|
Re: معقول السكن عندنا أغلى من مصر وتركيا ومان� (Re: منتصر عبد الباسط)
|
فى النقود هناك قيمة حقيقية , وقيمة شرائية. لو فتحتا حساب قى البنك , اودعتا فيهو 10 جنيهات .. وبعد سنة سحبتا الـ 10 جنيهات. البنك هنا ما اداك 10 , رغم انو اداك فعلاً 10 لو كانت قروشك وقت الايداع فى البنك بتجيب ليك 10 عيشات من الفرن , ووقت السحب جابت ليك 5 عيشات , اذاً البنك اداك القيمة الحقيقية الفعلية , لكن ما اداك فرق القيمة الشرائية (خاصةً فى صيغ التمويل الاسلامى , وهى عبارة عن نصب واستهبال). طيب انا عايز احفظ الـ 10 جنيه لبتى لحدى ما تكبر وتتزوج , لو حفظتها فى البيت فى خزنة او فى بنك , هى نفس القصة , القيمة او القوة الشرائية ليها بتتراجع , ولما البت تكبر الـ 10 ح تكون اقل من مليم. طيب افكر فى مشروع تجارى ؟ , حرفياً ح يطلعوا ميتينك , لانو الدولة قايمة فى ميزانيتهاعلى البلطجة من ضرائيب وعوائد ودمغات وتجديد رخص الخ. الحل , اشترى دولارات او دهب او ارض. ديل هم وسائل الحفاظ على الـ 10 جنيهات بتاعتى , فى سودان ما قبل وما بعد الثورة. مافى يا كافى البلاء فى السودان تنفيس وتأمين للكتلة النقدية الضخمة الموجودة عند الناس. لا سوق اوراق مالية حقيقى عشان استثمار فيهو , لا ايداع بنكى بفوائد عالية , تزيد مع زيادة مؤشر التضخم , لا طرح سندات حكومية فى البورصة. حتى البنوك بعد حركة عدم السماح لك بسحب مبلغ كبير من حسابك , الناس فقدت فيها الثقة. عملة محلية اصبحت ارخص من الورق الملون , وناس عايزة تحول الورق الموجود فى جيوبها لحاجة مضمونة. لذلك اصبحت الاراضى والعقارات هى البديل , وطالما الطلب عالى ولا يتوقف ولن يتوقف , فسوف تستمر هذه المهزلة.
|
|
|
|
|
|