♧ شُعَراءُ الفُصْحى بِأَدَواتِ زَمانِ الحَداثَةِ £

》《سبيط الكلام 》
يا ام احمد دقي المحلب*
💡نواصل بعد انقطاع في سلسلة سبيط الكلام والتى أحاول فيها ان افتح باباً للحوار والغوص في جميل المعاني وأنشر عبر الوسائط بعض الكلمات والقصائد الجميلة . واحرض أهل الفن والتخصص للكتابة عنها او حولها لننهل من معين معرفتهم وكما قلت من قبل انني مجرد قارئ وناقل أعبر عما أفهمه انا أو أشعر به ، وليس شرطاً ان يكون فهمي هذا هو مراد شاعر القصيدة او ما يدركه غيري من المطلعين عليها .. ..
تشعر أحياناً أن هنالك قصائد كتبت على لحن معين ونسق مسبق ..
قصيدة يا ام احمد دقي المحلب .. أشعر وكأنها كتبت لتسمع لا لتقرأ فلا يكتمل جمالها في نفسي إلا عندما اسمعها من مجيد .. ويصعب على شخص بعيد عن بيئة القصيدة أن يتفهمها من القراءة الأولى مالم يسمعها او يراجعها عدة مرات ..
في القصيدة اراجز قديمة ، وقصص من أساطير الأولين .. ( احمد غايب في الركايب) ( فاطمة السمحة ) ..
وفيها شوق وحنين للماضي ( في ذات يوم والنيل دا بيشهد ...) وفيها تصاوير فنية رائعة كعادة الشعراء هناك .. و كأن الرجل يعيش في مدينة فاضلة يأتيها رزق ربها من كل مكان ، ثم وكأن هناك طامة ما تلوح في الأفق او نزلت عليهم جائحة كسيل العرم .. او ربما لأنها ستفقد عزيز عليها .. ففي ابيات شعره رمزية حمالة أوجه لكل أن يفسرها على هواه .. وقمة الجمال و الروعة في تصوير حالة الحزن خاصة عندما يوصف حال النخلة في نص الدار -الضللت الحبان يوماتي بلعت ضلها رجفت كلها - .. ونرجع بلد العزة الخيلا تجقلب وفي الوجدان من قمنا واظن هذا مطلب الشاعر وشوقه للرجوع للبلد فهو يطلب من ام احمد ان تدق المحلب حتى يعود ابنها كما في اصل القصة ( ويبدو وكأن دق المحلب يصحبه نوع من الطقوس والنداءات تقام من أجل طلب عودة الغائب ) .. ونرجع الى نص القصيدة .. و شاعرها *محمد المهدي حامد* .. من مواليد قرية القرير شمال السودان وله عدد من القصائد والأغنيات وهو من الكوادر القديمة في مجال الاعلام اذ عمل باذاعة وتلفزيون امدرمان وعدد من الاقاليم وعمل بالمملكة العربية السعودية ..

يا أم أحمد
الشاعر . محمد المهدي حامد
يا أم أحمد دقي المحلب
دقي المحلب فوق توب أحمد
في ذات يـوم والنيل دا بيشهـد ..
.إنو بلدنا دي كانت عامري وكان الخير بى فوقا ممدد
حتى الغيم ما بخلف وعدو لما الشفــــــع ليهو يغـــــنوا"
يا ميطيرة صبي الليلة أحلبي سحابك في عـــينينا "كان في الحال بتشيل الغيمة
وتصبح ترعاً ماب تتحـدد
وكان الشفع يفرحو بيها ونفــــــرح بيهم
يا أم أحمـــــد
وحتى اللوبي الشم الزيفة إنشر وطال يتراقص فرهــد
رغم بساطة الحال تلقانا قليلنا يزيدنا سعـــادة ونسعـــد
أصلوا الهم ماحـام بى فوقنا
وما شفناهو وكان الأبعــــد
نصحـا على قنانة شاينـا نمشي القش عند العصـــــرية
ننـوم وحجـا حبوبـة معانـا يشــاركنـا الأحـلام يتـــــردد
فاطنة السمحـة عشقنـا جمالا
عشقنا بلدنـا وطيـرا الغرد
وكنا زهـور في جناين الشاطي
قريرنا هو مرتع خيرنا الأوحد
وكنـا كبـار في عيون حلتنـا
وكل شـوارع الحلة بتشـهد
وكنا حريـرة وكنـا ضريرة وكنـا عديلة وزفـة وسيـــرة
وكنـا بطان في ليل أعراسنـا
وكنـا فرح كل يـوم بتجـدديا
أم أحمد دقي المحلب دقي المحلب فوق توب أحمــــد
وفي ذات يوم والشفع نامـوا
جانا كلب سنونو صفـــــر حــــلب الناقـة وإتعشـــــابـا
داك اليـوم الشفع قامـوا مع الفجراوي ..
الطير ما غرد
النخلة الوارفـة في نص الدار
الضللت الحبـان يوماتي
وكانت مرتـع خيـر للشفــع
بلعت ضلها رجفت كلها جفلت من غيم ليلاً أســــــــود
وحتى نسيم الصبـح السـارى اليـوم داك مزهلل جارى ..‍‍‍‍‍‍ً‍‍‍‍‍‍‍!!
ومافى نفس غير حس الصنـة
وبـوخ الأنة وشوقاً جنّو
دمعة تسـرسـر فـوق الخــد ..!!
غيوم العبـرة إنداحت وشاحت
وسدت حلق الأفق الباكي
السارف دمعـو يشفق ... شفقو يوهدب قمــرو الجاكــي
ينـوح ... يشهق ... يتنكـد يومـاً لبس الضـو بالقلبـة وبـدا بالليـــــل
يومـاً صارع روحنـا وغلبـا وهـدّا الحيـل حيلنا
وحيلن ناس الحلى صغار وكبار
الشفع واليادوب في المهد
يا أم أحمـــــد مــــــن يوم داك وأب أحمــــــد غـــــايب
سادر فوق ديداب الراحو وأريت الغايب لو كان جايب دافـر والقدام مجهولة وكل أركان البـــــــال مشغولــــة
والأيام بتزح مشلولة تجرجر أذيال أمـــــلو الخايــــب
وكل أحلامو تموع تتـبدد
أتارى الغربـة رفيقة الكربة
شقيقة الآهـة الللــــوجــــدان دايمــــــاً شــــــواهــــة
تشكّع فوقو كلاب الحسرة يضيع وتضيع قبالو المسـرّة
تنّوخ فــوقــــو زوامـــــل الصــــايب وهمـاً سرمـــــد
زولاً فات الضل الوارف ولى أنفاس الحن كان كارف
ومن فيض الإحساس يوت غارف
مالك قولو مفارق ضلك؟؟
وبارى سراب الغربة وعارف ليلا بهيم و صباحا مرمّديا
أم أحمد دقى المحلب
ديل سنتين واب أحمـــد غايب
جاهو كلب سنونو صـــفر لملم باقي أفراحـــو مـــشابا
ونشف ريق السيل والغيمة ويبس كم ضرعات حلابـة
وضلمت الأيـــام ضليمة بلاد الغـــربة يباب وخــــرابة
أتارى بلدنا دى ضمة رحيمة
برغم الحزن الحارس بابا
ولو في ايدا فــــرد مليمة بتفــــرح بى ضيفانا وتسعـــد
بلداً نيلا براهو يطمن وصيدا إن جال في الــدارة يــجنن
وزولا أجواد ضكران ومصنن
وطلتو في الحوبات بترحمِن
لا بتخاذل عند الحارة
ولا بنضارى في يوم المشهـــــد
يا أم أحمد دقـــى المحــلب
لى كل غايب من أوطـــانو
لى كل شاعر عاشق زيّن صدر أبياتو بحب ســــودانو
لى كل زارع بوّق أرضو وقرّن في الكروات حيضانو
وللسادّات الفَرَقَة معاكِ قـــدر ما عـــــانِنْ هُنْ بْيعانــوا
ساندات ضهر الحال إن ميّل
شــان حِبانِنْ ياما كانـــوا
دقى المحلب
للغايبين يمكن ذات يوم الخــطى تتســـدد
ونرجع بلد العزة الخيلا تجَقْلِبْ في الوجدان
من قُمنا
وما فارقنا في لحظة صهيلا
وزى ماطيرا بيصدح يومى يرقص بالتغريد في نخيـــلا
نغنى ليها نقول يا يومى نضمـها
في الأعمــاق ونشيــلا
تزغرد (نورا) تضم (حميدا)
ويشرح صدر (العازة) (خليلا)
وتفرح أمدرمان
وتبشر وتسرج
ليل الطابية وخيلا
للعايدين الغابو وجابوا جابوا ضراعن بس لى نيلا
تَشَويمْ بيهو
وتلقا شليل
ا ويرجــع للقمـــرية هــديلا
ويبقى العود يا أم أحمد أحمد
ويبقى العود يا أم أحمد
خالدبرس💡