|
|
|
 Re: السر السيد ومحاولة تمثيل دور الكوز الشريف (Re: عمار عبدالله عبدالرحمن)
|
السيد بكري أبوبكر
طارق أبوعبيدة أحد الذين حملوا هذا المنبر في أحداقهم
وقدم له أضعاف ما قدم هذا العصبجي البذيء الذي يكتب باسم دينق ويعلق صورة مارتن لوثر كنج
ظل هذا العصبجي البذيء يتعرض للكثيرين وبأحط الألفاظ وأن تتغاضى عنه
عيب يا بكري عيب
Quote:
أنت في الكوز السر السيد ولا العاطل بتاع هولندا طارق أبو عبيدة الجاي يتعلم الإنتاج والأخراج في الشعب السوداني وعلى حساب الدولة كمان؟
والله دي فضيحة يا مدير التلفزيون لقمان . |
| |
 
|
|
|
|
|
|
|
|
Re: السر السيد ومحاولة تمثيل دور الكوز الشريف (Re: بدر الدين الأمير)
|
Quote: هو كونو السر السيد كوز منظم
دى دايرليها درس عصر ...
|
الا اكون انا كوز وما عارف نفسي ,,
السر السيد قلت انك لا تعرفه , فاسمح لي ان اعرفك بالسر السيد
السر السيد من ابناء عطبرة , في المرحلة الثانوية التحق بالاتجاه الاسلامي ,,
دخل معهد الموسيقي والمسرح , بتوجيه من الكيزان
قبل تخرجه من المعهد فارق الكيزان فراغ الطريفي لجمله ,,
ونسط في المجالات الثقافية في فترة الثمانينات تاثر بالجيفاريين
كان كما اغلب طلاب معهد الموسيقى والمسرح يطيب لهم المقام في جامعة القاهرة فرع الخرطوم
هنالك تعرفت عليه في 1983/ 1984 ,,, وظف ثقافته ومعارفه الموسوعية وعلاقته في خدمة التحالف الوطني الديمقراطي
في جامعة القاهرة , المعارض لنظام مايو وهمينة الكيزان على الحركة الطلابية ,,,
لديه مصادمات ومناظرات مشهورة لكل من واكب تلك الفترة في حامعة القاهرة فرع الخرطوم او معهد الكليات التكنلوجية (الجناح الغربي)
كده يكفيك ولا نزيدك
في كيف التحق بالاذاعة والتلفزيون
واسهامات في اتحاد الكتاب السودانيين في فترة الديمقراطية الثانية , وبعد حل الاتحاد من قبل انقلاب البشير ,,,
اتمنى ان ما يكون ممن يدفعون الناس دفعا بصنيفات شخصية لصف الكيزان
| |
|
|
|
|
|
|
|
|
|
Re: السر السيد ومحاولة تمثيل دور الكوز الشريف (Re: بدر الدين الأمير)
|
في بيت السر السيد :
"صور جيفارا والخميني وحسن نصر الله".
ويحمل ميدالية مفاتيح فيها صورة جون قرنق:
اهلا بسيد البوست ومناقشيه.
بعد عمل بحث، وجدت هذا الحوار الصريح مع السر السيد وأجراه الصديق :
محمد سيد أحمد.
ونشّر في المنبر في عام ٢٠٠٦،
وفيه يتكلم السر السيد عن علاقته بالحركة والاسلامية ومتى ولماذا خرج منها ....إلخ .
فإلى الحوار:
ونسة مع ناقد جدا
السر السيد : بتفق مع جون قرنق وما ممكن اتفق مع الحركة الشعبية
اتونس معاه بالمسرح: خليفة حسن بلة
[email protected]
السر السيد الناقد الجرئ لا يخرج من معركة الا ويدخل اخرى .. تجده فى قمة كراسى الادارة يكافح وينتج فتتغير صورة الدراما السودانية ورغم الاتهامات الا انها ظلت هى الفترة الاكثر انتاجا وتطورا ... يحسبه البعض على الحركة الاسلامية وبعضهم يسميه عنصرى امنجى انقاذى .. وفى الجانب الآخر الاسلاميين يتهمونه شيوعى مندس .. توجهت اليه بعديد من الاسئلة تمكنت من طرح بعضها وتأجلت الاخرى غصبا عنى ... الرجل يتحدث فى كل شئ بذات الحماس الذى يتحدث به فى الدراما .. اليكم ما دار بيننا .
فى بيتنا بتلقى صورة الخمينى وجيفارا وحسن نصرالله وشايل صورة د. جون فى ميدالية المفاتيح
تحقيق شليق..محمد شريف
* البعرفو عنك انك جيت لعالم المسرح صدفة
* صاح
* وهل صحيح انك جيت مجبور عليه من الحركة الاسلامية وقت كنت واحد من كوادرها فى عطبرة ؟
* شوف بقى خلينى ابدأ معاك صاح
* *جدا اتفضل
* * انا فعلا كنت فى الحركة الاسلامية من الثانوى العام وجلست لامتحان الشهادة السودانية 1980 م والرغبة الاولى قدمتها كانت جامعة الخرطوم كلية القانون والتانية جامعة امدرمان الاسلامية كلية الآداب وما قدمت غيرها لأنى كنت واثق انى حأدخل جامعة الخرطوم
* * جيت كيف معهد الموسيقى والمسرح ؟
* * الصدفة زى ما قلت انت ... الزول الكنت بذاكر معاه مسك الاورنيك بتاعى بعد ما مليتو وكتب لى رغبة تالتة وهى معهد الموسيقى والمسرح قسم المسرح
* * ليه هل لأنو كانت عندك ميول فنية ؟
* * ابدا ...هزار بس وانا ما اهتميت كتير بالموضوع وما كنت متخيل انى حأنزل لغاية الرغبة التالتة تانيا قلت حتى لو قبلونى مستحيل اقرأ حاجة زى دى
* * أها؟
* * الصدفة خلتهم يوزعونى المعهد وهنا لقيت نفسى فى مشكلة واتذكر انو الموضوع دة عمل ضجة وسط ناس الحركة الاسلامية فى عطبرة
* * لكن جيت المعهد
* * اوريك جيت كيف ... فى ناس من عطبرة نصحونى امشى الخرطوم وهناك اتخذ القرار وفعلا جيت هنا ولاقيت عدد من ناسنا هنا ومنهم من نصحنى ادخل المعهد
* * انا معلوماتى بتقول انو دكتور امين حسن عمر كان عندو دور كبير فى انك تقرا المعهد
* * صاح لكن برضو فى أخرين بس دكتور امين لأنو علاقتى بيهو بدت من عطبرة عشان كدة ظل لصيق بى وفعلا هو شجعنى على المعهد وكان بيصر على انو لازم يكون عندنا وجود فى المؤسسات دى
* * ودخلت المعهد باطمئنان ؟
* * لا اكيد ما باطمئنان كان فى حذر وتوتر
* * هل لأنك كنت اسلامى متشدد ؟
* * كنت اسلامى ملتزم والوقت داك الفنون كان حولها نقاش كبير فى الحركة الاسلامية ولسة ما حصل تصالح معاها
* * واتجانست عادى بعد ما اجتزت المعاينة ؟
* * لا كنت لوقت طويل بتحسس من حاجات كتيرة
* * منها ؟
* * مثلا يا خليفة من ما طلع الجدول بتاع اولى اتحسست جدا من مادة اسمها رقص وحركة وكنت خايف دى اتعامل معاها كيف لانو ما كان عندى فكرة عن شكلها
* * ..............؟
* * تانيا فى مادة تاريخ مسرح والمسرح الاغريقى كان مزعج جدا بالنسبة لى لأنو فيه تعدد الآلهة ودى ثقافة جديدة علينا
* * وانتو فى الحركة الاسلامية الوقت داك ما كنتوا بتقروا قرايات متنوعة ؟
* * لا حدود قرايتى انا كأسلامى جاد ملتزم فى الفكر الاسلامى ما كنت منفتح على مجالات كتيرة
* * الحياة اليومية داخل المعهد ما سببت ليك اذمة ؟
* * دى برضها كانت مشكلة لانو هنا كانت الحياة حرة فى تعامل الولد مع البت ولبس البنات برضو دى كلها كان بتسبب لى قلق
* * واستقريت متين ؟
* * شوف لوقت طويل انا كنت مهيأ أسيب المعهد فى اى لحظة ما كنت متصور انى حأخلصه لكن لأنو حسى السياسى كان عالى بقت المسألة بالنسبة لى معركة بتخضع لقياس الاضرار ايهما ضرراكبر وضرراصغر .. فى وضعية الحركة الاسلامية كان لازم يكون عندنا وجود فى مؤسسة زى المعهد
* * كانت فكرتك شنو عن المعهد قبل تدخلو ؟
* * بالفهم القديم بتاعى انو دى مؤسسة بتاعة شيوعيين بس ومن هنا كنت بشوف وجودى فيها ضرورى وحتمى لاغراض مقاومة الفكر دة ولغرض ايجاد مساحة للحركة الاسلامية فيها
* * حسابات سياسية بس؟
* * ايوة
* * ما حسبتها من ناحية دينية ؟
* * فى الحركة الاسلامية السياسة ما بتنفصل عن الدين وانا كا ن عندى كونصلتو خارجى بشاورهم دايما
* * د. امين حسن عمر ؟
* * ايوة والمحبوب عبدالسلام والكرنكىوحسين خوجلى .. وانا وضعى فى التنظيم ما زيهم ديل خبرة بالاضافة لاتجاههم فى التفكير كان مغاير وبالفهم دة اترتبت حاجات كتيرة
* * قلت ظنك كان انو دى مؤسسة شيوعية لقيتها زى ما ظنيت ؟
* * لا ما كانت مؤسسة خارجة زى ما اتصورتها بل هى مؤسسة سودانية عادية جدا وكتير من الاشياء الكنت بتخيلها عن السلوكيات والمفاسد ما بالصور البتخيلها
* * يعنى ما كان المعهدحق الشيوعيين ؟
* * لا دة كان وهم ساكت .. صحى انو الجبهة الديمقراطية كانت اقوى تنظيم مقارنة بالبعثيين والاسلاميين لكن كحضور وثقافة وكتيار مهيمن الغلبة كان لتيار السياسة اصلا ما شغلهم الشاغل ودة الخلانى احدد نقاط الضعف فى المعهد وانو المعركة بتاعتنا ما مع الشيوعيين بل مع الاتجاهات الفوضوية والاتجاهات الما منتمية وما عندها معايير وحدود
* * الاسهل ياتو .. انك تصارع ديل أم الشيوعيين ؟؟
* * الاسهل الشيوعيين طبعا لانو هنا فى مرجعيات مشتركة وفى قضايا كتيرة بتهمنا والشيوعيين اكثر حذرا فى قضايا كتيرة فى الوقت داك بتهمنا من قضايا قيم المجتمع
* * الخطوات العملية البديت بها انت شنو فى المعهد ؟
* * نظمت كتير من الندوات مثلا بدينا بندوة الفنون ومذهب الوجود قدمها د. ابراهيم محمد زين وبعدها ندوة عن الفن والفوضى قدمها د. امين حسن عمر والتالتة كانت عن المادية التاريخية شارك فيها د. التجانى عبدالقادر وابراهيم محمد زين وواحد شيوعى اسمو بدوى تاجو ... وغيرها
* *.....................................؟
* * فى الوقت داك بديت احس انو معهد الموسيقى والمسرح الاشكال الاساسى فيه فكرى فى علاقة الفنان بالفن وفى علاقة الفن بالمجتمع وفى تصورات الفن للوجود كله
* * طيب وانت كنت اسلامى براك وسط شيوعيين وفوضويين زى ما قلت .. ما استفردوا بيك ؟؟
* * لا ما استفردوا بى لاسباب كتيرة جدا اولا لأنى ما براى صحى ظاهريا ابدو وحدى لكن زى ما قلت ليك عندى كونصلتو فى خارج المعهد .. اضافة الى انو انا شغال بقدرات تنظيم قوى ... ياخى انا نزلت فى انتخابات المعهد ضد الجبهة الديمقراطية والمستقلين كمرشح للاتجاه الاسلامى وفزت
* * نلت كم صوت ؟
* * اظن 98 صوت من 112 صوت وبالمناسبة دة معناهو انو صوتوا لى ناس من الجبهة الديمقراطية
* * ليه ؟
* * لانى كنت نشيط وفاعل عندى منتدى اسبوعى وجريدة
* * وفنيا ؟
* كنت فاعل فنيا داخل المعهد فى التمثيل فى جماعة السديم المسرحية الاتكونت فى ابريل 1980 مع ناس يحي فضل الله وقاسم ابوزيد
* *...............................؟
* * المعهد بفرق عن جامعة الخرطوم او الفرع الحياة فيه ما مسيسة وحتى بالنسبة للمسيسين ما بحصل الفرز الحاد البحصل فى الجامعات التانية اذا كانت الخرطوم او الفرع او غيرهم
* * العمل دة كان مشروع السر السيد ام مشروع للحركة الاسلامية ؟
* * افتكر انو مشروع الحركة الاسلامية
* * كل الحركة ام المستنيرين زى د. امين ود. التجانى عبدالقادر ؟
* * صحيح ديل كانوا معاى فى الحتة دى لكن انا كنت بمثل المعهد فى لقاءات الطلبة فى الحركة الاسلامية وفى زول مسؤل منى زى ما هو برضو مسؤل من طلبة فى كليات تانية
* * يعنى الحركة الاسلامية كانت فى اللقاءات دى بتتعامل معاك باحترام ؟
* * على المستوى التنظيمى نعم لكن على مستوى الافراد بنقابل ناس عندى علاقة بيهم من باب حرصهم علينا ما بكونوا مطمئنين انك تكون فى معهد الموسيقى والمسرح لكن دى فى النهاية آراء فردية والراى الرسمى هو انو لابد يكون عندنا وجود فيها ودة الاهم
* *....................................؟
* * دة ساعدنى اكتر استقر والهدف الاكبر يكون فى وجود للحركة الاسلامية فى المعهد وفى الفنون
* *وانت اول اسلامى يدخل مجال الفنون والمعهد بصورة محترفة ؟
* * لا انا اول اسلامى يدخل مجال الفنون فى مؤسسة اكاديمية من التعليم العالى .. انا جيت من مكتب القبول وقبلى دخل الاستاذ شاكر قبسة لكنه جاء من وزارة التعليم وفى الاستاذ بابكر حنين عمل ماجستير فى المسرح فى امريكا
* * ما حاولت تجند زول من المعهد للحركة الاسلامية ؟
* * انا كنت بحاول اعمل تيار عام ...
* * كيف يعنى ؟
* * اوريك كيف .. انا كنت عارف انو ناس كتار جدا من المستقلين عندهم موقف من الجبهة الديمقراطية ومن هنا كانت استراتيجيتى فى خط منها اضعاف الجبهة الديمقراطية والتانى خلق فضاء مغاير للافكار الفوضوية والافكار الكنت بشوفها الوقت داك بعيدة عن القيم الاسلامية وهنا بكسب المتدينين التدين العادى وبكسب الما متدينين لكن محافظين وفى ناس لا متدينين لا محافظين لكن ضد الحزب الشيوعى كنت انا بشتغل فى المنطقة دى وفعلا اثناء ما نحنا شغالين بدت الجبهة الديمقراطية تفقد كوادرها وتتعطل ماكينة استقطابها للناس وبقى يعلو الصوت النقدى ضدها
* * البطلعوا ديل بجوك فى الحركة الاسلامية ؟
* * لا لكن بشتغلوا فى مشاريعنا العامة وفى ناس كتار جدا كانوا بجوا يشتغلوا معاى ويقدموا لى مساعدات لانهم مع الفكرة الاسلامية العامة
* * منو صاحب الترويج المزعج ليكم انو الاسلاميين ضد الفنون ؟
* * ( يفكر فأقاطعه)
* * هل الاسلاميين هم الساعدوا فى دة ؟
* * تاريخيا الاسلاميين روجوا للفكرةدى ودورهم كان اكبر وهم لفترات طويلة جدا كانوا ضد الفنون لكن لاحقا الفكرة دى هاجرت واتوطنت فى قوى وجهات تانية لدرجة وصل الامر انهم يقولوا الاسلاميين ما ممكن يطلع منهم مبدع و الفكرة دى لغاية الآن سائدة
* *......................؟
* * بدوا الاسلاميين يفكوا الطوق دة وبدت تتسع دائرة انو تكون عندهم علاقة بالفنون ودى قديمة بالمناسبة
* * منو رواد الدعوة دى ؟
* * د. امين حسن عمر ومجموعة معه.. الحركة الاسلامية عملت حاجة اسمها الواقعية الاسلامية بدت فى السجن ايام مايو واتعملت فيها دراسة لموضوعنا دة وانا شفت الدراسة دى وبقى فى اتجاه لبلورة الفكرة لغاية ما ظهر كتاب د. الترابى ..(قيم الدين رسالية الفن ) وظهرت مجموعات فنية محسوبة للاسلاميين زى نمارق واسراء فى المعهد وابتدأ الاحتفاء بشعراء زى خالد فتح الرحمن وغيره
* * الآن الصورة وضحت ؟
* * بالنسبة للاسلاميين والفنون ؟
* * ايوة؟
* * والله يا خليفة انا شايف لغاية الآن انو فيه اشكالية
* * خسرت شنو من دخولك معهد الموسيقى والمسرح ؟
* * ( صمت طويلا يفكر ) يعنى لازم اكون خسرت ؟
* * لا انا بسأل بس
* * ( يصمت فأقاطعه بسؤال )
* * هل حصل ليك تحول فى حياتك بعد دخولك المعهد ؟
* * دقيقة اجاوبك على سؤال الخسار ة اولا
* * جدا
* * من الحاجات الممكن اكون فقدتها وانا ما عارف هل هى خسارة ام لا هى العمل السياسى المنظم
* * وانت كنت سياسى للدرجة دى ؟
* * ايوة دة مجالى انا دخلت الحركة الاسلامية من المتوسطة وكنت يافع جدا و لغاية ما طلعت منها وانا كنت بشتغل بشكل تصاعدى
* * انت طلعت منها سنة 1983 يعنى وانت فى تالتة معهد الموسيقى والمسرح ؟
* *ايوة
* * ليه طلعت منها ؟
* * ( يصمت) والله آآآآآآ فى اجابتين الاولى وهى الظاهرة ولاحقا اكتشفت انها ما صاح
* * اللى هى شنو ؟
* * شوف انا واحدة من اهم مكاسبى من معهد الموسيقى والمسرح هو تنامى الحس الاجتماعى عندى حول قضايا الحرية والعدالة الاجتماعية وفضايا الفقراء والمسحوقين
* * ودى كاسلامى ما كانت عندك ؟
* * لا بالتحديد كدة ما كانت عندى ..هناك كانت عندى فكرة كلية لاقامة المجتمع الاسلامى لكن ما كنت قادر اميز انو الظلم دة عندو مؤسسات ومثلا الاقتصاد كمسألة مؤثرة فى القيم والاخلاق ما كانت اساسية عندى كان الاساس عندى انو فى زول بقدر يغير حياتو اذا عايز ...
* * انحنا مفروض نكون بنتكلم عن اسباب تركك للحركة الاسلامية ؟
* * ايوة ودة ممكن يكون السبب الاول الظاهرى اللى هو تنامى الحس الاجتماعى مع اعلان فوانين سبتمبر وبالمناسبة دة سبب اكتشفت لاحقا انو ما صحيح
* * السبب التانى والصحيح شنو ؟
* * التانى بتعلق بانفتاحى على عوالم اخرى تبعه انهيار روح التدين جواى ودة ما كان ظاهر انا كنت بقول انى خليتها لاستنادى على افكار سيد قطب وانو النظام دة نظام ما اسلامى ؟ انا بتكلم عن فترة قوانين سبتمبر واتبعت يسار الحركة الاسلامية وقت جيت لتقييم الحكاية دى لقيت انو دة ما السبب الحقيقى دى كانت حيلة والسبب الحقيقى هو انو البناء النفسى والفكرى بتاعى انا حدث فيها بتر يعنى باللغة العادية ممكن تسميها قدر من الهزات لكن باللغة الفكرية ممكن تسميها قدر من التفتح لاسئلة كبيرة حتى وان كان ضحيته الطريقة دى من التدين
* * معظم الرحلات الزى دى بتحدث من اليسار لليمين وانت كنت مختلف ؟
* * انا ما مشيت يسار انا ظليت فى يسار اليمين وفى جماعات وفرادى بمشوا الرحلات دى فى اليمين
* * ظليت كتيرفى يسار اليمين ؟
* * نعم ولفترة طويلة وكنت بمشى بناقش فى جامعة الخرطوم بعض الاسلاميين وانا ملتزم بأفكار سيد قطب ودة كان تراجع للخلف لأنو الاتجاه الاسلامى بقيادة د. الترابى وانا كنت عضو فيه اتجاوزت افكار سيد قطب وحسن البنا وانا بتصرفى داك رجعت
* * مشيت وين بعده ؟
* * شوف يا خليفة عشان ما تجنونى مشيت وين مشيت وين انا لغاية هسة ما مشيت اى حتة
* * طيب انت وين؟
* * ( يفكر)
* * مشيت الجبهة الديمقراطية ؟
* * لالالالا ما ممكن .. انا مؤمن الآن بالرؤية الاسلامية الكلية
* * ما انتميت لاى كيان سياسي ؟
* * ما حصل لكن اكتر حتة لقيتها واتعلمت منها كتير ولأنها فى الوقت داك ما مبلورة كتنظيم هى الحتة بتاعة ( الجيفاريين )
* * شنو هم ؟
* * دى حركة يسارية كانت فى السودان هنا منهم بشار الكتبى و دى المنظومة الاتعاملت واتلمزت على يد ناس فيها واضافوا لى اشياء كتيرة جدا و اميزحاجاتهم كانت العمل الثورى والمسلح
* * ودى كانت بتتناسب معاك؟
* * لحد ما ارتحت فيه كتير ... مثلا انا كان عندى موقف من الحزب الشيوعى لقيت الجيفاريين عندهم برضو موقف منه ..جمال عبدالناصر ما كنت مقتنع بيهو لقيت برضو الجيفاريين عندهم ملاحظات عليه والاتحاد السوفيتى ما بقتنع بيهو ونفس الشئ عند الجيفاريين غير كدة الجانب الثورى الرومانتكى الرومانسى كبير جدا بالنسبة لى.. اضيف ليها التعامل الشخصى وهنا هم شكلوا لى ملاذ وانا طالع من ازمات كتيرة وقتها
* * قعدت هنا كتير ؟
* * لا لأنو ما زال سؤال المشروع الاسلامى جواى قائم
* * بعدهم مشيت وين ؟
* * انا ياخى ما مشيت حتة
* * يا السر انت قبيل قلت انك ما مشيت بل كنت فى يسار الحركة الاسلامية لقيناك وصلت الجيفاريين وبرضو هسة قلت ما واصلت معاهم معناها شنو ؟
* * انا ما اتنظمت .. انا داير اثبت ليك حاجة انو انا بعد الحركة الاسلامية ما انضميت لأى اتجاه سياسى .. ممكن اكون التقيت باتجاهات ولقحت افكار وكدة
* * ودة البتكلم معاك فيهو ؟
* * جدا
* * طيب ياتو افكار تانى لفتتك؟
* * التشيع
* * كدة دخلنتنا للشيعة ودة كان سؤال مؤجل
* *شوف يا سيد انا وصلت لنتيجة غريبة جدا وهى انو اى شخص سياسى بكون حامل جينات كل الافكار السياسية التانية حتى البعارضها لكن بكون بطأها بأقدامه ماعدا ما هو ملتزم به
* * يعنى ؟
* * يعنى الزول الفى الحركة الاسلامية في درجة من الدرجات فيه شئ من الحزب الشيوعى والشيوعى فيه شئ من الجيفاريين وفيه شئ من الحركة الاسلامية والسنى فيه شئ من الشيعة والعكس صحيح وكدة ..
* * انت دة كان كله معاك ؟
* * ايوة وكنت بطأهو وبديت اطلعه تانى
* * وكان جواك شيعى ؟
* * كان جواى تشيع .. وما براى لو رجعت تاريخيا لفترة الثمانينات فى الحركة الاسلامية وبعد انتصار الثورة الايرانية بتجد فيها جزء من تخريمات تشيع وكانوا بصدروها الاسلاميين نفسهم زى ترجمات لعلى شريعتى الدفاع عن الثورة الايرانية وقراءات لمحمد باقر الصدر ودة بعد ما تركت الحركة الاسلامية نهض بالنسبة لى وبالمناسبة دة كله بتلاقى
* * ما حاسى بتوهان وتناقض؟
* * بالعكس زى ما قلت ليك دة كله بتلاقى .. مثلا الجيفاريين بلقى فيها الجانب الثورى الكبير والحزب الشيوعى فى مسائل ليها علاقة بالعدالة الاجتماعية اما الحركة الاسلامية فيها مسألة التنظيم وادارة العمل وادارة المعلومة واما التشيع فهو فى جانب الاسلام بحل مسألة مشكلة العدالة الاجتماعية ومشكلة الثورة
* * هل دة بحث عن جهة تنتمى لها لانك اتبنيت واتربيت جوة جهة بالتالى لا تستطيع ان تكون وحدك ؟
* * على المستوى الشخصى انا تفتحى الحقيقى تم داخل تنظيم وتنظيم معقد ليس حسب ما يعتقد الآخرين ..وهو تنظيم فاعل وعنده القدرة انو يغيرك فى مجمل معطياتك ويحدد ليك مساراتك فى حركتك وفى طريقة تفكيرك ولو فقدت المسألة دى وطالما انت ناشط بيكون عندك الحنين دة اثناء تحركاتك اللى هى ظاهريا فكرية فأنك بشكل غير مباشر بتبحث عن تنظيم ودة ثمن باهظ فى المعاناة .. ثانيا الآخرين هم آلفوك فى تنظيم ما بتخيلوك الا جوة تنظيم
* * وما دام انت الآن حسب ما تقول انك بلا حزب هل يعنى دة انك ما لقيت اقوى من الحركة الاسلامية ؟
* * طبعا .. انا احتكيت بمعظم كوادر الاحزاب دى وهنا للسبب دة فى ناس بتهمونى انى بنتمى لمؤسسات امنية .. المهم الاحتكاك دة خلانى متأكد انو كوادر الحركة الاسلامية اقوى كتير جدا مقارنة بالكوادر التانية واللى ممكن اقول ليك عنها انها هشة
* * حتى التحولات الحصلت للحركة الاسلامية كانت اضعف من الحركة الاسلامية زمان ؟
* * افتكر نعم .. من نواحى احلام الحركة الاسلامية والمشروع المفترض تقوم بيهو الآن اضعف واقل كتير من المطلوب لكن على مستوى التنظيم وادارة المعلومة والقدرة على مجابهة القوى الاخرى ما تزال الحركة الاسلامية هى الاقوى وهى القادرة
* * كان للحركة الاسلامية دور كبير فى انك تتخرج ناقد فى معهد الموسيقى والمسرح لكن معظم سهام نقدك اتجهت الى صدر الحركة زاتها ؟
* * لالا ما ضد الحركة الاسلامية .. انا فى مقالاتى ديك بتكلم عن مشروع ثقافى بتاع الحكومة والأنا بعتقد انو فيه مشاكل كتيرة جدا
* * انت فى مقالاتك ملخصها بتقول فيهو انو كل انجاز الانقاذ الثقافى صفر
* * انا ما بقولها كدة طبعا انا فى التقييم العام لحكومة ليها 17 سنة وعندها مشروع حضارى وللاحياء الثقافى وقت تجى للمحصلة وبالقوة دى والسنين دى كلها ممكن يكون صفر لكن دة كله محسوب على الانقاذ كحكومة
* * كنت واحد من قادة حركة الانقاذ الثقافية
* * ( يقاطعنى ) كدة ما بجى الكلام دة يا خليفة لانو بالطريقة دى ممكن نمسك اى مهندس فى مؤسسة نقول ليهو انت قائد فى الانقاذ طالما هو موظف
* * يا سيدى المهندس والموظف يفرقوا عن مدير ادارة وانت كنت مدير ادارة الدراما بالتلفزيون
* * ايوة انا كموظف انا كنت واحد من قادة اداريين فى التلفزيون ضمن حكومة الانقاذ
* * طيب ادارتك انجزت ؟
* * ايوة وانجاز كبير
* * ليه ماحسبته للانقاذ طالما انت كنت بتتكلم عن رصد واقعى ؟
* * انا قلت ليك كلامى داك كان مقارنة بأشياء كتيرة جدا لكن لو جينا للطريقة دى ممكن اقول ليك انو كبرى الفتيحاب دة يحسب للانقاذ
* * اذن ليس انجاز الانقاذ صفر اذا اعتمدنا فقط انجازات ادارة الدراما وقت كنت انت مديرها ؟
* * شوف يا خليفة وقت قلت صفر ما معناها صفر لانو الانقاذ دى مثلا عملت مليون مسرحية مش كدة ؟ انا بتكلم عن مقارنة بالمتوقع
* * ليه كتاباتك بقت فقط رصد للسالب فى الانقاذ ؟
* * كيف يعنى ؟
* * يعنى هسة انت قلت فى انجاز ودة ما جبت سيرتو فى كتاباتك كأنك قاصد تشير للسالب بس
* * دى مربوطة بالظرف انا ما كنت فى اطار تقييم انا كنت بتكلم عن موضوعات بعينها وممكن نقول ليك لو اتكلمنا عن السلبيات هذا لا يعنى انو مافى ايجابيات بالعكس فى ايجابيات كتيرة فى المسرح والنشر وغيرها ...
* * الانقاذ فى الورق عندها مشروع ثقافى ؟
* * اقترحت مشروع الاحياء الثقافى ووضعت فيه نقاط كتيرة جدا لو كان اتنفذ كان ممكن يكون عندها مشروع ثقافى كبير
* * المشكلة شنو فى انو ما اتنفذ ؟ هل الكوادر ؟
* * المشكلة فى غياب الحرية لانو ما ممكن تنفذ مشروع ثقافى براك ودة اول خطا استراتيجى ارتكبته الانقاذ الجانب التانى انها اعتمدت على كوادرها بس وديل معظمهم ما عندهم باع فى العمل الثقافى انا ما بقول كلهم لانو فيهم الجيدين جدا
* * وردى فى حوار قديم ليهو قال اليمين لا يبدع ..
* * دة كلام ما صاح .. ياخى كبار الروائيين فى العالم من اليمين .. بعدين ياخى دى فكرة خطيرة حكاية اننا نتهم حركة سياسية كاملة انها ما قدمت مبدعين دى حاجة خطيرة وما صحيحة
* * يعنى انت تختلف مع من يقول انو الانقاذ ما قدمت مبدع ؟
* * ياخى دى داير بحث الحكاية دى كلها لكن لو جينا وشفنا اسحق احمد فضل الله فهو قاص اسلامى وممكن نقول انقاذى ويشار اليه بالبنان ضمن المبدعين السودانيين وعندك مثلا د. احمد عبدالعال فى التنظير والادب والتشكيل وبرضو تجد كمثال فقط خالد فتح الرحمن وروضة الحاج وعلى كدة ممكن نذكر امثلة فى كل المجالات .. لكن لو جينا ندرس المشاريع الثقافية التانية زى مايو مثلا عندو نفس المشاكل دى واكتر اما مشروع الاحزاب الثقافى حتلقى انو مشروع الانقاذ احسن منه بمراحل لكن دة كله لو جيت تدرسو كوضعية الثقافة للسياسة فهنا ما بتيقى الانقاذ او مايو بتبقى القضية اشمل بتبقى طبيعة الدولة وعلاقتها بالثقافة وطبيعة المثقف فى علاقته بالدولة وبالسلطة يعنى المسؤلية بعد داك ما بتتحملها السلطة بس بل ممكن يتحملها مثقف
* * مؤمن بالسودان الجديد ؟
* * ايوة طبعا بس من خلال وجهة نظرى انا سودان يقوم على العدالة والحرية وعلى المساواة
* * بتتفق مع الحركة الشعبية ؟
* * لا ابدا .. انا ممكن اتفق مع افكار كتيرة قالها د. جون قرنق
* * مش غريبة زول يتفق مع قائد ومفكر ومنظر للحركة الشعبية ولا يتفق مع الحركة الشعبية ؟
* * د. جون قرنق انا بعتبرو مفكر استثنائى قبل ان يكون سياسى او عسكرى وواحدة من ابداعاته انه قدم مقترح لسودان اكبر من قدرات الحركة السياسية اذا كانت الحكومة او الحركة الشعبية زاتها...
* وبالفعل لازم يكون فى سودان جديد ودى مسألة ضرورية لكل سودانى وهذا لا يعنى ايمانى بالحركة الشعبية
* * عندى معلومات بتقول انهم غازلوك لتنضم اليهم
* * لا لا شوف انا داير اختها ليك واضحة الناس نتفتش للساهل ما للمعقد انا بعيش حياتى دى بسهولة وبتعقيد فى نفس الوقت يعنى الناس ما برتاحو الا اذا عرفوا الزول دة هو شنو ؟ انا ما غازلت حزب سياسى بعد الحركة الاسلامية ومافى حزب غازلنى وما قاعد اتعامل مع الاحزاب السياسية انا كل الفضاءات بالنسبة لى مفتوحة كل الافكار مفتوحة وبتصرف بما يمليه على ضميرى وقدراتى
* * وانت مرتاح كدة؟
* * مرتاح جدا جدا
* * قبيل قريت فى موقع على الانترنت واحد بتهمك انك انقاذى امنجى وواحد انقاذى قال لى السر دة شيوعى فى الحركة الشعبية .. هل انت مستثمر لهذه الجهجهة ؟
* * ( يضحك) بس فى ملاحظة انو دة كلو ما بتقولوا مؤسسات رسمية لا جهاز الامن لا الحزب الشيوعى لا المؤتمر الوطنى .. دة بتقال فى اطار ونسات ومعظم البتكلموا عنى ديل ما بعرفونى .. واقول ليك حاجة كونو الزول يبقى موضوع للونسات دة يؤكد ليك خمالات الحركة السياسية والثقافية ويوضح ليك جزء من امراضها
* * هل ما زالت فى صالون الضيوف بتاعكم معلق صورة جيفارا والخمينى ؟
* * انت ما جيتنا قريب لانى اضفت ليها صورة حسن نصر الله و شايل ميدالية مفاتيح فيها صورة د. جون قرنق انا مع الثوار
* * ما ممكن تعلق صورة بن لادن ؟
* * لا
* * ممكن تعلق صورة الترابى ؟
* * حقو تغير السؤال دة يا خليفة ياخى
* * طالما سألتك ببقى لازم يتجاوب وبنقبل اى اجابة حتى رفض الاجابة
* * طيب دقيقة ( ويفكر لفترة طويلة اغلقت خلالها جهاز التسجيل واشعل هو سيجارة ) انا ما بعلق سياسيين محترفين
* * حسن نصر الله سياسى محترف جدا
* * ياخى شوف انا حتى الآن لم اعلّق صورة الترابى ولكن قد أعلقها
* * فى النهاية ولو منحت فرصة لاعادة مشوارك من 1980 هل ستدخل معهد الموسيقى والمسرح تانى وتعيد نفس المشوار ؟
* * ايوة طبعا لأنو هو محطة كبيرة واساسية فى حياتى
* * وبعد داير تقول للناس انت منو انت ؟
* * انا مواطن سودانى بعمل الحاجة المقتنع بيها وعشان أريح ناس كتار قناعتى الكبيرة انى مؤمن انو البديل للتغيير الاجتماعى هو الاسلام فقط ...
| |
|
|
|
|
|
|
|
|
Re: السر السيد ومحاولة تمثيل دور الكوز الشريف (Re: osama elkhawad)
|
| Quote: * * انا مواطن سودانى بعمل الحاجة المقتنع بيها وعشان أريح ناس كتار قناعتى الكبيرة انى مؤمن انو البديل للتغيير الاجتماعى هو الاسلام فقط ... |
السر السيد
ماخليت فرض ناقص للدواعش وجز الرقاب وكل اللابسن
رحط الاسلمجية الاتناهزية
على فكرة حميدتى بكبر في كومو يحتاجك الان اكثر
يالسر السيد
| |
|
|
|
|
|
|
|
|
|
Re: السر السيد ومحاولة تمثيل دور الكوز الشريف (Re: بدر الدين الأمير)
|
Quote: دينق
موضوعى هنا ليس شخصى مع طارق ابوعبيدة
خدر عضو المنبر
طارق فنان ومغنى جيد وقد يكون طور قدراته
وملكاته الابداعية فى مجال المنتاج ....
بس السر السيد الكوز وبلا استحياء جاى يشرف على
برنامج عن بيوت الاشباح الاسسها التنظيم الذى ينتمى له
فعلا الاختشو ماتو |
بدر الدين.
وهل أنت موضوعك هنا "شخصي" مع السر السيد؟
السر السيد يعمل في نفس اللجنة التي يعمل بها طارق ابوعبيدة، فشنو أنت البخليك تنتقد واحد وتترك الاخر؟
في البوست الاصلي والذي فتحه الاخ خضر الطيب أنا أنتقدت جميع المرفين على برنامج بيوت الاشباح، ولكنك أنت مخصص نقدك هنا فقط للسر السيد!
فمن هو الذي لديه خلاف شخصي؟
بعدين أنت كتبت: "وقد يكون طور قدراته
وملكاته الابداعية فى مجال المنتاج ...."
شنو البخليك تعطي طارق ابوعبيدة (the benefit of the doubt) وتعطيه وتتعامل معه بحسن النية، والسر السيد الذي يشهد له بعض الناس بأنه ترك الكوزنة؟
دي معايير مختلة جدا.
| |
|
|
|
|
|
|
|
|
|
Re: السر السيد ومحاولة تمثيل دور الكوز الشريف (Re: Deng)
|
دينق
الفرق كبير بين رأى فى السر السيد
ورأيك في طارق ابوعبيدة عضو المنبر
بسم خدر
السر السيد كوز منظم لادسيها ولاخجلان منها
طارق ابوعبيدة ناضل ضد الكوزنة ومشروعها
المدمر للانسان والانساية وبيوت اشباحها خير دليل
لعدم انسانيتهم كيف التم طارق مع السر قد يكون
بزنس بس ماممكن السر السيد يشرف على برنامج
يوثق لبيوت الاشباح الذى اسسها التنظيم اللذى ينتمى له
بدون ان يعتذر
| |
|
|
|
|
|
|
|
|
|
Re: السر السيد ومحاولة تمثيل دور الكوز الشريف (Re: بدر الدين الأمير)
|
السر السيد:
ةQuote:
* ياخى دى داير بحث الحكاية دى كلها لكن لو جينا وشفنا اسحق احمد فضل الله فهو قاص اسلامى وممكن نقول انقاذى ويشار اليه بالبنان ضمن المبدعين السودانيين |
,,,,,,,, ةQuote:
اما مشروع الاحزاب الثقافى حتلقى انو مشروع الانقاذ احسن منه بمراحل |
...........
دخل معهد الموسيقي بكنسلتو ولجنة مستشاريين
ةQuote: فى الحركة الاسلامية السياسة ما بتنفصل عن الدين وانا كا ن عندى كونصلتو خارجى بشاورهم دايما
* * د. امين حسن عمر ؟
* * ايوة والمحبوب عبدالسلام والكرنك ىوحسين خوجلى .. وانا وضعى فى التنظيم ما زيهم ديل خبرة بالاضافة لاتجاههم فى التفكير كان مغاير وبالفهم دة اترتبت حاجات كتيرة |
| |
|
|
|
|
|
|
|
|
|
Re: السر السيد ومحاولة تمثيل دور الكوز الشريف (Re: كمال عباس)
|
Quote: ماخليت فرض ناقص للدواعش وجز الرقاب وكل اللابسن
رحط الاسلمجية الاتناهزية
|
اها يا ود الامير . قامت انتفاضة مارس ابريل وكان السر السيد معانا
(صديق الانصاري , منتصر عبدالماجد, ابوجودة قادم, وجون كلمنت , ونادر السماني , لنا جعفر وعييييييييييييك ملايين من مختلف مكونات التحالف في جامعة القاهرة فرع الخرطوم
لما قامت الديمقراطية نشط السر السيد في اتحاد الكتاب السودانيين (ما الادباء السودانين) ,,,,, وكانت جلستنا المفضلة في اتحاد الكتاب في الامسيات ,,,,
في تلك السنوات الحلوات جاء زائر الشاعر العراقي مظفر النواب ,, والسر السيد ومعه بعض الاحبة دعوه في جلسة خاصة في جامعة القاهرة فرع الخرطزم
اها في الفترة دي ذات كنا اسسنا الملتقي الثقافي ,, واول نشاط اليه استضاف برهان غليون ,, وقدمه السر السيد في ترابة حوش جامعة القاهرة الفرع ,,
وبعد كان في زيارة ادونيس ,,, واجرى معاه لقاء في التلفزيون كان باهت , فلم تبث الحلقة , فتمت الاستعانة بالسر السيد وقدم ادونيس في حلقة علق عليها ادونيس
بانه افضل حوار اجرى معه في التلفاز (الحلقة موجودة في التلفزيون وطلبتها من السر اكثر من مرة ولكنه كسول او زاهاد في توثيق اسهاماته) ,,,
في الفترة دي دخل السر السيد حوش الاذاعة والتلفزيون واصبح موظف حكومي ,,,
| |
|
|
|
|
|
|
|
|
|
Re: السر السيد ومحاولة تمثيل دور الكوز الشريف (Re: عمار عبدالله عبدالرحمن)
|
ياعمار ياالاسم البخاف منه
السر السيد بعرفو من طقطق
للسلام عليكم من خلال معارفه
وأصدقائه ومايحكى عنه عن ظروفه
وطارفته ناس على ابكر ناس سلمى الشيخ
ناس محمد السنى دفع الله وبعرف حتى يوم
قضى سهرة مع الخاتم عدلان ودهشته وحبه الخاتم
لكن السر السيد اخو مسلم اي كوز وماناكرها مالم تنكرها
انت عليه وحدى يومنا هذا لم يعتذر عنها وعمل مع سيء
السيرة والسريرة الخال الرئاسى الطيب مصطفى والسر لا اسف
ولامحرج عنده
وكمان جاى يشرف على برنامج عن بيوت الاشباح
فعلا الاختشو ماتو
| |
|
|
|
|
|
|
| |
بدر الدين الأمير
عمار عبدالله عبدالرحمن
mohmmed said ahmed
Deng
osama elkhawad
كمال عباس
فيس بوك
تويتر
انستقرام
يوتيوب
بنتيريست