دكتور الثورة القوي

Quote: كتب د. محمود ميسرة السراج ( الصيدلي والممثل والفنان ) : الحكاية دي ترددت في أن اقصها عليكم لكن غلبني.. قبل 9 ايام لقيت رسالة من دكتور أكرم على التوم "وزير الصحة" بستفسر عن دواء.. وعشان يحمسني في البحث عنه قال لي يا محمود الزول البستعمل الدوا ده آخر حبة بلعها قبل عشرة يوم ومتألم شديد..سألت عن الدوا وعرفت مكانه لكن قبل أن أكتب لاكرم اسم الصيدلية الفيها الدوا تلفوني اتسرق..وفقدت بالتالي كل أرقام التليفونات ومن ضمنها تلفون أكرم ونسيت الموضوع.. الليلة بتابع في الاخبار عرفت انو امبارح كان هناك اجتماع مهم غاب عنه وزير الصحة نسبة لاشتداد آلام الغضروف عليه.. فجأة انتبهت انو الحبوب الكان بسأل عنها أكرم وما لاقيها هي حبوب للغضروف وانو الزول الكان بقول انو متألم شديد ده هو شخصيا.. شئ غريب.. أكرم ده يوميا على اتصال مباشر مع منظمة الصحة العالمية ومع مراكز أبحاث ومستشفيات كتيرة جدا على مستوى العالم.. معقول ما يقول لواحد من الناس ديل يرسل ليهو الحبوب دي؟.. ياخ أضعف الإيمان عنده زوجته في القاهرة يتصل عليها ترسل ليهو الدوا في الطيارة المصرية الجهات قبل كم يوم شايلة أدوية ومعدات طبية خاصة بالكورونا.. لكن أكرم البعرفو انا ما بعمل كده.. أكرم ود حاجة كاشف داير يكون واحد من الناس.. من ملايين السودانيين العايشين في البلد دي ومرات كتيرة الدوا البستعملوهو بقطع ويضطروا يفتشوا عنو ويسالوا أصحابهم يفتشوا معاهم زي ما عمل أكرم معاي.. يا أكرم يا حبيبي..الف الف سلامة.. الحبوب البتفتش عنها موجودة في المستشفى الدولي في بحري.. وانا والله العظيم لو عندي تصريح كنت مشيت اتناولت ليك الحبوب وجبتها ليك لكن انا في ام درمان وبينا وبين بحري كبري والكبري عايز تصريح.. بس ما مشكلة خلي اي واحد من الشباب الشغالين معاكم في الوزارة وساكنين بحري يتناول ليك الدوا ده.. غايتو محبة البلد دي يوم بتقتل ليها زول...