اول شي طبعا لا هو اسمو سيد ولا أبوه اسمو خليفة !!!!!
اسمه علي و أبوه اسمه محمد الأمين
على محمد الأمين
وسيد خليفة برضو ما اسم فني زى ما يحصل كتير فى تغيير وتحوير أسماء الفنانين
في زول هسه عارف انه المبدع الفنان الطروب خوجلي عثمان انه اسمه الحقيقي هو
البلولة عثمان خوجلي ؟
السبب فى اسم سيد خليفة هو أنه والده كان شيخ الختمية فى الدبيبة وعموم شرق النيل واسمه الخليفة محمد الأمين ، وسمى ولده على تيمنا بالسيد على الميرغني شيخ الختمية ، وسارت عليه تسمية السيد علي وبقت لاحقا واقتصر على سيد بس خصوصا بعد دخوله مجال الغناء فى الدبيبة وهو صغير كان الاسم الشائع هو السيد ود الخليفة وبعدها بقت سيد خليفة
سافر سيد خليفة لمصر أو بالأحرى ارسل لمصر عشان يلتحق بالأزهر زى معظم أبناء زعماء وشيوخ الختمية
ولما وصل القاهرة قال يا عمك سيبك بالله بلا أزهر بلا اصفر مالى ومال القفطان و العمة الحمرا والمحل الكلو دقون ده
ويمم شطر معهد فؤاد الأول للموسيقي
إشباعا للرغبة القديمة والمحبة المقيمة للغناء وصقلا للموهبة الدفينة العنده وهو الجاي من بين رحاب ود الرضي و أحمد محمد الشيخ جاغريو وأحمد المصطفي ومبارك حسن بركات وخلف الله حمد وغيرهم
زولنا ما كضب
وبقى طالب فى معهد الموسيقي بدل الأزهر
مالنا ومال القراية أم دق وعمم دى ههههههه
لاقي عبد الحليم حافظ و أحمد فؤاد حسن وبقو زملان وصحبان
وعلى العليهو كمان لم فيه عبد المنعم عبد الحي
هو نان كان ما كان لم فيه الزول المسلط ده كنا وين نسمع
ابني عشك يا قماري
ومن ديك وعيك
أغرب شى عند أبو السيد هو أنه عنده أجمل اغنية فى الغناء السوداني كله واكعب اغنية فى الغناء كله برضو
معقول يا ابو السيد ياخ زول يغني
دنياي انت وفرحتي ومنى الفؤاد إذا تمني انت السماء بدت لنا واستعصمت بالبعد عنا
ويغني
يا عقد اللولي اللولي يا بت يا سمحه يا هولي
تلتق ساي مش ههههه
صاح ممكن زول يقول ليك حب الناس مذاهب والتذوق بختلف من زول للتاني
كلام سليم ما اختلفنا
بس ما للدرجة دى كمان
ولا شنو
-يتبع-
07-02-2021, 12:29 PM
Ahmed Yassin
Ahmed Yassin
تاريخ التسجيل: 01-31-2013
مجموع المشاركات: 5507
ابا ذر ايها العاشق الولهان ابدأ من حيث انتهيت انت... لاسوا اغنية سودانية حسب رايك طبعا اصلا ماف اغنية سيئة. سيد خليفة غنى "وغدت تبكى على شفتيّ" في ليل وخمر وشفاه وغنا " نانا يا نانا نانا نانا يا نااااااانا" لنفس الشاعر حسين عثمان منصور واكثر فنان غنى بالفصحى ....شوف الالحان القام بتاليفها .. شىء خرافي من ذكاء سيد خليفة . انه كسر الفصيح بالعامي الخفيف والالحان السريعة الراقصة ومن حبه للتخت الشرقي ادخل العشرة بلدي في عقداللولي خليك من اي سرب .. او في جواب( واستعصمت ) و( دنياي انت ) شوف التراكيب اللحنية وفك المترادفات في( يوم غريب ) او (النهاية) لهاشم صديق المك برضو ادخل العشرة البلدي في كوبليه"واشتقت لى طيف الدموع" ومشيت طريق اسمو المصير. وبرجع يبكي في ( النهاية ) و
سيد خليفة ملك الإيقاع السريع وهو في السريع ما بهتم بالكلمات كتير يعني شوف كمية الطرب الفي أغنية جاري وانا جارو .. مافي ولا نص كلمة .. ترقص بدون ما تشعر لكن لو قريتها كلمات مكتوبة بتقول دة شنو العبط دة!
أخلى أغانيه من وجهة يوم في يوم غريب ما يميزه غزارة الإنتاج واكتفاؤه بالأعمال الخاصة .. نادراً ما يغني لزول تاني أو حقيبة أسوأ ما فيه تسجيلاته الأخيرة قبل وفاته .. ما قدر يحافظ على صوته وأصر يغني بيه بعد ما شاخ
07-02-2021, 01:39 PM
أبوذر بابكر
أبوذر بابكر
تاريخ التسجيل: 07-15-2005
مجموع المشاركات: 8610
اكيد طبعا مافي عمل فني بكون مطلق الكعوبية لازم مهما كان تلقى فيه نفحة فتية وحضور إبداعي سواء كان قليل او كتير
سيد خليفة مطرب حقيقي وموسيقار فنان وملحن عبقري
انا بس طبعا مرات بكون متطرف جدا بخصوص الكلمات والاشعار
زول يلحن ويؤدي في ربيع الحب و يغني ولى المساء و اي سرب وطرير الشباب ويغني نظرة جماع اكيد زول ما ساهل
دا غير أغنيات العامية البديعة عند أبو السيد
عليك الله يا احمد اسمع وتذوق الأداء العجيب في اغنية فتنة الانظار، اظنها من اشعار عبد المنعم عبد الحي اغنية ما عادية ابدا ولحن عجيب، خصوصا مع حضور العود، وشغله في الأغنية كلها ومن النادر توظيف العود قي غنانا السوداني بالشكل دا واكتر زول عمل الشي دا هو سيد خليفة لاحظ لحضور العود في اغنية في ربيع الحب اظن شغل العود العجيب دا كان علي أنامل العواد الفنان حقا بشير عمر، أو بشير الشباب زي ما كان بقولو ليهو
07-02-2021, 02:12 PM
الشيخ سيد أحمد
الشيخ سيد أحمد
تاريخ التسجيل: 07-14-2008
مجموع المشاركات: 2666
شكرا على (حكمة الإشراق) في زمن الهنضبة.. صديقي ابوذر..حبابك وحباب الإصدقاء هنا..(ياسين ، احمد ، الشيخ ، والمتابعين والمتابعات).. كتر خيرك يا صاحب ..عنوان الخاطرة ، هو فلسفة السهروردي المقتول ، وهو رجل صوفي معروف ، مات مقتولا، والمحزن من قتله هو صلاح الدين الذي يعتبر عند الغالبية بطل يستدعى في ذاكرة الشعر العربي عند اوقات المطبات..! وخلفية سيد خليفة الصوفية ، هي التي جعلتني استدعي هذه الفكرة ، فكرة الإشراق.. اما زمن الهنضبة فهو دونك يا صديقي ، الزمن الجاف الذي تغلب عليه المغالطات في كل حاجة.. وتحية لحضور ول ابا احمد يسن..!
عارف يا ابا ذر..كم يوم ، تقريبا شهر..اعدت اكتشاف اغنية جميلة والأداء فيها لطيف للغاية..واعادة الإكتشاف يا صديقي ..كنت زيك كده ناوي اعملو خيط ونسة مع احمد يسن وترهاقا..وذلك لأني ..سمعت في حاجة اسمها (القونات) والقصة صارت مزعجة للغاية ..ومن كلام الناس عنها..والأذى من الأصوات العالية والإزعاج المسمى جزافا غناء (وليس موسيقى) خفت ان يعود بنا الزمان القهقرى لنرى عودة قوانين القمع من شاكلة (قانون النظام العام/سئ الذكر). اها قلت يا اخي نفتح كوة للونسة عن الغناء اللطيف المحبب وغير المؤذي..فتذكرت اغنية (ما كنت بفتكر الجميل) من اداء عمار السنوسي ، والتسجيل قديم ..مجرد سماعه بيرجعنا الى ايام الشباب وبيرجع الشباب الى ايامنا الراهنة..وكنت ناوي اتونس عن كيف الناس كانت بتحب وتعبر عن الحب ايام زمان..واليوم أو الراهن..! ولأن النفرى قال:( كلما اتسعت الرؤيا ضاقت العبارة)..فالأفكار تأتي كثيفة..والتعبير خاين تماما..!..خطيت الغنية بصوت عمار في صفحتي في الفيس بووك..وكويس بقت شرك جميل وجابات لينا القمري والبلوم والنحل..وكل انواع الكائنات المتلهفة للونسة اللطيفة..وعملت نايم..! ذات امسية ، حضر الأعدقاء على قول شيخنا واستاذنا دكتور حسن موسى..والأعدقاء هي صديقتنا الحيكومة ، وكنت في ذات حضرة بسبب غنية (ما كنت بتفتكر الجميل) ، اها الحيكومة قالت لي: بتسمع في شنو؟ قمت اديتها السماعة..! قالت لي: يا سلااااااااام ده منو القاعد يغني غنية سيد خليفة ده؟ طبعا انبهمت يا صديقي ، لأني ما كنت متصور انو في ناس ما بتعرف عمار السنوسي..!..والإنبهام الثاني..كون ان الغنية دي بالذات بتاعة سيد خليفة..! طبعا الإنبهام الثالث كان في حكاية صراع المركز والهامش (الحيكومة من ناس امدرمان ميلاد ونشأة وشنو كده ما عارف) وقالوا لي بصريح العبارة: كويس ناس الأقاليم اتطوروا وبقوا يسمعوا سيد خليفة..! وبدون ما اشعر لقيت نفسي بحكي عن سيرة عمار السنوسي وكيف انو فنان مختلف ومن انوار جيلو..! تووشك خبطوني ليك بسؤال: من وين زولك ده؟ قلت ليهم من الجزيرة..! قالوا لي: الدم للدم بيحن وناس الأقاليم ما بيعرفوا غير ناس الأقاليم..! المهم في الأمر يا صديقي ، الأغنية الجميلة طلعت بتاعة سيد خليفة ، بالرغم من اني كنت متذكر عمار السنوسي اشتغل كتير من اعمال سيد خليفة وشرحبيل احمد وعثمان الشفيع..لكن فاتت علي..وكنت اظن انها اغنيته الخاصة..! التحية لسيد خليفة ، وهو رقم مفارق في خارطة الغناء السوداني وسعيد بمعرفة اسمه الحقيقي واسم خوجلي عثمان..! لكن ، رغم انف الأعدقاء/الحيكومة ، عمار السنوسي غناي شديد..!
تحياتي كبر
07-02-2021, 04:11 PM
عبداللطيف حسن علي
عبداللطيف حسن علي
تاريخ التسجيل: 04-21-2008
مجموع المشاركات: 5454
اما في شأن السنوسي، فالحديث والله ذو فنون وذو شجون
تعرف يا كبر، انا دائما بقول انه اي زول من الجزيرة ممكن يكون مطرب، لاحظ مطرب مش مغني او مؤدي والشواهد كتيرة والله ومعروفة، سيبك من المشاهير المعروفين، والله امسك اي زول من الجزيرة سبحان الخالق تلقى صوته سمح وممكن يغني ما عارف دي مردها للجينتكس ولا البيئة ولا نوع من الهبات الإلهية
ناس الجزيرة حرفا في الغناء والكوشتينة واحرف كمان في الشربة هههههههه
ما كنت مفتكر الجميل واحدة من ألحان ابو السيد الحلوة اختار ليها إيقاع صعب جدا ومتعب جدا لبقية عازفي الآلات التانية في الاوركسترا اخونا احمد يسن ممكن يشرح لينا الحتة دي اكتر وهو الأدرى طبعا بتفاصيل المزيكا
ذكرتني بالمناسبة دي برضو اغنية بتبدا برضو ب "ما كنت مفتكر"
اغنية سيد المطربين خليل اسماعيل
ما كنت مفتكر العيون تسعد قلوب بالشكل دا
الغريبة ايقاعها تقريبا نفس او قريب من إيقاع اغنية سيد خليفة
عليك الله اسمعها يا محمد
07-02-2021, 08:49 PM
Ahmed Yassin
Ahmed Yassin
تاريخ التسجيل: 01-31-2013
مجموع المشاركات: 5507
اغنيةد.حسبو سليمان ما كنت بفتكر الجميل فيها كلام ونسة..... وفيها طقوس ..فيها بخور وفيها حلفان ستة مرات.."والله لو" ومع دا سيد خليفة ادخل حوارات موسيقية بديعة عمار السنوسي دائما بختار الصعب زي تباريح الهوى و.. ولى المساء ....ودائما ينجح بامتياز .. لانه بمتلك الاداء البخليك تسمعه للنهاية
07-04-2021, 05:10 PM
أبوذر بابكر
أبوذر بابكر
تاريخ التسجيل: 07-15-2005
مجموع المشاركات: 8610
محمد وردي لامن سأله حسين خوجلي .. و قال محمد وردي لو داير يسمع غنا غيره .. بيسمع منو ؟
وردي قال ليهو يا حسين .. الانتو ما بتعرفوه .. انو انحنا الفنانين لو قعدنا ما بغني لينا الا سيد خليفه .. و سيد خليفة ده انتو ما بتعرفوه زي ما انحنا بنعرفه ..
على الجمال تغار منا *** ماذا عليك إذا نـظرنا
هى نظرة تنسى الوقار**** وتسعد الروح المعني
دنـياى أنت وفـرحتى ***ومنى الفؤاد إذا تمني أنت السماء بدت لـنا*** واستعصمت بالبعد عنا
هلّ رحـمت مـتيمـا *** عصفت به الأشواق وهنا
وهفت به الذكرى فطاف *** مع الدجى مغنى فمغنى
هـزته مـنك مـحاسن *** غنى بهالما تـغني
يا شعلة طافت *** خواطرناحواليها وطــفنــا
أنـسـت فيكَ قداسة *** ولــمست إشراقاً وفناً
ونظرت فـى عينيك *** آفاقاً وأسـراراً ومعـنى
وسمعت سحرا يذوب *** صداه في الاسماع لحنا
نلت السعادة في الهوى ** ورشفتها دنا فدنا
قيدت حسنك في الخدور **** وصنته لما تجنى
وحجبته فحجبت سحرا ** ناطقا وحجبت كونا
وابيت الا ان تشيد *** للجمال الحر سجنا
كلم عهـوداً فى الصـبا*** أسأل عهـوداً كيف كنا
كـم باللقا سمـحت لنا *** كـم بالطهارة ظللـتنا
ذهـب الصـبا بعهوده *** ليت الطفولةَ عـاودتنا
07-03-2021, 02:36 PM
Ahmed Yassin
Ahmed Yassin
تاريخ التسجيل: 01-31-2013
مجموع المشاركات: 5507
عشان تعرفوا ان سيد خليفة يستاهل يفوز بالمركز الاول كفنان السودان الاول في استفتاء مباشر من المسرح عام 1962م نجي لى( صوت السماء ) او ياصوتها لما سرى..ومحمديوسف موسى سيد خليفة لحن الاغنية دي مرتين.الاول يبدوا انه لم يعجب الشاعر وسيد قال حتسمع اللحن الثاني... وقد كان ..والاغنية دي ما بتتلحن الا كدة. اولا فيها كل حركات الاعراب ..والمشكلة في التنوين اخر الكلمة بتكون ثقيلة في اللحن وفي النطق زي مثل الحرير (نعومة) و(نداوة) وتكسرا مثل الصباح (طلاقة) (رشاقة) وتخطرا وهمي (حنينا) (حالما) و(صبابة) وتاثرا وتدفقت كلماتها (دفئا) (نيديا) اخضرا (عبقا)يضوء (براءة) و تخترا (سكرا) ولا (كاسا) ترا اسمع النطق عند ابوالسيد وكيف( يلف ) على حرف النون
أغنيات فى شفاه الحب غنّاها الجمال والمنى يا روح قلبى ليس يفنيه الدلال أغرقتنى بين أمواج المنى والمنى شطّ على بحر الغرام وسقتنى خمر أعناب الهنا والهنا كأس وهمس وإنسجام علمتنى كيف أنسى من أنا وأنا لفظ حرام فى الهيام يا سقاة الكأس من عهد الرشيد ما لكاسى ظمئاً أبدا وحيد ونديمى قد سرى نجما مع الأفق البعيد حطم الكأس وولى وانطفأ نجم تلألأ وغدت تبكى على شفتيّ أصداء النشيد ليل وخمر وشفاه هنّ للقلب لظاه هنّ إكسير الحياة شعرها ليل تموّج صدرها الوثّاب هودج شفةٌ عطشى .. وأخرى هى كأسُ خمرها نار وجمرة ليتنى لو ذقتها فى العمر مرة
07-06-2021, 06:08 PM
أبوذر بابكر
أبوذر بابكر
تاريخ التسجيل: 07-15-2005
مجموع المشاركات: 8610
عارف يا أبا ذر زمان وأنا في كوستي الفوز الثانوية العليا طالبا لا أزال عملت بحث عنوانه "الرومانسية الحزينة في شعر إدريس الجماع". كما لو أن هناك رومانسية أخرى على النقيض. المهم كنت أبكي الناس على جماع باكثر من محاولة بيان ذلك النزوع "الرومانسي الحزين" في شعره. لقد جعلت وقتها طوب الأرض نفسه يبكي معي على إدريس المسكين. وهذه ملاحظة طالبة في فرع جامعة القاهرة. وقد وقع البحث بين يديها قبل أن ترى مؤلفه. أتذكر أنني استعنت بمرجع في الرومانسية كتبه أنطوان جان تيغيم. أرجو أن تكون الذاكرة لا تزال محتفظة بالاسم صحيحاً. المهم لما خلصت الثانوي، ذهبت إلى الخرطوم لأمر التعليم العالي. فرأيت أن استكمل الجوانب العملية المتعلقة بالبحث. وقد ساعدني وقتها مصطفى سند وقد كان يرأس القسم الثقافي بجريدة الأسبوع. وكان يتقاسم المكتب مع نجيب آدم قمر الدين. أحياناً كنت أجد معهم أبو آمنة حامد. والذي أراد وقتها لما نظر نحوي أن يلقي بما بدا الريبة جانباً حتى يتحدث مع سند حول أمر ما. عرفه سند بي باعتباري شاعراً ناشئا. وكنت أعرف سند منذ الثانوي العام. وقتها عرض علي طلاب كوستي بمصر أن أشارك في ليلة شعرية بنادي التنس يستضاف فيها شاعر من الخرطوم يسمى مصطفى سند. تحمست للفكرة بواسطة سلطة الجهل وحدها. دي كان المرة الأولى التي أسمع فيها باسم مصطفى سند هذا. نفس الخطأ النابع من سلطة الجهل هذه كررته في كندا. حين سرت وحدي في شارع يحكمه تجار المخدرات والعصابات من دون أن أعلم بكلفة السير في ذلك الشارع. كان مصطفى سند الإنسان العظيم الشاعر الكبير رحيماً دائما بسلطة جهلي تلك به. نحن نقترب من سيد خليفه
07-06-2021, 07:42 PM
عبد الحميد البرنس
عبد الحميد البرنس
تاريخ التسجيل: 02-14-2005
مجموع المشاركات: 7114
المهم زرت بيت جماع في الحلفاية. وقد أراني ابن أخت له جواز سفره. وتكلمت طويلاً عن إدريس مع حسبو سليمان. ثم لا يكتمل الحديث عن جماع من دون لقاء سيد خليفة. لكن في البدء سعدت بهذا البوست الذي يعمل على تذكرنا لأحد أولئك العظماء الذين ساهموا بفاعلية في تكوين وجداننا ولا يزالوا. وسيد صاحب موهبة كبيرة في إختيار الكلمات والتلحين والتطريب وله قدرة سحرية لما يتفاعل مع جمهوره. حددنا اللقاء معه بمنزله في الخرطوم جنوب. كان برفقتي ود جيراننا الذي يبدو أنه رافقني وقتها حتى يثبت علي تهمة الكذب بما ادعيت أنني في سبيلي إلى لقاء فنانه المفضل بعد الظهر. أعتقد بعد ذلك اللقاء كان سيصدق لو أنني أخبرته أنني سوف أقابل بوش الأب في البيت الأبيض بعد أيام قليلة
07-06-2021, 08:05 PM
عبد الحميد البرنس
عبد الحميد البرنس
تاريخ التسجيل: 02-14-2005
مجموع المشاركات: 7114
ما إن جلسنا في غرفة الاستقبال ببيت سيد خليفة، حتى طالعتنا صورة له شابا في صحبة عبدالحليم حافظ. وتلك قصة أخرى حكاها لنا سيد في سياق بداياته تلك في مصر. إلتقى سيد خليفة بجماع لأول مرة في بيت السودان بالقاهرة. كان جماع يأكل من صحن الخدرة، ويرتدي بدلة بيضاء، ما إن حياه سيد خليفة، حتى رفع جماع يده وربت على صدره عبر تلك المسافة رداً على التحية. ثم طلب منه سيد على الفور أن يعطيه كلمات يقوم بتلحينها. غادرا مقر بيت السودان معا، وسارا إلى محطة الترماي في طريقهما إلى مقهى بشارع المبتديان. كانت حساسية جماع المفرطة ترافقها حتى عند محطة الترماي. ما إن يقف الترماي حتى يعزم جماع على المتزاحمين معطيات لهم الأفضلية عليهما بالصعود. لم يجد سيد خليفة إزاء هذا الرقي الملائكي سوى أن يحمل إدريس بنفسه ويضعه داخل الترماي. في المقهى، يقول سيد أن جماع لم يكن كتب حتى لحظتها سوى الكوبليه الأول من قصيدة في ربيع الحب. ولما بدأ سيد على الفور في تلحين مطلع القصيدة المنجز، بدأ جماع يدخل بدوره إلى منطقة الإلهام. كان قد بدأ يرتحل ما تبقى من القصيدة ويدمع
07-07-2021, 11:48 AM
أبوذر بابكر
أبوذر بابكر
تاريخ التسجيل: 07-15-2005
مجموع المشاركات: 8610
تحية وسلام للحضور لسيد خليفة تسجيلات رائعة تبث عبر إذاعة وادي النيل سجلت لقاء مع سيد خليفة في قناة مصرية ونزلتو في اليوتيوب لم يعكر صفو روعة البرنامج غير سماجة وثقل دم سمير صبري
07-07-2021, 01:30 PM
عبد الحميد البرنس
عبد الحميد البرنس
تاريخ التسجيل: 02-14-2005
مجموع المشاركات: 7114
عارف يا أبا ذر في الفديو الذي أحضره مشكوراً الأخ مهدي صلاح هنا يتضح لك ذلك الجانب من التواضع الصوفي غير المبرر في الشخصية السودانية. وهو التواضع الذي بعث برسائل خاطئة لكل من سمير صبري والإذاع الآخر بحيث احتلال واجهة الحوار وتضخما كثيراً. ويمكن للغة سيد خليفة الجسدية أن تكشف لك هنا أنه ظلم كثيراً مكانته الفنية. بدءا من عقد يديه وراء ظهره وتحوله في سياق الحوار كعامل بناء مساعد ومروراً بجلوسه على المسرح مطرقا متابعا حوارا تمت سرقته منه بحرفية عالية وغير ذلك. إذا لم تمنح نفسك مكانتها المستحقة أحياناً قد يساء فهمك كثيراً. الموهبة القوية وحدها لا تكفي. وهذا ما كان يدركه الفيتوري جيداً بحيث أن من يتطاول عليه لا يكف يسأل الله أن يخارجه من هذا العكليت. وقد كنت شاهدا على ذلك بنفسي. وأذكر بينما كنت أصعد إلى جانبه يومها الدرج إلى مكتب الحياة اللندنية أن أوصاني قائلا "المصريون يقدرون الموهبة القوية. في البلد دي لازم تربي ليك ريش". على أن سيد والفيتوري كل منهما كان في الأخير جميلاً على طريقته.
07-07-2021, 02:05 PM
أبوذر بابكر
أبوذر بابكر
تاريخ التسجيل: 07-15-2005
مجموع المشاركات: 8610
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة