نحن لا تنقصنا الموارد الطبيعية.....بل ان مواردنا مصدر (حسد) من كثير من الدول... نحن لا تنقصنا الكوادر البشرية ....كثير من الدول العربي و الاجنبية شهدت ابداع كوادرنا في شتى المجالات.... لسنا من الدول القليلة السكان...او الصغيرة المساحة... نملك التاريخ...و الثقافة ...و مدنية كانت مضرب الامثال...بل جعلت أفئدة كثير من البشر تهوي الى بقعتنا الجغرافية....
هل هي السياسة....او ليس الساسة هم أهل جلدتنا ...و وليد شرعي لامتنا؟؟!!
04-03-2021, 09:49 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
قضيت حوال ال 6 اعوام في أروقة جامعات ببريطانيا و أكثر من 4 سنوات بجامعتين في الولايات المتحدة الاميريكية...
يشهد الله في هذه السنوات العشر لم أر او أشهد حادثة غش واحدة بين طلاب البكالاريوس في كل الجامعات التي درست/عملت بها في هاتين الدولتين.. وقد راقبت (كمعيد) في كثير من الامتحانات
في السودان (وكثير من الدول العربية)....كانت حالات الغش في الامتحانات لا تحصى و لا تعد
هل هذا مؤشر للتخلف الذي اصابنا؟؟!!
04-03-2021, 11:16 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
عندما جئت لانجلترا في عام 1990 ...وجدت الاعلامية السودانية زينب بدوي تعمل في القناة الرابعة في انجلترا
وهي قناة (تجارية) كانت تنافس قنوات البي بي سي (الاولى و الثانية)...و القناة التجارية ITV (القناة الثالثة)
كانت زينب تقرأ الاخبار المحلية في النشرة الرئيسية و التي كان مذيعها الاعلامي جون سنو (الذي حضر مع ليفربول للخرطوم و اجرى حوارا مع النميري في 1984)
كان دور زينب (ثانويا) جدا في النشرة...ولذا دهشت من صغر حجم المساحة المخصصة لها (رغم انها خريجة اوكسفورد)....
عندنا في السودان ...تدخل البطة مبنى التلفزيون بواسطة و او بصدفة ...وبين ليلة و ضحاها تصبح صبي مونتاج و حاملة كاميرا ..و صبي انتاج ..و مساعد اعداد....وهوووب ...تسمي نفسها مخرجا تلفزيونيا
04-04-2021, 03:26 AM
Asim Ali Asim Ali
تاريخ التسجيل: 01-25-2017
مجموع المشاركات: 13492
البحث عن الطرق المختصره هو الهم المقدم على الاجتهاد واستيفاء استحقاقات عمل او وظيفه الايام دى وفى خضم بحث عن مجموعه شباب لمشروع علمى وتفادىا لاستخدام البعض العلاقات والواسطه اعلنا عن الامر فى الفيس دون تحديد اولا اغلب المتقدمين ما اطلعو على الاعلان كامل والمتقدمين لاعلاقه لهم بالمشروع والبعض لايجيد اللغه الانجليزيه واخرين لايعرفو حتى كتابه السيره الذاتيه ويطلب ان يقدم مدير الصفحه الطلب نيابه عنهمرغم غياب اى معلومه عنهم والبعض مهتم بمعرفه الجهه ويطلب التواصل المباشر للتقديم ...وحالات كثيره الخلاصه انو مجرد فرصه اشتراكفى عمل اومشروع يطمع فيه كل شخص دون حتى اقل وقفه لمعرفه التفاصيل-ما له وما عليه - وكان الامر تقديم لوترى وفرصه وضربه حظ محتمله انو تحاول مسئول عن اداره اى جهه او مجموعه بحد ادنى من الانضباط يتحول الجميع اعداء لك ليه يقول ليك (محبكها ومعقدها) يعنى المسئول الجيد وحتى الاستاذ الجيد هو المتهاون والمجامل على حساب الواجب
الجواب على السؤال في العنوان: نعم اما مؤشرات التخلف عندنا في السودان فكثيرة جدا لا تحصى ولا تعد،،،وانت قد اشرت الى جزء مهم جدا من هذه المؤشرات،،،وفي السودان تجد كل شخص يشغل منصبا في غير مكانه،،،ولا تجد الشخص المناسب في المكان المناسب،،، وكل الوظائف والمناصب الهامة يشغلها اناس غير اكفاء وغير مهنيين،،،وكل المسالة محسوبيات وترضيات.... ومثال اخر ...لاحظت لمن يجيبوا ضابط في الجيش الامريكي في التلفزيون وفي كتفه ثلاثة نجوم فقط نجده راجل عجوز عمره يقارب ٧٠ سنة،،،وفي السودان تلقى ضابط في كتفه الثلاثة نجوم دي وعمره اقل من ٢٥ سنة،،،،
04-04-2021, 09:13 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
نعم الامثلة كثيرة فيما ذكرتي..... ولكن لماذا نحن هكذا
وضع الشخص الغير مناسب لما يؤديه من عمل.....نشترك فيه مع كثير من الدول ما يميزنا هو ان هذا الشخص الغير مناسب.... لن يحمد ربه (و يأكل عيش من سكات) كما يقول ناس شمال الوادي بل تجديه يفتي و يسب و يلعن كأنه سيد العارفين
04-04-2021, 09:07 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
الادهى و الامر ...ان معظم خريجينا يدخلون المعاينات و سةق العمل بذهنية (الطالب) التي شبوا عليها الطالب المتلقي الذي قل ان يسأل ناهيك عن الباحث ....المستقصي
في زمننا بجامعة الجزيرة...كان هناك كورس اسمه Industrial Training و هو شبيه بكورسات ال Internship في الجامعات الاوروبية و الاميركية وهو كورس متقدم جدا وقتها...لانه فعلا كان ينقل الطالب الي ذهنية الاعطاء بدلا من التلقي (السلبي) وقد كان كورسا مكتملا له التقدير الحرفي و السعات المعتمدة ...ويدخل في حساب المعدل التراكمي للطالب
جاءت ثورة التعليم العالي.....و وأد الكورس بحجة ارتفاع تكاليفه
04-06-2021, 04:35 PM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
أظنها يا بروف ازمة أخلاق .. الاخلاق السودانية تنحدر بشدة وتترهل بالخبائث ولعل للازمات الاقتصادية والسياسية دور أساسي في هذا التردي على مستوى السياسة أصبح النفاق ديدنا وفي الاقتصاد أصبح البحث عن الكسب السريع منهاجا .. وكل هذا انعكس على الصغير والكبير .. مع التحيات الطيبات لمبتدر البوست وضيوفه
04-12-2021, 03:01 PM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
من وجهة نظري العيوب القاتلة للشخصية السودانية والمجتمع السوداني عمومًا:
- أسلوب التربية والتعليم يعتمد على التلقين والضغط مما يضعف الشخصية ويولد التسلط - ثقافة العمل الجماعي غائبة تماما الا بعد وقوع الفأس في الرأس وبشكل غير مؤسس - العناد والعصبية الزائدة او نشاف الراس بالبلدي - الخوف من نظرة المجتمع في امور مصيرية وشخصية جدا مثل العمل والدراسة والزواج - التواكل والاهمال والفوضى والعشوائية المغلفة بصبغة دينية خاطئة - الكسل والرمتلة وعدم تقدير قيم أساسية مثل العمل وقيمة الوقت الا تحت ضغط الحاجة - حب المقارنة والنظر الى ما في يد الغير بدلا عن التركيز فيما يمكن عمله للتطور - تكوين الانطباعات المسبقة والحكم على الناس بناء على الانطباع الشخصي
ولسه كتيييير!
04-12-2021, 03:07 PM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
تحياتي اخي الكريم طارق في اعتقادي ان التربية لا غبار عليها التعليم - سابقا - اتبع النظام الانجليزي و الذي خلط بين التلقين و خلق مساحة للإبداع كان التعليم جيدا ما فشلنا فيه هو تحديد ماذا نريد - نحن - من التعليم كان هدف الانجليز واضحا وقد خدم النظام التعليمي ذلك الهدف بكل إتقان خرج الانجليز و ظل الهدف نفسه وكانت مخرجات التعليم تصب في خدمة من أصبح مستعمرا
04-12-2021, 09:28 PM
مازن سخاروف مازن سخاروف
تاريخ التسجيل: 03-10-2021
مجموع المشاركات: 738
السلام عليكم ورمضان كريم مقدما. أخبار غير سارة من سنة المألوف في السودان وهو الإختلاف. سقف الطموحات بتاعي منخفض. بحكم التجربة الناس بتحب الكلام العاوزة تسمعو. وكلامي سيكون صعب الهضم على البعض, أو الآغلبية. وأتمنى أن أكون مخطئا
بعد التحية مرة أخرى والإحترام, أرد ليك على كلامك دفعة واحدة:
Quote: Zakaria Fadel قضيت حوال ال 6 اعوام في أروقة جامعات ببريطانيا و أكثر من 4 سنوات بجامعتين في الولايات المتحدة الاميريكية...
يشهد الله في هذه السنوات العشر لم أر او أشهد حادثة غش واحدة بين طلاب البكالاريوس في كل الجامعات التي درست/عملت بها في هاتين الدولتين.. وقد راقبت (كمعيد) في كثير من الامتحانات
في السودان (وكثير من الدول العربية)....كانت حالات الغش في الامتحانات لا تحصى و لا تعد
هل هذا مؤشر للتخلف الذي اصابنا؟؟!!
الفقير إلى الله أقل منك بشوية: أربعة سنوات دراسية في أروقة جامعات بريطانيا. ومجموع تسع سنوات تدريب, إستشارة وتدريس بين المعاهد, الكليات والجامعات. علمت فترة محاضرا لطلبة البكالوريوس في مواد مختلفة ما بين اللاب, التيوتوريال كما محاضرا مسؤولا عن المادة. ومرت علي حالة غش من زميل كشف الإمتحان للطلاب في جامعة بغرب إنجلترا. وطبعا لمن الريحة (الفضيحة) فاتت, تم فصله. بالنسبة لي في تلك الجامعة, كنت متعاقد مع وكالة. والتدريس كان مرهق بسبب تعدد المجموعات والمواد, إضافة إلى السفر: كنت بدرّس في إتنين كامبص بدل كامبص واحد. لكن إكتشفت فساد بديع. في مادة كنت بدرسها كـ tutor أو مساعد تدريس ساعة في الأسبوع, زايد ساعتين قبلها لاب في نفس اليوم. لقيت المستوى بتاع القروب تعبان وفي أساسيات ما عارفنها. سألت الطلاب, إنتو مسؤولين من الخير, المحاضر بتاع المادة دي منو؟
الطلاب: ما عندنا محاضر؟
قلت ليهم إتو فارات ولا شنو؟ كيف يعني ما عندكم محاضر؟
الطلاب: زي ما قلنا ليك.
أنا: طيب, ولا حتى في جدول المحاضرات مافي؟
الطلاب: والله ما متأكدين.
قلت ليهم, طيب. خلوني أعمل تحقيق. شكيت إيميل لمنسق الكورس course coordinator, زميلي أليكس, ومعاو سي سي لرئيس القسم: ستان يا مانات, الطلبة ديل قاعد أديهم التيوتوريال ساعة في الأسبوع لكن قالوا ما عندهم محاضر للمادة دي.
قام المنسق قال, يا مازن,التيوتوريال ده ما جزء من المحاضرة يا عمك. ده الزيت ذاتو يا أصلي..
يا جماهير سودان نت الأبية في الدوسان ومشارق ومغارب الأرض, هل مر عليكم case قبل كدة بمادة علمية عندها تيوتوريال من غير محاضرات؟
أنا طبعا مرارتي اتفقعت., لكن إحتفظت بهدوئي وفكرت كويس. رجعت للـ Module Handbook بتاع المادة اللي عندي نسخة منو. لقيت ما يلي: 7 ساعات تيوتوريال (دي طبعا معاي أنا وعملت منها 4 أو 5 من أصل سبعة)
14 ساعة لاب (ودي برضو معاي وعملت منها مع الطلاب 8 أو عشرة ساعات في 4 أو 5 أسابيع بمعدل ساعتين في الأسبوع كما تقدم)
طبعا لحد هنا كلو تمام. لكن المفاجأة إنو مرشد التخطيط, التعيينات, الديلفري والإختبار بتاع المادة المشار إليه نص على: أربعة وأربعين ساعة تدريس!!
شكيت إيميل بارد إلى السيد "المنسق" وسي سي لرئيس القسم بما تنص عليه اللوائح.
الجماعة رسلوا للوكالة العملت عقد التدريس معاها إنو الزول ده قولوا ليهو تاني ما يجي. كان عندي معاهم خلاف تاني طفيف. لكن واقعة التيوتوريال دي كانت طبعا نقطة اللاعودة. طبعا هنا في شبهة فساد قوية إنو الشباب ديل مرتبين العقد الرسمي بأربعة وأربعين ساعة تدريس. وجايبيني مازن للتيوتوريال واللاب فعليا, وللمحاضرات إسميا (دون إطلاع مازن) ويبلعوا هم الفرق. شششششفتوا كيف.
بالمناسبة دي, حادثة الفساد دي تعتبر صغيرة قياسا إلى حادثة فساد شفتها في كلية تانية!! إنجلترا يا زكريا, سواء علمت أم لا تعلم هي بلد الفساد, ونموذج لبلد الرجل غير المناسب في المكان المناسب. فساد ولا محسوبية كمان؟ ولا أقول سيبك. خلينا في الفساد. نجي بقى على الغش وشغل التلاتة ورقات. عشان الليلة تكره عيشتك ذاتو .
في الجامعات زي ما ذكرت ليك لاقتني حالة غش واحدة. لكن في المعاهد والكليات, فيمكنني أن أخبرك أن الغش أو التغشيش هو القاعدة فوق الإستثناء. في دورة تدريبية مدتها ثلاثة أسابيع لمهندسين مباني Building Surveyors في الكلية بتاعتنا (الكورس كلو من بنات أفكاري), الكورس كان مادتين عن مبادئ الهندسة الميكانيكية والكهربية.
الفوضى والعشوائية هناك كانت لدرجة قف تأمل. من قولة تيت في أول يوم للتدريب المتدربين قالوا لي, يا أستاذ إحنا جايين الكورس ده أسبوعين. قلت ليهم كييييييف أسبوعين؟ أنا إتفاقي مع الكلية إنو تلاتة أسابيع
مازن: طيب أفتحوا إضنينكم كويس: أقسم ليك بكل الذهب الموجود في البلد المنغنغة دي إنو أسبوعين دي تلقوها عند زول تاني. معاي أنا, نهي زندقي. وتقدروا تتصلوا مع منسق البرنامج في المؤسسة بتاعتكم (واحدة من كبريات شركات التأمين في أوربا, ملتي ناشونال وكدة), إنو مازن قال كلا وألف كلا. وعشان كل الأطراف تكون بالصورة, حأتكلم مع المديرة بتاعتي خلال اليوم وأأكد ليها نفس الكلام. طبعا بدون صرف كلام كتير, الفوضى دي كلها من المديرة الكه .. كه .. كه
لاقيت مديرين كضابين بالكوم. لكن ما شفت في حياتي مديرة بتكضب زي المرة دي.
الإتفاق كان تلاتة أسابيع معاي, وأسبوعين مع الشركة والمتدربين. على فكرة المتدربين ديل كلهم رؤساء أقسام في شركاتهم. بالنسبة لي في المعهد المسؤول عن تدريب الشباب ديل المديرة برضو وعدتي كاذبة إنو بمجرد بدء التدريب حأتعين مدير قسم التدريب. كضبة تانية برضو. الفوضي زي ما قلت ليك ملكة متوجة. أدونا غرفة كبيرة للمحاضرات لكن أي زول يخش ويمرق زي سوق السمك. في مادة سيميوليشن دوائر كهربية ما أدونا ليها لابتوبات. في اختبار بتاع جهد المواد أو stress analysis المديرة تخش وتمرق لي لمن سألتها عن جهاز الإجهاد. في تالت يوم من التدريس قلت للطلاب
This is a Bull**** situation
حأتفاهم مع المديرة تشوف لينا حل مع العشوائية دي. وإلا أنا متخارج. الشركة (شركتين) في الحقيقة عملوا إجتماع كبير وأدوا مديرتي الكضابة على راسها ومازن أخد خمسة نجوم من الطلاب والمنسقة في الشركة الخاصة بالطلاب.
فلم تافه جدا. القروش زي الرز. لكن للأسف فوضى وعشوائية والآن الغش: الطلاب مفروض يعملوا اختبار بسيط يركبوا الدوائر الكهربية على السيميوليشن ويشغلوها وياخدوا البيانات كجزء من سؤال في الـ assignment
بتاعة المادة ديك في مبادي الهندسة الكهربية. المديرة قالت لي, إحنا نعمل ليهم السيميوليشن, وهم بس يشغلوه.
يا زولة! كيف الكلام ده. المديرة قالت لي بنبرة حاسمة, كدة أحسن لأنو لازم ننتهي من الجزء ده عشان ما يصرف لينا وقت (ده طبعا جزء من التدخلات بتاعة الولية دي في شغلي والتي بالطبع لم تنجح).
قلت ليها, طيب. ما عندي مانع بشرط إنك تمضي الورق بتاع التصحيح إنتي.. وأنا ما عندي أي دخل. طبعا دخلتها في ورطة. لكن تستاهل لأنو كانت عاوزة تجيب لي كفوة. أول ما تخت الإمضاء بتاعك في أوراق رسمية والإجراءات ما سليمة لو حصلت أي حاجة حتكون فقدت وظيفتك وسمعتك كمان. وهو الذي لن يحدث وأنا على قيد الحياة. إلا يمضّوني ميت غايتو :)
خليتين يومين تاااااااني فاجأتني هي ذاتا في غرفة المحاضرات بالصباح, وجابت اللابتوبات وبدت تعمل في السيميولويشن للطلاب. ناديتها برة بهدوء. قلت ليها عاين جاي: مع كل احترامي أنا المسؤول عن المادة دي. لو عاوزة تعملي السيميوليشن للطلاب وهم يشغلوه بس, تعملي الموضوع ده رسمي في الإيميل. وإلا يفتح الله.
المهم في النهاية, طبعا لم أحصل على الوظيفة الموعودة, بسبب الإستقلال, المهنية والنزاهة. شفت كيف يا زكريا. وفي النهاية خليتهم بعد أن فشلت محاولاتهم في إدخالي إلى شلة الفساد واللعب على الحبلين الذي يمكن أن يفتح أمام المرء سلم الفرص والترقيات. دي ما أول ولا تاني ولا تالت مرة بالمناسبة أشخت للقروش وأقول ليهم أركبوا هنا.
Quote: إمتثال عبدالله الجواب على السؤال في العنوان: نعم اما مؤشرات التخلف عندنا في السودان فكثيرة جدا لا تحصى ولا تعد،،،وانت قد اشرت الى جزء مهم جدا من هذه المؤشرات،،،وفي السودان تجد كل شخص يشغل منصبا في غير مكانه،،،ولا تجد الشخص المناسب في المكان المناسب،،، وكل الوظائف والمناصب الهامة يشغلها اناس غير اكفاء وغير مهنيين،،،وكل المسالة محسوبيات وترضيات.... ومثال اخر ...لاحظت لمن يجيبوا ضابط في الجيش الامريكي في التلفزيون وفي كتفه ثلاثة نجوم فقط نجده راجل عجوز عمره يقارب ٧٠ سنة،،،وفي السودان تلقى ضابط في كتفه الثلاثة نجوم دي وعمره اقل من ٢٥ سنة،
مساء الخير امتثال, وورمضان مبارك بمناسبة النجوم العسكرية,الإنجليز حين أسسوا قوة دفاع السودان, الضابط الإنجليزي الخريج كان بيجي نازل يوزباشي في قوة دفاع السودان, يعني نقيب تلاتة دبابير دون أن يكون مؤهلا بالطبع. والإدارة البريطانية أوصت ألا يخدم أي عسكري بريطاني في وحدة يكون ضابط سوداني أعلى رتبة منه. شفتي العقد دي كيف؟ ولو ده ما كفاية, ترقيات الإنجليز كانت بتمشي بصورة اعتيادية, بينما ترقيات السودانيين كان فيها "شيئ" التأويل للفرز في الترقيات إنو تبقى وليد فالح للإنجليز تترقى صاح. تعمل فيها ضكران أو مستقل ممكن ترقيتك تتعطل. شفتي كيف؟
بالنسبة للرجل غير المناسب في المكان المناسب, فزي ما قلنا فوق, الليلة العديل والزين وانجلترا الفساد بقى فيها زي الطين :) إنت بتباصو الدولة الكانت مستعمرانا ليه لمن نجي للكلام ده؟
كسرة: أرنوبة ما نسيتها. بس البتاع ده ما داير يخلص. يحلها ربك
Quote: طارق عبدالله من وجهة نظري العيوب القاتلة للشخصية السودانية والمجتمع السوداني عمومًا:
- أسلوب التربية والتعليم يعتمد على التلقين والضغط مما يضعف الشخصية ويولد التسلط - ثقافة العمل الجماعي غائبة تماما الا بعد وقوع الفأس في الرأس وبشكل غير مؤسس - العناد والعصبية الزائدة او نشاف الراس بالبلدي - الخوف من نظرة المجتمع في امور مصيرية وشخصية جدا مثل العمل والدراسة والزواج - التواكل والاهمال والفوضى والعشوائية المغلفة بصبغة دينية خاطئة - الكسل والرمتلة وعدم تقدير قيم أساسية مثل العمل وقيمة الوقت الا تحت ضغط الحاجة - حب المقارنة والنظر الى ما في يد الغير بدلا عن التركيز فيما يمكن عمله للتطور - تكوين الانطباعات المسبقة والحكم على الناس بناء على الانطباع الشخصي
ولسه كتيييير!
مساء الخير يا طارق عبدالله ورمضانك كريم نفس كلامك ينطبق على الشخصية الإنجليزية. على لسان الإنجليز: إحنا أكتر ناس منقادين للسلطة وبنقيف في الصفوف وما بنقول بغم. ظاهرة الرجل الإنجليزي المنقاد الذي يدري أنه مسير وتوجهه قوى أخرى ولكنه "يتجمل" متظاهرا بالعمى, فهناك من علماء الإجتماع من وقف عندها.
الإنجليز (ومعاهم بقية شعوب بريطانيا) تم قهرهم على مدى قرون. وفي ذلك مراجع
"التواكل والإهمال والفوضى والعشوائية", إنجلترا حالة نموذجية لكل هذا. الكلام ده بس للناس الشابكننا الإنجليز مشوا وخلوا لينا خدمة مدنية. بل هي خدمة أخرى فاشلة. كلام قد يصدم البعض
حاولت أرد على بقية كلامك. لقيت نفس الملامح والشبه. يبدو لي إنو الأمراض النفسية الإجتماعية دي معظمها إن لم تكن كلها جاية من ماما إنجلترا. ولو عاوز تعمل فوكسنغ ما عندي مانع.
بس وينو الوقت.
بالنسبة للتلقين, أديك الهندسة على الطريقة الإنجليزية كحالة دراسية من الجمود الفكري: الهندسة في بريطانيا تقتل الإبداع بسبب نظام الـ كورس ويرك.
04-14-2021, 09:05 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
أنا لم أقطع يقينا بعدم وجود غش في الامتحانات ببريطانيا ..بل ذكرت (انني لم أشهد )..... لست ممن لديهم (عقدة خواجة)....ولكن ما لمسته و فهمته من متابعتي للحياة في بريطانيا ( 1990 - 1997 ) أكد لي بما لا يدع مجالا للشك ان الفساد ليس منتشرا بالصورة التي (تدعو للقلق).... هل هذا يعني ان المجتمع البريطاني يتكون من ملائكة..؟ او أن الجزر البريطانية دولة فاضلة ؟؟!!! كلا و الف كلا... شهدت في تلك الفترة حوادث فساد فساد سياسي/مالي/حزبي....عديدة... ولكن كلها تم تسليط الضوء الاعلامي عليها ..ونال مرتكبيها ما يستحقون...و المؤكد ان لم تكن المحاسبة جنائية ...كان المرتكب (على الاقل) يفقد وظيفته/منصبه
ويقيني انه لو قمت انت بتسليط الضوء الاعلامي على هذه المؤسسات التي ذكرتها....لنلت التقدير (الذي تستحقه)...و لخرجت هذه المؤسسات من سوق العمل
مادفعني لذكر حادثة الغش ...ليس لفت انتباه الاخوة القراء ...لحيثية ان المجتمع البريطاني أفضل منا... كلا بل لتأكيد ان الطالب الانجليزي يريد فعلا معرفة (مستواه الحقيقي)....لأن سوق العمل عندهم لا يرحم وانه لا يمكنك البقاء ..و نيل فرصة ...إن لم تكن (بحق و حقيقة) تستطيع ان تمضى بالمؤسسة التي تعمل بها الى الامام
الامر الذي نفتقره تماما....
وبالمناسبة انا من المؤمنين بأن الانجليز تركوا خدمة مدنية ممتازة ...( خدمت جيدا ...النظام الحاكم وقتها)
شكرا على سعة صدرك. معليش ومتأسف للمغالطة معاك, لكن الفساد في إنجلترا فععععلا منتشر ومتفشي بالصورة التي تدعو للقلق.
المشكلة في بريطانيا ليس إنو في فساد, ولكن إنو الفساد لبن مقنن. معروف و"جميل وظااااهر رسمو" ولكن تتعمل ليهو لجنة تحقيق عشان قال ليك "لاااااازم نتعلم دروس الماضي".
في خلل أساسي في الشخصية البريطانية بتخليها تكوّن لجنة تحقيق عند كل فضيحة أو مصيبة.
كلامك,, إقتباس
Quote: "شهدت في تلك الفترة حوادث فساد فساد سياسي/مالي/حزبي....عديدة... ولكن كلها تم تسليط الضوء الاعلامي عليها ..ونال مرتكبيها ما يستحقون...و المؤكد ان لم تكن المحاسبة جنائية ...كان المرتكب (على الاقل) يفقد وظيفته/منصبه"
يدل على إنو, أنا وإنت عارفين الفولة. أي من حيث الرصد.. لكن الفرق (كما يبدو) في التشخيص: إنك بتعتبر تسليط الضوء الإعلامي على الفساد الإداري والمالي شفافية في حد ذاتو, ويؤدي على الأقل إلى طيران الرؤوس من حيث المناصب.
دي العوجة هنا يا مان. لأنو إذا كان حجم الفساد ألوف مؤلفة وبالملايين, فماذا ينفعني إجبار الفاسد على الإستقالة دون محاسبة جنائية؟ كيف يتم استعادة المال المسروق؟ دي مشكلة الصحافة: إنها "تدجن القضية" .. ما نسميه تمرينا أكاديميا. ممكن تقول مخدرات ثقافية. لإيهام الناس إنو العدالة والشفافية أدت إلى تساقط الرؤوس وفضح التجاوزات. ده زي لمن تقول للشافع, عيب يا ولد. خلي عندك أدب أمشي ألبس يا عريان! بلا في شكلك ذاتو! وطبعا الصحافة تجيب الفضايح والطبقة العاملة والطبقة الوسطى تقول يا سلام - لقد ذهبوا في ستين داهية. ذهبوا نعم, لكن المشكلة إنهم ذهبوا وزاغوا بالفكة. ونعرش على كدة, وأدرك شهر زاد الصحافة البريطانية الصباح فسكتت عن الكلام المباح. إلى أن يأتي موعد "شمارات" الفضيحة الجديدة.
عليك دينك دورة العنف دي يحلوها كيف؟
مدير الجامعة بتاعنا في إنجلترا عمل مشكلة وشمشرة شديدة (متحجج) وقال "ما داير معكاكم", زهجت مع السلامة. فالذي حصل إنو أنهوا العقد بتاعو بناء على طلبه (أو أيا تكن المشكلة مع مجلس الإدارة) وطلع بربع مليون جنيه تعويض. بسبب إنهاء العقد قبل إكمال المدة. اللي هي أصلا ما كان عاوز يكملها واتحجج يطلع. شفت كيف؟ في نفس الوقت ده يا زكريا قالوا لينا في كلية الهندسة إنو مضطرين نتخلى عن بعض الأجهزة والمعدات إضافة إلى تقليص المساحة المعطاة لينا في اللابات والورش لأنو ما في قروش. وإحنا بنؤجر المساحة من الكلية في الميزانية وبيحاسبونا على المساحة we are charged for space بحيث يمكن زيادة أو تقليص المساحة قياسا إلى ما ندخله إلى الجامعة: يعني إذا عداد كلية الهندسة رامي, يبقى الأمور باسطة وتستطيع كلية الهندسة أن تحتفظ بالمساحة المخصصة لمنشئاتها وتطالب بتوسع كمان. الصيغة دي طبعا للتعاقد فيها مشكلة كبيرة, والواحد دورها في راسو فترة طويلة عشان يعرف التلاعب في المؤسسات الرسمية بيحصل كيف.
والفقير إلى الله كان السنة ديك في لجنة الطلاب والأساتذة في كلية الهندسة. فقلت للبروف بتاعنا في المحاضرة باحتجاج, يا بروف, كيف ما في قروش والمدير لحس ربع مليون وطلع؟ البروف قال, الراجل كورك قال أعتقوني Let me go! يعملوا ليو شنو, يربطوه؟
والعقد واااااااضح, لو ما كملت المدة لأي سبب كان تاخد تعويضك كاش داون. عشان كدة البرجوازية الإنجليزية هي أم البرجوازيات في العالم. وهي المرضعة الكبيرة للبرجوازية السودانية التي من تحت راسها كل مشاكل السودان. أوصي كل شخص حادب على مشاكل السودان إنو يقرا كتاب د. فاطمة بابكر محمود: "البرجوازية السودانية". في الحقيقة الكتاب رسالة دكتوراة لـ د. فاطمة.
خليك من قصص سخاروف عن الفساد في بريطانيا. أمسك من طرف, مشاريع البنية التحتية. أولمبياد لندن مثلا (إتعمل في 2012). ميزانيته كانت 4 بليون (وليس مليون). زادت بعد داك بقت 6 بليون, ثم 8, ثم 10, وفي النهاية الميزانية النهائية خمسطاشر سطاشر بليون! يعني فساد بمتوالية عددية (4, 6, 8, ...), تحوّل إلى متوالية هندسية (4, 8, 16). ومن يتحمل المسؤولية بعد شمارات الصحافة كجزء من إدارة الأزمة؟
إقتراحك بتسليط الضوء الإعلامي على المؤسسات المذكورة أحييك, لكن عندي لك أخبار سيئة. جرائم الفساد المالي في بريطانيا مفروض نتفق إنو فضحها إعلاميا يؤدي على أحسن الفروض إلى إستقالات, ولكنه لاااااا يرجع المال المسروق ولا يعيد الحقوق. ممكن نقول مثال وإتنين وعشرة. من ناحيتي في مؤسسة تانية (مؤسسة عامة) إشتغلت فيها تم اختلاس ملايييييييييييين من أموالها على مدى ثلاث سنوات: المدير ورئيس الحسابات والمدير المالي (عصابة كاملة). وكل ما حدث إنو أجبروا على الإستقالة بعد إفلاس المؤسسة ووضعها تحت تصرف المراجع العام forced into public administration.
بشكل عام جرائم المعاطف البيضاء في بريطانيا, لا تستطيع أن تفتح حتى فيها بلاغ عند الشرطة. عارف المعلومة دي؟ دي من تجربتي. تتبعت عصابة لسرقة الأموال واتصلت بنقطة الشرطة الأقرب لي وقلت إني تعاملت مع شخص في ترتيب معاملة مالية وشكيت في الموضوع. ولقيت بعد جمع المعلومات إنو دي عصابة والأدلة عندي وعاوز أقدم بلاغ. الضابط على الهاتف قال, ما بيخارج, جرائم عادية كهي, جرائم مالية نهي :)
تستطيع فقط أن تذهب إلى موقع شبكي مخصص للتبليغ عن الجرائم الإلكترونية وتترك رقم تلفونك. أو تتصل هاتفيا. ويردوا عليك. أنا طبعا جاني إحباط الجماهير السودانية في إتفاقية الحرية والتغيير مع المجلس العسكري. يا سعادتك كيف الكلام ده؟ عاوز بس أصلكم وأعمل البلاغ وإنتو بعد داك تتحروا بطريقتكم, ما ينفع؟
الضابط: ما ينفع. تضرب تلفون بس. ولا تمشي الموقع الشبكي. المهم أخدت منو رقم التلفون. وضربت تلفون ومنتظر والخط فتح ... وألو معاك لجنة التحقيق في فض الإعتصام, كيف نقدر نساعدك. و كمية من الإجراءات .... وفي النهاية. لا شيئ. آخر خطاب منهم إنو لم يحدث اعتقال ونأسف لهذه النتيجة. إستمر في تقديم المعلومات إلينا في الجرائم. وأمشي بعد ده شوف ليك شغلة. ده مع إني أديتهم البيانات بتاعة رجل العصابة ورقم حسابو في إنجلترا (قدرت أعرف البنك واتصلت بالبنك كمان, وناس البنك عملوا مجانين), ورقم حساب تاني وعنوان في دولة أوربية (دردقت رجل العصابة في الكلام على الإيميل لحد ما أخدت منو المعلومات) وإتصلت بي طرف تالت قام رجل العصابة بتقليد صفحته الشبكية وسرقة صور شقته المعروضة بشكل قانوني للإيجار. يعني جريمة كاملة وكنت عاوز أقدمها للشرطة البريطانية على طبق من ذهب, وقد كان. لكنهم لم يفعلوا شيئا في النهاية. وتمخض جبل التحقيق القانوني في بريطانيا فولد فأرا.
أنسى بس.
بالنسبة لـ "الخدمة المدنية" الإنجليزية الرشيدة فشايفك ما علقت على كلامي:
Quote: "التواكل والإهمال والفوضى والعشوائية", إنجلترا حالة نموذجية لكل هذا. الكلام ده بس للناس الشابكننا الإنجليز مشوا وخلوا لينا خدمة مدنية. بل هي خدمة أخرى فاشلة. كلام قد يصدم البعض
بل لقيت في نهاية كلامك إصرار, إنو "يا بريطانيا إحنا العشنا (معاكم) ثواني زمان, وكان لحمتكم, لحمة ضان, تسير بإسمها الركبان :)
Quote: Zakaria Fadel "شهدت في تلك الفترة حوادث فساد فساد سياسي/مالي/حزبي....عديدة... ولكن كلها تم تسليط الضوء الاعلامي عليها ..ونال مرتكبيها ما يستحقون...و المؤكد ان لم تكن المحاسبة جنائية ...كان المرتكب (على الاقل) يفقد وظيفته/منصبه"
معليش, أديك مزيد من الأخبار السيئة. خدمة الإنجليز "الفاشلة" كانت خدمة المقصات و"كيد الأفندية". والكلام ده اتكتب في الموقع ده.
ويقول الكثيرون من النخب, وأظنك واحدا منهم إنو السودان كان له وضع خاص لأن خدمة السودان السياسية Sudan Political Service بدلا عن مكتب المستعمرات The Colonial Office
هي من كانت تدير السودان.
بعد البحث والتحري (عبدالله علي ابراهيم بالنسبة للاولى, ومازن سخاروف في الإثنين) إنو لا خير في هذا ولا خير في ذاك.
أقترح ولا أقول أرى إنو المشكلة نفسية. وأرى ولا أقول أقترح أن تقوم الصفوة السودانية (وسيتبعهم الشارع) طوعا بأن تتقبل نفسيا فكرة إنو "الخدمة المدنية" الخلوها الإنجليز دي عبارة عن أسطورة أو نكتة زي حكايات ود نفاش. وإنو السادة الإنجليز ديل ماسورة كبيرة.
تدبر راسك بس.
تحياتي ومعليش على الإطالة
سخاروف
04-20-2021, 12:43 PM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
مؤكد لدي اختلاف كبير و كبير جدا معك...ولكن هذا البوست ليس مخصصا لمناقشة فساد انجلترا... وقبل العودة لموضوع البوست...دعني اقول ...انني ليس من الذين يعتقدون ان للسودان (وضع خاص)... الخدمة المدنية التي تركها الانجليز في السودان (صنعوا) مثلها في الهند و كثير من المستعمرات... وهي كانت جيدة ...
بالعودة لموضوع البوست.... كثير من السلبيات في الشخصية السودانية ...الحقت بالبلاد اضرارا كثيرة... مما يؤسف له ...اننا نتخلى عن هذه الصفات السلبية عندما نهاجر ( او نغترب) ....وننسى ان بلدنا أحق بأن نتخلى عن هذه الصفات من اجلها
في رأي أهم هذه الصفات السلبية ...هي عدم قبول/تحمل الاخر....( الذي يختلف عننا...او لا يشاركنا المفاهيم)...
04-20-2021, 03:21 PM
مازن سخاروف مازن سخاروف
تاريخ التسجيل: 03-10-2021
مجموع المشاركات: 738
يا سيدي شكرا على سعة صدرك مرة أخرى. كما يقول الفرنسيون, عاش الإختلاف.
فساد إنجلترا ليس موضوع البوست. كلا ما أقوله هو إن المشاكل التي تبدو منفصلة عن انجلترا هي في حقيقتها مرتبطة ارتباطا عضويا بانجلترا. بما يشمل عدم تقبل\تحمل الآخر.
سواء كان "كيد الأفندية" والتآمر فيما يسمى بالخدمة المدنية
كما في البطش والقهر العسكري في العسكر. بكل بساطة (ودن تبسيط) أجيال من العسكرين السودانيين تربوا على "لوائح الخدمة الميدانية" والتي مقدمة كجزء من "العقيدة العسكرية" للجيش البريطاني.
معاملة أي احتجاج ضد السلطة على أساس أنه تمرد يستدعي أن يسحق. وكما ذكر سخاروف: "العقيدة العسكرية السودانية في الفظاعة وتجاهل الفرامل في الفتك بالضحية هي ربيبة أمها البريطانية".
يمكن أن نتفهم الجنوح عن مناقشة المشاكل السودانية عن أصلها البريطاني, وبالتالي التظاهر بأن تلك المشاكل سودانية محضة. ربما يكون هذا جزءً من المشكلة: هروب إلى الأمام. هذا لا ينفي وجود مشاكل سودانية حقيقية. لكن "فك الإرتباط" عن الرحم الإمبراطوري وصلاته الطيبة العميقة هو الغائب افي الثقافة, ألإقتصاد والسياسة. كما قال جايمس جويس: History is the nightmare from which I am trying to wake up.
ثم إستدرك فقال: What if this nightmare gives you a backkick؟
وتحياتي مرة أخرى
تاني تشوفني في الأعياد بس
:)
04-30-2021, 06:49 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
في زمن الاستعمار كان الموظف ( يخشى) جدا فقدان الوظيفة
بعد الاستقلال صار الموظف ( واثقا) من انه لن يفقد الوظيفة
بين الموقفين تتجلى ( في اعتقادي) إحدى ظواهر تخلفنا ففي زمن الاستعمار حرص الموظف على أداء واجباته ناشدا أداء جيدا وبعد الاستقلال صار الأداء ( مظهريا) حرص الموظف فيه على شكل الأداء أكثر من ثمره
وطبعا هذا الرأي يقصد به الأغلبية
04-30-2021, 07:03 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
وهناك مثال دائما ما اضربه لتوضيح ظاهرة ( نفاقنا) الوظيفي وهو مثال من المجال الذي أحببته منذ الصغر وهو التدريس
اذكر انه عندما كنا في المرحلة الابتدائية كنا نعلم فورا عندما يأتي تيم ( التفتيش) من مكتب التعليم لتقييم المعلم قبل أن نرى اي فرد من التيم فعندما يدخل الاستاذ إلى الحصة مهندما حاملا ( مسطرة) طويلة ويبدأ بعد طقوس التحايا و الأحترام بتخطيط السبورة بكل حرص ثم يكتب تاريخ اليوم و عنوان الدرس في مكانهما اللائق ثم يبدأ بالحديث عن الدرس السابق ندرك تماما ام مفتشا سوف يحضر معنا الحصة وفعلا بعد عدة دقائق يدخل المفتش الفصل يكون المدرس في هذه الحصة غاية في التركيز و الصبر في عملية نقل المعرفة
في الأيام الأخرى.........حسنا دعوني اقول ان الامر يختلف
04-30-2021, 01:03 PM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
هذا هو النفاق الوظيفي الذي نمارسه في السودان ..... ونتخلى عنه تماما عند العمل خارجه المعلمون السودانيون في الخليج تضرب بهم الامثال في الجودة و اتقان العمل كل حصة لديهم ...و كأن المفتش موجود معهم داخل الفصل....
تخيلوا ماهي الرسالة التي يرسلها المعلم لتلاميذه عندما تختلف الحصة (محضورة بالمفتش)...عن الحصة (بدون مفتش)؟!!! أبسط رسالة هي....انك تعمل باتقان في وجود (الرئيس),,, اما عندما يغيب...ف (اسلق البيض ساي)
05-05-2021, 12:39 PM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
نحن نملك - إضافة لبعض نفاق وظيفي - عدم اهتمام بالوظيفة نفسها ( لا نعطي الوظيفة حقها)... وللاسف هذا الامر قد نراه في (الخفير)...مثلما يفعله (الوزير)....
شاهدت استاذ جامعي ,,,,عندما يتولى مسؤولية تدريس مقرر في فصل دراسي ....لا يكمل كل مواضيع المقرر التي يجب ان تعطى للطلاب في هذا الفصل عادي جدا في السودان...ان يكون الميكانيكي الذي يقوم باصلاح سيارتك ...ليس متدربا بالقدر الذي يسمح له بالتصليح دون الحاق اضرار يمكنك في السودان و انت طالب تسكن داخلية مجانا ..و طعامك مجانا انت تحضر قريبا لك ليسكن معك في الداخلية لعدة أشهر ..حتى يجد وظيفة في المدينة (ان كنت من اهالي الاقاليم)
يمكن ان تكون مديرا لشركة تجارية حكومية ,,و ,تخسر الشركة اموالا طائلة كل عام .... ولا تحرك ساكنا ... ولكنك تغضب غضبة مضرية ان مست مخصصاتك بسوء وفي المساء ...وفي (قعدة مزاج)...يحق لك ان تنتقد كل سياسي الدولة و تطالب برحيلهم لانهم (لا ينتمون لحزبك)
05-05-2021, 01:00 PM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
وضع السودان اليوم لا يسر عدو ولا حبيب دولة لا تنتج ما يسد رمقها...وعليها التزامات سنوية (خدمة ديون) لن تستطيع الدولة ايفاءها من عائد يتناقص عاما بعد عام وهي دولة شابة (شبابها يفوق 60% من نسبة سكانها....ويزداد عدد السكان سنويا) دولة ليست تمتلك بنى تحتية جيدة
وفوق ذلك كله يشهد الصراع حول السلطة فيها تخطيا لجميع الخطوط الحمراء: * بيع لاسرار الدولة * التضحية بالمدنيين * تخريب للبنى التحتية المنهارة اصلا * إضعاف للجيش الوطني وإستغلاله في لعبة السياسة * إفساد للامن الوطني وإلزامه بخوض معارك لا يفترض فيه ان يكون طرفا فيها ابتداءا
كل ذلك جعل من مصلحة البلد العليا (ريشة) في مهب ريح المصالح الذاتية...ومن ثم يأتي ترتيبها دائما في المؤخرة
الدولة حاليا ...تعتمد على رزق اليوم باليوم على ما يجود به بعض المانحين وعلى ما (يلملم) اطرافه وقواه من قطاع منتج في زراعة مروية في مشاريع رسمية، ومعادن تستخرج من باطن الارض، وثروة حيوانية..وتحويلات مغتربين هذه القطاعات الاربع تعمل (وتنتج عائدا) بقوة دفع ذاتي..وبعضها تكبله قيود حكومية.... وهذي القطاعات بالكاد تفي بمتطلبات اهل القطاع الذي ينتمي للحكومة (اصحاب المرتبات) اما من هم خارج قطاع الحكومة (المنتجون الحقيقيون) ..فحالهم كما هو ..ولذا اصبحوا يتناقصون في العدد سنة بعد اخرى...
يقابل ذلك من الناحية الاخرى اوجه صرف ..بعضها طبيعي (النشوء الطبيعي) ...وغالبه من صنع الحكومات نفسها (يكفي ان نعلم ان أكبر ميزانية تخصص في كل الحكومات كانت للامن و الدفاع) وثالثة الاثافي...تكبيل البلاد بديون ..لم يجلس حتى الان اهل البلد لمناقشة :- * لماذا كانت الديون ؟ * فيم انفقت ؟ * ولماذا لم تحقق العائد المرجو منها؟ * من يحق له طلب الدين؟ * من هم المستفيدون من تلك الديون....؟
05-06-2021, 10:03 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
إضافة للنفاق الوظيفي....نمتلك صفة سالبة أخرى... وهي ...التعصب المهني أذكر انه و عند التخرج من الجامعة ...كنت أسكن في (ميز ) به مجموعة من طلاب دراسات عليا ضمت عددا من تخصص الزراعة و مهندسي الري كنا يوميا ندخل في نقاش حاد خاصة و ان الفترة كانت ديمقراطية ....أحد المواضيع التي قتلت نقاشا ..كانت بين أحقية ادارة الري بالجزيرة :- هل يتولاها خريج الزراعة ...ام خريج الهندسة المدنية... وأذكر انني في ليلة كدت ان (ابيت ) خارج الميز....لأنه عندما طلب مني ابداء الرأي (بصفتي صاحب تخصص محايد) ...قلت : أنني من انصار خريج الهندسة...لأن (بتاع الزراعة ) مهمته تحديد كمية المياه المطلوبة في الزمن المحدد ..للمحصول المعين... اما (كيفية ) انتقال و انسياب المياه..حجم و طول القناة الناقلة (عمقها و محيطها) ..هذا العمل المهم جدا في الري ..لا يقوم به الا المهندس.. فما كان من صديق لي (خريج زراعة ) ..الا ان نصحني قائلا (شوف ليك محل تبيت فيه الليلة)
الى الان لا ادري ..لم اصرار قبيلة الاطباء ..في ان يكون مدير المستشفى طبيبا؟!!
أنجح مسؤولي القنوات التلفزيونية في العالم (الاول) لم يمارسوا العمل التلفزيوني (فنيا)...
05-12-2021, 07:38 AM
Zakaria Fadel Zakaria Fadel
تاريخ التسجيل: 01-24-2013
مجموع المشاركات: 2002
و أسأل الله أن يتغمد شهداء مسيرة الامس بالرحمة و المغفرة و أن يدخلهم فسيح جناته
وللاسف لا زالت التضحية بالمدنيين مستمرة لا زال الشق العسكري في الحياة السياسية السودانية تحت سيطرة (محركات)..تمسك بمقودها (طبقة مدنية أكسير حياتها يكمن في هذا الصراع الدائم حول السلطة).
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Zakaria Fadel
Asim Ali
عمر التاج
طارق عبد الله
مازن سخاروف
فيس بوك
تويتر
انستقرام
يوتيوب
بنتيريست