من هو المريض السوداني رقم 6

Quote: بكل بساطة احنا بنعاني كشعب وكادر وانا مقتنع اصلا بفكرة انه المشكله ما كيزان المشكلة احنا مستشفى فضيل قريبة ممكن تمشو تسألو القال للدكتورة انه المريض دا جا من السفر منو واعملي حسابك منو لانه بكل بساطة الصورة ct chest بتاعت رويال الأنا استلمتها طلعت بتاعت زول تاني والصورة موجودة معاي وبناءا عليها they didn't suspect في مستشفى فضيل وبالعكس افتكر انه النايب دا زول ما فيهو ولا كلمه وبالعكس عامل كل الحاجات البتخليه في safe side يدل على مدى جديته في التعامل مع المرضى وهو الآن في الحجر عشان يحافظ على ناس كتار وما عمل حاجة غلط بالنسبه للناس البتكتب انه مقصرين.. لأنه بكل بساطة الصورة كانت normal والكلام البتقال انه شخصت في رويال دا كلام كاذب لانه اتمنى من الدكتورة بتاعت الccu الاتصلت على وقالت لي انه في غلط في الصور شكلها استبدلت وانه الصورة ظاهر فيهاopacities قلت ليها بعد شنو this patient يا دكتورةintubated... انا ما بفصل تاني اكتر لانه القلته دا واحد من مليون حاجة حصلت من اليوم الأنا خالطت هذا المريض الي اليوم لو قلتها بتزعل ناس كتار وبرضو ما مفروض احنا كاطباء ننهز في بعض كدا وما بقول برضو لانه الحقايق الأنا عشتها في فترة مخالطة هذا المريض( اللي هو كان اب بالنسبة لي ما نسيب) بتزعل الشعب السوداني كله.... وللناس البتسىء للطبيب السوداني والله من أحسن الأطباء في الدنيا بي عفانتنا وكعوبيتنا برضو بنتفق لمن البلد تحتاج وكويس انه في بعض ما للمريض حاجة اخيرة موضوع سفره لليصدق او ما يصدق هذا الرجل سفره كتير بحكم شغله ممكن يسافر ويرجع في خلال يوم او يومين وكتير بتحصل ولا انا ولا بنته اللي هي زوجتي بتكون عارفه بحكم طبيعه الشغل.. وعم ربيع دا بكل بساطة كان رجل ما بحب المستشفيات زي ناس كتار وبخاف من حاجة اسمها دكتور... أعراضه كانت atypical ودا للأطباء عشان تعملو حسابكم no cough, no sore throat, no headach كانت fever and burning micturation اختفت اليوم الرابع تماما.. لحد اليوم السابع اللي كان كل العرض العنده high random 400 up 600 And last day he developed dysnea on exertion that why the Dr in Royal requested echo coz he had strong family hx of cardiac problem في آخر ذلك اليوم نفسه اتضايق شديد وقبل ما امشي فضيل اتصلت عل دكتور في رويال قال لي احتمال acidotic لكن هم مقفلين للتعقيم لانه في suspected case وجريت بيه فضيل وفي الtriageكانت Normal temp but low o2 sat ولي ناس فضيل الزول دا كان لابس الN95الاصليه ما عشان انا عامل شاطر لكن من خوفي عليه انه ياخد حاجة من زول في المستشفى ولو ركزتو اغلب الحاجات كنت بعملها من نزلته من العربيه إلى العنبر فوق....السيناريو ما ماشي typical لكن لازم نتوقع اي شي بعدين يا دكتور زول بخاف و saturation بتاعه 50 تفتكر حيقول جيت من السفر (غلط ما في كلام لكن حتى لو كان اقرب الاقربين دا حال كل السودان) عشان كدا كل يوم نخاف اكتر وبننبح قولو الحقيقه.... في ناس كتار بتقول من الصباح في كلام في إساءة كتيرة.... وناس بعرفوني كتار في القروب دا ممكن اشتغل وما اشتغل معاي زول واضح وبالعكس ما بلف ولا بدور ودا المعروف...انا من خالط الحالة رقم ٦ من وإلى.... حيثيات كتيرة مدسوسة ودا ما مكانها ولكن اخيرا عرفت قدر شنو احنا شعب غبي وبليد وبس بتتابع الوسائط ونتكلم..... السبب الما بخليني اتكلم هنا انه دا ما مكانه وبالمناسبة للناس البتعرف زوجتي.... زوجتي لم تختلط بابيها واليوم الاختلطت بيه ناس المستشفى informed just not risk them عشان الناس ما تعافر ساي للسودان وما لي زول كل حاجات الزول دا كنت بعملها ليهو براي في البيت وما خالط اي زول ولا ناس البيت لانه لمن حسيت انه الحمى عاليه اخدت احتياط وحجرتهم من اول تحسبا بدون معرفه سفره... و الوزاره ما أعلنت ليكم ولكن tracing كان كله صحيح والحمد لله الظروف خدمت انه ما يختلط بي زول حاجات المعمل أثناء فحصي ليه بشيل samples من البيت وبرسله المستشفى لانه بس كان ما بحب المستشفى ما كنت ناوي اكتب الكلام دا عشان جد جد السودان كله يخاف وما يطلع ومبسوط انه الحالة رقم ٦ دخلت خوفه حتى للمسؤولين وزادو الحجر ودا المفروض احنا بلد تعبان ما عندنا إمكانيات والناس ما عارفه وبالعكس ممكن كان بسبب الخوف ده الناس تقعد ولكن اضطررت ان اكتب حتى لو الناس تتطمن عشان الزول البتنبز من الصباح وله كل المغفرة والرحمة كان خير اب لي وكان لي سندا.... ولكل من تضرر من أطباء مستشفى فضيل عذرا لما حصل ولكن دي الحقيقه في النهايه الزول ما برضى حاجه لي ناس بعرفهم وفيهم ناس اخوان بالنسبه لي لكن دا جزء من حاجات كتيرة حصلت بس والله ما بقدر اقول...وبشاهدة ناس كتير....المهنة دي صعبه وبتعرضنا لي مخاطر كتير لكن لو دا التفكير فعلينا السلام اخيرا لي زوجتي وفي ناس كتار بتعرفها متأسف للحصل لي ابوك وابوي ما بيدك وأمر الله لا بد أن يتم ومتاسف انه في ناس كتار قذفوك في شرفك باعنف الألفاظ وما قادر اخد ليك حقك ولكن الله في ومعليش ما قدرت اكون معاك في يوم زي دا والله الحجر بقى لي ضيق ...احتمال اكون مصاب بالفايروس واحتمال لا ابقى عشرة على الأولاد.. وللزول الما عارفه منو الكتب اول كلام ما عافي ليك لا دنيا لا آخرة لانه دا كلام اساء لي عرضي ولو كنت زول كنت بتعرف تصلني... انا ما عارفك ولا اتشرف انه اكون بعرفك في يوم من الايام..... في النهاية للناس الدايرة المحكمة يا ريت لو مشيت لو الله مد في العمر اتحداك عشان السودان كله يعرف د. محمد ابشر العفو والعافية

Quote: الاعلامية ام وضاح ( زوجة صلاح دهب ) في قناة النيل الازرق قبل قليل نكرت تماما انه مشي المدرسة ..وبفم مليان قالت الاسرة حتقاضي الناس النشرت الكلام ده وبتلوم الوزارة عن عدم اكتشافها للمرض وطبعا برأت بنته وولده من قصة التستر دي ...

Quote: بدأت المشكلة مع المتوفي رقم ١ المرحوم فيصل حين سيس الأمر

Quote: المصيبة صاحب مدرسة وجاء المدرسة وخالط الناس كلهم وكان وقت امتحانات وتسليم نتائج

Quote: حسب ما ذكر انو المرحوم عاد من دبي يوم 13 مارس (يوم جمعه) والمدارس اغلقت ابوبها يوم 14 مارس ..فالروايه المتداوله دي غير صحيحه

Quote: علّقت في غير مكان عن ملاواتنا لوزارة لصحة دي في اي قرار تاخده او تصريح تصرحه من اول يوم! تخيّلي لو نفس الملاواة دا تمّت في الصين!

Quote: اسع يا جعفر حبس البيت ده ما حار ،

Quote: اقفلوا المطار لا داخل ولا طالع الخ الخ الخ بعد شوية يطلع واحد من الصين يعمل لايف نحن ونحن وما قادرين نقعد عايزين نرجع الخ الخ طوالي السوشيال ميديا تشتغل ، لييه ما تفتحو المطار ديل مش سودانيين ، مفروض تاجروا ليهم طيارة الدول كلها اجلت رعاياها .. وودوهم الامارات عزلوهم هناك لمن جو رفضو تماما يتعزلوا وقالوا نحن جايين من عزل ، ويعني؟

Quote: المريض رقم 7 هل هناك معلومات عنه ؟ رقم 6 اهون اجنبي أتي من الإمارات

Quote: أهوال المريض رقم (٦) انه رجل في السادس من العمر، له ابناء يعملون في الحقل الطبي، سافر للامارات بغرض الزيارة لبعض أفراد أسرته المقيمين هناك ثم عاد للسودان في منتصف شهر مارس الحالي ، شعر باعراض الكورونا وهو في الإمارات وعندما تيقن أولاده من الأعراض المبدئية قاموا بتسفيره للسودان، وقد مارست أسرته ضغوطات على إدارة المطار فخرج على كرسي ذو عجلات من دون أن يخضع للحجر الصحي. حاول ابناؤه معالجة الوضع الصحي في المنزل ولكن حالته ساءت بالفعل بحكم انه يعاني من بعض الأمراض المزمنة التي جعلت عملية الشفاء التلقائي أمرا مستحيلا، فقاموا بوجه السرعة باسعافه ونقله للمستشفى لانه كان في حاجة ل ventilator ،وبالفعل وصل المستشفى ومارست أسرته الترغيب والترهيب في وجه الأطباء مما جعلهم يعطونه الاولوية القصوى وتقديم حالته على بقية المرضى وانكرت الأسرة تماماً قدومه من خارج السودان الأمر الذي جعل فريق الاسعاف لا يحتاط بصورة كافية، لكن الفريق الطبي انتبه لمسالة إصابته بمرض الكورونا بسبب ارتفاع الحمى وتم فحصه للتأكد من ذلك وجاءت النتيجة إيجابية فوقع الخبر كالصاعقة على روؤس الكادر الطبي الذي تم تضليله ، ومباشرة تم عزل اكثر من ٢٠ شخص من أعضاء الكادر الطبي وعدد كبير من بقية المرضى والزوار والذين تزامن وجودهم في العنبر في وقت وصول هذه الحالة.. وهذا المريض يحظي الان برعاية طبية فائقة ولو كان في إيطاليا او أسبانيا في هذه الأيام لطبقوا فيه قانون The doctor can priotrize who live or die based on the critical conditions and age هذه الازمة كشفت معدن الناس في المحنة ، وكيف يمكن لبعض الناس أن يقبل بالعيش على حساب حياة الآخرين. اطلب من سلطات مطار الخرطوم بأن تعمم نشرة بأسماء كل الذين وصلوا من الخارج عن طريق المنافذ البرية والجوية سودانيين او اجانب او حتى مسؤولين ووزراء في الدولة، هذه النشرة يجب أن تصل لوزارة الصحة واستقبال الحالات يجب أن يكون بالرقم الوطني وافادة موثقة من مرافقي او أسرة المريض... فإذا نقلنا العدوى للكادر الطبي فمن الذي ينقذنا عندما نصاب بهذا الوباء؟؟