# تسغط.. و بث#

♧ وضعنا المقلوز حالياً لدرجة يقرف الليمون ظاطو ؛ حتى
لم يعد يسرُّ عدواً ولا صليحاً. فدا ذكرني ذات مرة من ذوات
المرارات : كنا ماشين لينا لي عزا (بكا) في أم صففن عوراض
ديك المي هنا ؛ تراها جيهة ناس شلعوها الجعليينو حشرو
عباس. و راكبين لينا هوستن زبالة داوودي موديلمن يوم
حفرو البحر {سنة أم دقنوس مجاعة سنة 1306}.

● قمنا وحلنا ليك في ترس حقنة، وقف بينا حُمار الشيخ في العقبة .
أها قام للتسود ختوتو اللوري كطع سير مروحة؛ فما لقينا أي حل. قام
مساعدي الحَلَّة قال لينا: يا جماعة الخير ما يتحير علا مغير. دحين عندنا
دَبارة غايتو علا واحد منكم يتبرع لينا بي (تكة) لباسو نربط سير مروحتنا
نمشِّيبا حالنا . شب واحد من أخوان فاطنة طوالي قالو: أبشر، و حل تكتو
ناولو ياها ربطنابا سير الجن ، درَّجتنا شوية ترعة ترعتين و لكن حتها
انكطعت ؛ قمنا ملصنا تكة واحد تاني.فهكذا دواليك و هلم جرا .

● يلا ترس ورا ترس ؛ و نحن نتمولص و نجدع
تكةً تلو التكة ؛ لامن كملنا تِكَكنا كلهن ؛ و لحدما أخوان
فاطنة تشت علينا بقينا حزاماتنا ناصلات و قاعدين أم
فكو ساااه حفاةً عراةً غُرلاً؛ حتين يا اللهربك رب الخير
وصلنا بكان أهل الفراش: من فوق هلًّا هلًّا و من تحت
ملط العالم الله ( مولانا كما خلقتنا ).

●هناك بقينا ليك ممحنين. قلنا : ياخوانا هسة
بس شن نسوي؟! يعني ننزل نواجب الناس ديل
نرفع معاهم الفاتحة و لا نفضل ماسكين لباساتنا
بخشومنا كدي لامن نرجع مِقَبِّلين شايلين أهلنا؟!

▪ توقيع/ ود الأصيل
☆ ود ال ح ش ا ن ال ت ل ا ت ة
ملدوغٌ من جُحرٍ مرتين .. و مؤذنٌ
محجورٌ منزلياً بجزيرة مالطا.