|
|
|
 Re: نوريكم كسير التلج الجد الجد لبكرى ابوبكر (Re: امتثال عبدالله)
|
Ozark مسلسل رهيب فعلا يا بكرى.
الموسم الاخير نزل فى نيتفليكس قبل اسابيع ؛ تقريبا اخد معاى ويكند واحد و خلصته .
اللقطة الأخيرة من الموسم الاخير كانت عحيبة جدا و صادمة .
طيب لو داير ارشح ليك مسلسل قريب من اوزارك ارشح مسلسل
Blacklist فيهو حبكة درامية ممتازة ؛ يحكى عن مجرم مطلوب من هيئة المباحث الأمريكية FBI ، سلم نفسه فجاة واقترح ان يمد الهيئة بمعلومات عن عتاة المحرمين بشرط وجود ضابطة مباحث اسمها اليزابيث كيين ؛ اتضح لاحقا ان هناك علاقة تربطه بها .
مسلسل جميل و دائما النهاية سعيدة بحيث لا يترك اثر نفسى سء بعد مشاهدة الحلقة.
| |
  
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: أحمد محمد عمر)
|
Quote: والله حيرتنا يا ود قباني
هسع وينو الورقة ام مليون!!! |
ههههههها
ذكرتيني قالوا اتنين غالاطين واقفين في شارع مدني
واحد قال الشارع دا ماشي من الخرطوم لمدني
التاني قال : ابدا الشارع دا من مدني جايي الخرطوم
جاء واحد اشد غلاطا منهم قاموا سألوه:
قال ليهم : " هو الشارع زاتو وينو البتتكلموا عنو دا"
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: امتثال عبدالله)
|
Quote: ود قباني
ممكن كمان مزيد من الشرح عشان اقدر اشوف التلج
او التلج القالو جلالدونا انه ابرد تلج حايم في السوق،،،
لان تفكيرنا اشل بسبب حبسة الكرونا ،،،
وما تنسى ان الحبسة حتطول لغاية شهر يناير ٢٠٢٢م، |
و الله يا بتنا الا بعد ده اجيب بسطونة و اجيكم نيويورك .. 🙂
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: يحي قباني)
|
زحوا لي بعيد كلكم ما بتعرفوا تشرحوا :)
ما ممكن زول يقول ليكم ما فهمت تقوموا تعيدو ليه الشرح بنفس الكلمات :)
يا امتثال النصري واضع صورة بكري أبوبكر الشخصية كصورة بروفايل ليه
الإسم النصري والصورة اللي تحته بتاعة عمك أب عمة دة بكري ابوبكر وليس النصري
________________
ملحوظة: أنا (أشرح) عضو في الاونلاين أكان ما فهمتي مني صدقيني تاني ما بتقع ليك 
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: يحي قباني)
|
احمد محمد عمر
كدى اول نقدم ليك الشكر للشرح الوافي والكافي وبعدين نلومك....
غايتو بالغت في قولك انا يمكن ما بعرف شكل الباشمهندس بكري ، صاحب الحوش،
وقايلاه النصري.....
يعني انت عاوز باي طريقة ترفدني من المنبر العام ..ههههههههههه..وهسع اذا اترفدت البجيب ليكم
اخبار المظاهرات في امريكا منو !!!؟
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: امتثال عبدالله)
|
Quote: النصري واضع صورة بكري أبوبكر الشخصية كصورة بروفايل ليه
الإسم النصري والصورة اللي تحته بتاعة عمك أب عمة دة بكري ابوبكر وليس النصري |
ممكن تشرح لينا تاني يا حمادة بس بطريقة مبسطة شوية
عشاني وعشان اخوي علي عبدالوهاب انت عارف حيجي يقول بيك ضواحي الدنيا وماعارف شنو
براحة بالله..الكسر التلج منو
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: أحمد محمد عمر)
|
النصري يا اخوي في المنبر دا في ناس بترش بالصورة بس ....
ديل الواعين .....
في عواليق حايم في بوستك دا عامل فيها الود شريح (اكسر الشين و الراء)
قبل كم يوم رشوه ليك رش الجن من حيث لا يحتسب بدون صورة كمان
😂😂😂😂😂😂😂
فا شنو انا خايف كسير التلج دا تطلع منو بي بعض الخسائر .... 😂😂
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: امتثال عبدالله)
|
شكرا يا شباب على المرور على تلاجة ام درمان للتلج البارد.
الحقيقة، كسير التلج حصل بالصدفة .
صورة البروفايل بتاعتى كان محمله فى موقع اسمه m9c
..
الموقع اتدمر وخرج عن الخدمة وبالتالى كل الصور فى (بطنه) طشت.
اصبحت بدون صورة بروفايل وهى كانت صور من كاميرا الجوال لفاكهة الكاكا التى استمتعت بها الشتاء الفات.
بدات ابحث عن موقع اخر (ملح) لتحميل الصورة لكن موقع سودانيزاولاين كان برفض ربطها بالبروفايل .
حاولت عدد كبير من مواقع التحميل و كلها نفس النتيجة.
فى النهاية بدأت ابحث عن بروفايلات الأعضاء اصحاب الصور لبروفايل عسى اجد
موقع مقبول عند سودانيزاونلاين ؛ جربت صورة بكرى ابوبكر و ووضعتها فى البروفايل لمن اشتغلت ، قلت خلاص ده موضوع بوست مع الزهج الحاصل ده.
أقترح الأعضاء كلهم يغيرو صور بروفايلاتهم بصورة بكرى ابوبكر لمدة أسبوع كنوع من التقدير
و الاحترام لصاحب الحوش
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: النصرى أمين)
|
Quote: أقترح الأعضاء كلهم يغيرو صور بروفايلاتهم بصورة بكرى ابوبكر لمدة أسبوع كنوع من التقدير
و الاحترام لصاحب الحوش |
كتبت كلام كتير وفي مقدمته ان الرئيس وضع اسمه في سجل التاريخ بابتداعه هذا الموقع التفاعلي وفي وقت كانت الساحة احوج ما تكون إليه ..
شلتو ومشيت لبوست الاستاذ حسن الجزولي لقيتو مطبول ..
للاسف ما احتفظت بالمكتوب.
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: ABUHUSSEIN)
|
يا النصري
كسير التلج بتاعك ده زغلل عيونا ولمن نشوف تعليقك طوالي بنفتكر ان التعليق من الباشمهندس صاحب الحوش
لاننا ما بنقرأ الاسم لكن بنعاين للصورة ....عشان كده لازم تكتب في بداية لي تعليق :" انا النصري امين ...وبقول ليكم ..
...وشكرا على البوست الأوسكار الجميل..
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: يحي قباني)
|
اها يا ود قباني
اوع تكون واقف في صف مولانا محمد طه الملك !!!!
وبعدين انا مستغربة كيف ترسل ولدك إلى أمريكا طرمبة في هذا الوقت الحرج والمظاهرات
لسع مشتعلة في الشوارع...لكن اذا انت مرسله عشان يتضامن مع الأمريكان ضد التفرقة العنصرية ، معليش عندك حق ...
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: أحمد محمد عمر)
|
أول يوم لي في الجامعة لاقيت زميلي من بحري وقعدنا نتونس اليوم كلو واتصاحبنا
تاني يوم قال لي
- أنا عازم البنتين ديلك فطور أرحك معانا انت ذاتك
- ما بعرف اتونس مع بنات
- فيزياء هي؟ ما ياها زي ونستنا دي .. خلي الجرسة يلا الكافتريا
- ما متجرس لكن أنا ما حصل اتونست مع بنات قبل كدة
- يا زول بطل الـ.... يلا قوم
ومشينا الكافتريا .. هو مشى يجيب السندويتشات والبنات بحاولن يفتحن معاي موضوع هواياتك شنو؟ بتمشي وين؟ بتلعب كورة؟ بتقضي وقتك كيف
قلت ليهم والله أنا بفضل قراية الكتب على الأنشطة الحركة
قالوا لي طيب كلمنا عن آخر كتاب قريته
أهااااااا دي العوجة الكبيرة  .. وانا ما بعرف اكضب
الكتاب ما متذكر اسمه لكن كان بتاع سيجموند فرويد وبي براءة شديدة قعدت أكلمهم عن نظرية اللبيدو .. والله جد انتو قايليني بكضب لكن وحاة الله الموقف زي ما أقول ليكم كدي
البنات صبت فيهن موية بااااااااردة صاحبي أول ما جاء شايل السندويتشات لقاني بقول في عبارة ماسكها لي لحدي ما اتخرجنا (بقولوا طفولة الحياة الجنسية أو حياة الطفولة الجنسية) طواااالي بقى يضحك بي صوت عالي ضحك الإحراج داك وجراني من يدي أرح نجيب الشاي
يا زول خلينا نفطر في الأول
لاااا لا أرح نجيبو هسة
بس وصلنا محل الشاي كدة قال لي: شوف .. لحدي ما نطفح الفطور دة أوعك تفتح خشمك نهائي ما تقول أي حاجة
بس مع آخر لقمة جراني من يدي وقال للبنات عن إذنكم عندنا موضوع مستعجل
طلعنا برة في باب الكافتريا بقى هو يتكلم ونفسه قايم وانا ميت بالضحك شغال لي : طفولة شنو؟ أسمع تاني نهائي ما تقعد مع بنات ولو اتجبرت تتكلم مع بنت تحت أي ظرف ناديني في الأول لأنه لو بديت تتكلم براك بتكمل ونستك مع بوليس النظام العام .. أنا جادي معاك والله
وانا أضحك زي العوير واقول ليه أنا كلمتك لكن انت براك الأصريت
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: أحمد محمد عمر)
|
عديت الجامعة تجم كدة لحدي نهاية تالتة حتى بعد داك قررت أفتّح
صاحبي كان اكتشف بنات الدبلومات .. فاضياااات وما عندهن شغلة بالقراية ما زي بناتنا الونستهن كلها الشيتات والمشروع
اتشربكت في ود بحري ذاتو قلت ليه بس تدخلني في بنات الدبلوم
بننزل من المعامل بالعصر بكونن قاعدات في النجيلة تحت صاحبي يعرفني بيهم
عندي فرمالة واااااحدة بس ما بتتصلح لي براي إلا يصلحها هو .. بعد التعريف طوالي لازم يقول ليهم طبعاً دة أول الدفعة
لو لحق نساها بقطع ليه كرعينه بالتعفص والشلاليت بي تحت لحدي ما يفتش ليه موضوع من مافي يجييب بيه سيرة الفرمالة
بعد داك أنا برجع كتفي لي وراء وابتسامة للضرس الأخير والبنات يتخلّعن فيني واااااو عليك الله البرمجة صعبة ولا ساهلة؟ وأركب مكنة الخبير واقعد أدجّل في الحاجة الوحيدة البفهم فيها
بصراحة لو ختيت الفرمالة دي بتلقى عريبي بي بنطلون واحد وقميصين وشبط وشعر منكش ودقن مساجين معشكبة بتتحلق يوم الجمعة بس وجيب فاضي وشنطة مهلهلة مع الكراسات فيها ملاية وفرشة ومعجون محل تمسى ترسى
يعني حركات صاحبي بتاعة عازمكم ايسكريم في فورتي ون وغداء في صالة شنو كدة ما عارف ما بتنفع معاي .. البت حدي معاها البنش دة
المهم في ظل الإمكانيات التعبانة والحنك البيش بقيت بس ما أشوف صاحبي خالط واحدة طوالي بتتلحهم بضحكوا أضحك معاهم توزيع ما بتوزع لا بي تلميح لا بي طردة عديل
قدر ما يحنسوني أهو ديك النجيلة مليانة بنات وكلهن بعرفنك أمشي حنك أقول ليه إلا تجيبها لي محنكة جاهزة لكن غير كدة أنا في ضنبك .. لصقة بس
فااااا شنو استحمل بس .. أخوك جحمان خلقة
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: أحمد محمد عمر)
|
| Quote: عندي فرمالة واااااحدة |
على أيّامنا يا عربي كانت الفرمالة تأشر على ساعتك وتقول للدامة الساعة كم؟ طبعا بعد تجاوبك ح تسال باستغراب ما اهو انت لابس ساعة, تقوم بطريقة ظريفة كدا وببراءة مصطنعة* تقول عارف بس عايز افتح موضوع معاك!
________________________________
* لازم تكون مصطنعة و ظاهر انّها مصطنعة وإلّا ح تطلع عوير ساي
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: محمد على طه الملك)
|
الساعة كم عدييييل كدة؟
هازول دة مستوى احتراف بعيد خلاص
ثم أنا ما عنديش ساعة
قال يفتحوا موضوع قال!
هو نحن كان بنعرف نفتح المواضيع بنتلصق في المحترفين؟
عندي بت خالتي لزم كانت قدامي بي سنة بتقرأ مختبرات
نحن محاضراتنا في cr9 وهم في cr8 قاعات كدة في بداية الجامعة بسموهن السي آرات
كالعادة بنكون منتظرين الاستاذ قدام القاعة ولمن اشوفها طبعاً لازم نسلم على بعض
بنقوم نتلاقى في نص المسافة .. سلام كيفك كويسة؟ الحمد لله .. وبعديها بخت يدي الشمال في السلك الشائك بتاع الحديقة القدام القاعات وهي بتخت يدها اليمين في نفس السلك والاتنين بنكون بنعاين في الواطة وساكتين منتظرين استاذ يجي يخلصنا من لحظة اللتاخة دي
ولاااا بنقول أي كلمة أي واحد فينا ألتخ من التاني
طبعاً الكلام دة كلو بسبب التربية لكن بعد دخلنا الحياة العملية جطناها
كنا في بيتها أيام عيد كدة واتلمينا مع كمية من ناس العائلة
جات سيرة مدارس اولادها وقالت دخلتهم مدرسة عالمية واحد من أهلنا الكبار قال ليها انتي بت شيوخ تودي أولادك محل الاختلاط؟ مفروض تدخليهم المدرسة القرآنية
رفعت يدينها الاتنين وصرخت بي طول حسها برررري وحاة الله البقت فينا ما تبقى في أولادنا .. أسأل أحمد دة :)
أنا قعدت أضحك لمن داير اقع قلت ليها عليك الله انتي لي هسة متذكرة أيام السي آرات؟
قالت لي ودي بتتنسي! صاحباتي يعاينن فيني بالشباك ويضحكوا في لتاختنا ويدوروني في الداخلية :)
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: أحمد محمد عمر)
|
اههههههه
اتخيلوا انا لي ساعات بقهقه موش بقولوا قهقه حتى مال الى الوراء
انا حالم الثلاثي الخطير دا في حتة واحدة.ياخ ديل فيهم ملاحة
ابوحسين ، احمد محمد عمر ، النصري
لانه اول مرة اعرف انه في حاجة اسمها ( انصفه التعبير) بدل خانه القدونا بيها دي
لانه والله ابوحسين ابدع فيها وطبعا ما ننسى مولانا اللعب الباص الطويل ال ( ثرو)
وعيون تضوي الليل من فم رقيق بسام
الكاشف قال
طول يا ليل وهوّد عاجبني طول الليل .. الليل نسيمو عليل.. الليل سكونو جميل
الليل به العشاق.. يتأملوا الأفلاك.. يتناجوا والأرواح.. ولشدة ما ترتاح ما داير تاني صباح يا ليل
و... يا جمال النيل والخرطوم بالليل
ويا ريتني ابقى سبايب للضفيرة في راس الاميرة
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: أبوبكر عباس)
|
| Quote: "عنده ابتسامة بطعم قراصة التمر. لا تضر القلب ولا المعدة" |
اكيد الوصف بكون لافي في راسك ليهو اسبوع ما لاقي حتة تلصق فيها..
بقيت زي احمد محمد تحب الملح ..
قبل يومين كبيت حكاية تعتبر من عيون الحكايا في محل لا يناسبها فضاعت في الزحمة..
االكتابات الزي ديك تعتبر نضفة مفروض تتخير مكانها..
نعلمكم لا بتين.
| |
|
|
|
|
|
|
|
|
|
Re: نوريكم كسير التلج الجد الجد لبكرى ابوبكر (Re: Osman Musa)
|
تعرضت مدينة كالقري لامكار عنيفة مصحوبة
كرات ثلج أحدثت خراب و دمار خاصة في شمال المدينة
كسير تلج صحي ما تورية .
و أيضاً فيضانات عطلت الحركة في بعض الشوارع منها
الشارع الذي يفصل بين منزلي و منزل معاوية المدير
هذه هي الصورة
كسير التلج حصل في المناطق الشمالية من المدينة حيث يسكن الاخ النصري
و هذه المداخلة عشان اقول ليك حمداً لله علي السلامة.
و رينا التلج عمل فيك شنو؟؟؟؟؟
| |
|
|
|
|
|
|
| |
جلالدونا
بكرى ابوبكر
يحي قباني
MOHAMMED ELSHEIKH
Ahmed Yassin
ABUHUSSEIN
محمد على طه الملك
Mahjob Abdalla
محمد البشرى الخضر
محمد عبد الماجد الصايم
Abureesh
أبوبكر عباس
Osman Musa
Hamid Elsawi
فيس بوك
تويتر
انستقرام
يوتيوب
بنتيريست