الشعب قال الروووووب. ودا حال 70 في المية من الشعب . تشتري ربع كيلو عجالي و خضار ستات البيوت يتحرفنن. في ربع العجالي . وإخراج مسرح الحلة لغداء يومين . الأ الكهرباء بت الحنود تخسف بحلة الاماني السندسية الأرض. مع قطعة الثلاجة الحنينة 18 ساعة تقوم حلة الاماني تكشكش. والفول يصوفن واللبن يتقطع ودواء كحة الاطفال يتحول لشربوت اسكوتلندي. وتبقي الزلابية هي اغنية الموسم . يا جماعة جد الحالة صعبة . امس لاقيت صاحب ابو خمسة بنات في صف الرغيف كنصل اقامتو في السعودية . لاقيتو عيونو مدمعات . قال لي يا حليلك يا مدينة الخفجي. الناس عايشة في صراع نار بين محبة السودان وبين دموع الاحباط . كمية من شراب الشاي تحت النيم . كمية من التكسير. كمية من انتظار المجهول .
06-02-2021, 06:23 AM
Osman Musa
Osman Musa
تاريخ التسجيل: 11-28-2006
مجموع المشاركات: 23082
زمان لو جاك ضيف في مكتبك في مكان العمل طوالي بتسالو تشرب حاجة باردة؟ راحت ديك العادة الكريمة مع كهربتنا . حاجة سخنة بس . في درجة حرارة أعلى من سعر الدولار . حاجة سخنة من تحت النيمة. يا ناس الأمة في خطر .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة