|
Re: وأنت لا تحاول إهانة الشارع : يا كباشي (Re: علاء سيداحمد)
|
و هذا رد آخر متداول في الواتس
يا كباشي .. أول شي .. لما نقول القوات المسلحة المنزوعة السلاح بأمر قادتها .. قفلت أبوابها قدام مواطنة مطاردنها مرتزقة بالرصاص .. ده تاريخ موثق صورة وصوت .. ما إهانة ..
ولما نقول البوليس .. فتح مخازن مهماته للقتلة يلبسوا شرف الدولة ويركبوا دفارات "العمليات" .. لإرتكاب أبشع مجزرة ضد مواطنين عُزل .. دي حقائق سجلتها الكاميرات بأرقام الدفارات .. ما إهانة ..
ولما نقول .. قتلونا مندسين لوحاتهم (ق د س) .. فده وصف لإدانة صوروها بنفسهم ونشروها متفاخرين بالقتل والحرق والإغتصاب .. ما إهانة ..
ولما نقول .. جهاز الأمن قاعد زي ما هو بس بقو يدلعوه "المخابرات العامة" .. وفرعياته بترفع تقارير عن لجان المقاومة للقيادات .. فده مثبت بالمستندات .. ما إدعاء ولا إهانة إفتريناها ..
مافي زول أهان زول .. ده تاريخ موثق .. كده ده أول شي ..
تاني شي .. إنت بتقصد ياتو قوات نظامية ؟؟؟ لأنه واضح جداً إنه تعريفنا وتعريفك للقوات النظامية ما واحد ..
تعريفنا لقوات الشعب النظامية .. هي القوات النيران قلوب شرفاءها ردت تاتشرات جهاز الأمن عليها مهاويس المتأسلمين وحمت المعتصمين .. دي قواتنا النظامية ..
قوات الشعب النظامية البنعرفها .. هي القوات البنادقها ما بتتوجه لطفل زي (الشبلي) .. ولا بتتأجر بالدولار لما وراء البحار والصحراء الكبرى .. الهسي دي ما بنعرفها ..
ما إنت يا كباشي .. نحن الما بنقبل إهانة للقوات النظامية .. دي قواتنا ونحن أهلها .. وحتتنظف من العوج يعني حتتنظف .. بعد الله عز وجل واثقين أولاد العازة الشرفاء فيها ما شويه . أجيال إمتداد لأجيال .. من شموخ وكبرياء (أرضاً ظرف) لحدي بسالة (سعادتك أنا مخالف والرهيفة تنقد) .. وحترجع لحضن الوطن عاجلاً أو آجلاً .. قوات نظامية تحمي الأراضي وتأمن المواطن ما تهدده وتمد ليه صباع ..
وقع ليك .... .... هشام علي ( ود قلبا
|
|
|
|
|
|
|
|
|