|
|
 Re: طالبه وأم معادله صعبه (Re: احمد عمر محمد)
|
سلام احمد
نحنا مهما كان صعب نكون جامدين وباردين زى الخواجات (مش معناه كمان نخليها فوضى)ولازم نتماشى مع طبيعه مجتمعاتنا.انا كنت مشرف على تدربس عملى السنه الاولى لطلاب الجامعه كلهم وكنت صارم وممشى الشغل زى الساعه وعندى كلام ليهم اول خمسه دقائق حول النظام مسميها (خطبه الحجاج) لانو بفتكر انو طالب اى مجال علمى لو ما اتعلم الانضباط والدقه فى الدراسه العمليه يبقى مابنفع او غير جيد فى تخصصو لما يتخرج.
لكن برضو فى مواقف الواحد بيتفهم الحاصل حاصه مع تعقيد ظروف الحياه وضغوطها وحرص شباب على انهم رغم كل شىء يواصلوا ويكافحوا عشان يكونو ليهم قيمه انسانيه بالعلم.
الطالبه من اول تدريس الكورس بتحضر عادى واكيد لما جابتو معاها معناه فى ظرف قاهر خلاها تعمل كدا وبعدين لو انا طردتها من القاعه بولدها حرصا على الاخرين وحسب فهمى لنفسيه الشباب ممكن يقيفو معاها وقد يطلعو معاها لو كانو مترابطين شديد (خاصه وهم بسيطين فى العدد) وبعدين هى اكيد جابتو القاعه مطمئنه من جانبهم.وعادى حكايه طالبه تجيب طفلها معاها وتخلهو مع (الخالات )بقروش او مع صديقه او قريبه ليها فى الجامعه تمسكو لغايه مايتنتهى المحاضره او العملى وحتى زملاء الطالبه غالبا تلايقهم محتفين بالطفل ويلاعبوه لدرجه لو مريت بمكان جالسين فيه مجموعه مع الطفل ماتعرف تابع لمنو فيهم
احيانا الواحد بيمر بمواقف من نوع تانى حتى مع الطلاب الذكور يعنى اذكر مواقف واحد شغال فى شرطه الجمارك مره يتاخر ومره يعيب وواحد تانى شغال فى جهاز الامن دا غاب فتره ولما حضر لحقنى نهايه المحاضره وحكى ظرفو بتواضع(انو شغال تبع الجهاز وكان ضمن المكلفين وقتها بمرافقه وتامين مجموعه من المعارضه التشاديه -الطالب من ابناء دارفور)-دا فرد امن بخلاف البيكون منجى وجاسوس وسط اللبه بيكون مكشوف من حركتو وعلاقتو وبتذكر واحد بعد اتخرج بقى ضابط فى الجهاز اخر ترتطيبه- وحاله تالته واحد كان غايب من بدايه السمستر (الكلام دا السنه قبل الثوره بسنتين تلاته) ووضح انو كان معتل طوال فتره الغياب . احالات دى كلها ممكن اتعامل معاها بطب خطابات رسميه عشان اراعى الظروف فى نسبه الغياب او انجاز اعمال السنه لكن لانهم طلابنا نعرفهم وبعضهم لايمر سمستر او عام دراسى الا وتكون درستو كورس او عملى والمهم نساعد فى تقيم انسان يكون عندو خياراتو عشان يكون نافع للمجتمع كلهم اتفقت او اختلفت معاهم كسودانيين خارجحرم الجامعه لكن جوا الجامعه هم ظلاب تديهم فرصه طالما انو فى النهايه المحك الامتحان البيميز بين المجتهد والكسلان
من الامثله واحد فى سنه رابعه قبضتو فى الامتحانات ببحره واول ماقبضتو اعتذر بهدوء اخدت البخره وذرتو (طالب فى رابعه لو اتقبض غش معناها حيتاخر سنتين عن دفعتو ولاتعلم من خلفه من الاهل التعبانين عشان يتخرج) المهم فى السمستر التانى برضو لاحظت ان ببخره وهنا سجلنا حاله الغش وبتاكيد استاذ الماده انها تخص ماده الامتحان لكن اللجنه انتهت بلفت ظر او انذار في اذكر المهم السنه البعدها ماشفتو ولما سالت عنو واحد من الزملاء قال انو اتقبض تانى بعد داك (دا رغم انكتديهو فرصه لكن لايستقيم.
.
اما موضوع البوست الام الطالبه دا غالبا تلقاهو ود عمها او ود خالها وربما يكونو متفقين على تاجيل الاطفال لغايه بعد تخرجها .لكن انت فى مجتمع مامحصور فى اسرتك العملتها وانما جزء من عائله ممتده وامك وامها والاسئله ماعافين منكم كان ما كذا ومابقيتو تلاته و...الخ من الضغوط كمثالبل وحتى الزيجات الواحده يكملو خطوبتها وزواجها عشان عريسها يتحمل مسئوليه قرايتها وتخفف ضغط على والدها لكن تجرى الرياح بما لاتشتهى السفن احيانا والطفل يجى وبعض الطالبات يتساقطو فى الطريق بسبب الاطفال ويخلو الدراسه.
دا مجتمعنا لازم نفهمو ونكون مرنين حسب طبيعتو ولا رايك شنو ؟
اذرنى على الاسترسال
تحياتى
|
|
 
|
|
|
|
|
| |
Asim Ali
فيس بوك
تويتر
انستقرام
يوتيوب
بنتيريست