بيان تنسيقية لجان مقاومة الخرطوم ممهلة الحكومة 5 ايام للحل او البل..

Quote: عارف يا أخوي يمكن حل هذه الأزمة خلال ساعات لأنها أزمة مصطنعه وأمر تقوم به جهات لها مصالح تتعرض مصالحها للضرر فحيعملوا على إذلال المواطن حتى يخرج ويقلب الحكومة لتعود مصالحهم للازدهار بالمناسبة هي لوبيات منظمة وليس شرط أن تكون كلها كيزان البعض من هؤلاء تجار سوق وراسماليه منتنه وقذرة تلعب على حبل المصالح وتجند كثير من الأطراف داخل وخارج الحكومة كمحاسيب لهم تربطهم معهم مصالح وكان ما ساعدوا في زيادة الخناق بيعملوا مطنشين وده برضو دور

Quote: بتذكرني ايام استلم مرسي الحكم بعد أن فاز في الانتخابات كل شي كان معدوم واختفى بمجرد زوال حكومة مرسي كل شي رجع عادي وبوفرة في ظرف وقت قليل نفس المشكل الآن يا تقدر كحكومة تصل للاطراف دي وتضربها بقوة حتى تحل الأزمة وده أمر عايز قوة وسلطة تفتقدها حكومة حمدوك الضعيفة جدا والماقادرة حتى تنفذ قراراتها او حتى تصدر قرارات لحل الضوائق المعيشية وخلق الوفرة التي يتم حجبها عمدا يا كمان تربع يدينك لامن يخرج عليك الشارع الفاض بيهو وما قادر يستحمل ستستمر الضوائق المعيشية حتى تتغير الحكومة وتسقط أو ينفخ الله الروح في الحكومة الميته دي وتقدر تدحر هذه اللوبيات.

Quote: بدت مبادرات من لجان تفيير وخدمات بالعمل بنظام الكروت حتى يستفيد سكان الاحياء من الخبز المتوفر (على قلته) من دون السوق الاسود ومناديبو. لكن ظهرت معاكسات وتعقيدات والاسوء نظاميين يظهرو فى الصوره يقاسمو المواطن فى حقو ومستغرب ديل مش عندهم شركاتهم وخدماتهم البتوفر ليهم كل شىء من مواد تموينيه وخبز ؟؟؟ طيب ليه مضايقين المواطن العادى فى الاحياء ؟؟ تصور 4 صفوف كروت وغير كروت/رجال نساء وكل صف غير الكروت اما صبيان ناس المطاعم -ديل الرغيفه بيحسبوها حساب 5 او عشره ماعارف وصبيان المطاعم والسوق الاسود بقت مهنه للكثير - والسوق الاسود او نظاميين الواحد يجى يوقف الموتر او عربيتو ويقيف فى صف الناس الما شايله كروت. الصفوف بقى فيها طعن وقتل وكيس العيش بقى يتخطف من حراميه المواتر زيو وزى المبايلات والشنط . طيب ليه حكومه الولايه ماتعمم الفكره وتقننها كل منطقه سكنيه تخدمها افرانها واى شخص لايحمل كرت لاحق له ولايقرب ذاتو بعد كدا راضين لغيه ما ازمه المطاحن وماصاحبها تتحل راضين انو الواحد بالكرت انشاء رغيفه واحده طالما فى عدل وقفل طريق للسوق الاسود اما المستوى الاعلى اتحادى وولائى دا موضوع لازم يتحل ويتمارس عليهم ضغط على الاقل للشفافيه وتمليك الحقيقه للشعب.

Quote: والله دي مرحلة تعيسة ومتاخرة ان يتم توزيع الخبز بالبطاقات في إذلال أكثر من كده للمواطن. الخبز يجب ان يكون متوفرة للمواطن علي مدار الساعة. الأزمات تخلق بيئة يستغلها الانتهازيين في التكسب من ضائقة المواطن. مسألة الكروت ليس حلا لهذه الأزمة وحلها في توفير الدقيق للمخابز وتشغيل المخابز المتوقفة عن العمل. من الواضح بأن هناك عدم شفافية في معالجة هذه الأزمات وإخفاء حقائق عن الشعب.