♧ جنونُ العَظَمَةِ تاجٌ فَوْقَ رؤوسِنا..لا يَراه عاقِلٌ£

{مواهيم الجميلة و مستحيلة}

● بس على طاري حكاية مجانين ليلى العامرية خلونا نعمل بيها استراحة
لزوم ترطيب للجو قبالنخش في الغريق نحسباً لسخونة الهواء، لي قدام .

● يعني زي ما قالو مواهيم ليلى كتار لاكين ترا شقي الحال هو البيقع في القيد.
طبعاً يا جماعة الخير سامعين بمكيدة ليلي العامرية الكان دبرتها لتكشف معادن
نوايا قيسها الحقيقي، و تصقل معدن حبه الحقيقي على نارٍ خضراءَ هادئةٍ.

● فقالو أدت ليك خادمتها صحن طلس و سكين سنينة تحلق الشنب و قالت
ليها تمشي تقيفي فوق خشم الدرب الداخل الحلة بي ورا ؛ و كلما يجيك راجل
تظهر عليه بوادر الإندراوة و جنون العظمة اللما بتاوى .. و يمكن يكون مشروع
لمجنون ليلى ، تقومي طوالي تسأليه السؤال دا :اسمع اللخو أنت دحين ماك قيس بن
الملوح و لا يخلق من الشبه أربعين!؟ فلو قام يتشالق وجاوبك بأنو: ياني فعلاً أنا زاتي. تقومي تقولي ليه: سمح يلا عاين جاي و اسمعني كويس ، أنا ستي ليلى مرسلاني ليك عشان أتلقاك و بقريك منها السلام ، و كمان هي بتطلب منك بالمرة طلب صغنبوطي كدا، إنك تقطع لي أنفك بالسكين دي تجدعا لينا في القدح دا عشان أوديها ليها ، يعني زي ما تقول نكتفظ لؤك بيها عربون أول غرام و أجمل هديةوكدا ! أهاااه شن قولك.

● فأول واحد جا ماشي عليها كان أشعث أغبر و لابس ليك مرقع و حالتو بالبلا..
قامت الخدامة نادتو ليك و نقلت ليه نفس الرسالة. فزولك بس مما شم رائحة بارود المؤامرة تفوح من بين شفتيها و لقي الحكاية فيها كطع مناخير و وجدع أرنبة أنوف و سيلان دماء قام يتنحنح وقعد يتلفت جاي جاي فقال لنفسه الأمارة بالسوء : لا، ما بدهاش بقى و يا روح ما بعدك روح.. و قال للخادمة: اسمعي يا اللخت هوي و الله أنا ياني مجنون ليلى و أي حاجة و جاهزين لأي حاجة و حب ستي ليلى على العين و الراس ما قلنا حاجة؛ علا بس أم كطيع النخرين دي براها ما فينا و لا بتعضي معانا..فغايتو سلمي على ستي ليلى و قولي ليها.. خلاس الفيك انعرفت .. فممكن تخلينا خوة في الله ساي و اعتبرني زول جابني الدرب ضهبان! و يلا مسك دربو عديييل شتت و اتلحس!!