Re: نسينا ذكرى وفاتك يا حمّيد .. و انشغلنا بي ح� (Re: يحي قباني )
فتاح يا عليم .. رزاق يا كريم ..VIDEO كلمات محمد الحسن سالم حميد.. عم عبدالرحيم بيانو و عود فتّاح يا عليم رزّاق يا كريم صلى على عجل همهم همهمة حصّن للعباد .. وهوزز سبحتو دنقر للتراب .. هم فوق هم هما صنقع لى السما وكان فى الجو فى غيم وكم نجمات بُعاد وكان الدنيى صيف لا قالتلوا كيف .. كيف أصبحت .. كيف لا لمسةحنان لا لمسة وداد لا رمشة طِريف من قلباً وفى زى أيام زمان .. أيام الدِفِى كانت ماها فِى .. كانت فى المراح شدَّتلو الحمار .. تحلب فى الغنم لى شاى الصباح والطير ما نضم .. ما رسـّل نغم عم عبدالرحيم إتوكـّل نزل .. فى المُشرَع لِقَى زُملان الشقا الجا من الجريف .. الجا من الجبل علْ الناس بخير صبّح هاظرُمْ .. نقْنقْ ناقَرُمْ غاظوهو .. ونعَل وعم عبدالرحيم ما بخَبِر زعل كل الناس هنا ما بتخبِر زعل تزعل من منو.. .. وتزعل فى شِنو كل الناس هِنا .. كل الناس صِحَابْ .. كل الناس أهَل والماهُم قُرَاب .. قرّبـُمْ العمل الطاق اليَطُقْ .. عشتْ .. آ .. أبوالزَمَل بى الحال العليك .. بى الفال .. بى الأمل عم عبدالرحيم .. كُتْ فلاح فى يوم فى إيدك تنوم .. على كيفك تقوم لا دفتر حضور .. لا حصة فطور تقرع بالقمر .. تزرع بى النجوم لكن الزمن .. دوّار .. آ .. بِدُوم عم عبدالرحيم .. ماشى على الشغل فى البال القديم .. أنعارض تُكل تنشايح جِراح .. كيف الغُسُل الدِنيِى أم صلاح تبدا من التُكُل من حِجـّة صباح .. فى حق المُلاح فى اللبس الجديد .. فى القسط القديم وبيناتِن عشم .. فى الفرج البعيد أمونة الصباح .. قالتْلُو النـِّعال والطِرقى .. إنَهَرَنْ ما قالتْلُو جِيب .. شيلِن يا الحبيب غشّهِن النُقُلْتـِى والترزى القريب بس يا ام الحسن .. طقّهِن .. آ .. بِفيد .. طقّهِن .. آ .. بزيد إنطقّن زمن وإن طقّ الزمن .. لازمِك توب جديد بى أيـّاً تمَن غصباً لى الظروف .. والحال الحَرَنْ شان يا أم الرحوم .. ما تنكسفى يوم لو جاراتن جَنْ .. مارقات لى صُفاح أو بيريك نجاح ده الواجب .. إذن وأيه الدِنيِى غير .. لمّة ناس فى خير أو ساعة حُزُن عم عبد الرحيم يا حُر ماكا حُر يا ريت التمر .. ياريت لو يشيل كلِّ تَلاتْ .. أشـُرْ ولاّ أيام زمان كانت ما تمُر كان ماجاك هوان .. ما لاقاكى ضـُر كان لا ضِقت ضيق لا أنغرغَرْ صبر ولا شابيت غريق .. ولا طلوَحْ فقُر كان ماكان .. وكان أكسيكى دُر حيكومات تجى وحيكومات تغور تحكم بى الحِجِى .. بى الدجل الكِجُور مرّة العسكرى .. كسـّار الجِبُور ويوم بإسم النبى .. تحكمك القبور تعرف يا صبى مرّة تلف .. تدور وللاّ تقول بَرِى .. أو تحرق بخور هِم يا الفنجرى .. يا الجرف الصبور كل السقتو ما باقى على التِمور وأرضك راقدِى بور لا تيراب وصل .. لا بابور يدور والماهية أُفْ عيشة هاك .. وكُف فى هذا الزمن .. تـُف يادنيا .. تـُف يا العَبِد الشقى ما أتعوّدْ شكى لكن الكفاف فوقك .. منتكى والسوف فيك يا سوق... حالك ما بتسـُر إِلِّى كمان فى ناس فايتاك بى الصبُر ساكنين بى الإيجار .. لا طين .. لا تمُر وواحدين بى الإيجار .. ما لاقين جُحُر سِلعـتُمْ الضُراع .. والعرق اليخُر عمال المدن كلاّت الموانى الغُبُش التعانى بحّارة السُفُن حشّاشة القصوب لقاطّة القطن الجالبة الحبال الفِطن الفُرُن الشغلانتو نار والجو كيف سُخُن فرقا شتا بين ناس عيشا دين مجروره و تجُر تكدح بالأجر ومرة بلا أجر.. عيشُنْ كمّهو .. وديشُن هان قَدُر وناساً حالا زين مصنع .. مصنعين طين فى طين .. ووين ما مرابا مُر.. بارد همها لا يعرق جبين .. لا وشاً يصُر عين والله .. عين كلها كمها .. وعزها هان قدُر فى الجنة أم نعيم .. فى الجنة أم قُصُر يا عبد الرحيم إلِّىِ ورا القبُر ويلكد فى الحمار فتاح يا عليم وإن كان الفقر يا عبدالرحيم أشبه بى الكُفُر ونقرط لى الحمار نقريطة الحمار .. لاتنسى النِعال الطِرقِى الخدار اللِّبِس الجديد تسريح السفر .. لى الماشى الصّعيد ماشى الدّيش .. نَفَل والبال إشتغَل بى الأبى ما يعِيد .. الحول ما أشتغل الغُبُن الشديد .. السابا ورحَل الضيق .. المحَل والفرج القريب الجا .. وما وصَل زى الحال ده يوم .. لا كان .. لا حصَل والبال إشتغَل السكة الحديد .. يا عمو القَطَر يا عبدالرحيم قِدّامك قطر ........... وسال الدم .. مطر وطارت دمعتين .. وإنشايح وتر يا طاحن الخبر ما بين القضا .. ومَرْحاكة القدر الشِّهدوا الدموم .. والدمع الهَدَر إيدُمْ فى التُراب .. والعين فى القطر عارفين الحصل عارفين فى حذر الخبر اليقين .. بوّخ .. وإنتشر أطفال القرى .. وعمال الحضَر أدوهو الطيور .. ودنّوا البحر إنصاعت سحاب وإنْدافَقْ مطر عم عبد الرحيم .. فى الشارع عَصر لى تالا اليسار متفادى الكَجر .. دورية الكجر...عربية الكجر... جفّلت الحُمار .. وطلوَح زى حجر وعم عبد الرحيم .. إتلافا القطر فتاح يا عليم .. سال الدم مطر جرتق بالتُراب منشور بى كتاب روشتّة .. وجواب مفتاح أب قُراب .. أورنيقين سَهَر جنب لِبدة حُمار مقطوعين ضَهر ... عم عبد الرحيم ..يا كمِّين بشر صحِّى الموت سلام ما يغشاك شر ..