بوباااااااار جيط 00 جيط 00 جيط والله مرات بسأل نفسي كثيرا وبتــتــشابك كل علامات الاستفهام في عقلي واقول ياربي 00 معقول المراة السودانية دي بقت تشرب بنقو ؟؟؟ لدينا اسرة صديقة ومقربة جدا للعائلة دعونا لزواج ابنهم ومن منطلق العادات السودانية والتكافل الجميل قالت لي المدام لابد ان نقدم مساعدة لأم العريس لأن ظروفهم صعبة جدا ولم تقف المدام عند ذلك بل نفختني بعبارات من شاكلة ابوهشام وسيد الحارة ورجل المواقف الصعبة !!! حينها شعرت وكأنني فراشة تريد أن تعانق كل أزهار العالم ياخي مرات الرجل السوداني دا بتمر بيه حالات من العوارة المشاترة وبتقوم خلاياهو بتفرز كميات كبيرة جداً من انزيم الهبالة !!!! قوووووم يا { ماااااسورة } طلع ليك خمسة مليون خمسينات الواحدة شدة ما جديدة وسنينة ممكن تضبح خروف الضحية وبعد أن أكلنا الضلع وشربنا الشاي تم التجهيز لحفلة مصغرة بعد المغرب ودخلت القونا تلاليش وشلاليف ماشاء الله عيني باردة اشبه بمطبات المسعودية وجضوم تقول بتمسحهن بي خميرة وانفقع الصوت مع الساوند 00 بس تقول حمار يادوب دخل الدلالة هذا كله كوووم ونشوف ليك ام العريس كووووم تاني دخلت ترقص وجيطك جيطك جيطك ترمي في الخمسينات في القونا قروشي ذاااتاااا !!!!!! ياخي انا ضغطي بقى 341 والسكري 689 !!!! القونا دي بدون جيطك وخمسينات انا عندي معاها حساسية يعني مما اشوفها بتجيني كارووووشة وكوفيد 19 والله ح اسألكم وانا جادي جداً عليكم الله هسي الواحد يعضي القونا دي ؟؟؟ وللا يعضي أم العريس ؟؟؟؟ وللا الواحد يعضي ليهو كلب سعران ؟؟؟؟؟ مبالغة نحن ياااااخ قال سيد الحارة قال !!!!!!!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابوحراز
فيس بوك
تويتر
انستقرام
يوتيوب
بنتيريست