كما سطعوا في الثلاثين ...!!✌️
بنتلما يوم الجمعة في الفطور نتبادل الحكايا والأسمار وملاح ( التقلية ) ...!!
وأحياناً ( عشرة كشتينة ) بريئة مطعمة بي ( شاي أحمر ) وشايب ديناري ....!!♦️..!!
ولمن يجي وقت الصلاة الجامع ( مستف ) ...!!!
بنتفقد البيت الكبير والناقص نتمو ...!!
عشان كدا أمك بتقول ليك يا حبيب قساي ....!!!
فأي دار هذا الذي يجمع بين الحب وقواسي الأيام ويعلن انتصاره عليها وبالقاضية الفنية ....!!
وأنا عااارفو قلبك أبيض ...وكلك حسن نية ....!! 🥰
في كل ربوعنا والقرى والفرقان ....!!
الكبير كلمتو مسموعة ...!! وعذارى الحي خطوط حمراء ...!! والعز أهل ...!!!
أمهاتنا بحلن ويربطن ...!! وشبابنا واقف قنا ....!!
ولابد من ( ظريف ) يمنح المكان سحراً وضحكة بحلو الكلام ..!! وسرعة البديهة ...!! وقبول الناس ♥️
وملايين المغتربين في أرجاء المعمورة أجسادهم هناك وأرواحهم معلقة على جدار الوطن ...!!
أسعد لحظات حياتهم عندما تصل ( تحويلة ) لإهلهم في العيد والبنات يفرحن ويجيبو الملايات الجديدة وعدة الحاجه ..
ولبسات الشفع ...!!
وهو في ذات اليوم سادي خدمة وشغال ...!!!
لكن صدي ضحكاتهم ينزل عليه بردًا وسلام ....!!
فسلام عليكم في العالمين ...!!
نحن ما اتغيرنا ...!! إتغيرت الدنيا ...!!
فالذهب لا يصدأ ...!! ونحن ( معدنا ) طيب .....!!
الدنيا بتلعب في ( الداتا ) و ( الإعدادات ) تعينها الظروف وتساعدها الأقدار ...!! ....( وبعضهم ) ...!!
لكن فات عليهم إنو السودانيين ديل قد يصابوا ...!! لكنهم لا يتعطلوا ...!!!
فالأجسام المضادة فيها مروءة وكرم وشجاعة ولطف ...!!
عزة وهيبة ...!!وكثير كرامة ....!! وقد أكدوا ذلك في أكثر من مناسبة ....!!
شعب يجمع عليه العالمين ..ليس مزحة ...!! ولم يأت للأرض صدفة ونزهة ...!!
نحن من صلب كوش وسلطنة الفور وحضارات الشرق وبلاد النوبة ورياح الجنوب ...!!
والعندو تاريخ وجذور ...!! عندو الضي والنور ....!!
وبكره أخضر ....!! وقالو أجمل...!!!
وقلنا أحلى ...!! وقالو أنضر...!!
بلد تلقي فيها الحب والمحنة والطيبة والجمال .....
وتلقى فيها الريدة فارده جناحا تشتاق للربيع
يا ربيع ...يااااا ربيع ❤️🥰
| |
|
|
|
|
|
|
| |
ABUHUSSEIN
عبدالحفيظ ابوسن
محمد حمزة الحسين
عزيز عيسى
جلالدونا
أبوذر بابكر
Osama Siddig
فيس بوك
تويتر
انستقرام
يوتيوب
بنتيريست