احتجاج الشرطه فى ساحه الحريه (فيديو)

Quote: المشكله انو ناس حكومة الثوه ديل ما بيستبينو للنصح لا ضحي ولا بالليل زاتو وعنيدين وبيتعاملو مع الواقع كانو عادي جدا ولا كانو دي ثوره قامت ضد نظام عقائدي عندو قناعة انو ظل الله في الارض وانو هو الوحيد المفروض يستخلف ويكون حاكم باسم الله في الارض .. نظام ظل طيلة فترة حكمو يمكن لكادرو في كل المؤسسات... عسكريه او مدنيه .. فهل بناء عقدي استمر لتلتين سنه اتصرفت فيهو مليارات الدولارات ناس حمدوك وشوية الجوغه الدراويش بتاعنهم الشابكننا ( الكيزان انتهو وخلاص سقطو ) ديل متخيلين انو ممكن يزيلوهو بالرومانسيه واللطف بتاعم ده ؟؟ هل متخيلين اسلوبم بتاع المنظمات والامم المتحده وفض النزاعات والديمقراطيه اولا وتنمية القدرات والاحناك الرومانسيه دي ممكن تاكل معاهو ؟.. .. اها ياها دي النتايج .. يالا خمو وصرو .. ياها دي مؤسسه عسكريه ضخمه زي الشرطه بكل قوة عين بتتمرد وعلي رؤوس الاشهاد وبحضور ومشاركة عدد ضخم من ضباطا وقادتا وواضح جلياً انهم بيدو في جنودم التعليمات والتوجيهات بتاعة التمرد المكتمل الاركان ده .. وفي مرأي ومسمع من وزير الداخليه ووالي الخرطوم .. وده بيتم في قلب العاصمه الخرطوم يعني ما في الاطراف ولا في الاحراش فهل في احتقار واستفزاز واستقلال اكتر من كده؟؟ فهل لو في ذرة شك عند العساكر ديل بانهم حيتعاقبو علي فعلتم دي والبتعتبر جريمه شنيعه وعقوبتا رادعه وكبيره جدا حسب كل القوانين العسكريه في كل الدنيا كانو حيقدمو علي فعلتم دي او حتي كانو حيفكرو فيها مجرد التفكير زاتو ؟؟ .. بالله كدي وروني زول سياسي ما اتكلم في قصة خطورة المؤسسات بقاء العسكريه الادلجوها الكيزان بشكل كبير في فترة حكمهم وخاصه مؤسسه الشرطه كما هي دون فلتره كبيره واعادة هيكله بشكل جزري .. وروني زول واحد ما اتكلم عن انو ضروري تنظيف الشرطه وبحسم وروني زول واحد ما اتكلم عن انو وجود الكيزان داخل المؤسسات دي خطر علي الانتقال الديمقراطي لانهم اتادلجو علي العمل في ظل الانظمه الشموليه الدكتاتوريه الكانو بيطيعوها رغم ذلتا ليهم ورغم انها كانت بترمي ليهم فتات وكانت مضطراهم يقلبو عيشم بي طريقتم باستخدام كل السبل الملتويه وكانت بتغض الطرف عنهم وهي عااارفه وشايفه عشان تكسر عينم وتخليهم مشوهين فينظر الناس فبالتالي يكونو ذليلين وطايعين ليها ... بالله منو الما عارف الحقيقه دي في السودان ده كلو ؟؟ .. اقسم بالله الجميع عارفين والجميع اتكلمو لمن صوتم بحا .. لكن بالجد نحن قدرنا انو يتقدمو امرنا ناس اقزام عنيدين بشكل غير طبيعي ناس ما بيسمعو الا صدي صوتم وفعلا بيتعاملو مع الثوه دي ومكتسباتا من منطلق (جلداً ما جلدك جرو في الشوك) وكل يوم بيثبتو بي البرود الهم فيهو ده انهم ما وجيعين علي الثوه ولا علي البلد دي .. غايتو نحن لينا رب بس #الحركه_الاسلاميه_تنظيم_ارهابي