والي الخرطوم يطرد مدراء المستشفيات من مكتبه -يا ود الفحل قريبك مالو معنا !

Quote: منقوووول ماهو يا جماعة ما معقول مدراء مستشفيات عايزين يجتمعوا مع أمين عام حكومة ولاية الخرطوم وبدون أي ترتيب مسبق للاجتماع ولا أي شي .... يعني اتخيل معاي أطباء يجوا توشك داخلين رئاسة الولاية وعايزين أمين عام الحكومة يجتمع معاهم طوالي كأنو الزول ده لا شغل ولا مشغلة قاعد منتظر في مكتبو أي مواطن يجي يقعد معاهو.. القصة دي بالضبط حصلت قبل يومين داخل رئاسة ولاية الخرطوم الحصل شنو كان في اجتماع محدد مع أمين عام الحكومة ومدراء إدارات بوزارة الصحة الولائية.... اتفاجأ أمين عام الحكومة بانو في مدراء مستشفيات دخلوا الاجتماع ودي فيها تجاوز للتراتيبية أصلا لانو مدراء المستشفيات ديل عندهم جهة مسؤولة عنهم مفروض يجتمعوا معاها وكده يعني ما طوالي يجوا يجتمعوا مع أمين عام الحكومة لكن هم مدراء المستشفيات مشكلتهم شنو حسب ما سمعت انو الجماعة ديل رافضين مسألة انو الايرادات تدخل حساب وزارة المالية اولا وبعد كدة ترجع لحساب الوزارة وفقا لموجهات الميزانية وموجهات المراجع العام وبرضو مطالبين الولاية بزيادة أسعار الخدمات داخل المستشفيات عمليات وفحص ومقابلات وغيرها لانو الحاجات دي عندهم فيها نسبة ٤٠% وده حقهم طبعاً ومن حقهم يطالبوا بالزيادة دي تحديداً بس المطالبة دي مفروض تكون عبر القنوات المعروفة مش عبر فرض سياسة الأمر الواقع واصلا لما اترفعت الزيادات دي في الميزانية الولاية رات انو الزيادات ما اتبنت علي ارقام حقيقية وإنها فوق طاقة المواطن ولانو ببساطة أمين عام الحكومة برضو من حقو يرفض يجتمع معاهم لانو هو ما الجهة المسؤولة بشكل مباشر عن الحاجات دي واذا عما كده يبقى اتغول على صباحية جهة أخرى أو خلاها على الاقل قاعدة ساي . شوفو يا شباب لو ما كل المؤسسات الحكومية التزمت بولاية المالية علي المال العام والتزمت بموجهات المراجع العام حال الخدمة المدنية ده ما ح ينصلح وح نكون ماشين بنفس طريقة النظام البائد وكلو زول يتحصل إيرادات ويصرف علي كيفو في تفاصيل كتيرة حصلت في اجتماع الأمر الواقع والرفضوا أمين عام حكومة الولاية لكن عشان الناس ما تمل من البوست ده حبيت اكشف بعض الحقائق 9/3/2021 .