شكرا على (حكمة الإشراق) في زمن الهنضبة.. صديقي ابوذر..حبابك وحباب الإصدقاء هنا..(ياسين ، احمد ، الشيخ ، والمتابعين والمتابعات).. كتر خيرك يا صاحب ..عنوان الخاطرة ، هو فلسفة السهروردي المقتول ، وهو رجل صوفي معروف ، مات مقتولا، والمحزن من قتله هو صلاح الدين الذي يعتبر عند الغالبية بطل يستدعى في ذاكرة الشعر العربي عند اوقات المطبات..! وخلفية سيد خليفة الصوفية ، هي التي جعلتني استدعي هذه الفكرة ، فكرة الإشراق.. اما زمن الهنضبة فهو دونك يا صديقي ، الزمن الجاف الذي تغلب عليه المغالطات في كل حاجة.. وتحية لحضور ول ابا احمد يسن..!
عارف يا ابا ذر..كم يوم ، تقريبا شهر..اعدت اكتشاف اغنية جميلة والأداء فيها لطيف للغاية..واعادة الإكتشاف يا صديقي ..كنت زيك كده ناوي اعملو خيط ونسة مع احمد يسن وترهاقا..وذلك لأني ..سمعت في حاجة اسمها (القونات) والقصة صارت مزعجة للغاية ..ومن كلام الناس عنها..والأذى من الأصوات العالية والإزعاج المسمى جزافا غناء (وليس موسيقى) خفت ان يعود بنا الزمان القهقرى لنرى عودة قوانين القمع من شاكلة (قانون النظام العام/سئ الذكر). اها قلت يا اخي نفتح كوة للونسة عن الغناء اللطيف المحبب وغير المؤذي..فتذكرت اغنية (ما كنت بفتكر الجميل) من اداء عمار السنوسي ، والتسجيل قديم ..مجرد سماعه بيرجعنا الى ايام الشباب وبيرجع الشباب الى ايامنا الراهنة..وكنت ناوي اتونس عن كيف الناس كانت بتحب وتعبر عن الحب ايام زمان..واليوم أو الراهن..! ولأن النفرى قال:( كلما اتسعت الرؤيا ضاقت العبارة)..فالأفكار تأتي كثيفة..والتعبير خاين تماما..!..خطيت الغنية بصوت عمار في صفحتي في الفيس بووك..وكويس بقت شرك جميل وجابات لينا القمري والبلوم والنحل..وكل انواع الكائنات المتلهفة للونسة اللطيفة..وعملت نايم..! ذات امسية ، حضر الأعدقاء على قول شيخنا واستاذنا دكتور حسن موسى..والأعدقاء هي صديقتنا الحيكومة ، وكنت في ذات حضرة بسبب غنية (ما كنت بتفتكر الجميل) ، اها الحيكومة قالت لي: بتسمع في شنو؟ قمت اديتها السماعة..! قالت لي: يا سلااااااااام ده منو القاعد يغني غنية سيد خليفة ده؟ طبعا انبهمت يا صديقي ، لأني ما كنت متصور انو في ناس ما بتعرف عمار السنوسي..!..والإنبهام الثاني..كون ان الغنية دي بالذات بتاعة سيد خليفة..! طبعا الإنبهام الثالث كان في حكاية صراع المركز والهامش (الحيكومة من ناس امدرمان ميلاد ونشأة وشنو كده ما عارف) وقالوا لي بصريح العبارة: كويس ناس الأقاليم اتطوروا وبقوا يسمعوا سيد خليفة..! وبدون ما اشعر لقيت نفسي بحكي عن سيرة عمار السنوسي وكيف انو فنان مختلف ومن انوار جيلو..! تووشك خبطوني ليك بسؤال: من وين زولك ده؟ قلت ليهم من الجزيرة..! قالوا لي: الدم للدم بيحن وناس الأقاليم ما بيعرفوا غير ناس الأقاليم..! المهم في الأمر يا صديقي ، الأغنية الجميلة طلعت بتاعة سيد خليفة ، بالرغم من اني كنت متذكر عمار السنوسي اشتغل كتير من اعمال سيد خليفة وشرحبيل احمد وعثمان الشفيع..لكن فاتت علي..وكنت اظن انها اغنيته الخاصة..! التحية لسيد خليفة ، وهو رقم مفارق في خارطة الغناء السوداني وسعيد بمعرفة اسمه الحقيقي واسم خوجلي عثمان..! لكن ، رغم انف الأعدقاء/الحيكومة ، عمار السنوسي غناي شديد..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست