مجموعة قصصية تم نشر بعض قصصها متفرقة في بعض الاسفير.. القصة الأولى : طهور السر ونقسمها لجزئين : الجزء الأول : (1) بعد العشاء بساعة دقت الطبول ، وارتفعت اصوات الدلوكة، وجاءت (التاية) ترفل في زفافها الأبيض، وجيئ بـ(السر) العوير وهو يلبس -لأول مرة في حياته- جلبابا أبيضا ناصعا، ويحمل عكازا (مضببا) يهز به وسط النساء، أهل القرية اصطفوا في دائرة ضخمة يحملقون في شاشة تلفاز معلقة خلف (كوشة) العرس، انتباه الناس تحول تلقائيا لمكبرات الصوت وهي تفتتح الحفل بـ(تست ون .. تست ون)، المغني حاول الدخول ليتخذ موقعه على المنصة غير أن (تيس السرة) كان له رأي آخر، فقد اقتحم الصفوف فجأة وأعمل قرونه الغليظة في ظهر المغني وطرحه أرضا، (بله الكهربجي) تولى أمر الشاشة ولكنه لم يفلح في بث مشهد العروسين، فهداه (عجزه) لشغل الناس ببث حي من التلفزيون القومي، موسيقى الجيش تسللت عبر مكبرات الصوت تحمس الصبايا، ثم تبعها آخر يصدح بـ(النار ولعت ) فاشتعلت الدارة بالرجال، السر العريس عاد يهز وسط الدارة ، يطير في الهواء بجسده الضخم ويهبط وسط هالة من الغبار، ثم يقف يطقطق بأصبعه الغليظ ( أبسروا بالحيل .. ابسروا بالحيل)، وفي الطرف البعيد تحلق الأولاد يعلقون على العريس : - أسع السر العوير ده يكون لا طهروه لا حاجة! - آآي، أبوي قال الطهار ساكت غشاهم. -احتمال الطهار لقاهو مطهر. - أهااا الطهروا منو؟ عاد إلا ولدوهو من أمو مطهر! - أنا متأكد ما مطهر، شفتو بعيني لمن كانو بلبسوهو قبيل.. - أنا عندي فكرة تخلينا نتاكد من الكلام ده! يضحك الأولاد ويتهامسون قليلا، ثم فجأة تنطلق من بينهم صيحة قوية شتراء سمعها كل من في الحفل: - (السر الأغلاااف).
(2) لا تختزن ذاكرتي من أمور السياسة التي عكرت صفو طفولتنا إلا القليل، ولا تدري نفس من أقراني بعلاقة تلك الأحداث السياسية و طهور السر إلا ما حكته أم السر لاحقا، ورغم ذلك تظل ذكريات السر (العوير) وأبيه (الوزير) جزء من ذاكرة قريتنا للأبد. يعتبر السر ثاني المخلوقات التي كانت ترهب أولاد الحلة بعد (تيس) السرة، التيس صاحب الذقن الطويل و القرون الحادة إذا سلك طريقا في ذلك الوقت اتخذ الاولاد طريقا آخر، أما السر فيكفي أن ترى فمه الذي تبرز منه سن واحدة وتغطيه (شلاليف) تحتل أكثر من نصف مساحة وجهه لتحكم على حيونته، ويكفي أن تشاغله بعبارة (السر الأغلف) حتى يستوحش في وجهك ويصبح أخطر من تيس السرة. السر العوير لا يمر بمرحلة (الانسنة) شعوريا إلا من خلال غرامه بالحلوى وحبه للفطير باللبن، ولا تعرف له حديثا بشريا إلا عند سؤال الناس له: ( بتعرس متين يا السر؟)، فيرد بقوله :(أبوي قال لمن يطهرني بعرس لي طوالي)، ومن هذا الرد المبرمج كنغمة (عفوا) التي تنطلق من الهاتف لتخبرك بنفاد رصيدك تبرمجت (غلفة) السر في أذهان الناس . السر كان (الولد) الوحيد في بيت عباس، لذا فقد نشأ مدللا (خمجا)، ويبدو أن خيرات أبيه (النائب الولائي لدائرة المنطقة) والتي من ضمنها أن أطلقها في نفسه (وزيرا)، أو لعنات أهل البلد، قد ظهرت في تضاريس ابنه وعقله، فعندما شب السر لم يكن يشغله شئ غير ضرب اخواته الست، ومطاردة صبيان الحي متضامنا مع تيس السرة، ونادرا ما يصادف فتاة مليحة يسألها ( يا بت بتعرسيني؟) فتعتذر الفتاة وترد بالسؤال التقليدي (وانت بتعرس متين؟) فيجيب لها بسيرة الطهور، (عوارة) السر تبدو جلية في مناسبات الفرح والترح في الحلة، فالسر بعكازه الغليظ لا يبرح مواقع الحفلات حتى الصباح، ينطط كالقرد في (دارة) خارجية يصنعها له أهل العرس، لا ينتبه لفاصل غناء أو نهاية حفل، ومتى ماغلب عليه النوم يتمدد في (دارته) حتى توقظه شمس الصباح، أما في حالة الوفيات فهو يرابط ليله كله ينتقي من (بواقي) الاكل الفطير باللبن، يرتع فيه ويتلذذ به حتى الصباح.
(3) عندما بلغ السر سن الرشد مات أبوه، وترك له ميراثا ضخما من الأراضي السكنية والزراعية والعقارات، فقد كان الوزير شغوفا بنفوذه المحب للامتلاك ، ولم تنج من اسمه في سجلات الأراضي حتى مدرسة الحي وناديه، عشية الوفاة أجتمع أعيان المنطقة ليقرروا بشأن ورثه الوزير الضخمة ، ووجدوا أن نصيب السر سيجعل منه أثرى أثرياء المنطقة، ولكن من أين للسر بالعقل الذي يمتلك أو يدير هذا المال، قال خاله التلب: ( أنا بعرس للسر بتي مريم، عشان هي استاذة وبتقدر تساعده في إدارة الدكاكين والأراضي) ، الشبلي عم السر رد عليه بقوله: ( كان جات للعرس أن بناتي أولى بيه، السر ياهو ولدي، أعرسلو بتي ويقعد معانا في بطن البيت). شيخ الطاهر امام جامع الحلة كان عنده رأي آخر، قال للقوم (نحن حقو ننادي السر، ونشوفو داير يعرس بت منو ونعقد ليه عليها ونديها ورثته من ابوه). - السر ، البركة فيكم في ابوك. - أي زول ما جاب معاهو فطيرة بي لبن مايبارك لي ميتة ابوي . (ان شاء الله أبوي يموت عشان أشبع فطيرة بي لبن) كانت هذه أشهر أقوال السر المأثورة قبل وفاة والده. - الفطيرة بتجيك في العشا آ السر، أسع نحن دايرين نشاورك في عرسك. - أنا ما عندي عرس اسع، أبوي قال لمن يطهرني بعرس لي طوالي . - خلاص نحن بكره عايزين نطهرك وبنعرس ليك طوالي، رأيك شنو؟. - أنا الحروم ما بدورن بجيبن لي أخلاقي هنا (وأشار لشلاليفه الكبيرة) . - يا زول بنسوي ليك حفلة كاربة في العرس ، ونخليك تنطط في نص الدارة مع عروسك. - كان بتسو لي حفلة حلاس عرسو لي . - طيب قول لينا داير تعرس بت منو في الحلة دي؟ - داير أعرس زهرة أحوي (وكان مما زاده عوارة أنه لا ينطق حرفي الخاء والشين).. - لا لا، أختك ما بتتعرس ليك، شوف أي واحدة تانية في الحلة غير أخواتك. - حلاس بعرس التاية. - التاية منو؟ -التاية ام سعرا طوال الكانت بترقص أمبارح في عرس ود الجد. - المسنوح ده قصده التاية بت شيخ البلد ، الجات امس من المكابراب مع قريبتها العرسها ود الجد. - ها جنا ات ماك نصيح، التاية شنو البتعرسك ات؟ وبعدين دي زاتها ما من الحلة، البنيه جات ضيفها ورجعت لي حلتها، كدي شوف غيرها. - لا ماني داير واحدة تانية ، امبارح جيتها قريب وقتلها داير اعرسك ضحكت وقالت لي آآي بعرسك بعد ما يطهروك. - لاحولا .. انت يا العوير غلفتك دي وصلت لا عند ناس المكابراب؟ .. (4)
بعد مداولات كثيفة و(مجابدة) معه ، (عصلج) السر وقال ؛(ما داير أعرس)، إلا أن شيخ الطاهر فكر وقدر ثم قال:(يا جماعة نحن ما نجرب بت شيخ البلد، الأرض جربت الحجر، بكره لمن شيخ البلد يجي للعزاء نكلمو بالخبر ونشوف شورتو ). وبعد أن قدم لهم شيخ البلد التعازي في نائب دائرة المنطقة قال له الطاهر: - نحن آبونا الشيخ قاصدنك في شوره لي ولد المرحوم ده. - ان شاء الله خير. - الجنا ورث طين أبوه وبنكوس له في مره يعرسها وتمسك ليهو قروشو. - خير ما عملتوا. - أها الجنا شاف بتك أمبارح في عرس ود الجد، وقال يا يعرسها هي يا اما ما يعرس كلو كلو. - إتو بي صحكم .. السر العوير يعرس بتي أنا. - نحن قلنا يعني الجنا وارث وأملاك الوزير أنت أولى بيها، وكمان يعني ننزل السر عشان يبقى خليفة أبوهو في الدايرة. شيخ البلد فكر قليلا ثم قال: - خلاص خلوني أشاور البت وأمها. على الرغم من أن السر اشتهر بعوارته الظاهرة على أوله ، وما رسخ في ذهن الناس أن عباس لم يطهره بعد أن فقد الأمل في اصلاحه، إلا أن شيخ البلد فاجأهم بقبوله ولكن بشرط واحد، أن يطهروا السر ثم يأتون به عريسا لبنته. .. .. يتبع
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر التاج
فيس بوك
تويتر
انستقرام
يوتيوب
بنتيريست