مدد جمهوري: أي تشابه للأحداث في هذه القصّة مع الواقع هو محض صدفة
كتب الأستاذ محمود محمد طه في زنزانته قبل الإعدام في ورقة صغيرة وصية للجمهوريين قال فيها؛ فليصل بالناس فرادى شيخ سعيد في هذه اللحظة طرق عابر باب بيت سعيد شايب ببيان مدني جنب طاحونة الدي
08-27-2021, 05:55 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3469
عادة شيخ سعيد في بيته بالبيان بكون لابس الجلابية وتحتها سروال طويل وفنلّة حمالات ويخدم ضيوفه الجمهوريين وغيرهم من المحبين الختمية وأصدقاء الفكرة بنفسه وبكون حايم بين الحوش والصالون وجوّة البيت، لما الباب دقّ؛ ختّ الصينية الشايلها في سرير في الحوش ومشى يفتح الباب
08-27-2021, 06:01 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3469
طبعاً بتكون مفتكرين الزول الدقّ الباب جايب الورقة الكتبها محمود بالزنزانة في تلك اللحظة بكوبر جايبها مدني أبداً ما جايب ورقة ولا حاجة ولو خيال الكتابة ساهل كدا؛ منتصر دا بكرة ممكن يقول داير يكتب قصّة
08-27-2021, 06:04 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7211
نقيف هنا ونبدأ القصّة التانية: الشيخ العليش ونادي الشعلة بدباغة مدني؛ حكى لي صديقي الجمهوري المتهافت عبد الله عثمان عن دكتور عبد الله علي إبراهيم عن غوث الزمان الأستاذ سعيد الطيب شاطر؛ الشيخ العليش حضر زمن الكاشف وكان يعالج الناس بمحاية مكتوب في ورقتها: حجبوهو عن عيني إلا من قلبي لا ما قدروا حجبوهو وبعدين شخيط طويل وبعده صلى الله عليه وسلم والعصر بركب حماره يتراوح عبر الدباغة لمفازة أبحراز شرق مدني وكان حالف ما ينوم يوم في مدني
08-27-2021, 06:21 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3469
يوم جاء العصر ماري بحمارو شاقي ميدان الشعلة بالدباغة، جات كورة طاشة ضربت الحمار في بطنو، الحمار قنت التفت الشيخ للاعبين وقال ليهم: الشعلة لا تتعلى لا تتدلى ظلت الشعلة بالدرجة الثانية سنين عددا بعد وفاة الشيخ تقرب تطلع الأولى لناس الأهلي والإتحاد ونيل شدو؛ في آخر مبارة تنهزم تقرب تهبط لدوري السنترليق؛ يلحقها الشيخ العليش بضربة جزاء في آخر دقيقة
بعض عقلاء الدباغة ناس شيخ الجيلي صلاح قالوا ما في حل غير نراضي الشيخ العليش في مرقدو بأبي حراز شالوا الخرفان وساقوا معاهم عصام محمد نور يختم الغنا بحجبوهو أكرموا الحيران غاية الكرم وعصام صاحبي ما قصر وجوا راجعين مدني في نفس السنة طلعت الأولى
08-27-2021, 06:29 AM
عبدالله عثمان عبدالله عثمان
تاريخ التسجيل: 03-14-2004
مجموع المشاركات: 19192
طبعاً أسهل حاجة في الدنيا دي انك تشتغل أديب مرات القصّة في زمنكم بتاخد مني دقائق ولو الكي بورد بكتب بصوت الكلام الدارجي الممزوج بالفصحى ورب المجرات ما تاخد من نص دقيقة.
القصّة التالتة: هومليس homeless حكت لي صديقة زراعية بعد أن تركنا شمبات، قالت لي؛ مرّة في ميدان كلية الزراعة السمح داك، جبنا زيدان إبراهيم في حفل غنائي، في نص الحفلة طلبنا منو يغني لينا أغنية؛ في الليلة ديك أبو الزيك قعد في طرف المسرح وحلف للطلبة بحنيّة شديدة؛ والله العظيم والله العظيم يا جماعة، ما بقدر أغنيها غنيتها الشهر الفات مرتين عليكم الله، خلوني في بت في الصف الأول قعدت تبكي
08-27-2021, 06:45 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3469
يتبع هومليس: كغير العادة وقد تكون معرفتي بأمريكا ضعيفة؛ الأيام دي المشردين كتيرين جنس كترة، المهم وأنا طالع من قهوة ستاربكس شارع بتل غراوند لاقيت خواجة أبيض آري هومليس، قال لي جيب خمسة دولار داير أقول ليهو ما عندي فكّة، لكن تذكرت انو آري؛ أديتو عشرين دولار
08-27-2021, 06:58 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3469
دخل جاب ليهو قهوة وغشى دكان التباكو جاب سجاير ومشى الركن محل خاتي بقحتو وكرتونتو تحت شجرة جاب ليهو آلة ملفوفة بعناية، كنا زمان بنشتريها من الطبالي، لكن دي أصلية، أظن اسمها الهارمونيكا وجا بعد جنبي شال شفطة من القهوة ونفس من السجارة وختاهن في الواطة شال الهارمونيكا وعزف لي لحن شفت فيهو كل حزن الدنيا وهاشم ميرغني وقعدة زيدان في طرف المسرح بعد خلص ولع سجارة تانية ديك ماتت في واطاتها عرفت نفسي تورطت ورطة شديدة وجني في الدنيا الحزن قلت ليهو بالعربي عسى لا يفهمني: متين آخر مرّة عزفت اللحن دا؟ وقف علي حيلو وختّ راسو في بطني وعمتني وجعّر بصوت عالي
08-27-2021, 07:37 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3469
زمان قبل كم وعشرين سنة حاولت أحرج علي وعمي عوض عباس؛ أنت يا علي بتجي من الخرطوم في الويكند وقبل تمشي تسلم على أبوك بتغشى شيخ سعيد شايب تقعد معاهم وبالليل تجي لأبوك؟ قال لي: يا زول، سعيد شايب دا أنا عندي فيهو عقيدة عندك معاي تاني كلام؟ ما كان معانا زول تالت كان قال لي: بهت الذي كفر وأنا بقرأ هنا والناس تحاول تزنق دكتور ياسر الشريف ردّ نفس ردّ ودعمي ولو المنصوري كان موجود كان أضاف لعقيدة دكتور ياسر وعلي العوض؛ انو محمود نبي ورسول في زول عندو عندنا حاجة ولو موضوع موضوع عقل شنو كدا ظاهر الخف
صلى الله عليه وسلم
08-27-2021, 07:41 AM
اخلاص عبدالرحمن المشرف اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
طوالي استدعت فيني اشجان وذكريات مقيمة في اعمق تلافيف الروح
ذات المكان والله كان ال Assembly point اليومي حقنا في "اخر البيوت" طبعا التيرمنولوجي بتاع اخر البيوت دا ما بعرفوه الا ناس مدني
والمعني لغير المدنياب هو، نهاية اليوم الدراسي
جات في الخاطر طوالي وشوش بدر ابو العاص وخالد إدريس وطارق عبيد مدني وعلوي ومره مره بكون معانا عبد الله محجوب ومحمد صلاح نقرية وعبد الرحمن النو "الدحيم" وزروق الناير
وفي الغشوات ساي ناس العشير طارق يوسف العوض مع بكري بشير جمعة
والموئل والملتقى كان
ضل طاحونة الدي
غايتو الله يسامحك
08-28-2021, 01:12 AM
Ahmed Yassin Ahmed Yassin
تاريخ التسجيل: 01-31-2013
مجموع المشاركات: 5507
طبعاً يا أبا ذر وأحمد يس، الكتابة دي كلها من الونسات مع عبد الله عثمان وعبد الله عثمان ودكتور أحمد الحسين ديل في الواقع من الناس الذين لا تملهم أبداً وهم أصحاب نكتة وونستم خفيفة بشكل لا يمكن تصوره.
الجمهوريين يطلقون على نبيهم الجميل أستاذ سعيد شايب يطلقون عليه لقب سميح الزي الساكن جمب طاحونة الدي
في نهاية التسعينات كانت مدني بالنسبة لهم زي قم عند الشيعة وأذكر كن أداوم على زيارتهم بالبيان ولمان جيت أسافر الخليج محي الدين عبد الستار قال لي؛ ما تسافر تفوت مدني مدني دي مدينة روحانية حليل محمد مسكين وفضل الله محمد قول لي يا حبيبي شن أعمل معاكا ولّ أسيبها مدني وأجي أسكن حداكا قول لي يا حبيبي أنا حيران معاكا
08-28-2021, 03:50 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3469
أستاذ سعيد مشى فتح الباب الزول الدقّ الباب قال لسعيد داير لي جلابية شيخ سعيد طوالي طلع الجلابية أداها ليهو والزول مشى في اللحظة شقيق سعيد وهو أكبر منه جاء طالع من جوّة البيت لحوش الصالون لقى سعيد بالفنلّة الداخلية والسروال إنخلع وكورك في سعيد: دا شنو يا زول، البيت ملان ضيوف؟ سعيد قال ليهو: الزول الدقّ الباب قال داير جلابية أخوهو بزهج قال ليهو؛ طيب ما تمشي الدولاب تديهو جلابية سعيد؛ يمكن لو دخلت البيت ورجعت ألقاهو مشى
الجمهوريين السمعوا الحوار دا من جوّة الصالون قاموا جارين جري للشارع يفتشوا عن سيدنا الخدر في زقاقات البيان لكن هيهات
08-28-2021, 04:28 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
أنا طبعاً زول جدي العباس عم النبي وجدي القريب عمدة غرب شندي الحسن ضبعة، يعني من الصعب اتكيف لي من زول إلا يكون مختلف حتى أصاحبو أها عبد الله عثمان دا صاحبي ولو حصل في الامارات ضرب لي عندو برنامج طوالي بخلي العندي وبمشي ليهو هو طبعاً ممكن يمارس علي خيانات يعني ترتيبي في لستة أصدقاءه بعد كل الجمهوريين والحقيقية علاقة الجمهوريين مع بعض ومع رسولهم محمود والنبي سعيد شايب حاج تشبه اسطورة العلاقة بين المسيح وحيرانه محبة عجيبة والله، يا أخوانا، محمود دا ما بعيد يكون المسيح البتحلم بيهو البشرية الغريبة كلما أفكر في علاقات اجتماعية مثالية للبشرية بيخطر في بالي علاقة المسيح مع حيرانه وبتجي في راسي صورتهم من فيلم عذابات السيد المسيح وتجي معاها علاقات الجمهوريين ومحبتهم لبعض بتاعت الصحابة مع الرسول فيها شوية غلظة خاصة لمان واحد من الصحابة يقول الرسول؛ دعني أضرب عنقه يا رسول الله
و الله العظيم يا سحلي أنا سعيد سعادة لا توصف بعودتك الميمونة رغم انو لي سنيييييين من المنبر مع العلم انو ما عندي أي فكرة عن حكاية في غاية الإبداع القال عليها حبيبنا دكتور ياسر الشريف
يا مستنير انت رقم وغد في هذا المنبر فأرجو ان لا تعاقب الأعضاء بهكذا غياب طويييييل
د. أبوبكر عباس فعلاً غاية الإبداع من المرحوم سعيد شايب غفر الله له و جعل مثواه الجنة. قصة الآري الهومليس جميلة و فيها لمحة صغيرة عن رؤيتك للآخر المختلف.
08-28-2021, 09:17 AM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 48780
سلام للمستجير وغيره حمدلله ع السلامة يا طيب أنا غايتو النفاق الاجتماعي البحصل في المنبر دا ما شايلو وبصراحة بعمل حساسية هسة وين القصص الحلوة والابداع في هترشة شبعان (الشربوت ) دي .. ؟؟ أنا احرجت عمي وشكيت لأبوى وصينية الغداء نسوها في السرير والشعلة مدني مربوطة ... هسة اتا فرقك شنو من تلاتة أرباع ناس المنبر الشغالين وناسة ديل ؟؟ أرحمنا وقبل ذلك أرحم نفسك ما تعمل لينا غاغا الله يغفر لك. مع كل الاحترام والتقدير
يا زبير، خلينا نقعد ليك التسلسل حسب قلوبنا؛ غوث الزمان كان سيدي الحسن، وبالمناسبة سيدي الحسن نزل في ضيافة جدنا بشير ود ضبعة بالجوير غرب شندي سنين طويلة، الناس بدت تجي تصلي معاهو في البيت، قدام البيت كانت في شجرة مضيقة المحل، قام جدنا قال لأولادو جيبو الفرار أقطعوها، أول ما الفاس ضربها؛ الشجرة كاك كوركت وقالت لسيدي الحسن؛ حلفتك بجدك شفيع الناس كان تقطعني سيدي الحسن قال ليها: زحي بأمر الله الشجرة زحت وبقت دواء للناس!! وتزوج من الضباع، وجاب بنت تزوجها السيد المحجوب والمحجوب جاب بت تزوجها السيد علي الميرغني ولكنه لم ينجب منها وأفترقوا، ومشى تزوج أم ناس محمد عثمان الميرغني. جاء راجع الجوير عشان يرجعها، لكنها رفضت وقالت ما بتبقى ضرّة لبت عمها العنقريب البات فيهو السيد علي الميرغني في عودته للجوير لليوم محتفظين بيهو للبركة أها يا زبير، بعد سيدي الحسن الغوثية مشت للسيد علي الميرغني ودا سبب المحبة بين الختمية والجمهوريين. من السيد علي مشت للمكاشفي سيد القوم أبو عمر من المكاشفي جات للأستاذ محمود ومنه للأستاذ سعيد شايب. طبعاً دايرني أوريك ليها الان هي وين؟
السيد ابوبكر والمستنير بشهاده المنبريين تعجبنى الكتابه المختزله نصا وماهله خيالا فيتحرك القارئ فى براح خاص به يضيف ما يشاء ويترك مايشاء وكل ذلك فى رمشه عين او اقل... ما الذى يمنعك اعلان جمهوريتك وانت تتمايل شوقا وطربا مع مليح الزى هل تحمل الشئ ونقيضه ...عقل يقظ وصوفيه موروثه تنازع المرء نفسه
08-29-2021, 04:24 PM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3469
مرّة يا عبد الرحيم، اتصلنا بدكتور محمد محمود استاذ الأديان بجامعة بلندن، قلنا ليهو صحي يا دكتور، انت كنت جمهوري؟ قال لينا: دي كانت آخر محاولة عشان أبقى معاكم في الدين دا
08-29-2021, 04:53 PM
عبدالله عثمان عبدالله عثمان
تاريخ التسجيل: 03-14-2004
مجموع المشاركات: 19192
Quote: عد سيدي الحسن الغوثية مشت للسيد علي الميرغني ودا سبب المحبة بين الختمية والجمهوريين.
عن النور الذي رآءه السيدان محمد عثمان الختم في الحجاز والسيد عثمان دان فوديو في بلاد التكرون وهو يستعلن في بارا عند اورقية بت جلاب
الأستاذ قال ما معناه الناس ظنوا انو النور دا نور السيد الحسن لكن في الحقيقة هو نور السيد علي
تأكيدا لذلك يقول الخلفاء أن السيد الحسن كان عندما "يتواجد" يقول حديثا لا يفهمونه (في وقته) عن شوقه لحفيده السيد علي
بجاه الحسن ود ضبعة والشدرة المتكية نهدي ليك شي من مناقب السيد الحسن
يا حسن
من تنبؤات السيد الحسن الميرغني: كان السيد الحسن يمر بمنطقة غير آهلة بالسكان، ومعه خلفاؤه فرأوا ثلاث مناظر عجيبة .. رأوا زيرا بادي النداوة ومنه تظهر حبيبات الماء، فلما دنوا منه وجدوه خاليا وليس به قطرة ماء... ثم رأوا كلبا ينكح غزالة فعجبوا من ذلك ثم مروا بنهر فوجدوا تمساحا وسط الماء وهو فاتح فمه يتلقى الماء من قطرات نازلة من السماء، فعجبوا أشد العجب. ثم سأل الخلفاء السيد سلطان الأكوان عن ذلك، فقال السيد الجسن: ( أما الزير المندّي من الخارج الخالي من الداخل، فهو إشارة لعالم آخر الزمان يظهر التقوى والصلاح وفي داخله شديد المخالفة لله ، ولا خير فيه ... أما الكلب الذي ينكح غزالة ففي آخر الزمان يتزوج المرء الساقط الحسب والنسب إمرأة شريفة وذلك لاسباب كثيرة منها قلة الرجال ومنها كثرة المال لهذا النوع من البشر... أما التمساح في داخل النهر فهو إشارة لحاكم آخر الزمان يجلس على تل من المال، ومع ذلك يطمع فيما أيدي الناس ويفرض عليهم الضرائب والجمارك وغير ذلك... واللهم لك الحمد وإليك المشتكى وأنت المستعان ولا حول ولا قوة إلا بالله العلي العظيم ).
* من كتاب إمام العارفين: السيد الحسن الميرغني، لمؤلفه الخليفة محمد حامد السوراوي، 2009، سلسلة الطريقة الختمية.
08-29-2021, 05:03 PM
عبدالله عثمان عبدالله عثمان
تاريخ التسجيل: 03-14-2004
مجموع المشاركات: 19192
ذكرني أخي عبدالمنعم البيتي أن السيد الحسن كان يقول:
الله!! الله!! يا علي أفندي
وورد عن مناقبه رضي الله عنه ونفعنا بجاهه العظيم:
كان السيد الحسن ذات يومٍ في قرية الزومة بالشمالية وكان جالساً في راكوبة فسطع نورٌ باهرٌ أمامه فقال له الخلفاء: ما هذا؟ فقال: هذا نورُ إبني السيِّد علي الميرغني، فقالوا: من هو؟ قال ولد لإبني السيَّد محمد عثمان الأقرب يكون له شأنٌ عظيمٌ في الولاية بل إن بركته أدركتنا نحن جدوده، فأستأذنه ود المتعارض في مدح السيِّد علي قبل وجوده، فأذن له فقال:
وقال إبني عليٌّ لاح بارقهُ عن ختم ختمٍ بدا في ذروة القلل رأى سعادة كل الخلق منه بدت حتى هو الاعظم الموفي على زحل بالشفع والوتر والإطلاق فيك يكن محمداً سيدي عثمان ذا الدول
وورد أن السيِّد الحسن كان احياناً يتأوه ويتواجد ويقول ((علي لو أدركتهُ لأخذت عليه الطريق)).*
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوبكر عباس
Hafiz Bashir
عبدالله عثمان
Yasir Elsharif
محمد البشرى الخضر
أبوذر بابكر
Ahmed Yassin
الزبير بشير
نعمات عماد
طلحة عبدالله
علاء سيداحمد
Abdelrahim Mohmed Salih
عبداللطيف حسن علي
فيس بوك
تويتر
انستقرام
يوتيوب
بنتيريست