|
|
 Re: ديل من زمن طه القرشى (Re: عبدالحفيظ ابوسن)
|
بتذكر الموضوع دة تم إثارته من قبل كوز جامعي مثقف ونحن في الثانوي وكيف إنه الكفار لوثوا معتقدات أطفال المسلمين عن طريق بث الرسائل من خلال الأسماء طه القرشي مريض ومحمود الكذاب ومريم الشجاعة واندرو والأسد
كان راسنا ضارب شديد ونحن بنسأله كيف إنه زول اسمه محمود يمثل النبي؟ في كم مليون محمود في الوطن العربي؟ يعني لو صحيفة نشرت عنوان (القبض على تاجر المخدرات محمود أحمد) ديل يبقوا أساءوا للنبي! وكيف إنه الرسائل الما فهمناها ونحن كبار دي يفهموها الشفع الصغار؟
هاني الكافر كان فايتنا بسنين ضوئية في القرايات والفهم بسبب أخوهو الشيوعي سأله سؤال كان غريب شديد على مستوانا في الوقت داك قال ليه: كيف يكون الإصابة بمرض الإسهال إساءة للشخص؟ موش المرض دة ابتلاء!
الكوز كان مقتنع بإنه لا يجوز إلصاق أمراض زي الإسهال بالأنبياء! وقال لينا انتو (شلة العباس) ما بتحترموا الأنبياء
و (شلة العباس) كانت تعريض وتنميط لينا كمدافعين عن هاني لما تم تكفيره في الفصل من قبل استاذ الاسلامية بسبب سؤاله عن سبب طلب النبي فك قيد عمه العباس دوناً عن باقي الأسرى! وهل يعتبر ذلك تمييزاً بسبب القرابة؟
أيضاً مما أثاره الكوز المثقف أغنية عقد الجلاد قصة الولد اليتيم نفس صوت الاسطوانة وإنه مقصود بيها النبي وبرضو قلنا ليه نفس الكلام نحن بنسمع فيها سنين وأصلو ما جاء في بالنا كلامه دة وكالعادة هاني الكافر قال ليه طيب مادام في زول معترض على تكرار نفس القصص عن النبي بنفس الطريقة ليه ما يتم حكايتها بطريقة حديثة؟ يعني بدل تحكيها لي بطريقة سيرة ابن هشام الما بقدر اقرأ منها صفحة أحكيها لينا بأسلوب ماركيز وانا بأكد ليك كل الشلة الموجودة قدامك دي حتستمتع لأنهم لما يمسكوا رواية لي ماركيز ما بفكوها إلا في آخر صفحة .. وفعلاً كنا الوقت داك مكتشفين جدد لماركيز ومجانين بيه لدرجة بنقعد جيعانين نلم قروش الفطور عشان نمشي نشتري بيها رواية لي ماركيز من قدام حديقة وقيع الله
طبعاً الكوز شاف إنه دة دليل على نجاح الاستهداف الغربي لي ديننا كوننا نشوف ماركيز حكاي أكتر من ابن هشام
أي نعم منطقناه في أغلب النقاط لكن النصيحة أدانا الضربة القاضية في النهاية لما قال لينا انتو بتقولوا لي أنا متابع كلام شيوخ الحركةة الاسلامية وما عندي رأي براي لكن انتو آراءكم كلها طبق الأصل لآراء هاني واللي ما جابها من راسه وإنما هي آراء أخوهو .. لما تجيبوا فكرة حقتكم براكم تعالوا طالبوني بالتفكير من راسي
اليوم داك وصلت لي إنه تفكير الطلاب بسيط ولا ينظر لما وراء السطور ولا يبحث عن المؤامرة بين السطور .. بس انتو خليكم طبيعيين وهم ما بتجيهم عوجة
|
|
 
|
|
|
|
|
| العنوان |
الكاتب |
Date |
| ديل من زمن طه القرشى | عبدالحفيظ ابوسن | 01-05-21, 08:14 AM |
| Re: ديل من زمن طه القرشى | عبدالحفيظ ابوسن | 01-05-21, 08:20 AM |
| Re: ديل من زمن طه القرشى | عبيد الطيب | 01-05-21, 08:33 AM |
| Re: ديل من زمن طه القرشى | عبدالحفيظ ابوسن | 01-05-21, 10:06 AM |
| Re: ديل من زمن طه القرشى | عبدالحفيظ ابوسن | 01-05-21, 10:11 AM |
| Re: ديل من زمن طه القرشى | أحمد محمد عمر | 01-05-21, 10:35 AM |
| Re: ديل من زمن طه القرشى | عبدالحفيظ ابوسن | 01-05-21, 12:14 PM |
| Re: ديل من زمن طه القرشى | أحمد محمد عمر | 01-05-21, 12:35 PM |
| Re: ديل من زمن طه القرشى | أحمد محمد عمر | 01-05-21, 12:47 PM |
 Re: ديل من زمن طه القرشى | عزالدين عباس الفحل | 01-05-21, 02:03 PM |
| Re: ديل من زمن طه القرشى | Ahmed Yassin | 01-05-21, 02:24 PM |
| Re: ديل من زمن طه القرشى | Mahjob Abdalla | 01-05-21, 02:10 PM |
| Re: ديل من زمن طه القرشى | Asim Ali | 01-05-21, 02:34 PM |
| Re: ديل من زمن طه القرشى | عبدالحفيظ ابوسن | 01-05-21, 03:36 PM |
| Re: ديل من زمن طه القرشى | عبدالحفيظ ابوسن | 01-05-21, 03:41 PM |
| Re: ديل من زمن طه القرشى | عبدالحفيظ ابوسن | 01-05-21, 03:43 PM |
| Re: ديل من زمن طه القرشى | عبدالحفيظ ابوسن | 01-06-21, 04:01 AM |
| Re: ديل من زمن طه القرشى | محمد محمد قاضي | 01-06-21, 07:00 AM |
|
| |
فيس بوك
تويتر
انستقرام
يوتيوب
بنتيريست