# تسغط.. و بث#

♧ بخيتة قالت لي : انزل تحت .. بتقع £
●ناس حلتنا جاهم خبر بكاين بعيد في أم صفقن عوراض .
أها، ركبنا لوري داووري حق ود علي الجاك ، نساوين و رجاجيل.
اللعمى شايل المكسَّر قالو: لافيين الدافنة قبال الجنازة ما تبرد. بقينا
الرجال متشعبطين فوق في السيخ و النساوين مصنقرات تحت.

●عمك البلولة الزول المتوفي دا قريبو تب لحم و دم. لامن لما سمع
كان خامج ليو حوض زبالة لياس و حاقب عراقيهو بي خيت دُبارة
فوق كتافينو و قايم عليها. أها لامن جابو الخبر انخلع و قمز ركب ساه
بدون سروال. وكتين مرقو في الخلا و الصي بقى حاس بالهبمريب الطلق
ضاربو ليك صاااقط و يهبهب في العراقي و هو مو عارف روحو عريان.

● و الحروم ديل بي تحت عويناتن يلاقطن متل البصل في الروب .
و باسحياء يغضغضن في البصر و يضَّاحكن في سرهن عاد يقولن قررر.

● أها مرتو البِخَيته محكرة و سطن تحت حتها شافت المنظر لامن دخلت
بأضافريها في فتيل. يلا قعدت تناغم ليو تقوللو: يا راجل هوي انزل إتا بتقع.
و هو يقوللها لا لا، ما تخافي آالبِخَيتة أنا عارف روحي ماسك في السيخ سمح.
و تاني تلكزو تقوللو: ياراجل بتقع دايراهو يستر عورتو.و هو مع تباريح الهوى
الغلاب مو جايب خبر؛ يقوللها: يا ولية قت ليك ما بقع أنا هدا لي راكز تب.

● كمان صُوَيحبات البِخَيتة حتهن يهمسن ليها : كلامك صحي و الله يا دي،
فعلن، شعليق السيخ دا مو لي المتل راجلك البلولة؛ دا عاد للجنيات الصبايين
الراستات..الناس الوقفو قنا.. الجيل الراكب راسو. و راحت على الجلاكين.

● بتاع اللوري وقف للصلاه؛ و عمك البلولة شاللو إبريق و دقش التُّبَّاس داير
يكطع الجِمار. و لامن رفع العراقي حتي شاف مدفع الدلاقين لقي نفسو ام فكو.
طبعن خجل تب، دخل في ربع لباسو المافي أصلن ؛ و يا دوبك وقع ليو حديس
مرتو البِخَيته القبيل ، لكن وين، بعدما حدس ما حدس و الفاس فلق في الراس!

●المهم صلُّوا و تاني ركبوا يواصلو.لكن عمك البلولة المرة دي قنع و نزل قعد
تحت وسط الحريم😂 واحدة منهن نادتو بنوع من خبث و خبايز النواعم: إتا يا
البلوله ود أمي، هسة المقعدك متفَّن وسطنا القرفصاء تحت هنا شنو؟!!عمك دنقر
و قاللها: نان آالِّخَيَّة ما سمعتي مرتي البِخَيتة قبيلك قالت لي:" انزل.. بتقع"؟!
بعدينك ياخ الهوى زاتو ما ريحني شال عِمتي رماها لي جدعا من راسي🙈🙊

☆فبالله مين يقول للسيد أبو برنيطة : تنحى و ترجل، انزل أقعد تحت بتقع
▪يلا، إن شاء الله بس وقع ليك يا المشتح إضنيك.أوَليسَ:كلَّ عامٍ تُرذَلونَ¿!
🤣🤣🤣