عاطف عمر بالفيس

Quote: اخوه في الانسانية بكري بقول الحقيقة ولو على نفسه لذلك فهو في حالة ايقاف دائم

Quote: وهنا البوست يتفتح باسمك فيتم حذفه او حذف جميع مداخلاتك!!

يا عاطف حذف البوستات أو مداخلات الفيسبوك دة شأن بكروي خالص مافي زول عندو فيه تحكم .. ولأنه بكري لا يعتمد النقاش والإقناع في تصرفاته على لوحة التحكم فما عندك حل غير take it or leave it داير مداخلاتك تكون قاعدة نط فوق as simple as that

Quote: يعني (مسلن) أخوكم سيف الدين دا قال شنو ما اتقال فوق عشان يمش منفى التأديب؟

مرة ود خالتي مشى يخطب ليه بنت .. أخد منها ميعاد عشان يطرح ليها وبعديها طوالي يمشي يقابل أهلها
لما جاء من الميعاد سألته أها الحصل شنو؟ قال لي المسكينة خسرت ليها راجل :)
ببساطة كان بيرثى لي حالها كونها فوتت الفرصة اللي جاتها من السماء بكونه متقدم ليها .. بدون أي شعور بالزعل لأنه شايف السعادة دي مكتوبة لي زول غيرها
أنا غايتو عجبتني ثقته في نفسه :)

كنت عضو نشط شديد في قروب اسمه احترس أمامك كشة .. وبي سبب مداخلة واحدة قالوا لي امسحها براك وأبيت امسحها لقيت نفسي محظور من القروب .. ولا حتى في البحث على فيسبوك ما بظهر لي
انقر عملت شنو؟
ولا حاجة :)
قبل كم يوم بفتش في قروب جيل السبعينات والثمانينات اتفاجأت بي إني محظور .. واللذيذة ما عارف ذاتو اتحظرت متين ولشنو؟ أصلاً مشاركاتي فيه قليلة شديد
يلا محظور محظور القروبات اكتر من الهم في القلب :)

أي فضاء حوار في الانترنت معمول بواسطة شخص واحد متحكم .. سواء كان دافع قروش أو منشئ الفضاء دة في موقع مجاني
عضويتك فيه بتخليك كاتب مشارك وليس إداري شريك .. الإدارة عند منشئ الفضاء دة
لما تختلف معاهو أو إن شاء الله مزاج ساااااي كدة يشيلك كل العليك تمشي فضاء تاني أو تعمل فضاءاتك الخاصة وبس .. دي ما شركات قطاع عام ولا كتاباتك أسهم بتخلي عندك رأي في قرارات الإدارة .. سبب واحد يخليك تسعى ليك حائط مبكى وتقعد تنوح لماذا حظروني ولماذا خلو داك يكتب مافي .. شالوك اتطلب الله وشوف محل بقيّموا كتاباتك .. وإذا كنت واثق من جودة كتاباتك خليك واثق في نفسك زي ود خالتي وقول المنبر خسر ليه كاتب