البرد نخرة كلب والغبار مالي الحِتة والشمس لسة ماشرقت كويس وأنا راكب البص السفري في المحطة وأسمع ليك في الشباك كك كك ورفعت الستارة لقيت ليك عمك كبير واقف في الكارو عشان يصل الشباك ويدق في القزاز دقة خفيفة بعكاز وفتحت الشباك وعاينت لي عمك ملفلف بي شال وأغباااااش ونخرينو سايلات من البرد وأشر على الزول القاعد جمبي وكان ود شاب قيافة ومهندم وكان ياداب قعد في المقعد الجمبي ولابس سويتر أنيق المهم الولد إتلفت شاف عمك وطوالي قام حيلو ومدّة ليهو يدو وعمك شوف عيني ناولو صندوق بسكويت بركة ومعاها عشرين جنيه ووصاهو يغطي راسو من البرد .. ياسبحان الله عمك سايق كارو وواقف في عز البرد ويوصي شاب مانع راكب بص سفري إنو يغطي راسو من البرد لما البص إتحرك سألت الود الشاب عن الوالد وضحك قال لي دا أخوي الكبير وشغال مزارع لكنو حنين كدة من ماقمنا وهسة عرفني مسافر وماشربت الشاي أصر يلحقني بالبسكويت وكمان عشرين جنيه مصاريف جيب ... أنا زول رائد في البوليس لكن أخوي دا مابشوف الكلام الفارغ دا وماعندو كبير إلا الجبل .. تشيل بسكويت يعني تشيل بسكويت .. كان مرتبي مليار جنيه لازم يديني حاجة من جيبو نظام مصاريف ــــــــــــــــــــــ قضيت الرحلة كلها أفكر في الأخو الكبير والمعجزات الصغيرة البيصِر ينجزة لي أخوهو الصغير
03-25-2020, 11:00 AM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 48851
طول ما اقرا الكلام دا كنت اتوقع من وقت لآخر الولد الشاب ينزل و يسلم على اخوه و يركب معاه.. او يديه مقعده و هو يحق له بالكارو. الناس تشكر فى الاخ الكبير و لكن و لا كلمة عن عقوق الاخ الصغير و كبريائه و هو شب عن الطوق و صار ضابط شرطة.. قيم معكوسة لكن تقول شنو.
03-26-2020, 01:52 PM
Mohd Ibrahim
Mohd Ibrahim
تاريخ التسجيل: 01-19-2004
مجموع المشاركات: 2234
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة